ကမ္ဘာ က သဘောပေါက်ရမည့် အချက်

ကမ္ဘာ က သဘောပေါက်ရမည့် အချက်

📅 💬 မှတ်ချက်

By- လှစိုးဝေ
၂၀၂၂ ခုနှစ် အောက်တိုဘာလ တွင် ထုတ်ပြန်သော ကမ္ဘာစီးပွားရေး စစ်တမ်း တွင် GDP per Capita ဟု ခေါ်သည့် နိုင်ငံသား တဦးချင်းစီ ၏ ကုန်ထုတ်လုပ်နိုင်မှု ပမာဏ တွင် မြန်မာသည် ဒေါ်လာ ၁,၁၇၀ ဖြင့် အရှေ့တောင်အာရှ ဆယ်တစ်နိုင်ငံ စာရင်းတွင် အနိမ့်ဆုံး သို့ ရောက်ရှိနေပြီ ဖြစ်သည်။ ဆယ်တစ်နိုင်ငံ ဆိုသည်မှာ ၂၀၀၂ ခုနှစ်မှ အချူပ်အခြာ အာဏာပိုင် နိုင်ငံ ဘဝသို့ တင်းပြည့်ကျပ်ပြေ့ ရောက်လာခဲ့သည့် အရှေ့ တီမော ကို ထည့်သွင်းထား၍ ဖြစ်သည်။ (ပုံတွင် နိုင်ငံ အလိုက် စာရင်း ကို ဖေါ်ပြထားသည်)
ယခုအခါ ၎င်းတို့ ခေတ် နောက်ထပ် တိုးတက်မှုကြီး တရပ်အဖြစ် ရန်ကုန်မြို့ အနှံ့တွင် ခေတ်အဆက်ဆက် တခါမျှ မမြင်ခဲ့ဖူးသော လမ်းဘေးအိပ်၊ လမ်းဘေးစား Homeless လူတန်းစားပင် ပေါ်ထွန်းလာခဲ့ပြီ ဖြစ်သည်။
ကုမ္ပဏီ အကြီးအကဲ တဦးပင် ထိုသို့ နှစ်နှစ်ဆက်တိုက် ဘာတခုမျှ ဖြစ်မလာပဲ အရှုံးပေါ်နေမည် ဆိုက ရှယ်ယာ အစုရှင်များက ၎င်းအား ဖယ်ရှားရန် ဆူပူ တောင်းဆို ကြမည်မှာ ဓမ္မတာ ပင် ဖြစ်သည်။ သို့သော် မြန်မာပြည်ရှိ စစ်ဗိုလ်ချုပ်များကတော့ ၎င်းတို့ အနေအစား ချောင်လာကောင်းရဲ့ ဟူသော စိတ်ဖြင့် တိုင်းပြည်ကို မင်းအောင်လှိုင် လုပ်ချင်ရာ လုပ်ဟု ထိုးအပ်နေကြသည်။
မင်းအောင်လှိုင်သည် ယခုလို နည်းပညာ များ တဟုန်ထိုး တိုးတက်နေပြီး ကမ္ဘာကြီးသည် ရွာကြီးတရွာလို ပို၍ စုဝေးလာနေချိန်တွင် မြန်မာပြည်သည် မည်သို့သော အနေအထား ဖြင့် ရပ်တည်သွားမည် ဆိုသည်နှင့် ပတ်သက်ပြီး အတွေးအခေါ် အကြံညဏ် လုံးဝ ကုန်ခန်းနေသူ ဖြစ်သည်။ သူ့တွင် ရှိသည့် တခုတည်းသော စိတ်ကူးက တိုင်းပြည်ကို ငြိမ်ဝပ်မိပြားအောင် လုပ်မည်၊ ပြီးလျှင် ရွေးကောက်ပွဲကို ဟန်ပြ လုပ်ကာ ကမ္ဘာကြီးအား ၎င်းတို့ကို ပြည်သူက ရွေးချယ် တင်မြှောက်ထားသည့် တရားဝင် အစိုးရ ဖြစ်လေဟန် ဆောင်မည်။
သို့ဆိုက မျက်နှာပင် မမြင်ချင်လောက် အောင် မုန်းတီးနေသည့် မြန်မာ ပြည်သူများ နှင့် မည်သို့ ဆက်၍ စခန်းသွားကြမည်နည်း၊ ဖမ်းလိုက် သတ်လိုက် နှင့် သံသရာလည် နေမည်သာ ဖြစ်သည်။ ကုလသမဂ္ဂ မှ စ၍ မည်သူကမျှ လည်း အသိအမှတ်ပြုကြလိမ့်မည် မဟုတ်။
အာဏာသိမ်းပြီးတိုင်း ဆူပူကြလျှင် ခဏပါဟု အလွယ်တွေးခဲ့ကြသည်၊ သို့သော် မြန်မာပြည်သူများက ယခင်ကလို စိတ်ပျက် လက်မှိုင်ချပြီး ၎င်းတို့၏ အုပ်ချုပ်ခံ အဖြစ် ဆက်နေသွားကြဖို့ စိတ်မကူးတော့၊ မိမိတို့၏ တိုးတက်ရာ တိုးတက်ကြောင်း ဘာတခုမျှ မယ်မယ်ရရ လုပ်ကိုင် ပေးလိုစိတ် မရှိ၊ နီးစပ်ရာ ဝေစားမျှစား နှင့် တိုင်းပြည်ကို နှစ်ပေါင်း ၆၀ နီးပါး အနိုင်ကျင့် အုပ်ချုပ်လာခဲ့မှု ကို လုံးဝ လက်မခံတော့ပဲ လက်နက်ကိုင် တွန်းလှန် လာကြပြီ ဖြစ်သည်။ ထိုအရေးကား သိကြားမင်း  ဆင်းတာလျှင်တောင် မည်သို့မျှ အဆုံးသတ်သွားဖို့ ရာ မရှိ။
တိုင်းပြည်သည်သာ ရှေ့လျောက် လုံးခြာလိုက်ပြီး တိုင်းတပါး၏ အစောင့်ရှောက်ခံ ဘဝ နှင့် အချုပ်အခြာ အာဏာ ဆုံးရှုံးရပေတော့မည်၊ လက်ရှိ ယူကရိန်း အား ကျုးကျော်မှု တွင်ပင် ဆရာသခင် ရုရှား အကြိုက်လိုက်၍ ကြားနေယုံမျှ မဟုတ်တော့ပဲ ထောက်ခံပေးခဲ့ကြသည် မဟုတ်ပါလော၊ ဤသည်ကပင် လွတ်လပ်၍ တက်ကြွသော နိုင်ငံခြားရေး မူဝါဒ စတင် စတေးပေးလိုက်ရခြင်းပင် ဖြစ်သည်။
ထိုအနေအထားမျိုး နှင့် ရှေ့လျှောက် မည်သို့ စခန်းသွားကြပေဦးမည်နည်း၊ တပ်ထဲရှိ သေဆိုသေ ရှင်ဆိုရှင် expendable စတေးပစ်နိုင်ရန် အသုံးတော်ခံနေကြရရှာသော စစ်ဗိုလ် မိုက်ရူးရဲများကတော့ PDF များကို ချေမှုန်းနိုင်လျှင့် ပြဿနာ ပြေလည် ပြီ ဟု လူမိုက် တွေး တွေးနေကြဆဲပင် ဖြစ်သည်။
၎င်းတို့ ရင်ဆိုင်နေရသည့် ပြဿနာသည် ထိုထက်မက ကြီးမားလွန်းနေသည်ကို မင်းအောင်လှိုင်က အစ ရိပ်စားမိနိုင်စွမ်း မရှိသော်လည်း အိမ်နီးချင်း နိုင်ငံများကတော့ ရင်လေးနေပြီ ဖြစ်သည်၊ ထို့အတွက် အင်ဒိုနီရှား သမ္မတ ဂျိုကိုဝီ မှ ၎င်း၏ ဗိုလ်ချုပ်ကြီးဟောင်း တဦးကို စေလွှတ်၍ အရပ်သား အုပ်ချုပ်မှု လက်အောက်သို့ တိုင်းပြည် အာဏာ ကို ပြန်လွှဲပေးရန် နားချ တော့မည် ဖြစ်သည်။
ဤသည်ကပင် ဂျိုကိုဝီ က အစ အာဆီယံ နိုင်ငံများ အကြီးအကျယ် လွဲချော်နေမှုပင် ဖြစ်သည်။ အာဏာကို မင်းအောင်လှိုင်က အရပ်သား အစိုးရထံ ပြန်လွှဲပေးပြီး စစ်တန်းလျှား ပြန်သွားယုံနှင့် ပြေလည် သွားမည်လော၊ ပါးစပ်ထဲ အက်ဆစ်လောင်းထည့်ကာ ညှင်းပမ်း နှိပ်စက်၊ သတ်ဖြတ်ခံကြရမည့် အရေးကို မြင်၍ ရန်သူကို နောက်ကြောတွင် ထားကာ မည်သူက စွန့်စားရဲပေမည်နည်း။ တိုင်းရင်းသား လူနည်းစုများ ကကော ၎င်းတို့နှင့် ငြိမ်းချမ်းရေး သဘောတူညီချက် လက်မှတ် ရေးထိုးကြမည်လော။
တိုင်းပြည်ကို မည်သူ အုပ်ချုပ်ရမည်ကို ၎င်းတို့သာ ဆုံးဖြတ်ပိုင်ခွင့် ရှိနေသည်ဟု ဦးနှောက်ထဲ ရိုက်သွင်းခံထားရသူများက နောက် သုံးလေးနှစ် ကြာလျှင်ကော ထိုသို့အာဏာ ထပ်မသိမ်းပါဟု မည်သူ အာမခံ နိုင်မည်နည်း။ ထိုသို့ ထပ်မဖြစ်စေရဟု မယုံကြည်နိုင်သရွေ့ မည်သို့သော ဖြေရှင်းမှုမျိုးကို ရွာ များ မီးရှို့ခံထားရသော၊ မိမိတို့သားသမီးများ ဆုံးရှုံးခဲ့ကြရသော မြန်မာ ပြည်သူများက မည်သို့မျှ လက်ခံကြမည်မဟုတ်။
မြန်မာ အရေးကား ထိုသို့ ပြီးလွယ် စီးလွယ် လုပ်၍ မရ၊ တာဝန်ခံမှု တာဝန်ယူမှု မရှိပဲ မည်သို့မျှ ပြေလည်ရာ ပြေလည်ကြောင်း မဖြစ်နိုင်။
ယခုအခါ ၎င်းတို့ဖက်မှ အမြဲလို လိုက်ပြောနေသည့် ဂျပန် ၏ အထူး သံတမန် ဟု ဆိုသူ ယိုဟီ ဆာဆာကာဝါ က အမျိုးသား ပြန်လည် ရင်ကြားစေ့ရေး အတွက် အာဆီယံ မှ စစ်အာဏာသိမ်း အဖွဲ့ နှင့် ဆွေးနွေးမှ ဖြစ်မည်ဟု ဆိုလာပြန်သည်။ မြန်မာပြည်သူများက ရင်ကြားစေ့ရေး ကို လုံးဝ လက်မခံတော့၊ ၎င်းတို့အားလည်း အာဏာကိုင်စွဲ အုပ်ချုပ်ပိုင်ခွင့် လုံးဝ မရှိစေမည့် အဆုံးသတ် တိုက်ပွဲ ဆင်နွှဲသွားဖို့ အခိုင်အမာ သန္နိဋ္ဌာန် ချထားပြီး ဖြစ်သည်ကို ကမ္ဘာက လက်ခံ မှသာ ပြသနာ၏ အဖြေကို ရှာနိုင်မည် ဖြစ်သည်။
ယခုအခါ ရန်သူ ကို စစ်မြူနိုင်ခဲ့ပြီ ဖြစ်၍ စစ်အာဏာသိမ်း အဖွဲ့သည့် ၃၇ မြို့နယ်တွင် မာရှယ်‌လော အား နိုင်ငံတကာ တွင် ၎င်းတို့၏ လက်ကျန် ဂုဏ်သိက္ခာ များ အကျခံကာ ထုတ်ပြန်ခဲ့ရပြီ ဖြစ်သည်။
ဘန်ကောက်ပို့စ် သတင်းစာမှ ဆောင်းပါးရှင် ချုလာလောင်ကွန်း တက္ကသိုလ် လုံခြုံရေး နှင့် နိုင်ငံတကာ လေ့လာရေး ဌာနမှ Thitinan Pongsudhirak က နိုင်ငံတကာသည် အမျိုးသား ညီညွတ်ရေး အစိုးရအား တနေ့တခြား ထောက်ခံလာကြပြီ ဖြစ်သော်လည်း တိုင်းပြည် ဝါးအစည်းပြေ သကဲ့သို့ ကွဲထွက်သွားမည်ကို စိုးရိမ်နေကြသည်၊ NUG အနေဖြင့် ထိုသို့ မဖြစ်နိုင်ကြောင်း၊ လူထု အပေါ် ဩဇာ သက်ရောက်နိုင်မှု ရှိကြောင်း အခိုင်အမာ ပြသနိုင်ရန် လို‌နေသည်ဟု ထောက်ပြလာခဲ့သည်။
၎င်းက တိုင်းရင်းသား လက်နက်ကိုင် များ နှင့် ခုခံ တော်လှန်နေသော အင်အားစုများ သည် တခုတည်းသော ကွပ်ကဲမှု အောက်တွင် စည်းကမ်းတကျ၊ အဖွဲ့အစည်း ပီသစွာ တာဝန်ခံနိုင်မှု မပြ နိုင်သရွေ့ ၎င်းတို့ တောင်းဆိုနေသော လေယာဉ်ပစ် လက်နက်များ နှင့် အခြား လက်နက်များ ရောက်လာနိုင်ဖွယ် မရှိဟု လည်း ဆိုသည်။
နောက်ထပ် ရရှိသော သတင်းတရပ်အရ မလေးရှား ဝန်ကြီးချုပ် အန်နဝါ အီဗရာဟင်မှ မလေးရှား-ထိုင်း ကုန်သည်ကြီး များ အသင်းတွင် မိန့်ခွန်းပြောကြားရာတွင် အာဆီယံ အဖွဲ့ဝင် နိုင်ငံများ၏ ရှေ့လျောက် ဖွံ့ဖြိုး တိုးတက်ရေး ကို အနှောက်အယှက် ပေးလာနေသည့် မြန်မာအား အာဆီယံ မှ ဖယ်ထုတ်ပစ်ရန် ထည့်သွင်း ပြောဆိုလာခဲ့ပြီ ဖြစ်သည်။ ဤသည်ကပင် မြန်မာ စစ်ဗိုလ်ချူပ်များ ရေရှည် လိမ်ဖယ် လိမ်ဖယ် နှင့် သွားနေမည် ဟု ယူဆလိုက်ခြင်းပင် ဖြစ်သည်။
၎င်းတို့အားလည်း ကိုယ့်ပြည်သူ ကို ကိုယ် နေ့စဉ်လို သတ်ဖြတ်နေကြသည့် အဖွဲ့ဟု တကမ္ဘာလုံး က ဝိုင်းဝန်း အသိအမှတ် ပြုထားကြပြီးလည်း ဖြစ်ပေသည်။
ပြည်သူတို့၏ ခုခံ တွန်းလှန်စစ် မုချအောင်ရမည်!!!
လှစိုးဝေ
Illustration Credit - Democratic Voice of Burma

