လူတစု၏ လွတ်လပ်ရေးနေ့

လူတစု၏ လွတ်လပ်ရေးနေ့

📅 💬 မှတ်ချက်

▪️ဗိုလ်ရှုခံစင်မြင့်တွင် လက်ကလေးပြလိုက်၊အလံလေး ရှေ့နောက်လှုပ်ပြလိုက်၊ ထပြီး အလေးပြုလိုက်ဖြင့် တယောက်ထဲ အလုပ်ရှုပ်နေ

ဇန်နဝါရီလ ၇ ရက်

နှစ်စဉ် ဇန်နဝါရီလ ၄ ရက်နေ့ဆိုလျှင် လွတ်လပ်ရေးနေ့အဖြစ် မြန်မာပြည်တဝှမ်းတွင် ကျင်းပလာသည်မှာ ၁၉၄၈ ခုနှစ်မှ စ၍ ၂၀၂၃ ခုနှစ်အထိဆိုလျင် ၇၅ နှစ်တိုင်ခဲ့ပြီ ဖြစ်၏။

လွတ်လပ်ရေးနေ့ဆိုသည်နှင့်ပတ်သက်၍ လည်းကောင်း၊ ယခင်ခေတ်ကာလများနှင့်ပတ်သက်၍ လည်းကောင်း အငြင်းပွားစရာနှင့် အမြင်မတူသည်များ ရှိနိုင်ပါသည်။ သို့သော် အချိန်ကာလတခုတွင်တော့ လွတ်လပ်ရေးနေ့အား လူထုက ပျော်ရွှင်စွာ ကျင်းပခဲ့ကြသည်ကို မြို့ရောတောပါ ကြုံတွေ့ခဲ့ရသည်။

လွတ်လပ်ရေးနေ့ ပျော်ပွဲရွှင်ပွဲများကို လူထုက ကျင်းပပြီး လူထုကိုယ်တိုင် ပါဝင်ဆင်နွှဲခဲ့ကြသည်။

ရန်ကုန်ကဲ့သို့ လူနေထူထပ်သော မြို့ပြများတွင်ပင် လွတ်လပ်ရေးနေ့ ပျော်ပွဲရွှင်ပွဲကို သိုက်မြိုက်စည်ကားစွာ ကျင်းပခဲ့ကြသည်။ နှစ်သစ်ကူးနှင့်အတူစ၍ ရပ်ကွက်တွင်း ဘောလုံးပြိုင်ပွဲများကို ဇန်နဝါရီလ ၁ ရက်၊ ၂ ရက်နေ့မှ စတင်ကန်ကြသည်။

ရပ်ကွက်တွင်း လမ်းတချို့အား ကားအသွားအလာပိတ်ထားပြီး လမ်းမများပေါ်တွင် ဂိုးကျဉ်းဘောလုံးပြိုင်ပွဲများ စတင်ကြ သည်။ ဇန်နဝါရီ ၄ ရက်နေ့ လွတ်လပ်ရေးနေ့ကား အစည်ကားဆုံးဖြစ်သည်။

အိမ်တိုင်း တိုက်ခန်းတိုင်း နိုင်ငံအလံ လွှင့်ထူထား၏။ မနက်စောစောကထဲက အိမ်တိုင်းရှိ ကလေးငယ်များ လမ်းမပေါ် ရောက်လာကြပြီး လွတ်လပ်ရေးနေ့ကစားပွဲများကို ပါဝင် ယှဉ်ပြိုင်ရန် အသင့်ဖြစ်နေကြပြီ။

လူကြီးများကလည်း ခရာတရွှီရွှီတုတ်၍ ပွဲထိမ်းရန်၊ ကြီးကြပ်ရန် ပြင်ကြသည်။ ဇန်နဝါရီလ၏ နှင်းမှုံများကြား ဝေလီ ဝေလင်းတွင် ရန်ကုန်မြို့၏ ရပ်ကွက်တိုင်းရှိ လမ်းမများတွင် ကလေးလူကြီးများ ရောက်ရှိနေကြပြီဖြစ်ပြီး စည်ကားနေပြီ ဖြစ်၏။

မကြာမီတွင်ပင် လမ်းမများပေါ်တွင် ကစားပွဲပြိုင်ပွဲများ စသည်။ ဂိုးကျဉ်း ဘောလုံးပြိုင်ပွဲ၊ တာတိုအပြေးပြိုင်ပွဲ၊ ထုပ်ဆီးတိုးပွဲ၊ မုန့်စားအပြေးပြိုင်ပွဲ၊ ဂုံနီအိတ်စွပ် အပြေးပြိုင်ပွဲ၊ ခြေသုံးချောင်းထောက်အပြေးပြိုင်ပွဲ၊ ခေါင်းအုံးရိုက်ပြိုင်ပွဲ၊ ချောတိုင်တက်ပွဲ စသည်များကို ရပ်ကွက်အလိုက်တပျော်တပါးကျင်းပကြသည်။

အားပေးသံများ၊ အော်ဟစ်သံများဖြင့် လမ်းတိုင်း၊ ရပ်ကွက်တိုင်း ဆူညံနေကြပြီဖြစ်သည်။ ထိုအချိန်ကာလတွင် ရပ်ကွက်တွင်းရှိ လမ်းအတော်များများ ပိတ်ထားပြီး ကားများ သွားလာခွင့်မပြုကြတော့ပေ။ ဆော့ကစားပျော်ပါးနေသည့် ကလေး လူကြီးများကိုသာ တွေ့မြင်ရတော့သည်။

ရန်ကုန်တွင်သာမက နယ်မြို့အသီးသီးတွင်လည်း တပျော်တပါး ကျင်းပကြသည်ကို ကြုံတွေ့ခဲ့ကြသည်။ ဤသည်ကား လူထုကျင်းပသည့် လွတ်လပ်ရေးနေ့ ဖြစ်သည်။ လူထုကိုယ်တိုင်ပါဝင်သည့် လွတ်လပ်ရေးနေ့ဖြစ်၏။

ကုန်ကျစားရိတ်မကြီးမားဘဲ လူထုအားလုံး ပါဝင်ပျော်ပါးနိုင်သည့် လွတ်လပ်ရေးနေ့ ဖြစ်၏။ မခန်းနား မကြီးကျယ်သော်လည်း စည်ကားကြီးကျယ်သည့် လွတ်လပ်ရေးနေ့ဖြစ်၏။ ထိုသို့သော လွတ်လပ်ရေးနေ့ဆိုသည်မှာ လူထု ကိုယ်တိုင် လွတ်လပ်သည်ဟု ခံစားရ၍ ကျင်းပသည့် လွတ်လပ်ရေးနေ့လည်း ဖြစ်၏။

သို့သော် ၂၀၂၁ ခုနှစ် ဖေဖဝါရီလ ၁ ရက်နေ့ စစ်တပ်ကအာဏာသိမ်းပြီးနောက် မြန်မာပြည်ရှိ အရာရာသည် ပျက်စီးသွားသည်။ ထိုအထဲတွင် လွတ်လပ်ရေးနေ့လည်း ပါ၏။ လူထု၏စိတ်တွင် လွတ်လပ်သည်ဟု မခံစားရတော့။

လွတ်လပ်ခွင့်ဆုံးရှုံးသွားပြီဟု ခံစားခဲ့ပြီဖြစ်သည်။ နောက်လာတဲ့ မောင်ပုလဲ ဒိုင်းဝန်ထက်ကဲ ဆိုသကဲ့သို့ မြန်မာ ပြည်သူ လူထုသည် နယ်ချဲ့ထက်ဆိုးသော စစ်ဗိုလ်တသိုက်၏ ရက်စက်ကြမ်းကြုတ်သော အုပ်ချုပ်မှုအောက်တွင် ရောက်နေကြပြီကို မြန်မာပြည်လူထု တွေ့ကြုံခံစားနေရပြီ ဖြစ်သည်။

၂ နှစ် မပြည့်မီ လူပေါင်းထောင်ချီသတ်ဖြတ်ခဲ့ပြီး လူပေါင်းသောင်းချီ အဖမ်းဆီးခံခဲ့ရပြီ ဖြစ်သည်။ ထို့ပြင် လမ်းမများပေါ် တွင် သေနတ်တကားကားနှင့် စစ်သားနှင့်ရဲများကို တွေ့နေရပြီး မထင်ရင်မထင်သလို ဖမ်းဆီးစစ်ဆေးခံရသည်ကို ကြုံတွေ့နေရပြီဖြစ်၏။ ထို့ပြင် နိုင်ငံတဝှမ်းလုံး၌ အိုး အိမ်အဆောက်အအုံပေါင်း လေးသောင်းကျော်မီးရှို့ဖျက်ဆီးခံခဲ့ရပြီ ဖြစ်သည်။

သို့ဖြစ်ရာ လူထုအတွက် လွတ်လပ်ရေးနေ့ဆိုသည်မှာ အဓိပ္ပါယ်မရှိတော့သကဲ့သို့ အနှစ်သာရ ကင်းမဲ့သွားပြီ ဖြစ်သည်။ သို့‌ဖြစ်ရာ ၂၀၂၃ ခုနှစ်၊ ဇန်နဝါရီလ ၄ ရက်နေ့သည် ၇၅ နှစ်မြောက်လွတ်လပ်ရေးနေ့ ဖြစ်သော်လည်း လူထု၏ လွတ်လပ်ရေးနေ့ မဟုတ်တော့။

