အာဏာသိမ်းပြီးမှ စစ်တပ်နဲ့ပေါင်းပြီး စီးပွားရေး ပိုကောင်းလာသူ ခရိုနီ ကိုကိုလတ်
စစ်အာဏာသိမ်းပြီးနောက် ပြည်သူတွေ ဒုက္ခပင်လယ်ဝေနေချိန်မှာ၊ စစ်တပ်နဲ့ ပေါင်းစားပြီး စီးပွားရေး ပိုကောင်းလာသူတွေ ရှိပါတယ်။
အဲဒီထဲက ထင်ရှားသူတစ်ဦးကတော့ ခရိုနီ ကိုကိုလတ်ပဲ ဖြစ်ပါတယ်။
ကိုကိုလတ်ဟာ K K Business Group၊ Gulf Group လို့လည်း သိကြတဲ့ ကုမ္ပဏီအုပ်စုကြီးကို ဦးဆောင်နေသူဖြစ်ပြီး၊ ရွှေအိုလတ်လို့လည်း လူသိများပါတယ်။
ဒီကုမ္ပဏီအုပ်စုကို ၂၀၀၄ ခုနှစ်၊ စစ်အစိုးရဟောင်းလက်ထက်က စတင်တည်ထောင်ခဲ့တာဖြစ်ပြီး၊ အခု ကုမ္ပဏီ ၁၅ ခုထက် မနည်းပါဝင်ပါတယ်။
၂၀၂၁ စစ်အာဏာသိမ်းပြီးနောက်ပိုင်းမှာ K K Myanmar ကုမ္ပဏီဟာ စစ်တပ်ပိုင် မြန်မာ့သစ်လုပ်ငန်း MTE ရဲ့ သစ်လေလံပွဲတွေမှာ သစ်တန်ချိန်များစွာ ရရှိခဲ့ပါတယ်။
Justice For Myanmar ရဲ့ စုံစမ်းဖော်ထုတ်ချက်အရ ၂၀၂၂ နဲ့ ၂၀၂၃ ခုနှစ်တွေမှာ ကုမ္ပဏီ ၄၀ ကျော်ထဲက သစ်အများဆုံး ဝယ်ယူခဲ့သူဟာ K K Myanmar ပဲ ဖြစ်ပါတယ်။
၂၀၂၃ ခုနှစ်မှာတော့ ကိုကိုလတ်ဟာ K K Aviation Support Services ဆိုတဲ့ ကုမ္ပဏီကို တည်ထောင်ခဲ့ပြီး၊ စစ်တပ်ရဲ့ လေကြောင်းဆိုင်ရာ လိုအပ်ချက်တွေကို ဖြည့်ဆည်းပေးနေပါတယ်။
အရပ်ဘက် လေကြောင်းလုပ်ငန်းနဲ့ စစ်တပ်လေတပ်တို့ကြား နယ်နိမိတ်မရှိသလောက်ဖြစ်နေတဲ့ ဒီကဏ္ဍဟာ အန္တရာယ်များတဲ့ လုပ်ငန်းစုတစ်ခုအဖြစ် သတိပေးခံနေရပါတယ်။
ဒါ့အပြင် ရန်ကုန်မြို့လယ်က Central Hotel ဟာလည်း ကိုကိုလတ်ရဲ့ လုပ်ငန်းတွေထဲက တစ်ခုဖြစ်ပါတယ်။
စစ်တပ်ပိုင် မြန်မာ့စီးပွားရေး ဦးပိုင်လီမိတက် MEHL ရဲ့ လက်အောက်ခံကုမ္ပဏီက တည်ဆောက်ခဲ့တဲ့ ဒီဟိုတယ်ကို K K Business Group က ၁၅ နှစ် လုပ်ပိုင်ခွင့်နဲ့ ငှားရမ်းလုပ်ကိုင်နေတာပါ။
ကိုကိုလတ်ဟာ ၂၀၂၆ ခုနှစ် ဖေဖော်ဝါရီလမှာ အိုက်စလန်နိုင်ငံရဲ့ မြန်မာဆိုင်ရာ ဂုဏ်ထူးဆောင် ကောင်စစ်ဝန်အဖြစ် ခန့်အပ်ခံခဲ့ရပေမယ့်၊ Justice For Myanmar ရဲ့ ဖော်ထုတ်မှုတွေကြောင့် မေလမှာ ရာထူးက နုတ်ထွက်ခဲ့ရပါတယ်။
အခုဆိုရင် JFM အပါအဝင် အဖွဲ့အစည်းတွေက အမေရိကန်၊ ဗြိတိန်၊ EU၊ ကနေဒါနဲ့ သြစတြေးလျတို့ကို K K Business Group နဲ့ ကိုကိုလတ်အပေါ် ပစ်မှတ်ထား အရေးယူပိတ်ဆို့ဖို့ တောင်းဆိုနေကြပါပြီ။
ပြောရရင် ကိုကိုလတ်ဟာ အာဏာသိမ်းပြီးနောက် စစ်တပ်နဲ့ပေါင်းပြီး စီးပွားရေး ပိုကောင်းလာသူ ခရိုနီတစ်ဦးဖြစ်ပြီး၊ သူ့လုပ်ငန်းတွေဟာ စစ်တပ်ကို ဘဏ္ဍာရေးအရ ထောက်ပံ့နေတာပါ။
ဒါ့ကြောင့် သူဟာလည်း မမေ့သင့်တဲ့သူတွေထဲက တစ်ဦးပဲ ဖြစ်ပါတယ်။
ဒီဆောင်းပါးရဲ့ အချက်အလက်တွေကို မမေ့နဲ့ - Don't Forget page နဲ့ Justice For Myanmar တို့ရဲ့ ဖော်ထုတ်ချက်တွေကနေ ရယူထားပါတယ်။
မှတ်ချက်များ
Post a Comment