ဆက်ဖတ်ရန် →

သေနတ်ကိုင်ခွင့်ဥပဒေစိုးထွဠ်နာမည်ဖြင့်ထုတ်ပြန်ချက်

သေနတ်ကိုင်ခွင့်ဥပဒေစိုးထွဠ်နာမည်ဖြင့်ထုတ်ပြန်ချက်

📅 💬 မှတ်ချက်

ဆက်ဖတ်ရန် →

မကွေးမြို့ပေါ်တွင် အသံတိတ် သပိတ် ပျက်စီးရေး ဆိုင်ကယ်များ ဖမ်းဆီးပြီး ဖေဖော်ဝါရီ ၁ ရက်နေ့ ရွေးခိုင်းခဲ့သည့် ယာဥ်ထိန်းရဲ ၁ ဦး ပစ်ခတ်ခံရပြီး သေဆုံး

မကွေးမြို့ပေါ်တွင် အသံတိတ် သပိတ် ပျက်စီးရေး ဆိုင်ကယ်များ ဖမ်းဆီးပြီး ဖေဖော်ဝါရီ ၁ ရက်နေ့ ရွေးခိုင်းခဲ့သည့် ယာဥ်ထိန်းရဲ ၁ ဦး ပစ်ခတ်ခံရပြီး သေဆုံး

📅 💬 မှတ်ချက်

ရန်ကုန်၊ ဖေဖော်ဝါရီ ၁၀ ခေတ်သစ်

မကွေးတိုင်း၊ မကွေးမြို့ပေါ်တွင် အသံတိတ် သပိတ် ပျက်စီးရန် ဆိုင်ကယ်များ လိုက်လံဖမ်းဆီးခဲ့သည့် ယာဥ်ထိန်း ၁ ဦးကို ပစ်ခတ်တိုက်ခိုက်ခဲ့ပြီး သေဆုံးခဲ့ကြောင်း မကွေးပြောက်ကျား တပ်ဖွဲ့ထံမှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
ဖေဖော်ဝါရီလ ၁၀ ရက်နေ့ မွန်းလွဲ ၃ နာရီ ၃၀ မိနစ်တွင် မကွေးမြို့၊ မကွေးပြည်တော်သာလမ်း ကောင်းမွန်စင်တာရှေ့တွင် စစ်တပ် လက်အောက်ခံ ယာဥ်ထိန်းရဲ ၁ ဦးကို Magway Guerrilla Warfare မကွေးပြောက်ကျားတပ်ဖွဲ့က သေနတ်ဖြင့် ၅ ချက် ပစ်ခတ် တိုက်ခိုက်ခဲ့ပြီး သေဆုံးသွား​ကြောင်း သိရသည်။
မကွေးမြို့ပေါ်တွင် အကြမ်းဖက် စစ်တပ် လက်အောက်ခံ ယာဥ်ထိန်းရဲများသည် အာဏာသိမ်း ၂ နှစ်ပြည့်အဖြစ် ပြုလုပ်သည့် Silent Strike သပိတ်ကို ပျက်စီးရန် ဆိုင်ကယ် ၁၀၀ ကျော်ကို နည်းမျိုးစုံဖြင့် ဖမ်းဆီးခဲ့ခြင်းကြောင့် ပစ်ခတ် တိုက်ခိုက်ခဲ့ခြင်း ဖြစ်ကြောင်း မကွေးပြောက်ကျား တပ်ဖွဲ့ထံမှ တာဝန်ရှိသူ တစ်ဦးက ပြောဆိုသည်။
ဓာတ်ပုံ- မကွေးမြို့ပေါ်မှာ ရဲထိန်းရဲနှင့် ရဲများ ဆိုင်ကယ်များကို ဖမ်းဆီးနေစဉ်။ 
(ပုံအဟောင်းဖြစ်သည်)

ဆက်ဖတ်ရန် →

ထန်တလန်မြို့ကို ဗိုလ်ကြီး စောရဲမှူးအောင် နဲ့ ဗိုလ်ကြီးဟိန်းမြက်စိုး အဖွဲ့သားတွေက မီးရှို့ခဲ့တာဖြစ်တယ်လို့ ဖမ်းမိထားတဲ့ စစ်သုံပန်းတွေ ဝန်ခံ

ထန်တလန်မြို့ကို ဗိုလ်ကြီး စောရဲမှူးအောင် နဲ့ ဗိုလ်ကြီးဟိန်းမြက်စိုး အဖွဲ့သားတွေက မီးရှို့ခဲ့တာဖြစ်တယ်လို့ ဖမ်းမိထားတဲ့ စစ်သုံပန်းတွေ ဝန်ခံ

📅 💬 မှတ်ချက်

C8 News
ရန်ကုန်၊ဖေဖော်ဝါရီ(၉)

ချင်းပြည်နယ်၊ ထန်တလန်မြို့ ကိုဦးဆောင်မီးရှို့ခဲ့သူတွေဟာ ဗိုလ်ကြီး စောရဲမှူးအောင် နဲ့ ဗိုလ်ကြီးဟိန်းမြက်စိုး တို့ဖြစ်တယ်လို့ ထန်တလန်မြို့မှာရှိတဲ့ CB ဘဏ် အဆောက်အဦးမှာ လက်ရဖမ်းဆီးမိခဲ့ရသူတွေက ပြောပါတယ်။
ပြီးခဲ့တဲ့ ဖေဖော်ဝါရီ(၁)ရက်နေ့မှာလည်း ထန်တလန်မြို့မှာရှိတဲ့ CB ဘဏ် အဆောက်အဦးမှာ စစ်ဗိုလ်အဆင့်ရှိသူအပါအဝင် စစ်သား(၂)ဦးနဲ့ ရဲ(၄)ဦးကို သူတို့ကိုင်ဆောင်တဲ့ သေနက်(၇)လက်နဲ့ ဗုံးသီး (၈)လုံးကို CNF နဲ့CNA တပ်ဖွဲ့တွေက ဖမ်းမိခဲ့ပြီး စစ်ဆေးဆောင်ရွက်ချိန်မှာ သူတို့ကပြောဆိုခဲ့တာ ဖြစ်ပါတယ်။
ဗိုလ်ကြီးစောရဲမှူးအောင် နဲ့ ဗိုလ်ကြီးဟိန်းမြက်စိုးတို့က သူတို့ကိုယ်တိုင် ဦးဆောင်မီးရှို့ကြတဲ့အပြင် အိမ်ထဲက ပြည်သူတွေရဲ့ပစ္စည်းတွေကိုလည်း မနိုင်မနင်းလုယက်ခိုးယူသယ်ထုတ်သွားကြတယ် ခိုးယူထားတဲ့ ပစ္စည်းများလွန်းတဲ့အတွက် မနိုင်လို့ ရဲသားတွေကို ကူညီသယ်ခိုင်းတာတွေရှိတယ်လို့ သူတို့ကပြောပါတယ်။
စစ်ကောင်စီဘက်ကတော့ ထန်တလန်မြို့ကို ဒေသခံလက်နက်ကိုင်တပ်ဖွဲ့တွေနဲ့ PDF တွေကမီးရှို့ဖျက်စီးခဲ့တာ ဖြစ်တယ်လို့ နိုင်ငံပိုင် သတင်းစားနဲ့ ရုပ်သံတွေမှာ ပြောဆိုထားပါတယ်။
Zawgyi
ထန်တလန်မြို့ကို ဗိုလ်ကြီး စောရဲမှူးအောင် နဲ့ ဗိုလ်ကြီးဟိန်းမြက်စိုး အဖွဲ့သားတွေက မီးရှို့ခဲ့တာဖြစ်တယ်လို့ ဖမ်းမိထားတဲ့ စစ်သုံပန်းတွေ ၀န်ခံ
C8 News
ရန်ကုန်၊ဖေဖော်ဝါရီ(၉)
ချင်းပြည်နယ်၊ ထန်တလန်မြို့ ကိုဦးဆောင်မီးရှို့ခဲ့သူတွေဟာ ဗိုလ်ကြီး စောရဲမှူးအောင် နဲ့ ဗိုလ်ကြီးဟိန်းမြက်စိုး တို့ဖြစ်တယ်လို့ ထန်တလန်မြို့မှာရှိတဲ့ CB ဘဏ် အဆောက်အဦးမှာ လက်ရဖမ်းဆီးမိခဲ့ရသူတွေက ပြောပါတယ်။
ပြီးခဲ့တဲ့ ဖေဖော်ဝါရီ(၁)ရက်နေ့မှာလည်း ထန်တလန်မြို့မှာရှိတဲ့ CB ဘဏ် အဆောက်အဦးမှာ စစ်ဗိုလ်အဆင့်ရှိသူအပါအဝင် စစ်သား(၂)ဦးနဲ့ ရဲ(၄)ဦးကို သူတို့ကိုင်ဆောင်တဲ့ သေနက်(၇)လက်နဲ့ ဗုံးသီး (၈)လုံးကို CNF နဲ့CNA တပ်ဖွဲ့တွေက ဖမ်းမိခဲ့ပြီး စစ်ဆေးဆောင်ရွက်ချိန်မှာ သူတို့ကပြောဆိုခဲ့တာ ဖြစ်ပါတယ်။
ဗိုလ်ကြီးစောရဲမှူးအောင် နဲ့ ဗိုလ်ကြီးဟိန်းမြက်စိုးတို့က သူတို့ကိုယ်တိုင် ဦးဆောင်မီးရှို့ကြတဲ့အပြင် အိမ်ထဲက ပြည်သူတွေရဲ့ပစ္စည်းတွေကိုလည်း မနိုင်မနင်းလုယက်ခိုးယူသယ်ထုတ်သွားကြတယ် ခိုးယူထားတဲ့ ပစ္စည်းများလွန်းတဲ့အတွက် မနိုင်လို့ ရဲသားတွေကို ကူညီသယ်ခိုင်းတာတွေရှိတယ်လို့ သူတို့ကပြောပါတယ်။
စစ်ကောင်စီဘက်ကတော့ ထန်တလန်မြို့ကို ဒေသခံလက်နက်ကိုင်တပ်ဖွဲ့တွေနဲ့ PDF တွေကမီးရှို့ဖျက်စီးခဲ့တာ ဖြစ်တယ်လို့ နိုင်ငံပိုင် သတင်းစားနဲ့ ရုပ်သံတွေမှာ ပြောဆိုထားပါတယ်။
Photo-SS