လွတ်လပ်ခြင်း ဆုံးရှုံးနေသော လူထုအတွက် လွတ်လပ်ရေးနေ့ဆိုသည်မှာ ရင်ထဲရောက်မလာတော့။ တိုက်ခန်းတိုင်း အိမ်တိုင်းလွှင့်ထူသည့် နိုင်ငံတော်အလံကို မမြင်တွေ့ရတော့။ လူထုပါဝင်ဆင်နွှဲကျင်းပသည့် လွတ်လပ်ရေးနေ့ ပျော်ပွဲရွှင်ပွဲများကို မတွေ့ရတော့။

လူထုအတွက် လွတ်လပ်ရေးနေ့သည် သာမန်နေ့တနေ့သာဖြစ်သွားပြီး ပုံမှန်သာ ဖြတ်သန်းသွားကြသည်ကို ၇၅ နှစ် မြောက် လွတ်လပ်ရေးနေ့တွင် တွေ့ရပေတော့သည်။

သို့သော်လည်း အာဏာသိမ်းစစ်အုပ်စုကတော့ ၇၅ နှစ်မြောက် လွတ်လပ်ရေးနေ့ကို တခမ်းတနား ငွေကုန်ကြေးကျခံရ၍ ကျင်းပသည်။ လုံခြုံရေး အထပ်ထပ်ချထားသော နေပြည်တော်တွင် လွတ်လပ်ရေးနေ့ အခမ်းအနားအား သစ္စာခံ စစ်တပ်၊ ရဲ၊ သစ္စာခံ အစိုးရ ဝန်ထမ်းများ၊ မသိနားမလည်သေးသည့် ကျောင်းသူကျောင်းသားငယ်များ၊ စစ်တပ်နှင့် ပေါင်း၍ စီးပွားရှာစားနေသူများနှင့် တခမ်းတနားကျင်းပခဲ့သည်။

စစ်ကောင်စီ၏ စိန်ရတု လွတ်လပ်ရေးနေ့ အခမ်းအနားအား ဇန်နဝါရီလ ၄ ရက်နေ့ မနက် ၄ နာရီခွဲခန့်မှ စတင်သည်။ ဗိုလ်ရှုသဘင်မဏ္ဍပ်ရှိ စစ်ခေါင်းဆောင်အား စစ်တပ်နှင့် ဝန်ကြီးဌာနအားလုံးမှ ဝန်ထမ်းများက ချီတက်အလေးပြုကြရသည်။

ဝေဟင်ကလည်း လေယဉ်တအုပ်ပြီးတအုပ် ပျံသန်းအလေးပြုကြရသည်။ ရဟတ်များပေါ်မှ လေထီးများနှင့်ဆင်း၍ အလေးပြုကြရသည်။ တိုင်းနှင့်ပြည်နယ်ကိုယ်စားပြု အလှပြယဉ်များ၊ စစ်တပ် ကြည်း၊ ရေ၊ လေနှင့် ဝန်ကြီးဌာန ကိုယ်စားပြု အလှပြယဉ်များ၊ အကအဖွဲ့များက ချီတက်ကပြ အလေးပြုကြရသည်။

ဆင်၊ မြင်းအစုံအညီနှင့် ရှေးမြန်မာ ဘုရင်နန်းဝတ်နန်းစားများဖြင့်လည်း ချီတက်အလေးပြုကြရ၏။ နိုင်ငံတော်အလံများ ဝှေ့ ရမ်းကြရ၏။ အပေါ်ယံကြည့်လျင် အတော်ကို ငွေကြေးကုန်ကျခံ၍ တခမ်းတနား စီစဉ်ထားသည်ဟု ဆိုရမည်။ စစ်ကောင်စီ လက်ထက်တွင် ဘက်စုံက ဖွံ့ဖြိုးတိုးတက်နေသည်ဟု ထင်ယောင်ထင်မှားဖြစ်ရန် ပုံဖေါ်ထားသည်ကို တွေ့ရသည်။

ဤသို့စီစဉ်ထားသော လွတ်လပ်ရေးနေ့ အခမ်းအနားသည် မည်သည့်အဓိပ္ပါယ်ဆောင်ပါသနည်း။ အများသိကြသည့် အတိုင်း စစ်ကောင်စီက ၎င်းတို့အနေနှင့် တိုင်းပြည်အခြေအနေကို တည်ငြိမ်စွာထိန်းထားနိုင်ပြီကို ဖော်ပြချင်နေသည်ကို အားလုံးက သဘောပေါက်ကြ၏။

သို့သော် စစ်ခေါင်းဆောင် ကိုယ်တိုင် ထိုင်နေသည် မဏ္ဍပ်ပေါ်ရှိ လူများ၏ မျက်နှာအနေအထားများက အခြေအနေမှန်ကို ဖော်ပြနေသည်။ လက်ကလေးပြလိုက်၊ အလံလေး လှုပ်လိုက်၊ ထပြီး အလေးပြုခံလိုက်နှင့် တယောက်ထဲအလုပ်ရှုပ်ပြီး ပျော်မြူးနေသည်မှာ စစ်ခေါင်းဆောင် မင်းအောင်လှိုင်တယောက်တည်းဖြစ်သည်ကို တွေ့ရသည်။

ကျန်သူအများစုကတော့ မျက်နှာသေများနှင့် မပြုံးမရီ ထိုင်နေကြ၏။ မင်းအောင်လှိုင်လက်ခုပ်တီးလျင် နောက်ကနေ လေး ငါးချက် လိုက်တီးလိုက်ကြ၊ မင်းအောင်လှိုင် အလံလွှင့်လှုပ်လျင် နောက်က နည်းနည်းလိုက်လှုပ်လိုက်ကြနှင့် မင်းအောင်လှိုင် အရိပ်အခြေကို ကြည့်၍ လှုပ်ရှားနေကြသည်မှအပ မင်းအောင်လှိုင်၏ ထိပ်တန်း စစ်ကောင်စီ ခေါင်းဆောင်များ၏ မျက်နှာတွင် အပြုံးရိပ်လည်း မတွေ့ရ။ အပျော်ရိပ်လည်း မတွေ့ရပေ။

ပွဲကြိုက်သည့် မင်းသားရူးတယောက်၏ ဇာတ်ထဲလိုက်နေရသည့် ဇာတ်အဖွဲ့သားများကဲ့သို့ စားရသောက်ရလို့သာ လိုက်နေရသော်လည်း မအီမလည် ဖြစ်နေကြပုံရသည်။ ထို့ပြင် ပွဲကြီးလမ်းကြီးနှင့် တခန်းတနား ကျင်းပနေကြသော်လည်း အခြေအနေ မကောင်းလှသော စစ်ကောင်စီ၏ အခြေအနေကို ကိုယ့်ဝမ်းနာကိုယ်သာ သိ‌နေပုံရသည်။

တပြည်လုံးတွင် လက်နက်ကိုင် ပုန်ကန်ထကြွနေသည်ကို သောကရောက်နေကြပုံရသည်။ ရန်ကုန်၊ မန္တလေးကဲ့သို့ မြို့ကြီး ပြကြီးများတွင်ပင် မလုံခြုံသည့်အခြေအနေကို စိုးရိမ်မကင်းဖြစ်နေကြပုံရသည်။

စီးပွားရေး အကျပ်အတည်းနှင့် ငွေကြေးဖေါင်းပွမှုကြောင့် စိတ်မသက်သာဖြစ်နေပုံရသည်။နိုင်ငံတကာချေးငွေ တပြားတချပ်မှ မရ၍ စိတ်ညစ်နေကြပုံရသည်။

ကမ္ဘာ့ကုလသမဂ္ဂတွင်လည်းကောင်း၊ အာဆီယံတွင်လည်းကောင်း ထိုင်ခုံပျောက်ပြီး ရွာပြင်ရောက်နေ၍ စိတ်ပျက်နေကြပုံရ၏။ ကုလသမဂ္ဂလုံခြုံရေးကောင်စီဆုံးဖြတ်ချက်၊ အမေရိကန်၏ ဥပဒေသစ်များကြောင့် တုန်လှုပ်နေပုံရသည်။

ပြောင်းလဲသွားသော တရုတ်၏ ဆက်ဆံရေးကြောင့် စိတ်ညစ်နေပုံရ၏။ လွတ်လပ်ရေးနေ့မတိုင်မီ တရုတ်နယ်စပ်အနီးတွင် ကိုးကန့်တပ်က လက်နက်ထောင်ချီတပ်ဆင်နေသည့် သတင်းကြောင့် သို့လော သို့လော စဉ်းစားစရာဖြစ်နေပုံရသည်။

