NUG လက်အောက်ခံ ဆရာ၊ဆရာမတွေကို ဖမ်းဆီးအရေးယူမယ်လို့ ခြိမ်းခြောက်စာစောင်တွေ လိုက်ဖြန့်
စစ်ကိုင်း၊ ဖေဖော်ဝါရီ ၃၊ ၂၀၂၃။
စစ်ကိုင်းတိုင်း၊
ဆားလင်းကြီးမြို့ပေါ်ကို ဝင်ရောက်လာတဲ့ စစ်ကောင်စီတပ်ဖွဲ့ဟာ NUG
လက်အောက်ခံ ဆရာ၊ဆရာမတွေကို တည်ဆဲဥပဒေနဲ့ အရေးယူမယ်လို့
ခြိမ်းခြောက်ရေးသားထားတဲ့ လက်ကမ်းစာစောင်တွေကို လိုက်လံဖြန့်ဝေနေတယ်လို့
ဒေသခံတွေဆီက သိရပါတယ်။
ဖေဖော်ဝါရီ
၃ ရက် ဒီကနေ့ နေ့လယ် ၁ နာရီခန့်လောက်က အင်အား ၁၀၀ နီးပါးဟာ
စစ်ကောင်စီတပ်ဖွဲ့တွေဟာ ခြေလျင်နဲ့ ဆာလင်းကြီးမြို့ထဲကို ဝင်လာတဲ့
လမ်းကြောင်းတလျှောက် လက်ကမ်းစာစောင်တွေကို လမ်းဆုံနေရာတွေမှာ
ကပ်ထားခဲ့တာလို့ ဆားလင်းကြီး ဒေသခံတဦးက ပြောပါတယ်။
“လာတာတော့
ခြေလျင်နဲ့ပဲ လာတယ်။ အဓိကကျတဲ့ လမ်းဆုံတွေမှာ အဲဒီစာရွက်တွေ
လိုက်ကပ်သွားတယ်။ ကံကြီးတောရွာ အထွက်ကိုလည်း ကပ်ထားခဲ့ပါတယ်” လို့
သူကဆိုပါတယ်။
အဲဒီလက်ကမ်းစာစောင်ထဲမှာ
NUG အမည်ခံတရားမဝင်အဖွဲ့က ဖွင့်လှစ်ထားတဲ့ စာသင်ကျောင်းက ဆရာ၊ဆရာမတွေဟာ
ကျောင်းသားတွေဆီကနေ ငွေကြေးကောက်ခံနေမှုနဲ့ အခုဖွင့်လှစ်ထားတဲ့
ကျောင်းတွေဟာလည်း အစိုးရက အသိအမှတ်ပြုထားတဲ့ ကျောင်းမဟုတ်ကြောင်းတွေ
စာသားတွေပါတဲ့ စာတွေရေးသားထားပါတယ်။
အဲဒီအပြင်
ကျောင်းသား၊သူနဲ့ မိဘတွေအနေနဲ့လည်း အဲဒီကျောင်းတွေဟာ တရားမဝင်ဖြစ်တဲ့အတွက်
အချိန်နဲ့ငွေ ကြိုးစားအားထုတ်မှုတွေဟာ အရာမထင်ဘဲ ဖြစ်လိမ့်မယ်လို့လည်း
စစ်ကောင်စီတပ်ဖွဲ့တွေရဲ့ လက်ကမ်းစာစောင်တွေထဲမှာ ရေးသားထားပါတယ်။
မနေ့ကညပိုင်းမှာ
စစ်ကိုင်းတိုင်းအတွင်း မြို့နယ် ၁၁ မြို့နယ်ကို စစ်ကောင်စီက
စစ်အုပ်ချုပ်ရေး ကြေငြာတဲ့အထဲမှာ ဆားလင်းကြီးမြို့နယ်ပါဝင်ပြီး ဒီကနေ့မှာပဲ
အခုလို ချိန်းခြောက်စာတွ လိုက်လံဖြန့်ဝေခဲ့တာ ဖြစ်ပါတယ်။
သတင်း - နန်းခမ်း