ထန်တလန်မြို့_C8News

ဆက်ဖတ်ရန် →

စစ်ကောင်စီမိသားစုဝင်တွေ၊ စစ်တပ် အသိုင်းအဝိုင်း မိသားစုဝင်တွေ သွားလာလှုပ်ရှားပုံပြောင်း

စစ်ကောင်စီမိသားစုဝင်တွေ၊ စစ်တပ် အသိုင်းအဝိုင်း မိသားစုဝင်တွေ သွားလာလှုပ်ရှားပုံပြောင်း

📅 💬 မှတ်ချက်

မင်းအောင်လှိုင် မိန်းမနဲ့ သားသမီးတစ်စု စင်ကာပူသွားတာကို သူတို့ လေယာဉ်ပေါ်တက်တဲ့နေ့ကတည်းက သတင်းရင်းမြစ်တစ်ဦးက လှမ်းပြောလို့ သိရတယ်။ စင်ကာပူက မိတ်ဆွေတစ်ဦးကိုတောင် လှမ်း အသိပေးလိုက်သေးတယ်။ စင်ကာပူ အစိုးရက ခွင့်ပြုလက်ခံလို့ သွားမှတော့ သိပ်ပြီး မထူးဆန်းဘူးလို့ မှတ်ယူပါတယ်။ ဒါပေမယ့် ဒါနဲ့ဆက်စပ်လို့ စိတ်ဝင်စားစရာကောင်းတာ ရှိတယ်။ 
.
အဲ့ဒါက စစ်ကောင်စီမိသားစုဝင်တွေ၊ စစ်တပ် အသိုင်းအဝိုင်း မိသားစုဝင်တွေ သွားလာလှုပ်ရှားပုံပြောင်းနေတာ ၃ လလောက်ရှိပြီလို့ ဆိုရမယ်။ ဒီထက်လည်း ပိုစောနိုင်တယ်။ နေပြည်တော်မှာ နေကြတဲ့ စစ်တပ်အသိုင်းအဝိုင်း၊ ညွှန်မှူး၊ ညွှန်ချုပ်၊ ဗိုလ်မှူး၊ ဗိုလ်ချုပ်တွေရဲ့ မိသားစုဝင်တွေဟာ နေပြည်တော်ကနေ ထွက်ရင် နပတ ကားနံပါတ်ကို မသုံးကြတော့ဘူး။ 
.
ရန်ကုန်ကိုသွားရင် ရန်ကုန် နံပါတ်ပြားကို နေပြည်တော်မှာကတည်းက လဲ လာတယ်။ မန်းကိုသွားရင် မန်းလေးနံပါတ်ပြားလဲလာတယ်လို့ ယုံကြည်ရတဲ့ သတင်းရင်းမြစ်က ဆိုတယ်။ ဒါ့အပြင် နေပြည်တော်မှာ တာဝန်ကျနေသူ ရန်ကုန်ပြန်လာရင် သူတို့နဂိုက နေခဲ့တဲ့ အိမ်တွေမှာ မနေတော့ဘဲ တည်းခိုခန်း၊ ဟိုတယ်တွေမှာ လှည့်နေကြတယ်လို့လည်း သိရတယ်။ 
.
နောက်တစ်ခုကတော့ တချို့ မိသားစုဝင်တွေဟာ သန်းခေါင်စာရင်းကစပြီး တစ်မိသားစုလုံး နာမည်ပြောင်းထားကြတယ်လို့ ဆိုတယ်။ အိမ်ထောင်ဦးစီးမဟုတ်ဘဲ အပြင်သွားချင်တဲ့ မိန်းမ၊ သမီး၊ သား နာမည်တွေ ပြောင်းကြတာပေါ့။ ဒါကတော့ 'လူဝင်မှု' က သတင်းရင်းမြစ်တစ်ဦး ပြောပြတာ။ 
.
စစ်ဗိုလ်ချုပ်တွေရဲ့ သားသမီးဆိုတာမျိုးကလည်း နာမည်တွေကို အိန္ဒြေထွဋ်ခေါင်မြမြထိပ် ဆိုတာမျိုးပေးတတ်ကြတာကိုး။ မင်းအောင်လှိုင့်သမီးတောင်ကြည့် ခင်သီရိသက်မွန်တဲ့။ နောက်ပြီး ဧကရီလင်းသက်လှိုင် ဆိုတာမျိုးလည်း ရှိသေး။
.
ဒါပေမယ့် သန်းခေါင်စာရင်းထဲမှာတော့ သမီးတွေဆိုရင် 'အေအေးမွန်' တို့၊ 'သက်သက်စိုး' တို့၊ သားတွေဆိုရင် 'မောင်ထွန်းအောင်' တို့၊ 'မောင်ဝင်းအောင်' တို့လို နာမည်မျိုးတွေ ပြောင်းပစ်ကြတယ်လို့ ဆိုတယ်။ 
.
စစ်အာဏာရှင်ဖြစ်လေတော့ သန်းခေါင်စာရင်းအသစ်၊ မှတ်ပုံတင် အသစ်၊ ပတ်စ်ပို့လည်း အသစ် အကုန်လုံး အသစ်လုပ်ဖို့ လွယ်ကြတာကိုး။ နောက်ဆုံး ဘဏ်စာရင်းလည်း အသစ်၊ ရှိသမျှအကုန် နာမည်သစ်တွေ ပြောင်းပစ်ကြတယ်လို့ သိရတယ်။ 
.
နိုင်ငံတကာက ဆန်ရှင်လုပ်တယ်ဆိုတာလည်း သိပ်တော့ ရင်ခုန်စရာမရှိဘူးရယ်။ တလောက ရေနံနဲ့သဘာဝဓာတ်ငွေ့က လူတချို့ ကို ဆန်ရှင်လုပ်တာမှာ လက်ရှိအလုပ်မလုပ်တော့တဲ့ ဟိုးတုန်းက လူဟောင်းတွေ ပါလာတာတွေ့တယ်။ ဘယ်လိုစစ်ဆေးပြီး လုပ်ကြတာလည်းတော့ မသိ။ အံဖွယ်ရာတွေပေါ့။

ဆက်ဖတ်ရန် →

မြန်မာနိုင်ငံကို အာဆီယံအဖွဲ့မှ ထုတ်ပယ်ရန် မလေးရှားဝန်ကြီးချုပ် ပြော၊ ပြည်သူများအပေါ် စစ်တပ်က ကျူးလွန်သော ရက်စက်ကြမ်းကြုတ်မှုများ ရပ်တန့်ရမည်ဟု သတိပေးပြောဆို

မြန်မာနိုင်ငံကို အာဆီယံအဖွဲ့မှ ထုတ်ပယ်ရန် မလေးရှားဝန်ကြီးချုပ် ပြော၊ ပြည်သူများအပေါ် စစ်တပ်က ကျူးလွန်သော ရက်စက်ကြမ်းကြုတ်မှုများ ရပ်တန့်ရမည်ဟု သတိပေးပြောဆို

📅 💬 မှတ်ချက်

ရန်ကုန်၊ ဖေဖော်ဝါရီ ၁၀ ခေတ်သစ်

မြန်မာနိုင်ငံမှ စစ်အာဏာသိမ်းမှုကြောင့် ဖြစ်ပေါ်လာသော နိုင်ငံရေးအကျပ် အတည်းသည် အာဆီယံအတွက် အနှောင့်အယှက် ဖြစ်နေစေရာ အာဆီယံအဖွဲ့မှ မြန်မာနိုင်ငံကို ထုတ်ပယ်ရန် မလေးရှားဝန်ကြီးချုပ်  Anwar Ibrahimက ပြောဆိုလိုက်သည်။ 
ထိုင်းနိုင်ငံခရီးစဉ်အတွင်း ထိုင်းဝန်ကြီးချုပ်နှင့်တွေ့ဆုံအပြီး မလေးရှားဝန်ကြီး ချုပ်က ယနေ့ အထက်ပါအတိုင်း ပြောဆိုလိုက်ခြင်းဖြစ်သည်။ 
"အခုလောလောဆယ် မြန်မာနိုင်ငံကို ဖယ်ထုတ်သင့်ပါတယ်။  မြန်မာ့အရေးက အာဆီယံရဲ့ လှုပ်ရှားမှုတွေကို အနှောင့်အယှက် မဖြစ်သင့်ပါဘူး။ မြန်မာစစ်တပ်ကို ပြင်းထန်တဲ့ သတင်းစကားပေးဖို့အတွက် ကျနော်တို့အားလုံးမှာ ခိုင်မာတဲ့ သဘောတူညီချက်နဲ့ ဆောင်ရွက်တာက သင့်တော်ပါတယ်" ဟု မလေးရှားဝန်ကြီးချုပ်က ဆိုသည်။ 
ထို့ပြင် မလေးရှားဝန်ကြီးချုပ်က မြန်မာစစ်တပ်အနေဖြင့် ပြည်သူများအပေါ် ကျူးလွန်နေသော ရက်စက်ကြမ်းကြုတ်မှုများကို ရပ်တန့်ရမည်ဟု သတိပေးပြောဆိုသည်။ 
" နိုင်ငံတွေမှာ ပြည်တွင်းရေးမူဝါဒနဲ့ ဦးစားပေးလုပ်ပိုင်ခွင့်တွေ ရှိတယ်၊ ဒါပေမယ့် ဒီလိုခေတ်ကြီးမှာ ဘယ်အစိုးရကမှ ခွဲခြားဆက်ဆံတဲ့ မူဝါဒတွေနဲ့ ကိုယ့်ပြည်သူတွေကို ပစ်ပယ်တာ၊ ခြိမ်းခြောက်တာ၊  ပိုဆိုးတာက ကိုယ့်ပြည်သူတွေကို အကြမ်းဖက်မှုတွေ ကျူးလွန်တာမျိုးတွေကိုတော့ လုပ်ခွင့်မရှိပါဘူး " ဟု ၎င်းက ဆိုသည်။
ထိုင်းဝန်ကြီးချုပ် ပရာယွတ်ချန်အိုချာနှင့်မလေးရှားဝန်ကြီးချုပ်တို့ ယမန်နေ့ တွေ့ဆုံစဉ် မလေးရှားဝန်ကြီးချုပ်က  မြန်မာ့ အကျပ် အတည်းကို ဖြေရှင်းရာတွင် ထိုင်းနိုင်ငံက  ပိုကြီးမားသည့် အခန်းကဏ္ဍမှ ပါဝင်ရန် တိုက်တွန်းသည်။ 
“ကျွန်တော်တို့က ပြင်ပလူတွေကို ဝင်မစွက်ဖက်ချင်ဘူး။ အမေရိကန်နဲ့ ဥရောပက ဘာလုပ်ပါဆိုပြီး  မပြောစေချင်ဘူး။ ဒါပေမယ့် ကျနော်တို့နဲ့ တစ်ခုခုတော့ လုပ်ရပါလိမ့်မယ်။ ဒါကို ကြိုးစား ဖြေရှင်းဖို့ သတ္တိရှိရှိ လုပ်ကိုင်ရမယ်" ဟု မလေးရှား ဝန်ကြီးချုပ်က ပြောဆိုသွားသည်။ 
ဓာတ်ပုံ- မလေးရှားဝန်ကြီးချုပ်နှင့် ထိုင်းဝန်ကြီးချုပ်တို့ ယမန်နေ့ တွေ့ဆုံစဉ်။

ဆက်ဖတ်ရန် →

တစ်နိုင်ငံလုံးရှိ ကျောင်းအားလုံး ပြန်လည်ဖွင့်လှစ်နိုင်ရန်အတွက် အချို့ဒေသများတွင် စစ်အုပ်ချုပ်ရေး ကြေညာခြင်းဖြစ်ဟု မင်းအောင်လှိုင်ပြော

တစ်နိုင်ငံလုံးရှိ ကျောင်းအားလုံး ပြန်လည်ဖွင့်လှစ်နိုင်ရန်အတွက် အချို့ဒေသများတွင် စစ်အုပ်ချုပ်ရေး ကြေညာခြင်းဖြစ်ဟု မင်းအောင်လှိုင်ပြော