ထို့ပြင် လွတ်လပ်ရေးစိန်ရတုကျင်းပနေစဉ် ကြာအင်းဆိပ်ကြီးရှိ စစ်တပ်တပ်ရင်းဌာနချုပ်သုံးခုအား ကရင်နှင့် PDF တပ်များ ဝင်ရောက်တိုက်ခိုက်သည့် သတင်းကို ကြား၍လည်း ထပ်ဆင့်စိတ်ဆင်းရဲနေကြပုံရသည်။ ထို့ပြင် မနက် ၄ နာရီခွဲမှ နေ့လည် ၁၂ နာရီခွဲအထိ မပြီးနိုင်မစီးနိုင် ၈ နာရီခန့် ကျင်းပနေသည့် အခမ်းအနားအချိန်ကြောင့်လည်း ပို၍ စိတ်ညစ်နေကြပုံရသည်။

အရိပ်အာဝါသအောက်တွင်ထိုင်နေသည့် စစ်ကောင်စီ လူကြီးများထက် ပိုဆိုးသည်မှာ အရိပ်မရှိသော နေပူထဲတွင် ထိုင်ခိုင်းထားသည့် မင်းပရိတ်သတ်များ ဖြစ်သည်။ အခန်းအနားက ညလုံးပေါက်သည့် ဇာတ်အဖွဲ့ အစီအစဉ်ကဲ့သို့ မပြီးနိုင် မစီးနိုင်ဖြစ်၏။

သို့သော်လည်း ကျင်းပသည့်အချိန်က ညကဲ့သို့ မအေးမြ။ နေအပူက မနက် ၉ နာရီမှစ၍ တဖြေးဖြေးပူလာသည်။ ၁၀ နာရီ၊ ၁၁ နာရီ၊ ၁၂ နာရီ တို့တွင် နေအပူရှိန်က ပိုတက်လာ၏။ နေပူကြဲကြဲအောက်တွင် ထိုင်နေကြရသော မင်းပရိတ်သတ်များ သည်လည်း နေပူထဲ ငါးခြောက်လှမ်းခံရသကဲ့သို့ တဖြေးဖြေးတွန့်လိမ်လာသည်ကို တွေ့ရသည်။ ရေလည်းဆာ၊ ဝမ်းလည်းဟာ လာကြပုံရသည်။

ဗိုလ်ရှုခံစင်မြင့်တွင် တယောက်ထဲပျော်နေသည်ကတော့ စစ်ခေါင်းဆောင် မင်းအောင်လှိုင် ဖြစ်သည်။ လက်က‌လေး ပြလိုက်၊ အလံလေး ရှေ့နောက်လှုပ်ပြလိုက်၊ ထပြီး အလေးပြုလိုက်ဖြင့် တယောက်ထဲ အလုပ်ရှုပ်နေ၏။ တယောက်တည်း ထင်တိုင်းကြဲ ခွင့်ရသဖြင့် စိတ်ကြီးဝင်ပြီး ဘဝင်လေဟပ်နေပုံရသည်။

၁၂ နာရီခွဲတွင်မှ စစ်ကောင်စီ၏ လွတ်လပ်ရေးနေ့ အခမ်းအနား ပြီးသည်။ စစ်ခေါင်းဆောင်က သူ၏ ထိပ်တန်း စစ်ကောင်စီ အဖွဲ့ဝင်များကို နှုတ်ဆက်ပြီးသကာလ မြင်းများ၊ ဆိုင်ကယ်များ ၊ ကားများ ခြံရံပြီး ပျော်ရွှင်မြူးတူးစွာ ထွက်ခွါသွားသည်။

စစ်ကောင်စီ ထိပ်တန်းအဖွဲ့ဝင်များကတော့ မင်းသားရူးကို ဇာတ်ဆရာ တင်မိထားသဖြင့် ဇာတ်ပျက်လျင် သူတို့ပါ ဒုက္ခ ရောက်ရတော့မည်ဟူသော စိုးရိမ်သည့် မျက်နှာပေးနှင့် ကျန်ခဲ့သည်ကို တွေ့ရသည်။

ပို၍ အရှက်ရစရာကောင်းသည်မှာ မြန်မာနှင့် သံတမန်ဆက်ဆံရေး ထူထောင်ထားသည့် နိုင်ငံပေါင်း ၁၇၅ နိုင်ငံရှိရာ ရုရှား၊ နီပေါနှင့် ကမ္ဘောဒီးယားနိုင်ငံ ၃ ခု တို့ကသာ ယခုနှစ် ၇၅ နှစ်မြောက် လွတ်လပ်ရေးနေ့အတွက် ဝမ်းမြောက်ကြောင်း သဝဏ်လွှာ ပေးပို့ခဲ့ခြင်းပင် ဖြစ်သည်။ ကျန်တဲ့နိုင်ငံပေါင်း ၁၇၀ ကျော်က အဖက်ပင် မလုပ်ကြတော့။

တကယ်တော့ ထိုစိန်ရတုလွတ်လပ်ရေးနေ့တွင် ပျော်နေသည်က စစ်ခေါင်းဆောင်တယောက်ထဲတော့ မဟုတ်ပေ။ ထိုစိန်ရတုပွဲတွင် အသုံးပြုသည့် အလှပြယဉ်များ၊ ဝတ်စုံစားရိတ်များ၊ လေ့ကျင့်ရေးစားရိတ်များအတွက် သန်းပေါင်း၊ သိန်းပေါင်း များစွာ ကံထရိုက်ရကြသည့် စစ်တပ်လက်ဝေခံတစုလည်း ပျော်မြူးနေကြပြီး ဂျွမ်းထပ်ခါထပ်ခါ လှိမ့်ထိုးနေကြပေလိမ့်မည်။

ဤသည်ပင်လျင် လူထု၏ လွတ်လပ်ရေးနေ့ မဟုတ်သည့် လူတစု၏ လွတ်လပ်ရေးနေ့ မြင်ကွင်း ဖြစ်ပေတော့သည်။

Photo - ၂၀၂၃ ခုနှစ် နေပြည်တော်တွင် လွတ်လပ်ရေးနေ့ကျင်းပစဉ် တွေ့ရသည့် စစ်ခေါင်းဆောင် မင်းအောင်လှိုင် 

TIR - Hlaing Info

ဆက်ဖတ်ရန် →

ညစ်ညမ်းဗီဒီယိုရိုက်ကူးသူ၊ ပြည့်တန်ဆာများ၏ အငှားခင်ပွန်းအဖြစ် ဟန် ဆောင် ပေးသူဘ၀မှ ဝီရသူ ၏ အနီးကပ်လုံခြုံရေး ၊ အမျိုးသားရေး အစွန်း ရောက်ဖြစ်လာသူ ညောင်ကန်(ခ) ကိုကိုမောင်

ညစ်ညမ်းဗီဒီယိုရိုက်ကူးသူ၊ ပြည့်တန်ဆာများ၏ အငှားခင်ပွန်းအဖြစ် ဟန် ဆောင် ပေးသူဘ၀မှ ဝီရသူ ၏ အနီးကပ်လုံခြုံရေး ၊ အမျိုးသားရေး အစွန်း ရောက်ဖြစ်လာသူ ညောင်ကန်(ခ) ကိုကိုမောင်

📅 💬 မှတ်ချက်

By ဟိဏ်းဝေယံ ခေတ်သစ်

အကြမ်းဖက်စစ်တပ်က လက်သက်မွေးပြီး အာဏာသိမ်းဖို့အရေး အသုံးချခဲ့တဲ့ မဘသ အစွန်း ရောက်တွေ၊ အမျိုးသားရေး အမည်ခံကာ ငွေကြေးလုပ် စားသူ တွေ အကြောင်း ပြည်သူများသိရှိနိုင်စေဖို့ ဖော် ထုတ် ရေးသားနေရာမှာ ဒီတစ်ပတ် တော့ ညစ်ညမ်းဗီဒီယိုရိုက်ကူးသူ ၊ ပြည့်တန်ဆာတွေရဲ့ အငှား ခင်ပွန်းဟန်ဆောင်ပေးသူ အဖြစ်ကနေ ဝီရသူရဲ့ အနီးကပ်လုံခြုံရေး ၊ အမျိုး သားရေး အစွန်း ရောက် ညောင်ကန်(ခ) ကိုကိုမောင် အကြောင်း တင်ပြပါ့မယ်။ 

မဘသ နဲ့ အမျိုးသားရေး အစွန်းရောက်တွေဟာ ငွေကြေးအတွက် စစ်တပ် ထောက်ခံပြီး ငွေကြေး လုပ်စားနေသူတွေပါ။  ဘယ်အလုပ်မှ လက်ကြော မတင်းဘဲ မကောင်းတာမှန်သမျှ အကုန်လုပ် စားခဲ့သူတွေဘ၀ကနေ စစ်တပ်က အလွယ် တကူ ထုတ်ပေးတဲ့ ငွေကြေးကို ရယူကာ တိုင်းပြည်ကို နင်းချေ ဖျက်ဆီးခဲ့ကြတာကို သက်သေတွေနဲ့တကွ ထုတ်ဖော် ရေးသားနေတာပါ။ 

ညောင်ကန်(ခ) ကိုကိုမောင်ဆိုတာဟာ ဝီရသူ ရဲ့ ရန်ကုန် တရားပွဲတွေနဲ့ နိုင်ငံ ရေး ဟောပြောပွဲတွေမှာ လုံခြုံရေး ယူပေးတဲ့ လုံခြုံရေးခေါင်းဆောင်ဖြစ်ပါတယ်။ 

