ဗိုလ်ချုပ်ကြီးဟောင်း မောင်မောင်ကျော်ရဲ့သား လက်နက်ပွဲစား အိုင်ဗင်ထက်
ဗိုလ်ချုပ်ကြီးဟောင်း မောင်မောင်ကျော် ဆိုတာကတော့ အားလုံးသိပြီး ဖြစ်မှာပါ။ သူနေထိုင်တဲ့ရုံးခန်းထဲ ဗိုလ်ကြီးမမ တယောက်ကို နေစဉ် ခေါ်အိပ်နေသူဖြစ်တယ်။ စစ်ရုံးထဲ ဒီသတင်းပြန့်သွားတော့ မိန်းမဖြစ်သူ အောင်မာမြင့်က ဒီကိစ္စအတွက် မင်းအောင်လှိုင်ကို တိုင်တယ်။ ဒါနဲ့ပဲ စစ်အာဏာသိမ်းပြီး သိပ်မကြာခင် မောင်မောင်ကျော်တယောက် လေတပ်စစ်ဦးစီးချုပ်ရာထူးကနေ ဖြုတ်ချခံခဲ့ရတာဖြစ်တယ်။
အခု ပြောပြမယ့်အကြောင်းကတော့ ဗိုလ်ချုပ်ကြီးဟောင်း မောင်မောင်ကျော်ရဲ့သားဖြစ်သူ ဟိန်းထက်၊ ခေါ် အိုင်ဗင်ထက်အကြောင်းပဲ ဖြစ်ပါတယ်။ သူကို ဟိန်းထက် ဒါမှမဟုတ် အိုင်ဗင်ထက်က ဆိုပြီး တပ်ထဲမှာ သိကြပါတယ်။ သူဟာ ၁၉၈၇ ခုနှစ် နိုဝင်ဘာလ ၆ ရက်နေ့မှာ မွေးခဲ့တာဖြစ်ပါတယ်။
ဒါပေမယ့် သူ့ရဲ့နာမည်ဟာ မောင်မောင်ကျော်ရဲ့ သားဆိုပြီး၊ လူသိတာ မဟုတ်ပါဘူး။ အာဏာသိမ်းစစ်တပ်အတွက် လေကြောင်းနဲ့ စစ်ဘက်ဆိုင်ရာပစ္စည်းတွေ ဝယ်ယူရေးလုပ်ငန်းတွေ အဓိကလုပ်ကိုင်နေတဲ့ လက်နက်ပွဲစားဆိုပြီး လူပိုသိတာပါ။
အိုင်ဗင်ထက်ဟာ သူ့ရဲ့ဇနီးဖြစ်သူ လင်းလက်သီရိနဲ့အတူ Alliance Engineering Services Co., Ltd. အပါအဝင် ပုဂ္ဂလိကကုမ္ပဏီတွေ ထူထောင်ပြီး လုပ်ကိုင်ခဲ့ပါတယ်။ အဲဒီလုပ်ငန်းထဲမှာ လေယာဉ်အစိတ်အပိုင်းတွေ၊ ဒရုန်းပစ္စည်းတွေ၊ ရေဒါနဲ့ လေကြောင်းဆိုင်ရာပစ္စည်းတွေ၊ စစ်ဘက်ဆိုင်ရာပစ္စည်းတွေကို တင်သွင်းတာ၊ ရောင်းချတာနဲ့ ဝန်ဆောင်မှုပေးတာတွေ ပါဝင်ပါတယ်။
အိုင်ဗင်ထက်ရဲ့ စစ်လက်နက်ဝယ်ယူရေး ကွန်ယက်အပေါ် ရိုက်တာသတင်းဌာနကတောင် ဖော်ပြခဲ့ရပါတယ်။ သူ့ဖခင် ဗိုလ်ချုပ်ကြီးဟောင်း မောင်မောင်ကျော်ဟာ၊ လေတပ်စစ်ဦးစီးချုပ်ဖြစ်လာခဲ့ပြီးနောက် လေတပ်ကို ခေတ်မီအောင် ပြုပြင်မယ်ဆိုတဲ့ လမ်းစဉ်တွေ ချမှတ်ခဲ့ပါတယ်။
အဲဒီနောက် လေတပ်အတွက် ဒေါ်လာသန်းပေါင်းများစွာ အသုံးပြုခဲ့တာကိုလည်း တွေ့ရပါတယ်။ ၂၀၁၉ ခုနှစ် တစ်နှစ်တည်းမှာတင် လေတပ်ရဲ့ စစ်အသုံးစရိတ်ဟာ အမေရိကန်ဒေါ်လာ သန်း ၃၆၀ အထိ ရှိခဲ့ပါတယ်။