📅 💬 မှတ်ချက်

တစ်နိုင်ငံလုံးရှိ ကျောင်းအားလုံး ပြန်လည်ဖွင့်လှစ်နိုင်ရန်အတွက် အချို့ဒေသများတွင် စစ်အုပ်ချုပ်ရေး ကြေညာခြင်းဖြစ်သည်ဟု စစ်ကောင်စီ ခေါင်းဆောင်မင်းအောင်လှိုင်က ဖေဖော်ဝါရီ ၉ ရက်က နေပြည်တော်၌ ပြုလုပ်သည့် အစည်းအဝေးတွင် ပြောကြားခဲ့သည်။
ယင်းအစည်းအဝေး၌ မင်းအောင်လှိုင်က ယခုပညာသင်နှစ်သည် ပညာရည်သင်ကြားမှုများ အဆင်ပြေချောမွေ့စွာ ပြီးစီးခဲ့ပြီဟု ဆိုနိုင်သော်လည်း ကျောင်းတက်ရာခိုင်နှုန်း မပြည့်မှီသေးသည်ကို တွေ့ရှိရကြောာင်း၊ အချို့သောနယ်မြေများတွင် ခြိမ်းခြောက်မှုနှင့် အခြားအကြောင်းအမျိုးမျိုးကြောင့် လာရောက် ပညာမသင်ကြားနိုင်သည့် ကျောင်းသူ၊ ကျောင်းသားများလည်း ရှိမည်ဟု ပြောကြားသည်။
ထို့ပြင် ဒေသအားလုံး၌ ကျောင်းများဖွင့်လှစ်နိုင်ရေးအတွက် အချို့သောနေရာဒေသများတွင် စစ်အုပ်ချုပ်ရေးကြေညာခဲ့ခြင်းဖြစ်ကြောင်း၊ စည်းကမ်းတင်းကြပ် ကိုင်တွယ်မှသာလျှင် ကျောင်းနေအရွယ် ကလေးငယ်အားလုံး အခွင့်အရေးများ မဆုံးရှုံးမည်ဖြစ်ကြောင်း၊ လာမည့် ပညာသင်နှစ်တွင်လည်း ကျောင်းတက်ရောက်သူ ဦးရေ ပိုမိုတိုးပွားလာမည်ဟု မင်းအောင်လှိုင်က ဆိုသည်။
ယင်းအပြင် ဦးဆောင်မှုကောင်းသည့် ပါတီများ တည်ရှိခြင်းသည် ပိုမိုကောင်းမွန်မည်ဟု ယူဆသည့်အတွက် နိုင်ငံရေးပါတီများ မှတ်ပုံတင်ခြင်းဥပဒေကို ထုတ်ပြန်ခဲ့ပြီး ထိန်းသိမ်းခြင်းများကို ဆောင်ရွက်ခြင်းဖြစ်သည်ဟု မင်းအောင်လှိုင်က ဆက်လက်ပြောကြားသည်။
အစည်းအဝေးတွင် မင်းအောင်လှိုင်က မည်သည့် လက်နက်ကိုင်အဖွဲ့အစည်းကိုမျှ ယင်းတို့ အခြေချစခန်းများကို သွားရောက် တိုက်ခိုက်ခြင်းများ မပြုလုပ်ခဲ့ကြောင်း ၊ငြိမ်းချမ်းရေးတွင် ရိုးသားမှုရှိရမည်ဖြစ်ကြောင်း၊ ငြိမ်းချမ်းရေးဆွေးနွေးမှုများတွင်လည်း တစ်ဖက်နှင့် တစ်ဖက် သဘောထားကြီးစွာ ဆွေးနွေးဆောင်ရွက်ကြရန် လိုသည်ဟု လည်း ပြောကြားသေးသည်။
တိုင်းရင်းသား လက်နက်ကိုင်အဖွဲ့အစည်းအများစုသည် NCA အပေါ်တွင် လက်မှတ်ရေးထိုးထားခြင်းဖြစ်ပြီး၊ အာဏာသိမ်းပြီးနောက်ပိုင်းတွင် ပေါ်ပေါက်လာသည့် လက်နက်ကိုင်အဖွဲ့အစည်းအများစုသည် ဒီမိုကရေစီပေါ်တွင် သဘောထားကွဲလွဲမှုများကြောင့် ပေါ်ပေါက်လာသည့် လက်နက်ကိုင်အဖွဲ့အစည်းများဖြစ်သည်ဟုလည်း ယင်းက ဆိုသည်။
မင်းအောင်လှိုင်၏ အစည်းအဝေးပွဲတွင် တိုင်းပြည်တွင် အကြမ်းဖက်မှုများ၊ မီးရှို့မှုများ အစရှိသည်တို့ကို လက်နက်ကိုင်အဖွဲ့အစည်းများနှင့် PDF အဖွဲ့များက သာလုပ်ဆောင်နေခြင်းဖြစ်သည်ဟုလည်း လွှဲချ ပြောဆိုမှုများရှိခဲ့သည်။
https://cjplatform.com

ဆက်ဖတ်ရန် →

ICJ တွင် ချေပနိုင်ရေး စစ်ကောင်စီက ရခိုင်မှ လူ ၃၀ ခန့်ကို သက်သေထွက်ဆိုချက် လက်မှတ်ထိုးခိုင်း

ICJ တွင် ချေပနိုင်ရေး စစ်ကောင်စီက ရခိုင်မှ လူ ၃၀ ခန့်ကို သက်သေထွက်ဆိုချက် လက်မှတ်ထိုးခိုင်း

📅 💬 မှတ်ချက်

အပြည်ပြည်ဆိုင်ရာပူပေါင်းဆောင်ရွက်ရေးဝန်ကြီးဌာန ပြည်ထောင်စုဝန်ကြီးဦးကိုကိုလှိုင်နဲ့ အဖွဲ့ဟာ  ၂၀၁၆/၁၇ အကြမ်းဖက်ဖြစ်စဥ်နဲ့ ပတ်သက်ပြီး မောင်တော၊ ဘူးသီးတောင်ဒေသခံ ရခိုင်၊ မွတ်ဆလင်၊ ဟိန္ဒူ ၃၀ လောက်အား ဖေဖော်ဝါရီ ၈ ရက်နေ့က အစိုးရအဖွဲ့ရုံးမှာ သက်သေထွက်ဆိုချက် ကျမ်းကျိန် လက်မှတ်ထိုးခိုင်းခဲ့တယ်လို့ အစစ်ဆေးခံဒေသခံတွေက ပြောပါတယ်။
အစစ်ဆေးခံရမှာ ပါဝင်ခဲ့တဲ့ မောင်တောဒေသခံ ရိုဟင်ဂျာတဦးက "ကျနော်တို့ကို ၂၀၂၀ ခုနှစ်က စစ်တွေ ဟိုတယ်မှာ ၂၀၁၆/၁၇ အကြမ်းဖက်ဖြစ်စဥ်နဲ့ ပတ်သက်ပြီး စစ်ဆေးခဲ့တာတွေရှိခဲ့တယ်။ အဲ့ဒီစစ်ဆေးချက်တွေကို ICJ တရားရုံးတင်ဖို့အတွက် ဟုတ်မှန်ကြောင်း သူတို့က ကျမ်းကျိန်ပြီး လက်မှတ်ထိုးခိုင်းတာပါ။ အသစ်စစ်ဆေးတာမရှိပါဘူး။ အဲ့ဒီအကြမ်းဖက်ဖြစ်စဥ်မှာ ကျနော်တို့ကိုယ်တိုင် မျက်မြင်လည်းမရှိခဲ့ပါဘူး။ သေနတ်သံတွေကြားတော့ ထွက်ပြေးခဲ့ကြရတာပါ" လို့ ပြောပါတယ်။ 
ဦးကိုကိုလှိုင်ဦးဆောင်တဲ့ အဖွဲ့ဟာ ရခိုင်ပြည်နယ်ကို ဖေဖော်ဝါရီ ၅ ရက်မှ ၈ ရက်နေ့အထိ ရောက်ရှိလာခဲ့ကြတာပါ။
စစ်ကောင်စီက အခုလို သက်သေအထောက်အားစုဆောင်းတဲ့အပေါ် ဘူးသီးတောင် ပြည်သူ့ လွှတ်တော်အမတ်ဟောင်း ဦးအောင်သောင်းရွှေက  "အဲဒီလိုသက်သေအထောက်အထားစု ဆောင်းတယ်ဆိုတာက ဘယ်လောက်ထိ မှန်ကန်မူရှိမလဲအပေါ်မှာ မူတည်တယ်။ တရားစွဲခံရတဲ့သူတွေ အနေနဲ့တော့ သူတို့ဘက်က သူတို့ထွက်ပေါက်ကိုတော့ ရှာလိမ်မယ်။ သူတို့ဘက်က လိုချင်တဲ့အချက်တွေကိုပြောတဲ့ သူတွေကိုခေါ်ယူပြီးတော့ ပြလိမ်မယ်။ သူတို့တင်ပြတဲ့ချေပလွှာတွေဟာ ဘယ်လောက်မှန်ကန်ပါတယ်လို့ ပြောပြော  နိုင်ငံတကာတရာရုံးက ကျွမ်းကျင်တဲ့ တရားသူကြီးတွေက အဆုံးဖြတ်အပေါ်မှာမူတည်တယ်။ နစ်နာသူတွေနဲ့ တရားစွဲခံရသူတွေကတော့ တဖက်နဲ့တဖက်ကတော့ စွပ်စွဲမူတွေ ချေပမူတွေရှိမယ်။ အဲ့ဒီတော့ စွပ်စွဲချေပမှုတွေကို ဆုံးဖြတ်ရမှာက တရားသူကြီးတွေပဲဖြစ်တယ်။” 
ရခိုင်ပြည်နယ် မောင်တောဒေသမှာ ပြီးခဲ့တဲ့ ၂ဝ၁၇ ခုနှစ်ကဖြစ်ပွားခဲ့တဲ့ အကြမ်းဖက်မှုတွေမှာ ရိုဟင်ဂျာတွေအပေါ် မြန်မာစစ်တပ်က လူမျိုးတုံးသတ်ဖြတ်မှု ကျူးလွန်တယ်ဆိုပြီး အပြည်ပြည်ဆိုင်ရာတရားရုံး (ICJ) မှာ ဂမ်ဘီယာက မြန်မာနိုင်ငံအပေါ် တရားစွဲဆိုထားတာပါ။
စွပ်စွဲထားမှု မဟုတ်မှန်ကြောင်းနဲ့ တရားစွဲဆိုထားမှုအပေါ် လက်ခံကြားနာခြင်းမပြုလုပ်ဖို့ အချက် ၄ ချက်ကို မြန်မာအစိုးရဘက်က ICJ မှာ တင်သွင်းချေပခဲ့ပေမဲ့ ICJ က ၂ဝ၂၂ ခုနှစ် ဇူလိုင် ၂၂ ရက်က ပယ်ချခဲ့ပါတယ်။
DVB Burmese

ဆက်ဖတ်ရန် →

သထုံတွင် ကရင်ပြည်နယ်ဘက်သို့ဦးတည်သွားသည့် စစ်ကောင်စီတပ်မှ ရိက္ခာနှင့်လူအင်အားပို့သည့်ယာဉ်တန်း မိုင်းဆွဲတိုက်ခိုက်ခံရ

သထုံတွင် ကရင်ပြည်နယ်ဘက်သို့ဦးတည်သွားသည့် စစ်ကောင်စီတပ်မှ ရိက္ခာနှင့်လူအင်အားပို့သည့်ယာဉ်တန်း မိုင်းဆွဲတိုက်ခိုက်ခံရ

📅 💬 မှတ်ချက်

ဧရာဝတီတိုင်းမ်
(သထုံ)၊ ဖေဖော်ဝါရီလ ၁၀ ရက်

ကရင်ပြည်နယ်၊ ဘားအံမြို့နယ်၊ သထုံ-မြိုင်ကလေး လမ်းပိုင်းတစ်နေရာဖြစ်သည့် အထက်နောင်ကျန်ရွာအနီးတွင် ဖေဖော်ဝါရီလ ၈ ရက်နေ့က စစ်ကောင်စီယာဉ်တန်းအား မိတ်ဖက်တော်လှန်ရေးတပ်ပေါင်းစုမှ မိုင်းဆွဲတိုက်ခိုက်ခဲ့ကြောင်း သိရသည်။
သထုံ-ဘားအံ အဝေးပြေးလမ်းပေါ်ရှိ အထက်နောင်ကျန်ရွာအနီးတွင် ကရင်ပြည်နယ်ဘက်သို့ ရိက္ခာနှင့်လူအင်အား ထောက်ပို့ကားတန်းဟုယူဆရသည့် ယာဉ် ၁၉ စီးပါ စစ်ကောင်စီယာဉ်တန်းအား ကြားဖြတ်မိုင်းဆွဲတိုက်ခိုက်ခဲ့ရာ စစ်ကား ၂ စီးပျက်စီးခဲ့ကြောင်း မိတ်ဖက်တော်လှန်ရေးတပ်ပေါင်းစုထံမှ သိရသည်။
"တိုက်ခိုက်ခဲ့တာကတော့ သထုံနဲ့မြိုင်ကလေး လမ်းမှာပါ။ အဲ့ဒီနေ့က စစ်ကောင်စီကားတွေကအများကြီးဖြတ်ကျတယ်။ ၁၉ စီးယာဉ်တန်းတစ်ခုကိုမိုင်းဆွဲတိုက်ခိုက်ခဲ့တယ်။ ကားတွေကတော့ ၃၊၄ စီးတခါစု သွားကြတာပေါ့။ မိုင်းထိပြီး ကား ၂ စီးပျက်ပြီးစက်ရပ်သွားခဲ့တယ်လို့သိရတယ်။ အဓိကက ရိက္ခာနဲ့လူအင်အားတွေတင်လာတာ" ဟု မိတ်ဖက်ဝော်လှန်ရေးတပ်ပေါင်းစု တာဝန်ရှိသူက ဧရာဝတီတိုင်းမ်ကိုပြောသည်။
မိုင်းဆွဲတိုက်ခိုက်မှုအတွင်း စစ်ကောင်စီတပ်သားများ ထိခိုက်သေဆုံးမှုများရှိသော်လည်း အတည်ပြုနိုင်ခြင်းမရှိပဲ မိတ်ဖက်တော်လှန်ရေးတပ်ဖွဲ့များမှာ လုံခြုံစွာဆုတ်ခွာနိုင်ခဲ့ကြောင်း သိရသည်။
သထုံတွင် ဖေဖော်ဝါရီလ ၄ ရက်နေ့ကလည်း သထုံ-ဘီးလင်း ကားလမ်းပိုင်းတစ်နေရာတွင် ကား ၄ စီးပါစစ်ကောင်စီယာဉ်တန်းအား KNLAနှင့်PDF ပူးပေါင်းအဖွဲ့မှ မိုင်းဆွဲတိုက်ခိုက်ခဲ့ပြီး လက်နက်ကြီးများဖြင့်ပစ်ခတ်ခဲ့ရာ တပ်သား ၅ ဦးသေဆုံးခဲ့ကြောင်း တော်လှန်ရေးတပ်ဖွဲ့ဝင်များထံမှ သိရသည်။
#သထုံ #ကရင် #စစ်ကောင်စီ #PDF #ရိက္ခာ #မိုင်းဆွဲတိုက်ခိုက်
#Ayeyarwaddy_Times