ဝင်းကိုကိုလတ် ခေါ် ဖိုးလောင်တီး က ညစ်ညမ်းစာတွေ ရေးသားနေရာက ဝီရသူနဲ့ တွေ့ပြီး အမျိုးသား ရေးသမားဖြစ် လာသလို အခု ညောင်ကန်(ခ) ကိုကိုမောင်ကလည်း အမျိုးသား ရေး အစွန်း ရောက် ဘ၀ မရောက်ခင်က ပြည့်တန်ဆာတွေရဲ့ အငှားခင်ပွန်း၊ ညစ်ညမ်း ဗီဒီယိုရိုက်ကူး ရောင်းစား သူဖြစ်ပါတယ်။ 

မြောက်ဒဂုံမှာနေထိုင်တဲ့ ညောင်ကန်(ခ) ကိုကိုမောင်  အမျိုးသား ရေးအစွန်း ရောက် မဖြစ်လာခင်မှာ လုပ်ကိုင်တဲ့ အလုပ်က  ပြည့်တန်ဆာတွေ စုပေါင်း ငှားနေတဲ့  အိမ် သို့မဟုတ် ပြည့်တန်ဆာ တွေနဲ့ ဆက်ဆံလို့ရတဲ့ အိမ်တွေကို ရဲဝင်ဖမ်းရင်  ပြည့်တန်ဆာ အလုပ်လုပ်နေတာမဟုတ်ဘဲ ယောကျ်ား နဲ့ နေတာဖြစ်ကြောင်း  သက်သေပြနိုင်ရန် အတွက် ပြည့်တန်ဆာတွေရဲ့ အငှားခင်ပွန်းအဖြစ် နေထိုင်ပေးရတဲ့ အလုပ်ကို အဓိက လုပ်ကိုင်တာပဲ ဖြစ်ပါတယ်။ 

ဒါ့အပြင် သူကိုယ်တိုင်လည်း ပြည့်တန်ဆာတွေနဲ့ အတူနေပြီး ဗီဒီယိုရိုက်ကူးပြီး မြန်မာ ညစ်ညမ်း ဗီဒီယိုဆိုပြီး ရောင်းစားတာမျိုးတွေလည်းလုပ်ပါတယ်။ သူ့ဗီဒီယိုတွေကို နာမည်ကြီး အပြာWebsite တချို့မှာရှိနေပါသေးတယ်။ 

ညောင်ကန်(ခ) ကိုကိုမောင်က  အမျိုးသားရေးအစွန်းရောက် အဖွဲ့တစ်ခုဖြစ်တဲ့  မြန်မာနိုင်ငံလုံး ဆိုင်ရာအမျိုးသားရေးအစည်းအရုံး(MNO) အဖွဲ့မှာလည်း ပါဝင်သူ ဖြစ်ပါတယ်။   သူ့ကို အမျိုးသား ရေး ခေတ်ဦးသမားလို့ ပြောလို့ ရပါတယ်။

ရန်ကုန် အမျိုးသားရေးအစွန်းရောက် လောကမှာ လူဦးရေ လက်ချိုးရေလို့ရ တဲ့အချိန်ကတည်းက စစ်တပ်ထောက်ခံတဲ့ အမျိုးသားရေး အဖြစ် ပါဝင် နေခဲ့တာပါ။ ယုံကြည်ချက်ကြောင့်မဟုတ်ပါဘူး။ ငွေရလို့ဖြစ်ပါတယ်။ 

အမျိုးသားရေးအစွန်းရောက် လောကရဲ့ ထိပ်သီး တွေဖြစ်တဲ့  သာကေတ လူ မိုက် တင်လင်းထိုက် ခေါ် လင်းလင်း ၊ ဝင်းကိုကိုလတ်(စွေစောင်း ၊ ညစ်ညမ်း အပြာစာရေးသူ ဖိုးလောင်တီး) နဲ့လည်း အမြဲအတူ သွားလာသောက်စား နေသူ လည်းဖြစ်ပါတယ်။ 

ဝင်းကိုကိုလတ်နဲ့ ညောင်ကန်(ခ) ကိုကိုမောင်က အရင်ညစ်ညမ်းစာပေ၊ ဗီဒီယို တွေ ရိုက်ကူးချိန် ကတည်းက ခင်မင်ရင်းနှီးခဲ့ကြတဲ့ ငယ်ပေါင်းကြီးဖော်တွေ လည်းဖြစ်ပါတယ်။ 

 ဝင်းကိုကိုလတ် က အွန်လိုင်းမှာ ပြည့်တန်ဆာတွေနဲ့ ချိတ်ဆက်ရှာဖွေပေးတဲ့ အလုပ်လုပ်နေချိန်မှာ ညောင်ကန်(ခ) ကိုကိုမောင်ကလည်း ဝင်းကိုကိုလတ်ကို ကူညီ ချိတ်ဆက်ရှာပေးရင်း အကျိုးတူ အလုပ် လုပ်ကြပါတယ်။ ဖာခေါင်း အလုပ်ကို အတူတွဲလုပ်ခဲ့ကြတာလည်းဖြစ်ပါတယ်။ 

ညောင်ကန် ခေါ် ကိုကိုမောင် ရဲ့ ညစ်ညမ်း လိင်ကိစ္စ စိတ်ဝင်စားမှုက အမျိုးသား ရေး အစွန်းရောက် ဖြစ်လာချိန်မှာလည်း ငြိမ်သက်မသွားခဲ့ပါဘူး။ 

ဓမ္မစကူးလ် ဆရာမ တစ်ယောက်ကို ကြိုက်နှစ်သက်ဟန်ဆောင်ပြီး တည်းခို ခန်း မှာ အတူနေပါတယ်။ အဲဒီလို အတူနေခဲ့တာကို ဗီဒီယို ခိုးရိုက်ပြီး    အွန်လိုင်းပေါ်က အပြာဝက်ဆိုဒ်တွေမှာ ပြန်လည် ရောင်းချခဲ့ပါတယ်။ အဲဒီလိုပဲ အခြားသောအမျိုးသမီးငယ်တွေကို လည်း ကြိုက်နှစ်သက်ချင်ယောင် ဆောင် ကာ အတူနေထိုင်ပြီး ဗီဒီယိုရိုက်ကူး ရောင်းစားတာတွေ အခုထက်ထိကို လုပ်နေတုန်းပါပဲ။ 

လက်ရှိအချိန်မှာတော့ ညောင်ကန်(ခ) ကိုကိုမောင်က စစ်အာဏာရှင် ဆန့်ကျင် ရေး လှုပ်ရှားသူ လူငယ် တွေကို အဓိက ပစ်မှတ်ထား ရှာဖွေ ဖမ်းဆီးတဲ့ အလုပ် ကို လုပ်ကိုင်နေပါတယ်။ 

အမျိုးဘာသာသာသနာ စောင့်ရှောက်ရေး မဘသ၊ အမျိုးသားရေး ကြွေးကြော် နေကြသူတွေဟာ မကောင်းမှုမှန်သမျှ အကုန်လုပ်ရင်း စစ်တပ်အသုံးချခံဘ၀ကို ငွေရယူ ကျေကျေနပ်နပ်ခံယူခဲ့ကြတဲ့ ဒုစရိုက်သမားတွေဆိုတာ ပေါ်လွင်နေပြီ ဖြစ်ပါတယ်။ 

(Facebook ရဲ့ လူမှုကွန်ရက် စည်းမျဉ်းစည်းကမ်းတွေအရ သူနဲ့ပတ်သက် တာတွေ ကို အသေးစိတ် ဖော်ပြဖို့ ခက်ခဲတာမို့ တယ်လီဂရမ်မှာ သွားရောက် အသေးစိတ်ကြည့်နိုင်ပါတယ်)

ဆက်ဖတ်ရန် →

မင်းကင်းမောင်မြင့်၏ပြောကြားချက် ဖရိုဖရဲဖြစ်နေသည့်စစ်တပ်ကို ပြိုကွဲအောင် လှုံ့ဆော်ပေးဟုဆို

မင်းကင်းမောင်မြင့်၏ပြောကြားချက် ဖရိုဖရဲဖြစ်နေသည့်စစ်တပ်ကို ပြိုကွဲအောင် လှုံ့ဆော်ပေးဟုဆို

📅 💬 မှတ်ချက်

6 Jan 2023 by MPA

လစ်ဗျားအာဏာရှင် ကဒါဖီ ကျဆုံးခန်းကို ဥပမာပေးကာ ကုလသမဂ္ဂလုံခြုံရေးကောင်စီ၏ မြန်မာ့အရေးဆုံးဖြတ်ချက်သည် စိုးရိမ်စရာကောင်းကြောင်း မင်းကင်းမောင်မြင့်၏ ပြောကြားချက်သည် ဖရိုဖရဲဖြစ်နေသည့်စစ်တပ်ကို ပြိုကွဲအောင် လှုံ့ဆော်ပေးနေကြောင်း အငြိမ်းစားတပ်အရာရှိကြီးတစ်ဦးက ပြောသည်။