၂၀၂၀ ခုနှစ်မှာလည်း ဒေါ်လာ ၃၃၇ သန်းအထိ ရှိခဲ့ပြီး အဲဒီငွေထဲက သုံးပုံတစ်ပုံလောက်ကို လေယာဉ်အပိုပစ္စည်းနဲ့ ပြုပြင်ထိန်းသိမ်းရေးအတွက် အသုံးပြုခဲ့တာဖြစ်ပါတယ်။
အိုင်ဗင်ထက်ဟာ ဖခင်ဖြစ်သူ လေတပ်ဦးစီးချုပ် ဖြစ်တဲ့အချိန် တရုတ်ထုတ်၊ ရုရှားထုတ် စတဲ့ လေကြောင်းလက်နက်ဆိုင်ရာ စစ်ဘက်ပစ္စည်းတွေကို အချိုအချောင်နဲ့ ရအောင်ချိတ်ပါတယ်။ ချိတ်ဆက် ပြီးမှ လေယာဉ်/ရဟတ်ယာဉ် သယ်ယူရေးအတွက် မောင်မောင်ကျော်အမိန့်နဲ့ လေတပ်က အရာရှိ/စစ်သည်တွေကို တရုတ်/ရုရှားကို စတဲ့နေရာတွေကို သွားရောက်သယ်ယူစေခဲ့တာဖြစ်တယ်။
အဆိုပါ လေတပ်ကနေ သွားရောက်ခဲ့ဖူးတဲ့ လေတပ်သားတယောက် ပြောပုံအရ အိုင်ဗင်ထက်ရဲ့ အဖေ မောင်မောင်ကျော် လက်ထပ်မှာ သူတို့တွေ တရုတ်ကို K-8 လေယာဉ် သယ်ယူရေးအတွက် သွားခဲ့ရကြောင်း၊ လေယာဉ်တွေက တရုတ်မှာ နာရီသက်တမ်းကုန်နေတဲ့ လေယာဉ်တွေ ဖြစ်တဲ့အပြင်၊ ခြုံနွယ်တွေရှင်းပြီးမှ လေယာဉ်တွေကို သယ်ယူခဲ့ရတယ်လို့ ဆိုပါတယ်။
နာရီသက်တမ်းကုန်နေတဲ့ လေယာဉ်အင်ဂျင်တွေဖြစ်တဲ့အတွက် ပါကစ္စတန်ကနေ အင်ဂျင်မှာယူရတယ်လို့ဆိုပါတယ်။ ဒါတွေကိုဝယ်ပြီးတာနဲ့ မိတ္ထီလာ(လထခ) အနောက်ဘက်က တပ်မတော်အကြီးစားစက်ရုံ(တကစ ၁၀) မှာ ပြုပြင်တပ်ဆင်ခဲ့ရတယ်လို့သိရတယ်။
လေယာဉ် ဝယ်ယူရေးမှာလည်း စစ်အသုံးစားရိတ်ကို အပြည့်အစုံ တောင်းခံခဲ့တာဖြစ်တယ်။ ဒါပေမယ့် ပထမဆုံး လေယာဉ် ၁၂ စီး သယ်ယူချိန်မှာ ထက်ဝက်ခန့်က (Head Up Display) လို လေယာဉ် ပစ္စည်း အပြည့်အစုံမပါဝင်ခဲ့ကြောင်း ပြောပြပါတယ်။ ဆိုလိုချင်တာက လေယာဉ် ၁၂ စီးဝယ်ရင်၊ ၆ စီးက အပြည့်အစုံမပါလာဘဲ၊ လဲလှည်အသုံးပြုခဲ့ရတာဖြစ်တယ်။
နောက်ထပ်လည်း ထပ်မံဝယ်ယူရရှိတဲ့ လေယာဉ်တွေကို မြန်မာပြည်ပြန်ရောက်တဲ့အချိန် မိတ္ထီလာနဲ့ ရန်ကုန်မှာရှိတဲ့ (လထခ) တပ်ကိုပို့ကြပါတယ်။ အဲ့ဒီ့တပ်တွေမှာ အကြီးစား ပြင်ဆင်ပြီးမှ လေယာဉ်တပ်တော်ဝင်ဖို့ မင်းအောင်လှိုင်ဆီ အကြောင်းကြားကြတယ်လို့ သိရတယ်။