ဆက်ဖတ်ရန် →

သိမ်းဆည်းခံရသည့် လက်နက်များမှာ ပြုပြင်ရမည့် လက်နက်များဟု စစ်တပ်က သတင်းထုတ်ပြန်လိမ်လည်

သိမ်းဆည်းခံရသည့် လက်နက်များမှာ ပြုပြင်ရမည့် လက်နက်များဟု စစ်တပ်က သတင်းထုတ်ပြန်လိမ်လည်

📅 💬 မှတ်ချက်

ထန်တလန် မြို့နယ်ရဲတပ်ဖွဲ့မှူးရုံးကို ချင်းတပ်ဖွဲ့များက တိုက်ခိုက်သိမ်းပိုက်လိုက်မှုကို ရဲတပ်ဖွဲ့ဝင်များ အောင်မြင်စွာ ဆုတ်ခွာနိုင်ပြီး သိမ်းဆည်းခံရသည့် လက်နက်များမှာ  ပြုပြင်ရမည့် လက်နက်များဟု စစ်တပ်က သတင်းထုတ်ပြန်လိမ်လည်

ရန်ကုန်၊ ဖေဖော်ဝါရီ ၁၀ ခေတ်သစ်

ချင်းပြည်နယ်၊ ထန်တလန်မြို့နယ်တွင် ထန်တလန်မြို့နယ်ရဲတပ်ဖွဲ့မှူးရုံးကို ဖေဖော်ဝါရီလ ၉ ရက်နေ့တွင် ချင်းတိုင်းရင်းသား ကာကွယ်ရေးတပ်ဖွဲ့များက တိုက်ခိုက်သိမ်းပိုက်လိုက်မှုအပေါ် စစ်တပ်က သတင်းထုတ်ပြန်ရာတွင် ရဲတပ် ဖွဲ့ဝင်များ အောင်မြင်စွာ ဆုတ်ခွာနိုင်သည်ဟု သတင်းထုတ်ပြန်သည်။ 
ဖေဖော်ဝါရီလ ၈ ရက်နေ့ ည ၁၀ နာရီမှ စတင်ပြီး CNA-CDF ချင်းကာကွယ်ရေးတပ်ဖွဲ့များက ထန်တလန်မြို့နယ်ရဲတပ်ဖွဲ့မှူးရုံးကို ဝင်ရောက်တိုက်ခိုက်ခဲ့ပြီး ဖေဖော်ဝါရီလ ၉ ရက်နေ့ နံနက် ၁ နာရီအချိန်တွင် ရဲစခန်းကို သိမ်းပိုက်နိုင်ခဲ့ကြောင်း ၊ လက်နက် ၄၀ ကျော်နှင့် ရဲအလောင်း ၄ လောင်းကို သိမ်းဆည်းရမိကြောင်း၊ ကျန်ရှိသော ရဲတပ်ဖွဲ့ဝင်များမှာ ကစဉ့်ကလျား ထွက်ပြေးသွားခဲ့ ကြောင်း သိရှိရသည်။ 
ထိုသို့ ထန်တလန်မြို့နယ်ရဲတပ်ဖွဲ့မှူးရုံးကို ချင်းကာကွယ်ရေးတပ်ဖွဲ့များက တိုက်ခိုက် သိမ်းပိုက်မှုအပေါ် စစ်တပ်က သတင်းထုတ်ပြန်ရာတွင် သာလွန်အင်အားအသုံးပြု၍ တိုက်ခိုက်ခံရသဖြင့် ရဲတပ်ဖွဲ့ဝင်များက စနစ်တကျဖြင့် ဆုတ်ခွာခဲ့ရပြီး စစ်တပ်လုံခြုံရေး တပ်စခန်းသို့ အောင်မြင်စွာ သွားရောက်ပူးပေါင်းနိုင်ခဲ့သည်ဟု သတင်းဖော်ပြသည်။ 
ထို့ပြင် လက်နက် ၄၀ ကျော်ကို ချင်းကာကွယ်ရေးတပ်ဖွဲ့များက  သိမ်းဆည်းရရှိသည့်အပေါ် စစ်တပ်က သတင်းထုတ်ပြန်ရာတွင် ပြုပြင်ရန် လိုအပ်သည့် လက် နက်ငယ်တချို့ ဆုံးရှုံးခဲ့ရသည်ဟုလည်းကောင်း၊ ချင်းကာကွယ်ရေးတပ်ဖွဲ့၏ တိုက်ခိုက်မှုကြောင့် စစ်ကောင်စီတပ်ဖွဲ့ဝင်များ သေဆုံးအပေါ်တွင်လည်း ရဲတပ် ဖွဲ့ဝင်များ ကျဆုံး ဒဏ်ရာရရှိသည်ဟုလည်းကောင်း သတင်းများကို ဖော်ပြထားကြောင်း သိရှိရသည်။ 
"သူ့သတင်းစာက သူတို့စစ်သားတွေအတွက် ထုတ်ပြန်တာ။ ငါတို့ အိုကေတယ်။ ငါတို့ မခံရဘူး။ ငါတို့ အောင်မြင်နေတယ်ပေါ့။ သတင်းစာမှာ သူတို့စစ် တပ်အတွက် ဝါဒဖြန့်တာ။ ပြည်သူတွေအတွက်မဟုတ်ဘူး" ဟု ပြည်တွင်းဝါရင့် သတင်းစာဆရာတစ်ဦးက ပြောသည်။

ဆက်ဖတ်ရန် →

မင်းအောင်လှိုင် ရွေးကောက်ပွဲ ဘယ်တော့လဲ (OPINION)

မင်းအောင်လှိုင် ရွေးကောက်ပွဲ ဘယ်တော့လဲ (OPINION)