မင်းကင်းမောင်မြင့်၏ ယင်းသို့သော ပြောဆိုချက် လူမှုကွန်ရက်ပေါ်သို့ ဒီဇင်ဘာ၃၁ရက်နေ့က တက်လာခဲ့ပြီးနောက် စစ်ကောင်စီတပ်အတွင်း ကြီးမားသောရိုက်ခတ်မှုဖြစ်ပေါ်စေခဲ့ပြီး မြန်မာ့အရေး လုံခြုံရေးကောင်စီဆုံးဖြတ်ချက်မှာ အောက်ခြေအရာရှိနှင့်စစ်သားများကြား ပိုမိုနက်ရှိုင်းလာ ကြောင်း သိရသည်။

“မောင်မြင့်ဆိုတာက သူတို့လူ။ အရင်က ဝန်ကြီးတွေ၊ဒုဝန်ကြီးတွေလုပ်ခဲ့တာဆိုတော့ ပြည်သူတွေက မင်းကင်းမောင်မြင့်ကိုကျပ်မပြည့်ဘူးလို့ သဘောထားကြပေမဲ့ စစ်တပ်ထဲကျတော့ သူ့စကားကို အလေးထားကြတယ်။ တပ်မမှူးလောက်လုပ်လာတဲ့ကောင် ပြောတဲ့စကား အလကားမဟုတ်ဘူးလို့ စစ်တပ်ထဲ မှတ်ယူကြတယ်။ မောင်မြင့်စကားထွက်လာပြီးတော့ စစ်တပ်ထဲမှာ ရှေ့မီနောက်မီတွေကလည်း အရင်သန်းရွှေလက်ထက်တုန်းက လုံခြုံရေးကောင်စီ ဆုံးဖြတ်တာမျိုးမရှိခဲ့တာကို ပြောလာကြတယ်”ဟု ၎င်းကပြောသည်။

ထို့ပြင် မင်းအောင်လှိုင်က နေပြည်တော်တွင် ရွှေစလွယ်ကြီး သိုင်းကာ ဗိုလ်ရှုခံနေချိန်၌ အောက်ခြေ စစ်သားများက မဝရေစာဖြင့် အသေခံစစ်တိုက်ကာအရှုံးကြီးရှုံးနေရခြင်း၊ ပြည်သူက စစ်တပ်ကို လုံးဝလက်မခံခြင်း၊မြန်မာ့နွေဦးတော်လှန်ရေးကို ပံ့ပိုးပေးမည့် အမေရိကန်NDAAဥပဒေ စသည့် အကြောင်းအရာများကြောင့် စစ်တပ်တွင်း ရိုက်ခတ်မှုပြင်းနေချိန်၌ မင်းကင်းမောင်မြင့်က အဆင်း ဘီးတပ်ပေးလိုက်ခြင်းဖြစ်ကြောင်းလည်း ၎င်းကဆိုသည်။

“မောင်မြင့်က သူတို့ချင်းကြား တိုးတိုးကြိတ်ဆွေးနွေးရမယ့်စကားကို ဘာလို့ လူတွေအားလုံးကြား အောင်ပြောတာလဲဆိုတော့ သူ့စကားကို မင်းအောင်လှိုင်က အဖက်မလုပ်တာကြောင့်လို့ ကောက်ချက်ချနိုင်ပါတယ်”ဟုလည်း ၎င်းကဆက်ပြောသည်။

ကုလသမဂ္ဂလုံခြုံရေးကောင်စီ၏ မြန်မာ့အရေးဆုံးဖြတ်ချက်သည် တရုတ်နှင့် ရုရှားတို့က  ဗီတိုအာဏာမသုံးခဲ့၍  ဆုံးဖြတ်ချက်အတည်ဖြစ်သွားရကြောင်းနှင့်  မြန်မာနိုင်ငံ ကုလသမဂ္ဂ အဖွဲ့ဝင်နိုင်ငံဖြစ်ချိန်မှစ၍ တစ်ကြိမ်မျှ ယခုလို ဆုံးဖြတ်ချက်ချမှတ်ခြင်းမခံရဖူးသေးကြောင်း  မင်းကင်းမောင်မြင့်ကပြောသည်။

“မြန်မာနိုင်ငံနဲ့ပတ်သက်ရင်အခုဟာက No Fly Zone Resolution လောက်တော့လည်း မပြင်းထန်သေး ဘူး။ မပြင်းထန်ဘူးဆိုပေမယ့် နောက်ထပ်ထပ်ပြီးတော့မှ လိုက်လာမယ့် ပထမလှိုင်းပဲရှိသေးတယ်။ နောက်က ဆင့်ကဲဆင့်ကဲ လိုက်လာဦးမှာ၊ ဘယ်လိုလာဦးမလဲ မသိသေးဘူး”ဟု မင်းကင်းမောင်မြင့်က ပြောသည်။

မောင်မြင့်သည် သန်းရွှေနှင့်သိန်းစိန်လက်ထက်တို့တွင် ဒုဝန်ကြီးနှင့်ဝန်ကြီး တာဝန်ယူခဲ့ဖူးသူ ဖြစ်သည်။

မင်းကင်းမောင်မြင့်ပြောစကားနားထောင်ရန်နှိပ်ပါ

ဆက်ဖတ်ရန် →

စစ်တပ်က ဝင်ရောက်ပစ်ခတ်ခဲ့တာကြောင့် အကျဉ်းသားတစ်ဦးသေဆုံး

စစ်တပ်က ဝင်ရောက်ပစ်ခတ်ခဲ့တာကြောင့် အကျဉ်းသားတစ်ဦးသေဆုံး

📅 💬 မှတ်ချက်

ယနေ့ (၂၀၂၃၊ ဇန်နဝါရီ ၆)ရက်နေ့ ပုသိမ်အကျဉ်းထောင်မှာ နိုင်ငံရေးအကျဉ်းသားများနဲ့ ထောင်ဝန်ထမ်းများ စကားများရန်ဖြစ်တာကို စစ်တပ်က ဝင်ရောက်ပစ်ခတ်ခဲ့တာကြောင့် အကျဉ်းသားတစ်ဦးသေဆုံးခဲ့ပြီး အသက်အန္တရာယ်စိုးရိမ်ရသူ (၈)ဦးရှိသည့်အပြင်၊ အကျဉ်းသား (၆၀)ကျော် ထိခိုက်ဒဏ်ရာရရှိခဲ့ပါတယ်။

ဒဏ်ရာရရှိထားတဲ့အကျဉ်းသားတွေကိုလည်း အခုချိန်ထိ လက်ပြန်ကြိုးတုပ်ပြီး စစ်ဆေးမေးမြန်းနှိပ်စက်တာတွေ ပြုလုပ်နေတယ်လို့ သိရပါတယ်။

အကြမ်းဖက်စစ်တပ်မှ အကျဉ်းသားတွေအပေါ် လူမဆန်စွာပြုမူနေမှုများအား ကျွန်တော်တို့အားလုံး လက်ပိုက်ကြည့်နေလို့မဖြစ်ပါဘူး၊ အသံတွေကျယ်ကျယ်လောင်လောင်ထွက်ပေးကြဖို့လိုပါတယ်။

ANTS - ပုရွက်ဆိတ်များ

Edit text & Shared _ #အေအန်န်အမ်မ်တီ

ဆက်ဖတ်ရန် →

စစ်ကြောင်းမှူးသီဟသူရဗိုလ်မှူးလက်ပြတ်ကွပ်ကဲခဲ့တဲ့ကြာအင်းဆိပ်ကြီးစခန်းသိမ်...

စစ်ကြောင်းမှူးသီဟသူရဗိုလ်မှူးလက်ပြတ်ကွပ်ကဲခဲ့တဲ့ကြာအင်းဆိပ်ကြီးစခန်းသိမ်...

📅 💬 မှတ်ချက်

ဆက်ဖတ်ရန် →

ကြာအင်းဆိပ်ကြီး၊ ခလရ ၂၈၄ ယာယီတပ်ရင်းမှူး ဒုဗိုလ်မှူးကြီး/ဗိုလ်မှူး မင်းမောင်မောင်ဟိန်း တိုက်ပွဲ အတွင်း သေဆုံး

ကြာအင်းဆိပ်ကြီး၊ ခလရ ၂၈၄ ယာယီတပ်ရင်းမှူး ဒုဗိုလ်မှူးကြီး/ဗိုလ်မှူး မင်းမောင်မောင်ဟိန်း တိုက်ပွဲ အတွင်း သေဆုံး

📅 💬 မှတ်ချက်

ကြာအင်းဆိပ်ကြီး၊ ခလရ ၂၈၄  ယာယီတပ်ရင်းမှူး ဒုဗိုလ်မှူးကြီး/ဗိုလ်မှူး မင်းမောင်မောင်ဟိန်း တိုက်ပွဲ အတွင်း သေဆုံး၊ အလောင်းကို ရဟတ်ယာဉ်ဖြင့် သယ်

ရန်ကုန်၊ ဇန်နဝါရီ ၆ ခေတ်သစ်

ကရင်ပြည်နယ်၊ ကြာအင်းဆိပ်ကြီး၊ ခလရ ၂၈၄  ယာယီတပ်ရင်းမှူး ဒုဗိုလ်မှူးကြီး/ဗိုလ်မှူး မင်းမောင်မောင်ဟိန်း တိုက်ပွဲအတွင်း သေဆုံးသွားခဲ့ပြီး အလောင်းကို စစ်ကောင်စီက ရဟတ် ယာဉ် ဖြင့် သယ်ယူသွားကြောင်း စစ်တပ်သတင်းရင်းမြစ်များထံမှ သိရှိရသည်။ 