အမှန်ဆို လေယာဉ် အသစ်ဝယ်ယူရာမှာ အရာအားလုံးသစ်လွင်နေရပါမယ်။ ဒါပေမယ့် သူတို့ဟာ အဟောင်းတွေကိုပဲ မွန်းမံ အသုံးပြုခဲ့ကြတာဖြစ်တယ်။ အဲ့ဒီ့ကာလမှာ ဖခင်ဖြစ်သူ မောင်မောင်ကျော်ရဲ့အရှိန်အဝါနဲ့ သားဖြစ်သူ အိုင်ဗင်ထက်တယောက် အတော်လေး ဝင်ငွေရခဲ့တယ်လို့ သိရတယ်။
ဒါ့အပြင် အိုင်ဗင်ထက်ဟာ စစ်ဘက်ဆိုင်ရာ လက်နက်တွေ ဝယ်ယူရာမှာ ပွဲစားခအဖြစ် ၂၀ ရာခိုင်နှုန်းကနေ ၃၀ ရာခိုင်နှုန်းအထိ ရရှိတယ်လို့ ဆိုပါတယ်။ ဒါဟာ စစ်တပ်က လက်နက်တွေဝယ်ယူတဲ့အခါ စစ်ခေါင်းဆောင်တွေနဲ့ နီးစပ်သူတွေ၊ မိသားစုဝင်တွေကနေတစ်ဆင့် ဝယ်ယူပြီး အဲဒီကနေ ငွေကြေးအကျိုးအမြတ်တွေ ရရှိနေတဲ့ပုံစံကို ပြသနေပါတယ်။
လက်ရှိအချိန်ထိလည်း ဖခင်ဖြစ်သူ လေချုပ်ပြုတ်ပြီးချိန်ထိ သူဟာစစ်လက်နက်တွေကို အာဏာသိမ်းတပ်အတွက် ဝယ်ယူဖြည့်တင်းနေဆဲ ဖြစ်တယ်။ ဒါ့ကြောင့် အိုင်ဗင်ထက်ကို အမေရိကန်ဘဏ္ဍာရေးဝန်ကြီးဌာန၊ US OFAC က ဒဏ်ခတ်ပိတ်ဆို့မှုစာရင်းထဲ ထည့်သွင်းထားပါတယ်။
ပြန်တွေးကြည့်ရင် ခေတ်အဆက်ဆက် စစ်ဗိုလ်ချုပ်သားသမီးတွေဟာ တိုင်းပြည်ရဲ့ဝင်ငွေကို ဖခင်အရှိန်နဲ့ အလွယ်ရနေတာ တွေ့ရပါတယ်။ နေဝင်းရဲ့သား/မြေတွေဖြစ်တဲ့ အေးနေဝင်းတို့ ကြည့်မလား၊ သန်းရွှေရဲ့ သမီး/မြေးတွေ၊ မင်းအောင်လှိုင်ရဲ့ သားနဲ့ သမီး ဘယ်သူ့ကြည့်ကြည့် ဖခင်အရှိန်နဲ့ ချမ်းသာလာသူတွေဖြစ်တယ်။ လက်ရှိ ဗိုလ်ချုပ်ကြီးဟောင်းသား အိုင်ဗင်ထက်လည်း တယောက်အပါအဝင်ဖြစ်တယ်။
တဖက်ကနေ အာဏာသိမ်းစစ်တပ်အတွက် လက်နက်ခဲယမ်းတွေ ဝယ်ယူပေးနေခဲ့တာဟာ ပြည်သူလူထုကို သတ်ဖြတ်ဖို့သာ ရည်ရွယ်ပါတယ်။ နောက်ထပ်အခြားတဖက်မှာတော့ သူဟာ တိုင်းပြည်ဘဏ္ဍာငွေ/တနည်း ပြည်သူ့ချွေးနည်းစာကို အချိုအချောင်ရယူနေသူ ဖြစ်တယ်။
ဆိုတော့ ဘယ်ဘက်က ကြည့်ကြည့် စစ်ဗိုလ်ချုပ် သားသမီးတွေဟာ တိုင်းပြည်အတွက် လုံးဝ အကျိုးမပေးတာတွေ့ရတယ်။ ဒါ့ကြောင့် ဖခင် ဖြုတ်ချခံရတာတောင် အာဏာသိမ်းတပ်အတွက်၊ လူသတ်လက်နက်ဝယ်ယူပေးနေသူ အိုင်ဗင်ထက်တို့လို စစ်လက်နက်ပွဲစားတွေကို တချိန်အရေးယူနိုင်ဖို့ မှတ်တမ်းတင်ထားရမှာပဲ ဖြစ်တယ်။ သူတို့ဟာ လူသတ်လက်နက်ထောက်ပံ့သူဖြစ်သလို၊ တိုင်းပြည်ဘဏ္ဍာ ခိုးစားနေသူတွေလည်း ဖြစ်ပါတယ်။
မှတ်ချက်များ
Post a Comment