📅 💬 မှတ်ချက်

ဇန်နဝါရီလ တတိယပတ်လောက်မှာ နိုင်ငံရေးမိတ်ဆွေတစ်ဦးက အာဏာသိမ်းကာလ ၂ နှစ်ပြည့်၊ လာမယ့် ဖေဖော်ဝါရီမှာ အကြမ်းဖက်စစ်အုပ်စု ဘယ်လိုဆက်စခန်းသွားမလဲလို့ ကျနော့်အမြင်ကို လှမ်းမေးတယ်။ မိတ်ဆွေရဲ့ သိချင်မှုက ၂၀၀၈ အခြေခံဥပဒေကို ကုလားဖန်ထိုး ရှေ့ဆက်မလား၊ ဘယ်လို ကုလားဖန်ထိုးနိုင်သလဲနဲ့ ဒါမှမဟုတ်  ၂၀၀၈ အခြေခံဥပဒေကို ဖျက်သိမ်းကာ အာဏာသိမ်းလိုက်ကြောင်း ဗြောင်ကြေညာလိုက်မလားဆိုတာကိုပါ။ သတင်းဌာနကြီးတချို့ကလည်း စစ်အုပ်စုဟာ ၂၀၀၈ အခြေခံဥပဒေပေါ်ကနေ ဘယ်လို ရှေ့ ဆက်သွားနိုင်မလဲဆိုပြီး ခြေဥပုဒ်မတွေ တသီကြီး ဆွဲထုတ်ပြကာ ခန့်မှန်းချက်ပေးတာ တွေ့ရသေးတယ်။
ကျနော်ကတော့ စစ်အုပ်စု ဘယ်လိုရှေ့ဆက်မလဲဆိုတာ စိတ်ဝင်စားစရာမရှိတဲ့အတွက် စက္ကူစုတ်ဖြစ် သွားတာကြာပြီဖြစ်တဲ့ ၂၀၀၈ ခြေဥစာအုပ်ကိုလည်း ပြန်မလှန်၊ တစ်ချက်တောင် စေ့စေ့ မတွေးဖြစ်ခဲ့ပါဘူး။ ဘာကြောင့်လဲဆိုတော့ စစ်အုပ်စုက ၂၀၀၈ ခြေဥကို ကိုင်ကာ ဖာပါးစပ်နဲ့ တောင်ရောက်မြောက်ရောက် လျှောက်ပြောနေတာ အာဏာစသိမ်းစကတည်းကမို့ပါ။
စစ်အုပ်စုက ဘာတွေပဲပြောပြော၊ အာဏာသိမ်းလိုက်တယ်ဆိုတာ ပြည်သူတိုင်း အသိ၊ နိုင်ငံတကာလည်း အသိ။ အာဏာသိမ်းထားပြီး အာဏာကို လက်မလွှတ်ချင်တော့တာကြောင့် အကြီးအကျယ်သတ်ဖြတ် ဖျက်ဆီးနေတဲ့ စစ်တပ်ဟာ ဘယ်လိုတွေ ဘာတွေဆက်ပြောပြီး ဘယ်လိုပဲခေါင်းစဉ်တပ်တပ် အာဏာသိမ်းခြင်းဆိုတဲ့ အနှစ်သာရကို ပြောင်းလဲစရာအကြောင်းမရှိဘူးလို့ နားလည်ပါတယ်။
အခုလည်း ဇန်နဝါရီလ ၃၁ ရက်မှာ မင်းအောင်လှိုင်လက်အောက်ခံ အမျိုးသားကာကွယ်ရေးနှင့် လုံခြုံရေးကောင်စီ အစည်းအဝေးခေါ်ပြီး အရေးပေါ်အခြေအနေကို နောက်ထပ် ၆ လ သက်တမ်းထပ်တိုးကြောင်း ကြေညာလိုက်ပါတယ်။
ပြည်သူရွေးကောက်ခံ သမ္မတကို ဖမ်းပြီး အာဏာသိမ်းလိုက်တဲ့ အင်မတန်ရှင်းလင်းလှတဲ့ အာဏာသိမ်းပွဲအပေါ်မြင့်ဆွေကို မင်းအောင်လှိုင်က ယာယီသမ္မတလုပ်ခိုင်း၊ ခြေဥနဲ့ အတင်းကောက်ညီကာ ကုလားဖန်ထိုးခဲ့တဲ့ပွဲအပြီး အခု မြင့်ဆွေကို ကုပ်ချောင်းချောင်းနဲ့ ထပ်တွေ့ရပြန်တယ်။ အခု မင်းအောင်လှိုင်ပြောတဲ့ ကာလုံအစည်းအဝေးဆိုတာ အာဏာသိမ်းထားတာကို ထပ်ကုလားဖန်ထိုးတာဖြစ်လို့ အဲဒီအစည်းအဝေး တက်ရောက်သူအားလုံးဟာ တစ်ချိန်မှာ နိုင်ငံတော်ပုန်ကန်မှုနဲ့ တရားစွဲခံရမယ့် မင်းအောင်လှိုင်ရဲ့အမှုတွဲတွေ ဖြစ်တယ်ဆိုတာ အခုကတည်းက ကြိုတင်ထုံးတို့ထားရပါမယ်။
ဇန်နဝါရီလ ၃၁ ရက်နေ့၊ ကာလုံလို့ ခေါင်းစဉ်တပ်ထားတဲ့ မင်းအောင်လှိုင်ရဲ့ ဆုံးဖြတ်ချက်အရဆိုရင် နောက်ထပ် အရေးပေါ်အခြေအနေသက်တမ်းဆိုတာကို ၆ လ တစ်ဖြတ်နဲ့ ဆက်တိုက်လာမယ့် သဘောပါပဲ။ ဘယ်အချိန်ထိ အရေးပေါ်အခြေအနေ ဖြစ်နေမလဲဆိုတော့ မင်းအောင်လှိုင်လုပ်ချင်နေတဲ့ ရွေးကောက်ပွဲမဖြစ်မချင်းအထိလို့ အကြမ်းဖျင်းပြောနိုင်ပါမယ်။
ဆိုတော့ ရွေးကောက်ပွဲကို စစ်အုပ်စုက ဘယ်တော့လုပ်နိုင်ခြေရှိပါသလဲ။ ဖြစ်နိုင်မယ်ဆိုရင် အခုချက်ချင်းကို စစ်အုပ်စုက ရွေးကောက်ပွဲပြုလုပ်လိုပါတယ်။ ဘာလို့လဲဆိုတော့ ရွေးကောက်ပွဲဆိုတဲ့ ခေါင်းစဉ်ဟာ တိုင်းပြည်အာဏာကို ရာသက်ပန်သိမ်းပိုက်နိုင်မယ့် တရားဝင်နည်းလမ်းလို့ မင်းအောင်လှိုင်ထင်နေလို့ပါပဲ။
စစ်အုပ်စုပြုလုပ်လိုတဲ့ ရွေးကောက်ပွဲဆိုတာ ဒီမိုကရေစီအင်အားစုအားလုံးကို လုံးဝပါဝင်ခွင့် မပေးရုံတင်မက ဇန်နဝါရီနောက်ဆုံးပတ်အတွင်း စစ်အုပ်စုထုတ်တဲ့ နိုင်ငံရေးပါတီဆိုင်ရာ သတ်မှတ်ချက်တွေအရ ရွေးကောက်ပွဲသိပ်ဝင်ချင်နေတဲ့ ကိုကိုကြီးတို့ရဲ့ ပြည်သူ့ပါတီတောင် ပါတီအဖြစ် ဆန်ကာတင်ကျန်ဖို့ မဖြစ်နိုင်ပါဘူး။ 
စစ်အုပ်စုရဲ့ ရွေးကောက်ပွဲလုပ်ချင်စိတ်က တစ်ပိုင်း၊ လတ်တလော သေချာတာက သူတို့ ရည်မှန်းထားသလို လာမယ့် ဩဂုတ်လမှာ ရွေးကောက်ပွဲလုပ်မယ်ဆိုတာကို ရက်အကန့်အသတ်မရှိ ရွှေ့ဆိုင်းလိုက်ပုံရပြီး အဲဒါဟာ စစ်အုပ်စုကို ဆတ်ဆတ်ခါ နာရပါတယ်။
အင်အားကြီး အမေရိကန်က စစ်အုပ်စုရွေးကောက်ပွဲကို အတိအလင်းပယ်ချလိုက်တာကြောင့် အမေရိကန်ရဲ့ မဟာမိတ်နိုင်ငံတွေကလည်း အလိုလို ပယ်ချပြီးသားပါပဲ။ မြန်မာ့အရေးမှာ အရေးပါတဲ့ တရုတ်နိုင်ငံကလည်း စစ်အုပ်စုရွေးကောက်ပွဲကို ပယ်ချကြောင်း တရုတ်ထုံးစံအရ ထုတ်ဖော်ပြောခြင်းမရှိပေမယ့် အသိအမှတ်ပြုပုံမရသလို စစ်အုပ်စုနဲ့ ပလူးချင်နေတဲ့ အိန္ဒိယကလည်း အာဆီယံရဲ့ သတိပေးချက်အရ ရူးချင်ယောင်ဆောင်နေရပါတယ်။ အာဆီယံကလည်း စစ်အုပ်စုရွေးကောက်ပွဲကို ငြင်းကြောင်း ထုတ်မပြောပေမယ့် အာဆီယံမူ ၅ ရပ်ဆိုတာ စစ်အုပ်စုသွားလိုတဲ့ ငါတကောရွေးကောက်ပွဲလမ်းကြောင်းနဲ့ ဖြောင့်ဖြောင့်ကြီး ဆန့်ကျင်နေတာ အသိသာကြီးပါ။ ပြောရရင် စစ်အုပ်စုရွေးကောက်ပွဲအပေါ် ထောက်ခံပါတယ်လို့ ပြောတဲ့ နိုင်ငံတစ်နိုင်ငံတောင် မရှိသေးတာ ကြီးမားတဲ့ ဖိအားတစ်ရပ်ပါပဲ။
ပြီးတော့ ရွေးကောက်ပွဲကိုရော အမှန်တကယ် ဘယ်နှမြို့လောက်မှာ ပြုလုပ်နိုင်မလဲဆိုတဲ့ မေးခွန်းကိုလည်း ဖိအားကြီးကြီးနဲ့ ရင်ဆိုင်နေရပါတယ်။ ဇန်နဝါရီလ ၃၁ ရက်နေ့၊ ကာလုံလို့ နာမည်တပ်ထားတဲ့ အစည်းအဝေးမှာ မင်းအောင်လှိုင်ကိုယ်တိုင် ဝန်ခံလိုက်ရတာက မြန်မာနိုင်ငံတစ်ဝန်း မြို့နယ်ပေါင်း ၃၃၀ မှာ ရာနှုန်းပြည့် ထိန်းချုပ်နိုင်တာ ၁၉၈ မြို့နယ်သာရှိပြီး လုံခြုံရေးနဲ့ ပတ်သက်ပြီး အလေးထားဆောင်ရွက်ရမယ့် မြို့နယ် ၆၅ ခုနဲ့ ထိထိရောက်ရောက် ဆောင်ရွက်ရမယ့်မြို့နယ် ၆၇ ခု ရှိတယ်ဆိုတာပါပဲ။ လုံခြုံရေးအရ အလေးထားဆောင်ရွက်ရမယ့် မြို့နယ်တွေဆိုတာက တစ်စိတ်တစ်ပိုင်းသာ ထိန်းချုပ်နိုင်တဲ့ မြို့တွေလို့ဆိုလိုပြီး လုံခြုံရေးအရ ထိထိရောက်ရောက် ဆောင်ရွက်ရမယ့် မြို့တွေဆိုတာက လုံးဝ ထိန်းချုပ်နိုင်ခြင်းမရှိတဲ့ မြို့တွေလို့ ပြောတာပါ။
သေချာတာက အဲဒီ ၁၃၂ မြို့နယ်မှာ ရွေးကောက်ပွဲပြုလုပ်ဖို့ရာ လောလောဆယ် ဘယ်လိုမှ မဖြစ်နိုင်ပါဘူး။ ဒါ့အပြင် ပြီးခဲ့တဲ့ ဖေဖော်ဝါရီလ ၁ ရက်နေ့ အသံတိတ်သပိတ်ကို မြန်မာမြို့ပေါင်း ၁၅၀ ကျော်က ဆင်နွှဲခဲ့ခြင်းအရ ဒီမိုကရေစီအင်အားစုတွေက စစ်အုပ်စု ရွေးကောက်ပွဲလုပ်မယ့်နေ့မှာ အသံတိတ်သပိတ် ဆင်နွှဲဦးမယ်ဆိုရင် အနည်းဆုံး မြို့ပေါင်း ၁၅၀ ကျော်မှာ ချောက်ချားသွားနိုင်ပါသေးတယ်။ အသံတိတ်သပိတ်ကို အခြေခံပြောရမယ်ဆိုရင် မြန်မာနိုင်ငံက မြို့ပေါင်း ၁၅၀ ကျော်က စစ်အုပ်စုကို အခိုင်အမာ ဆန့်ကျင်နေပါတယ်။
ပြီးတော့ စစ်အုပ်စုရွေးကောက်ပွဲရဲ့ ကနဦးခြေလှမ်းဖြစ်တဲ့ မဲစာရင်းကောက်ယူတဲ့အဆင့်မှာတင် PDF တွေဟာ လက်ပိုက်ကြည့်မနေကြောင်း သက်သေပြခဲ့ပြီးဖြစ်ပါတယ်။ ဒါကိုပဲ ကိုယ်မသေရင်ပြီးရော အသက်တွေ ပေါတယ်ဆိုပြီး နောက်ထပ်ခြေတစ်လှမ်း ထပ်လှမ်းဦးမယ်ဆိုရင် နောက်ထပ် ပြင်းထန်တဲ့ စိန်ခေါ် သံတွေနဲ့ ရင်ဆိုင်ရမှာ မလွဲပါဘူး။ အဲဒီလိုအခြေအနေမျိုးမှာ ဘယ်သူတွေက လွှတ်တော်အမတ် ဝင်အရွေးခံပြီး အသက်ကို ဖက်နဲ့ထုပ်  စင်ပေါ်တက် တရားဟောကာ မဲဆွယ်စည်းရုံးရဲမှာလဲ။ ရန်ကုန်လို၊ မန္တလေးလိုမြို့ ကြီးတွေမှာတောင် ဘယ်အချိန် ဘယ်နေရာက ရောက်လာမယ်မှန်းမသိတဲ့ ကျည်ဆန်တွေက အဆင်သင့် စောင့်နေတာမို့ မင်းအောင်လှိုင်စိတ်ကူးယဉ်နေတဲ့ ရွေးကောက်ပွဲမှာ အမတ်လုပ်ဝင်ရွေးဖို့ ကျပ်ပြည့်တဲ့လူဆို စိတ်ကူးမယဉ်ရဲပါဘူး။
အဲဒီလို ပြည်တွင်း၊ ပြည်ပ ပစ်မှတ်ထားခံနေရတဲ့ ရွေးကောက်ပွဲကို စုံလုံးကန်းဆက်လှမ်းရင် ဆက်ဆိုးရွားနိုင်တာမို့ မင်းအောင်လှိုင်တစ်ယောက် သက်ပြင်းချ တောက်ခတ်ပြီး နောက်တစ်လှမ်း ဆုတ်လိုက်ပုံရပါတယ်။ နောက်တစ်လှမ်းဆုတ်တယ်ဆိုတာ ရှေ့တစ်လှမ်း တိုးဖို့အတွက်ဖြစ်ကြောင်း မမေ့ကြဖို့လိုပါတယ်။ ဘယ်လိုပုံစံမျိုးနဲ့ ရှေ့တစ်လှမ်း ဆက်တိုးလာနိုင်မလဲဆိုတော့ မင်းအောင်လှိုင်ရဲ့ ပုံသေနည်းလမ်းအတိုင်း  တစ်စိတ်တစ်ပိုင်းသာ ထိန်းချုပ်နိုင်တဲ့မြို့နဲ့ လုံးဝထိန်းချုပ်နိုင်ခြင်းမရှိတဲ့ မြို့တွေကို အင်အားသုံးဖြိုခွင်းပြီး ရှေ့ ဆက်လှမ်းမှာ အသေအချာပါပဲ။
စစ်အုပ်စုဟာ သူတို့သွားလိုတဲ့ လမ်းကို နောက်ပြန်မလှည့်စတမ်း၊ ပိုင်းပိုင်းဖြတ်ဖြတ် ရွေးချယ်ထားပြီး ဖြစ်ပါတယ်။ စစ်အုပ်စုသွားနေတဲ့လမ်းကို ပြည်တွင်းအင်အားစုတွေရော နိုင်ငံတကာအသိုင်းအဝိုင်းကပါ ဒီနေ့အချိန်ထိ မဟာဗျူဟာမြောက် မဟန့်တားနိုင်သေးတာလည်း အသေအချာပါပဲ။
~~~~~~
ထွန်းလင်း
#ငွေမောင်းသံ မီဒီယာ

ဆက်ဖတ်ရန် →

မြန်မာနိုင်ငံကို ဒီမိုကရေစီနိုင်ငံ ဖြစ်လာစေဖို့ အချက် ၃ ချက်ကို အဓိက လုပ်ဆောင်နေတယ်လို့ အမေရိကန် ဒုလက်ထောက်နိုင်ငံခြားရေးဝန်ကြီး ပြောကြား

မြန်မာနိုင်ငံကို ဒီမိုကရေစီနိုင်ငံ ဖြစ်လာစေဖို့ အချက် ၃ ချက်ကို အဓိက လုပ်ဆောင်နေတယ်လို့ အမေရိကန် ဒုလက်ထောက်နိုင်ငံခြားရေးဝန်ကြီး ပြောကြား

📅 💬 မှတ်ချက်

မြန်မာနိုင်ငံကို ပါတီစုံ ဒီမိုကရေစီနိုင်ငံ ဖြစ်လာစေဖို့အတွက် အချက် ၃ ချက်ကို လုပ်ဆောင်နေတယ်လို့ အမေရိကန် ဒုတိယ လက်ထောက် နိုင်ငံခြားရေးဝန်ကြီး Melissa Brown က ဒုတိယအကြိမ်မြောက် “နွေဦးပန်းများ” နိုင်ငံတကာ အွန်လိုင်း ညီလာခံမှာ ပြောကြားလိုက်ပါတယ်။   
ဒီအချက် ၃ ချက်မှာ အာဏာသိမ်း စစ်ကောင်စီကို စီးပွားရေး၊ နိုင်ငံ‌ရေးအရ ဖိအားပေးမှုတွေ တိုးမြှင့်လုပ်ဆောင်တာ၊ မြန်မာ့ ဒီမိုကရေစီအရေး လှုပ်ရှားမှုတွေကို ထောက်ပံ့မှုတွေ တိုးမြှင့်လုပ်ဆောင်တာ၊ ဒုက္ခသည်တွေအတွက် လိုအပ်နေတဲ့ လူသားချင်းစာနာထောက်ထားမှု အကူအညီတွေ ပေးပို့တာတွေ ဖြစ်တယ်လို့ အမေရိကန် ဒုလက်ထောက် နိုင်ငံခြားရေး ဝန်ကြီး Melissa Brown က ဆိုပါတယ်။
နွေဦးပန်းများလို့ နာမည်ပေးထားတဲ့ ဒုတိယအကြိမ်မြောက် နိုင်ငံတကာညီလာခံမှာ အဖွင့်မိန့်ခွန်းပြောကြားရာမှာ အမေရိကန် ဒုလက်ထောက် နိုင်ငံခြားရေး ဝန်ကြီး Melissa Brown က အခုလို ထည့်သွင်းပြောကြားခဲ့တာ ဖြစ်ပါတယ်။ 
ဒုတိယအကြိမ်မြောက် “နွေဦးပန်းများ” နိုင်ငံတကာ အွန်လိုင်း ညီလာခံကိုအမေရိကန် အစိုးရ တာဝန်ရှိသူတွေ၊ လွှတ်တော် အမတ်တွေ၊ အမျိုးသားညီညွတ်ရေး အစိုးရ (NUG) ယာယီ သမ္မတ ဒူးဝါးလရှီးလ၊ ပြည်ထောင်စု လွှတ်တော် ကိုယ်စားပြု ကော်မတီ (CRPH) ဥက္ကဋ္ဌ ဦးအောင်ကြည်ညွှန့် တို့လည်း တက်ရောက်ပြီး မိန့်ခွန်း ပြောကြားခဲ့တယ်လို့ သိရပါတယ်။ 
ဒီညီလာခံကို မြန်မာအမေရိကန် လူမှုအသိုင်းအဝန်းအဖွဲ့ Burmese American Community Institute (BACI) နဲ့ နွေဦးတက္ကသိုလ်လို့ လူသိများတဲ့ မြန်မာ့ အမျိုးသား တက္ကသိုလ်-ကမ္ဘာလုံးဆိုင်ရာနယ်မြေ The National University of the Union of Myanmar – Global Campus (NUUM) တို့အပါအဝင် အဖွဲ့အစည်းတွေရဲ့ ကမကထပြုမှုနဲ့ ဖေဖော်ဝါရီ ၈ ရက်နေ့ကနေ ၁၂ ရက်နေ့အထိ ကျင်းပနေတာ ဖြစ်ပါတယ်။
“နွေဦးပန်းများ” ညီလာခံမှာ ပညာရှင်တွေရဲ့ စာတမ်းဖတ်ပွဲတွေ၊ ဆွေးနွေးပွဲတွေနဲ့ နိုင်ငံရေး စကားဝိုင်းတွေကို အွန်လိုင်းကနေ စီစဉ်ကျင်းပနေတာ ဖြစ်ပါတယ်။
~~~~~
မေဦးကျော်
#ငွေမောင်းသံ မီဒီယာ