ဇန်နဝါရီလ ၄ ရက်နေ့ ကြာအင်းဆိပ်ကြီး ခလရ ၃၂ ၊ ခလရ ၂၈၄ ၊ ခလရ ၂၈၃ တပ်များကို တော် လှန်ရေးအင်အားစုများက ၀ိုင်းဝန်းတိုက်ခိုက်ခဲ့ကြရာ စစ်ကောင်စီဘက်မှ ခလရ ၂၈၄ တပ်ရင်းမှူး ဒုဗိုလ်မှူးကြီး/ဗိုလ်မှူး မင်းမောင်မောင်ဟိန်း အပါအဝင် ဗိုလ်မှူး၊ ဗိုလ်ကြီး စုစုပေါင်း၂၀ နီးပါး  သေဆုံး(သို့မဟုတ်) ပျောက်ဆုံးနေကြောင်း၊ တချို့အရာရှိများ၏ အလောင်းများကို လိုက်လံ ရှာဖွေ ကောက်ယူနေကြောင်း တပ်သတင်းရင်းမြစ်က ပြောသည်။ 

"ဒုဗိုလ်မှူးကြီး/ဗိုလ်မှူးမင်းမောင်မောင်ဟိန်းက အရင် ရှမ်းပြည်ဘက်ကနေ ရာထူးတိုးပြောင်းလာတာ။ DSA 46 ကျောင်းဆင်း။  ၂၈၄ ယာယီ တပ်ရင်းမှူး လုပ်နေရင်း ကျဆုံးပါတယ်" ဟု စစ်တပ် သတင်းရင်းမြစ်က ပြောသည်။ 

ဇန်နဝါရီလ ၄ ရက်နေ့ တော်လှန်ရေးအင်အားစုများ၏ တိုက်ခိုက်မှုကြောင့် ကြာအင်းဆိပ်ကြီး ခလရ ၂၈၄ ၊ ခလရ ၃၂ နှင့် ခလရ ၂၈၃ တွင် သေဆုံးသွားကြေသော  အရာရှိနှင့်စစ်သား အလောင်းများကို ကားများဖြင့် အခေါက်ခေါက် သယ်ထုတ်ရကြောင်း ကြာအင်းဆိပ်ကြီး ဒေသပြည်သူများထံမှ သိရှိ ရသည်။ 

တော်လှန်ရေးအင်အားစု သတင်းရင်းမြစ်များက ကြာအင်းဆိပ်ကြီးရှိ တပ်ရင်း ၃ ခုကို ဝင်ရောက် ပစ်ခတ်မှုတွင် စစ်တပ်ဘက်မှ ရာဂဏန်းချီ သေဆုံးသည်ဟု ပြောဆိုသော်လည်း စစ်တပ်ဘက်ကမူ PDFနှင့် တိုင်းရင်းသားလက်နက်ကိုင်အဖွဲ့များဘက်ကသာ  အကျအဆုံးများသည်ဟု သတင်း ထုတ်ပြန်ခဲ့သည်။

ဆက်ဖတ်ရန် →

သီတဂူဗုဒ္ဓ တက္ကသိုလ်မှ ဘွဲ့ရ နာယက ဆရာတော် အရှင်ဂန္ဓသာရ အပါအဝင် လူ ၄ ဦးကို စစ်တပ်က ပစ်သတ်

သီတဂူဗုဒ္ဓ တက္ကသိုလ်မှ ဘွဲ့ရ နာယက ဆရာတော် အရှင်ဂန္ဓသာရ အပါအဝင် လူ ၄ ဦးကို စစ်တပ်က ပစ်သတ်

📅 💬 မှတ်ချက်

ဒီပဲယင်းကွဲကျေးရွာကို စစ်တပ်က ဝင်ရောက် ပစ်ခတ်စီးနင်းပြီး  သီတဂူဗုဒ္ဓ တက္ကသိုလ်မှ ဘွဲ့ရ နာယက ဆရာတော် အရှင်ဂန္ဓသာရ အပါအဝင် လူ ၄ ဦးကို စစ်တပ်က ပစ်သတ်၊ ရွာကို မီးတင်ရှို့ 

ရန်ကုန်၊ ဇန်နဝါရီ ၆ ခေတ်သစ်

စစ်ကိုင်းတိုင်း၊ စစ်ကိုင်းမြို့နယ်၊ ဒီပဲယင်းကွဲကျေးရွာကို စစ်တပ်က ဝင်ရောက် ပစ်ခတ်စီးနင်းပြီး  သီတဂူဗုဒ္ဓတက္က သိုလ် မှ မဟာဘွဲ့ရ  သံဃာတော်တစ်ပါး အပါအဝင် ပြည်သူ ၄ ဦးကို ပစ်သတ်ကာ  ရွာကိုပါ  မီးတင်ရှို့သွားကြောင်း ဒေသ ပြည်သူများထံမှ သိရှိရသည်။ 

ဇန်နဝါရီလ ၆ ရက်နေ့ နံနက် ၆ နာရီအချိန် ကြွယ်ပုံပျူစောထီးကျေးရွာမှ ထွက် လာသော စစ်ကြောင်းနှင့်ပျူစောထီးများက ဒီပဲယင်းကွဲကျေးရွာကို ပစ်ခတ် ဝင် ရောက်လာကြောင်း၊ ယင်းနောက် ဒီပဲယင်းကျေးရွာတွင် ယာယီ သီတင်း သုံးနေ သော သီတဂူဗုဒ္ဓတက္ကသိုလ်ကျောင်းဆင်း မဟာ ဘွဲ့ရ   သံဃာတော် တစ်ပါးကို လည်း စစ်တပ်က ပစ်သတ်လိုက်ကြောင်း၊ ထို့ပြင် အခြား ပြည်သူ ၃ ဦးကိုလည်း ပစ်သတ်ကြောင်း၊ ယင်းနောက် ရွာကို မီးတင်ရှို့ကြောင်း သိရှိရသည်။ 

စစ်တပ်က ပစ်သတ်လိုက်သော ဆရာတော်မှာ သီတဂူဗုဒ္ဓတက္ကသိုလ်မှ ဘွဲ့ရ ဖြစ်ပြီး   သီတဂူဘွဲ့ရများ နာယက ၁၀ ပါးစာရင်းဝင် ဆရာတော် အရှင် ဂန္ဓသာရ ဖြစ်ကြောင်း သိရှိရသည်။ 

"ဒီနေ့ မနက်ခင်း ၆နာရီအချိန် ကြွယ်ပုံပျူရွာကနေ ထွက်လာပြီး ဒီပဲယင်းကွဲ ရွာကိုလက်နက်ကြီးတွေပစ်ဝင်လာတယ်။ အဲလိုပစ်ဝင်လာတော့ ရွာသားတွေ အကုန် ထွက်ပြေးရင်း သူတို့ဖမ်းမိတဲ့ လူ၃ဦးနဲ့ ဘုန်းကြီးတစ်ပါးကို ပစ်သတ် ခဲ့ကြ တယ်။ ဘုန်းကြီးက စာတတ်ပေတ်ပါဗျာ။ ဘာမှနိုင်ငံရေးမလုပ် ဘဲနဲ့ သတ်ထားခဲ့ကြတာ။ဘုန်းကြီးက သီတဂူဗုဒ္ဓတက္ကသိုလ်ကနေ မဟာဘွဲ့ရ ထားတဲ့ ဆရာတော်ပါ။ သီရိလင်္ကာနိုင်ငံဘက်ကို ကြွပြီးမြန်မာပြည် လာတဲ့ သံဃာတော်ပါ။ သက်တော်၄၀ကျော်၊ဝါတော်၂၀ကျော်လောက်တော့ရှိမယ် ။ နောက်ပြီး အမျိုးသမီးတစ်ဦးနဲ့ရွာသားတစ်ဦးကိုလည်းသတ်ထားခဲ့ကြတယ်။ နောက်တစ်ဦးကတော့ PDFတစ်ယောက်ပါ။ စုစုပေါင်း ၄ ဦးကို စစ်တပ်က ပစ် သတ်ထားခဲ့တာပါ" ဟု ဒေသပြည်သူတစ်ဦးက ပြောသည်။ 

စစ်တပ်က သံဃာတစ်ပါး အပါအဝင် လူ ၄ ဦးကို ပစ်သတ်ပြီးနောက် ကျေးရွာ ကို လည်း မီးတင်ရှို့လိုက်သဖြင့် နေအိမ် ၇၀ ကျော် မီးလောင်ဆုံးရှုံးခဲ့ရကြောင်း ဒေသပြည်သူများက ပြောဆိုသည်။ 

"ကျနော်တို့ရွာကို  ဝင်ချင်နေတာကြာပြီ။ ကြွယ်ပုံက ပျူစောထီးတွေ ဝင်ဖို့ လက်ညှိုး ထိုးနေတာ။ ကြွယ်ပုံ ရွာက မဖွံ့ဖြိုးဘူး။ ကြွယ်ပုံကို စစ်တပ်က ဆက်ကြေးတောင်းတော့ ဒီပဲယင်းကွဲကို တောင်းရင် နှစ်အိမ်လောက် တောင်း ရင် သိန်း ၁၀၀ ရမယ်လို့ ပြောပြီး စစ်တပ်ကို သွားခိုင်းတယ်။ အခုတော့ စစ်တပ် နဲ့ ပျူစောထီးပေါင်းကြီး ဒီပဲယင်းကွဲကျေးရွာကို ချေမွသွားတာပါ" ဟု ဒီပဲယင်းကွဲ ကျေးရွာသားတစ်ဦးက ပြောသည်။ 

ဓာတ်ပုံ- ဒီပဲယင်းကွဲကျေးရွာတွင် စစ်တပ်နှင့်ပျူစောထီးများ ပစ်သတ်ခဲ့သော အရှင်ဂန္ဓသာရ နှင့်လူ ၃ ဦးအသတ်ခံထားရသည့်မြင်ကွင်းများ။

ဆက်ဖတ်ရန် →

သီတဂူ ကျဆုံးမှုသည် နွေဦးတော်လှန်ရေး၏ အောင်မြင်မှုတစ်ခုဖြစ်သည်

သီတဂူ ကျဆုံးမှုသည် နွေဦးတော်လှန်ရေး၏ အောင်မြင်မှုတစ်ခုဖြစ်သည်

📅 💬 မှတ်ချက်

ဘာသာရေးအသုံးချ၍ ကြီးပွားချမ်းသာလို၊ သြဇာထူထောင်လိုခြင်းကို လက်မခံသည့် ယဉ်ကျေးမှုကို ဒီမိုကရေစီတော်လှန်ရေးနှင့်အတူ ထူထောင်မှသာလျှင် နောင်သီတဂူများ မပေါ်ပေါက်အောင် တားမြစ်နိုင်မည်။ 

ဆွေဝင်း

Published on Jan 5, 2023

၂၀၀၀ ခုနှစ်ခန့်ကဖြစ်သည်။ ကျွန်တော်သည် မြန်မာပြည်အလယ်ပိုင်း မြင်းခြံထောင်ထဲရှိ အကျဉ်းခန်းငယ်တစ်ခု၏ တံခါးသံတိုင်များကြားထဲသို့ နားရွက်ကို ရသမျှတေ့ပြီး လေထဲတွင် လွင့်လာသော သီတဂူဆရာတော် အရှင်ဉာဏိဿရ၏ တရားတစ်ပုဒ်ကို အတင်းနားစွင့်၊ နားထောင်နေမိသည်။

၎င်းဟောပြောနေသည့် အကြောင်းအရာမှာ ဖခင်ကို သတ်ဖြတ်ပြီး ထီးနန်းလုခဲ့သော အဇာတသတ်သည် ညစဉ် အိပ်မပျော်နိုင်ဘဲ ပူဆွေးနောင်တရနေသောကြောင့် ဂေါတမဗုဒ္ဓထံသို့ ချဉ်းကပ်တရားနာကြားခဲ့ပုံဖြစ်သည်။ လူတစ်ဦးသည် ၎င်းကျုးလွန်ခဲ့သော အပြစ်အတွက် နောင်တရရုံမျှမက၊ ထိုအပြစ်ကို ဝန်ခံခြင်း၊ ထိုအပြစ်မျိုး နောက်ထပ်တစ်ဖန်မကျူးလွန်ခြင်းဖြင့် အပြစ်ဆေးကြောရပုံကို အဇာတသတ်ဖြစ်ရပ် အကြောင်းပြု၍ ဟောကြားနေခြင်းဖြစ်သည်။

ဆရာတော်၏ အာဝဇ္ဇန်းရွှင်ရွင်ဟောပြောမှု၊ ဗုဒ္ဓဝင်ဇာတ်နိပါတ်များကို ၏၊ သည်မရွေး ပြန်လည်ဟောခြင်းမဟုတ်ဘဲ ပုဂ္ဂလဓိဋ္ဌာန်ဖြင့် အတန်အသင့် ပြန်လည်ပိုင်းခြားသုံးသပ်ပြီး ဟောကြားမှုများသည် ထိုခေတ်ထိုအချိန်က မြန်မာဗုဒ္ဓဘာသာများကြားတွင် လျှမ်းလျှမ်းတောက်တောက် အောင်မြင်ခဲ့သည်။

ကိုယ်ကျင့်သီလနှင့် ခြိုးခြံကျင့်ကြံမှုအရာတွင် ကျော်ကြားသော မန္တလေးတောင်မြို့ဆရာတော် အရှင်ဇနကာဘိဝံသ၏ ဘုန်းကြီးပျံပွဲတွင် သီတဂူဟောကြားခဲ့သော နောက်ဆုံးဆယ်လ မြတ်ဗုဒ္ဓနှင့် ဘဝတန်ဖိုးဟောကြားချက်များသည် ၎င်း၏ အထင်ရှားဆုံးသော ဟောကြားချက်များဖြစ်လေသည်။

စစ်အုပ်ချုပ်ရေးအောက်တွင် အကြောက်တရားဖြင့် ရှင်သန်နေရသော မြန်မာလူထုသည် ၎င်းတို့ကြောက်ပါသည်ဆိုသည့် စစ်ခေါင်းဆောင်များကို ပြည်တွင်းနေ၍ မသိမသာဝေဖန်သူ ဘုန်းတော်ကြီးများ၊ အနုပညာရှင်များ၊ စာရေးဆရာ ကဗျာဆရာ၊ ကာတွန်းဆရာများကိုလည်း ခေတ်အဆက်ဆက် လေးစားသည့် အစဉ်အလာလည်းရှိခဲ့ရာ သီတဂူ၏ ရာဇောဝါဒ (မင်းကျင့်တရား ဆယ်ပါး) တရားနှင့် ၂၀၀၇ ရွှေဝါရောင်တော်လှန်ရေးဖြိုခွင်းပြီးကာလတွင် ဟောသော လူမိုက်တို့၏ သွားရာလမ်းတရားများသည် လူထု၏ စစ်အာဏာရှင်များအား နာကြည်းမှုကို ဒဏ်ကြေဆေးလိမ်းပေးသကဲ့သို့လည်း ဖြစ်ခဲ့၏။

Thidagu_and_mah.jpeg

၂၀၂၀ တွင် ပြုလုပ်သည့် အခမ်းအနားတစ်ခုတွင် သီတဂူဆရာတော် အရှင်ဉာဏိဿရ၊ အာဏာသိမ်း စစ်ခေါင်းဆောင်တို့ကို ယှဉ်တွဲတွေ့ရစဉ်။ (ဓာတ်ပုံ - Myanmar Now)

မိရိုးဖလာဗုဒ္ဓဘာသာဘုန်းတော်ကြီးများကို ရှေးရိုးမပျက်ကြည်ညိုမှု၊ မျက်ကန်းယုံကြည်မှု၊  အဟောအပြောကောင်းမှု၊ စစ်အာဏာရှင်ကို မသိမသာဝေဖန်ဖူးသဖြင့် ပြည်သူ့ဘုန်းဘုန်း တို့ဘုန်းဘုန်းဟု စိတ်ပိုင်းဆိုင်ရာကိုးကွယ်ရာရှာဖွေမှုများကြားတွင် သြဇာကြီးထွားလာသော သီတဂူဆရာတော်၏ မင်းသားခေါင်းစွပ်သည် ၂၀၁၀ ဒီမိုကရေစီအကူးအပြောင်းတွင် စတင်လှုပ်ခတ်လာပြီး ယခုအခါတွင် စစ်အာဏာရှင်အားပေး ထောက်တိုင် ဘုန်းကြီးအဖြစ် သိသာထင်ရှားလာကာ ၎င်းအား ဝေဖန်မှုများသည် ၂၀၂၁ အာဏာသိမ်းပြီးချိန်မှစ၍ ပြောင်ပြောင်တင်းတင်းဖြစ်ပေါ်လာခဲ့ပြီဖြစ်သည်။ 

ထိုကဲ့သို့ဖြစ်မလာခင်ကတည်းက သီတဂူဆရာတော်နှင့် ပတ်သက်ပြီး မေးခွန်းထုတ်ဖွယ် အချက်နှစ်ချက် အမြဲတစေဖြစ်ပေါ်ခဲ့သည်။ ပထမတစ်ချက်မှာ ၎င်း၏ အောင်မြင်မှုကို ဖြစ်စေသည့် အကြောင်းရင်းပင်ဖြစ်သည်။ စစ်ကိုင်းတောင်ရိုးရှိ ၎င်း၏ ဘုန်းကြီးကျောင်း၊ သီလရှင်ကျောင်းများအတွက် ရေရရှိစေရေး အားထုတ်မှုအပါအဝင် ဆေးကုသမှုနှင့် အခြားသော လူမှုလုပ်ငန်းများဖြစ်သည်။ 