ဆက်ဖတ်ရန် →

စစ်ကိုင်းတပ်မ ၃၃ ရှေ့ တိုက်ပွဲဖြစ်ပြီးနောက် အရာရှိကြီးတွေ ထိတ်လန့်

စစ်ကိုင်းတပ်မ ၃၃ ရှေ့ တိုက်ပွဲဖြစ်ပြီးနောက် အရာရှိကြီးတွေ ထိတ်လန့်

📅 💬 မှတ်ချက်

ဖေဖော်ဝါရီ ၉
စစ်ကိုင်းမြို့၊ တပ်မ ၃၃ ရှေ့မှာ တိုက်ပွဲဖြစ်ပွားခဲ့တဲ့အပေါ် စစ်တပ်အရာရှိကြီးတွေ ထိတ်လန့်နေပြီး လုံခြုံရေးတိုးမြှင့်ထားကြောင်း သိရပါတယ်။
ဖေဖော်ဝါရီ ၆ ရက်နေ့ မွန်းလွဲ ၁၂ နာရီခွဲလောက်က စစ်ကိုင်းမြို့တပ်မ ၃၃ ရှေ့နားမှာ အကြမ်းဖက်စစ် တပ်နဲ့ PDF တို့တိုက်ပွဲဖြစ်ပွားခဲ့ပါတယ်။
“တပ်မ ၃၃ လို တကယ့်ကို အခိုင်အမာအင်အားရှိတဲ့နေရာရှေ့တောင် လာတိုက်ရဲသေးတော့ တပ်မ ၃၃က တပ်မမှူးနဲ့ အရာရှိကြီးတွေ လန့်သွားတယ်။ဖေဖော်ဝါရီ ၇ ရက်နေ့မှာ တပ်မ ၃၃ ထဲက အရာရှိကြီးတွေ လုံခြုံရေးအစည်းအဝေးလုပ်တယ်။ တပ်မရှေ့နဲ့ ဘေးပတ်ဝန်းကျင်ကို လုံခြုံရေး တိုးမြှင့်နေတယ်။ လက်နက်ကြီးနဲ့ အတိုက်မခံရအောင် ဘာလုပ်မလဲ ဆိုပြီးတော့လည်း ဆွေးနွေး ကြတယ်လို့ ဖရဲသီးတွေဆီကနေ သိရတယ်”လို့ စစ်ကိုင်းအခြေစိုက် PDF ရဲဘော်တစ်ဦးကပြောပါ တယ်။
အဲဒီသတင်းကို တပ်တွင်းသတင်းရင်းမြစ် ၃နေရာကနေ ထပ်တူသိရတဲ့အတွက် မှန်ကန်တယ်လို့ စိတ် ချလက်ချအတည်ပြုနိုင်ကြောင်း သူကဆက်ပြောပါတယ်။
ဖေဖော်ဝါရီ ၆ ရက်နေ့က အမရပူရမြို့နယ် Htet Mobileက ဒလန် ဝေယံအောင်(TKF-AMA အဖွဲ့ဝင်ဟောင်း)ကိုလိုက်လံသုတ်သင်ရာ သူနဲ့ အတူ တစ်ပါတည်းပါလာတဲ့ ကား၂ စီးပေါ်က  စစ်သားတွေနဲ့  စစ်ကိုင်းမြို့ရှိ တပ်မ ၃၃ ရှေ့မှာ ပစ်ခတ်မှုဖြစ်ပွားခဲ့ကြောင်း Truth Keeping Force Amarapura v2 ကထုတ်ပြန်ထားပါတယ်။
“PDF တွေမှာ လက်နက်ကြီးတွေ ဒါ့ထက်ပိုအားကောင်းလာရင် ဘာလုပ်ကြမလဲလို့ သူတို့အရာရှိကြီး တွေဆွေးနွေးကြတော့ ဘယ်သူမှ ဘာမှမပြောနိုင်တော့ဘူးလို့ သိရတယ်။ တပ်မ ၃၃ နေရာလည်း မလုံခြုံတော့ဘူးဆိုတာ သူတို့သိလာပြီ”လို့ စစ်ကိုင်းအခြေစိုက် PDF ရဲဘော်ကပြောပါတယ်။
ဖေဖော်ဝါရီ ၆ ရက်နေ့ တိုက်ပွဲမှာ PDF ရဲဘော်တစ်ဦးကျည်ထိမှန်(မစိုးရိမ်)ဒဏ်ရာရခဲ့ပြီး ကျန်အဖွဲ့ဝင်တွေ အထိခိုက်မရှိခဲ့ပါဘူး။ စစ်သား ​ေတွရဲ့ အထိအခိုက်စာရင်းကိုတော့ စုံစမ်းနေဆဲပဲလို့ Truth Keeping Force Amarapura v2 ကထုတ်ပြန်ထားပါတယ်။
~~~~~~~ 
ကိုငြိမ်း
ဓာတ်ပုံ-CJ
#ငွေမောင်းသံ မီဒီယာ

ဆက်ဖတ်ရန် →

စစ်တပ် ဒေါက်တိုင် ခရိုနီ သူဌေးကြီး တေဇ စင်ကာပူမှာ နေထိုင်ခွင့်ဗီဇာရဖို့ ဘွဲ့လက်မှတ် အတု အသုံးပြုနေသလား

စစ်တပ် ဒေါက်တိုင် ခရိုနီ သူဌေးကြီး တေဇ စင်ကာပူမှာ နေထိုင်ခွင့်ဗီဇာရဖို့ ဘွဲ့လက်မှတ် အတု အသုံးပြုနေသလား

📅 💬 မှတ်ချက်

By ရန်ကုန်ခေတ်သစ်
အာဏာရှင် အဆက်ဆက် ခရိုနီသူဌေးကြီးအဖြစ် ရပ်တည်နေနိုင်ခဲ့တဲ့ တေဇဟာ တက္ကသိုလ် ဘွဲ့ တခုခု ရရှိခဲ့တယ် ဆိုတဲ့ မှတ် တမ်း မှတ်ရာ တစုံတခုကို ဘယ်မှာမှ တွေ့ခဲ့ဖူးခြင်း မရှိပါဘူး။ စစ်သက္ကသိုလ် (DSA) တက်ရောက်ခဲ့ပေမယ့် ပြီးဆုံးတဲ့အထိ မတက်နိုင်ဘဲ စစ်တက္ကသိုလ် တတိယနှစ်မှာ ထွက်ခဲ့ရတယ်ဆိုတာ တိုင်းသိပြည်သိဖြစ်ပါတယ်။ 
ရန်ကုန်ခေတ်သစ်သတင်းဌာနနဲ့ ချိတ်ဆက်နေတဲ့ စင်ကာပူ အခြေစိုက် သတင်းရင်းမြစ်တစ်ခုက ခရိုနီတေဇဟာ စစ်အာဏာသိမ်းချိန်ကတည်းက စင်ကာပူမှာ တိမ်းရှောင်လာခဲ့ပြီး လက်ရှိမှာ နေထိုင်ခွင့် သက်တမ်းကုန်ဆုံးလို့ ဆက် လက် နေနိုင်ဖို့အတွက် Employment Pass လျှောက်ထားခဲ့တယ်လို့ သိရပါတယ်။ 
အဲဒီလို လျှောက်ထားရာမှာ လိုအပ်ချက်ဖြစ်တဲ့ ဘွဲ့လက်မှတ်အတွက် ဘွဲ့လက်မှတ်အတု တစ်ခုကို ဖန်တီးအသုံးပြု ခဲ့တယ်လို့ သိရပါတယ်။ စင်ကာပူရဲ့ Employment Pass ဆိုတာက နိုင်ငံခြား ပရော်ဖက်ရှင်နယ် ဝန် ထမ်းတွေ၊ မန်နေဂျာတွေနဲ့ ရင်းနှီးမြှုပ် နှံမှုဆိုင်ရာ ကုမ္ပဏီတွေရဲ့  ပိုင်ရှင်/ဒါရိုက်တာတွေကို ထုတ်ပေးတဲ့  အလုပ်နဲ့ပတ်သက်တဲ့  နေထိုင်ခွင့် ဗီဇာအမျိုးအစားပဲ ဖြစ်ပါတယ်။
စင်ကာပူမှာ နေထိုင်ခွင့် လျှောက်ထားရာမှာ တေဇက သူရရှိထားတဲ့ ဘွဲ့ကို သင်္ချာဘွဲ့လို့ ထည့်သွင်းပြီး     ဘွဲ့နံပါတ်မှာတော့ စ- ၆၁၇၄၀ လို့ဖော်ပြထားတဲ့အပြင် ၁၉၈၈ ဇန်နဝါရီလမှာ  ဘွဲ့ရခဲ့ကြောင်း၊  ဘွဲ့လက်မှတ်ကို  ရန်ကုန်တက္ကသိုလ် က ၁၉၉၄ ခုနှစ်၊ အောက်တိုဘာလမှာ ထုတ်ပေးထားတယ်လို့ ဖော်ပြထားပါတယ်။ 
တေဇနဲ့ ရင်းနှီးတဲ့ စီးပွားရေး လုပ်ငန်းရှင် တစ်ဦးက  “ဦးတေဇ သင်္ချာနဲ့ ဘွဲ့ရခဲ့တယ်ဆိုတာမျိုး တစ်ခါမှ မကြားဖူးသေးဘူး။ တ ကယ် ရခဲ့ရင် သိရမှာပေါ့ဗျာ” ဟု မှတ်ချက်ပြုပြောဆိုပါတယ်။ 
CDM လုပ်ထားတဲ့ တက္ကသိုလ် ကထိကတစ်ဦးကတော့ ဘွဲ့လက်မှတ်ဆိုင်ရာ စာရွက်စာတမ်း အထောက် အထားတွေက နေပြည် တော် ၊ ပညာရေးဝန်ကြီးဌာန ဆီ ပြောင်းရွှေ့ ရောက်သွားပြီဖြစ်လို့  ရန်ကုန်မှာ ဘွဲ့လက် မှတ် နဲ့ပတ်သက်တဲ့ အစားထိုးတာတွေ၊ အတုလုပ်တာတွေ  အခုအချိန်မှာ သိပ်ကို လုပ်စားလို့ကောင်းတဲ့ လုပ်စား ခွင်ကြီး‌ဖြစ်နေတယ် လို့ဆိုပါတယ်။ 
အာဏာရှင် အဆက်ဆက် ခရိုနီသဌေးကြီးအဖြစ် ရပ်တည်လာခဲ့သလို စစ်အုပ်စုကို ကာလရှည် ထောက်ပံ့နေတဲ့  တေဇဟာ အာဏာသိမ်းမှု စတင်ကတည်းက စင်ကာပူကို ပြောင်းရွေ့နေထိုင်ခဲ့ပါတယ်။ 
တေဇအနေနဲ့   စင်ကာပူ ဆန်တိုစာ ကျွန်းပေါ်မှာ ဒေါ်လာ ၁၅ သန်းတန် သုံးထပ် အဆင့်မြင့်အိမ်ရာကြီးအပါအဝင် အိမ် ၂ လုံးကို ပိုင်ဆိုင်ထားပြီး၊ အဆိုပါအိမ်ရှေ့မှာ အမြဲလိုလို တန်ဖိုးကြီး Ferrari 8 Spider နှင့် မာစီဒီးစ် ကားကြီး နှစ်စီး ရပ်တန့်ထားကာ၊ မာရီနာဘေး ကာဆီနိုကို ငွေအိတ်ကြီး သယ်ကာ သွားရောက် သုံးဖြုန်းကစားနေနိုင်သူ ဖြစ်နေတယ်လို့ Bloomberg News က လွန်ခဲ့တဲ့ လေးလခန့်ကပဲ သတင်းဖော်ပြခဲ့ပါတယ်။
လက်ရှိမှာတော့ တေဇကို အမေရိကန်၊ ယူကေအပါအဝင် အနောက်နိုင်ငံများက စီးပွားရေး ပိတ်ဆို့အရေးယူထားပြီး၊ NUG အစိုးရကလည်း စစ်တပ်ကို လက်နက်များ ဝယ်ယူနိုင်ဖို့ ပံ့ပိုးနေတဲ့ အကြမ်းဖက် စစ်တပ်ထောက်ခံသူ စီးပွားရေးလုပ်ငန်းရှင် ၉ ဦးရဲ့ အမည်စာရင်းမှာ တေဇကို ထည့်သွင်းအရေးယူထားပါတယ်။ 
ကာစီနို ကိုးမီး ဖဲဝိုင်းမှာ ဒေါ်လာသန်း ၇၀ ခန့် ရှုံးနိမ့်ခဲ့ဖူးတဲ့ တေဇဟာ စင်ကာပူကို အပန်းဖြေစရာ ကစားကွင်းတခုလို အသုံးချနေတာ ကာလကြာမြင့်လှပြီလည်း ဖြစ်ပါတယ်။ ဒါပေမဲ့ တိုးမြင့်လာတဲ့ ပိတ်ဆို့အရေးယူမှုတွေနဲ့အတူ အများအမြင်မှာ စောင့်ကြည့်ခံလာရမှုအပြင် ဘွဲ့လက်မှတ်အတုအထိပါ လုပ်လာတဲ့ တေဇတယောက် စင်ကာပူမှာ ဆက်ပြီး အေးအေးလူလူ နေထိုင်နိုင်ဦးမှာလား ဆိုတာကတော့ ဆက်လက်စောင့်ကြည့်ရမှာဖြစ်ပါတယ်။

ဆက်ဖတ်ရန် →

ကန့်ဘလူတွင် စစ်ကောင်စီတပ်စခန်း ၂ ခုနှင့် စစ်ဆေးရေးဂိတ် တစ်ချိန်တည်း တိုက်ခိုက်ခံရပြီး ၁၀ ဦးသေဆုံးဟုဆို

ကန့်ဘလူတွင် စစ်ကောင်စီတပ်စခန်း ၂ ခုနှင့် စစ်ဆေးရေးဂိတ် တစ်ချိန်တည်း တိုက်ခိုက်ခံရပြီး ၁၀ ဦးသေဆုံးဟုဆို

📅 💬 မှတ်ချက်

ကန့်ဘလူ - ဖော်ဖော်ဝါရီ ၁၀၊ ၂၀၂၃။ 

74 Media

စစ်ကိုင်းတိုင်း၊ ကန့်ဘလူမြို့နယ်တွင် အထိုင်ချထားသည့် စစ်ကောင်စီတပ်စခန်း ၂ ခုနှင့် စစ်ဆေးရေးဂိတ်တစ်ခုကို ယမန်နေ့ နံနက် ငါးနာရီက ကန့်ဘလူမြို့နယ် ပြည်သူ့ကာကွယ်ရေးပူးပေါင်းတပ်ဖွဲ့က သွားရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁၀ ဦး သေဆုံးကြောင်း သိရသည်။ 

ကန့်ဘလူမြို့နယ်၊ ရွှေဘို- မြစ်ကြီးနားကားလမ်းမပေါ်တွင် စစ်ကောင်စီနှင့် ပျူစောထီးပူးပေါင်းအဖွဲ့တို့ အထိုင်ချထားသည့် စံပယ်နံ့သာစစ်ဆေးရေးဂိတ်ကိုသွားရောက်တိုက်ခိုက်ခဲ့ရာ စစ်ကောင်စီနှင့် ပျူစောထီးအဖွဲ့ဝင် ၁၀ ဦး သေဆုံးခဲ့ကြောင်း ကန့်ဘလူမြို့နယ် ပြည်သူ့ကာကွယ်ရေး တပ်ဖွဲ့ဝင်တစ်ဦးက The 74 Media ကိုပြောသည်။

“စခန်းကိုသိမ်းလို့ရတော့မှာ အဲ့ထဲဝင်ပြီး လက်နက်တွေဘာတွေ ကောက်တော့မယ့်အချိန်ကျတော့ ဂျက်ဖိုက်တာဝဲတာနဲ့ ပြန်ဆုတ်လာခဲ့တာ။ ဂိတ်အထဲထိဝင်နိုင်တယ်။ အနားကိုကပ်ပြီး လက်နက်ကြီးနဲ့ပစ်ပြီး အလစ်ဝင်တိုက်တာကို” ဟုပြောသည်။

အဆိုပါတိုက်ပွဲကို ကန့်ဘလူဒေသခံ ပြည်သူ့ကာကွယ်ရေးအဖွဲ့ဝင် (ပကဖ)၊ ကန့်ဘလူတပ်ရင်း (၃) နှင့် တပ်ရင်း (၄) တို့ပါဝင်တိုက်ခိုက်ခဲ့ကြောင်းသိရသည်။ 

တစ်ချိန်တည်းမှာပဲ စံပယ်နံ့သာကျေးရွာနှင့် ၁၀မိုင်အကွာတွင်ရှိသည့် ပေကြီးကျေးရွာအနီးရှိ ကွင်း (၉) ခေါ် စစ်ကောင်စီတပ်အထိုင်ချထားသည့် တပ်စခန်းကိုလည်း သွားရောက်တိုက်ခိုက်ခဲ့ကြောင်း ကန့်ဘလူမြို့နယ် မြေပြင်တော်လှန်ရေးတပ်ဖွဲ့ဝင်တစ်ဦးက ပြောသည်။

“ကွင်း (၉) ဆိုတာ တပ်မတော်ကြံစိုက်ပျိုးရေးတပ်ကပိုင်တာ။ အဲ့မှာတပ်က အထိုင်ချထားတာ။ ရွှေဘို- မြစ်ကြီးနား ကားလမ်းဘေးမှာ ရှိတာ။ ကွင်း ၉ရယ် စံပယ်နံ့သာရွာရယ် တစ်မနက်တည်းမှာပဲ တိုက်ခိုက်မှုလုပ်ခဲ့ကြတာ။ တစ်ချိန်တည်းမှာ” ဟုပြောသည်။

စစ်တပ်အထိုင်ချထားသည့် ဂိတ်နှင့် တပ်စခန်းများအား သွားရောက်တိုက်ခိုက်ပြီးနောက် သုံးနာရီခန့်အကြာတွင် စစ်ကောင်စီတပ်က စံပယ်နံ့သာကျေးရွာရှိ ဒေသခံအိမ်ငါးလုံးကို မီးရှို့ဖျက်ဆီးခဲ့ကြောင်း သိရသည်။

စံပယ်နံ့သာဂိတ်နှင့် ကွင်း (၉) ပစ်ခတ်မှုဖြစ်စဉ်တွင် စစ်ကောင်စီနှင့် ပျူစောထီးအဖွဲ့ဝင် ဆယ်ဦးထက်မနည်း သေဆုံးခဲ့ခြင်း ဟုတ်၊ မဟုတ်ကို The 74 Media အနေဖြင့် သီးခြားအတည်ပြုနိုင်ခြင်း မရှိသေးပါ။

အလားတူ ပြီးခဲ့သည့် ဖေဖော်ဝါရီ ၈ ရက်နေ့ညကလည်း ကန့်ဘလူမြို့နယ်၊ ကိုးတောင်ဘို့ကျေးရွာတွင် အထိုင်ချသည့် စစ်ကောင်စီစခန်းကို ကန့်ဘလူတပ်ရင်း (၂) နှင့်‌ ပြည်သူ့ကာကွယ်ရေးအဖွဲ့ဝင် (ပကဖ)များက သွားရောက်တိုက်ခိုက်ရာ စစ်ကောင်စီတပ်က လက်နက်ကြီး ရမ်းသမ်းပစ်ခတ်သည့်အတွက်ကြောင့် ကိုးတောင်ဘို့ဈေးမှာ မီးလောင်ပျက်စီးခဲ့ကြောင်း ကန့်ဘလူတော်လှန်ရေးတပ်ဖွဲ့ဝင် အမျိုးသမီးတစ်ဦးက ပြောသည်။

“သူတို့ဘက်က လက်နက်ကြီးနဲ့ လှမ်းပစ်တော့ ဈေးအလယ်ကို ကျသွားတာလေ။ ပြီးတော့ မီးကျည်တွေနဲ့လည်း ပစ်တော့ ဈေးကမီးလောင်တာ။ ထွက်လည်းမငြိမ်းရဲဘူး။ တစ်ညလုံးပစ်ဖောက်နေတော့ ပြည်သူတွေက မငြိမ်းရဲတော့ တစ်ဈေးလုံး ပြာကျသွားတာ” ဟုပြောသည်။

မီးလောင်ပျက်စီးခဲ့သည့် အဆိုပါဈေးမှာ ကိုးတောင်ဘို့ကျေးရွာဘူတာရုံနှင့် ကပ်လျက်တွင် တည်ရှိပြီး စစ်ကောင်စီတပ်အထိုင်ချထားသည့် ကိုးတောင်ဘို့အထိုင်စခန်းကုန်း၏ မြောက်ဘက်တစ်မိုင်အကွာတွင် ရှိကြောင်းသိရသည်။

၂၀၁၇ သန်းခေါင်စာရင်းအရ စစ်ကိုင်းတိုင်း ကန့်ဘလူမြို့နယ်တွင် ကျေးရွာအုပ်စု ၈၆ စုရှိပြီး လူဦးရေ နှစ်သိန်းခုနှစ်သောင်းကျော် နေထိုင်ကြောင်း သိရသည်။

စစ်ကိုင်းတိုင်း၊ ကန့်ဘလူမြို့နယ်တွင် ပြီးခဲ့သည့် ဇန်နဝါရီလအတွင်း စစ်ကောင်စီတပ်၏ မီးရှို့ဖျက်ဆီးမှုကြောင့် ကျေးရွာငါးရွာမှ နေအိမ် ၁၀၈လုံး မီးလောင်ပျက်စီးခဲ့ပြီး အရပ်သားပြည်သူ ၁၅ဦးကို စစ်ကောင်စီနှင့် ပျူစောထီးတပ်ဖွဲ့ဝင်များက သတ်ဖြတ်ခဲ့ကြောင်း သိရသည်။

သတင်း - Yu San

ဓါတ်ပုံ - Credit

ဆက်ဖတ်ရန် →