မိရိုးဖလာဗုဒ္ဓဘာသာဘုန်းတော်ကြီးများသည် တရားဟောခြင်း၊ တရားကျင့်ကြံပို့ချခြင်းများပြုလုပ်ကြသော်လည်း လူထုကို ပရဟိတအကျိုးဆောင်သည့် လုပ်ငန်းများမလုပ်ကြ၊ လုပ်သည့်ဘုန်းတော်ကြီးသည် ခေတ်မီသည်၊ ပို၍ အများအကျိုးကိုဆောင်သည်ဟု လူ့အဖွဲ့အစည်းတွင် ထင်မှတ်လာခဲ့ပြန်သည်။ ကမ္ဘာပေါ်တွင် ထိုအခြေအနေကို ကျဉ်းမြောင်းသည့် ဘာသာရေးအသိုက်အအုံမှ ခွဲထွက်ပြီး လူထုကို အခြေပြုသော Socially Engaged ဗုဒ္ဓဘာသာဟူ၍ အကောင်းသဘောဖြင့် သမုတ်ကြပြန်သည်။ 

ထိုကိစ္စသည် မြန်မာနိုင်ငံ ဗုဒ္ဓသံဃာ့အသိုင်းအဝန်းတွင် ကြီးမားသော အငြင်းပွားဖွယ်ရာကိစ္စ ဖြစ်ခဲ့သင့်သော်လည်း အကျင့်ထက် ဝါကိုလည်းကောင်း၊ သီလထက် ဘွဲ့ထူးဂုဏ်ထူးများ၊ အဟောအပြောကောင်းမှုနှင့် နာမည်ကျော်ကြားမှုကို ပိုအလေးထားသော မြန်မာနိုင်ငံရှိ လူပရိသတ် ရဟန်းပရိသတ်များကြားထဲတွင် အငြင်းပွားဖွယ်ရာမဖြစ်ခဲ့ပါ။

ဘုန်းတော်ကြီးများနှင့် သာမန် ဗုဒ္ဓဘာသာ လူဝတ်ကြောင်များကို ခြားနားစေသော အဓိကအချက်မှာ ဘုန်းတော်ကြီးများသည် ကိလေသာတိုက်ဖျက်ရေးလုပ်ငန်းကို ဇောက်ချ၍ ဘဝတစ်ခုလုံး အချိန်တိုင်းကို ရင်းနှီးပြီးလုပ်မည် မလုပ်မည်ဆိုသော အချက်သာဖြစ်သည်။ ကိလေသာတိုက်ဖျက်မည်ဆိုပါက သီလကို ညစ်စေသော အပြုအမူမှန်သမျှကို အလုံးစုံရှောင်ကြဉ်ခြင်း၊ ခြိုးခြံချွေတာခြင်း၊ စိတ်၏ တည်ငြိမ်မှု ထိခိုက်စေသော အခြေအနေများကို အပတ်တကုတ် ရှောင်ရှားခြင်း၊ ဘွဲ့ထူးဂုဏ်ထူးနာမည်ကျော်ကြားမှုများကို အလေးဂရုမပြုခြင်း၊ နိုင်ငံလူမျိုးအသားအရောင်မခွဲခြားဘဲ လူသားအားလုံးပေါ် မေတ္တာဂရုဏာထားရှိရန် ကြိုးပမ်းခြင်း စသည့် လက္ခဏာများသည် မည့်သည့်ဘုန်းကြီးကောင်းတွင်မဆို ရှိကိုရှိရမည်ဖြစ်သည်။ သီတဂူသည် ထို့ကဲသို့ လူနှင့်ရဟန်း စည်းခြားမှုကို ဖြစ်ပေါ်စေသော ကိလေသာတိုက်ဖျက်ရေးလုပ်ငန်းများကို လုပ်ခဲ့ပါသလော။

Thidagu_sagaing.jpeg

စစ်ကိုင်းရှိ သီတဂူကျောင်းကို ၂၀၂၀ ခုနှစ်က တွေ့ရစဉ်။ (ဓာတ်ပုံ - Myanmar Now)

ဗုဒ္ဓသည် အုပ်စုဖွဲ့ဘာသာရေးကို မထူထောင်ခဲ့သည့်အလျောက် ၎င်း၏ ပို့ချချက်များတွင်လည်း မည်သည့်ဘာသာရေးခေါင်းဆောင်ကို ကိုးကွယ်ရမည်၊ ဘာသာရေးခေါင်းဆောင်ဆိုသည်မှာ မည်ကဲ့သို့အရည်အချင်းသတ်မှတ်ချက်ပြည့်မီရမည်ဟု ဟောကြားခြင်းမရှိခဲ့ဘဲ ကိလေသာတိုက်ဖျက်ရေးကို စွမ်းဆောင်လိုသော လူပုဂ္ဂိုလ်တို့သည် မိမိတို့၏ စိတ်သန္တာန်တွင် ဓမ္မတရားများကို ထူထောင်ကာ ကိုယ်တိုင်ကျင့်ထားသော ထိုတရားများကိုသာ ကိုးကွယ်ရာအစစ်အမှန်ဟူ၍ ဟောကြားခဲ့မှုကြောင့် ဗုဒ္ဓဘာသာတွင် ဘာသာရေးခေါင်းဆောင်ဆိုသည်မှာ ရှိကိုမရှိပေ။ 

သို့ရာတွင် သီတဂူသည် ၎င်းကိုယ်၎င်း အာဏာရှိသူတို့၏ ကိုးကွယ်ခံပုဂ္ဂိုလ်အဖြစ်လည်းကောင်း၊ မြန်မာဗုဒ္ဓဘာသာဝင်တို့၏ ဘာသာရေးခေါင်းဆောင်သဖွယ်အဖြစ်လည်းကောင်း ငွေ၊ အခြွေအရံနှင့် နာမည်ကျော်ကြားမှုဘက်သို့ တစိုက်မက်မက် လျှောက်လှမ်းခဲ့သည်။ 

၎င်းသည် နိုင်ငံရပ်ခြား လှည့်ပတ်သွားလာစဉ် ထိုနိုင်ငံရှိ ဗုဒ္ဓဘာသာဘုန်းကြီးကျောင်းများတွင် တည်းခိုနိုင်လင့်ကစား အဆင်မြင့်ဟိုတယ်များတွင်လည်း တည်းခိုတတ်ကြောင်း၊ စျေးကြီးပစ္စည်းများကို ဒေါ်လာအထပ်လိုက်ကိုင်တွယ်၍ ဝယ်ယူသည့်အလေ့ရှိကြောင်းလည်း သိရသည်။

လွန်ခဲ့သည့် ဆယ်စုနှစ်တစ်ခုခန့်က သြစတြေးလျနိုင်ငံ မဲလ်ဘုန်းမြို့သို့ သီတဂူရောက်ရှိစဉ် ကင်မရာဝယ်ယူလိုသည်ဟု ဆိုသဖြင့် ၎င်းကို ကင်မရာဆိုင်လိုက်ပို့သောအခါ ဒေါ်လာထောင်ပေါင်းများစွာတန်သော ကင်မရာတစ်လုံးကို ၎င်းအသုံးပြုရန် အဆိုင်းအတွမရှိ ဝယ်ယူခဲ့သည်ဟု မြို့ခံတစ်ဦးက ဆိုသည်။ ထိုကဲ့သို့ ငွေဖြုန်းသုံးနေသော ဘုန်းကြီးမျိုးကို ဘဝနိဂုံးချုပ်ခါနီး သံသရာရိက္ခာအတွက်ဟုဆိုကာ ရှိစုမဲ့စုငွေကြေးများလှူတန်းနေသော မြန်မာနိုင်ငံတစ်ဝန်းရှိ တောသူတောင်သားများ၏ အဖြစ်ကို တွေးကြည့်က ရင်နင့်ဖွယ်ရာဖြစ်လေသည်။

Dsc_6691.Jpg

သီတဂူဆရာတော် အရှင်ဉာဏိဿရ ။ (ဓာတ်ပုံ - Myanmar Now)

ကိလေသာတိုက်ဖျက်ရေးဆိုသော မူလဘူတအချက်ကို ပရဟိတလုပ်ငန်းများဗန်းပြ၍လည်းကောင်း၊ အသံကောင်းအဟောကောင်းဖြင့် သွေဖည်မည်ဆိုပါက လူနှင့်ဘုန်းကြီးကွဲပြားချက် ပျောက်ကွယ်ပြီဆိုသောအချက်ကို သီတဂူသည် ၂၀၁၀ နိုင်ငံရေးအကူးအပြောင်းများမဖြစ်မီကတည်းက ထင်ရှားပြခဲ့ပြီဖြစ်သည်။ 

သီတဂူ၏ မေးခွန်းထုတ်ဖွယ် နောက်အချက်တစ်ခုမှာ ၎င်း၏ တရားများတွင် ဗုဒ္ဓဘာသာသည် အစ္စလာမ်တို့၏ ကျုးကျော်တိုက်ခိုက်မှုများကြောင့် မှေးမှိန်ခဲ့ရပုံ၊ တစ်ချိန်က ဗုဒ္ဓဘာသာအကြီးအကျယ်ထွန်းကားခဲ့သော အာဖဂနစ္စတန် (မိလိန္ဒဘုရင်ပေါ်ခဲ့ရာ)၊ ပါကစ္စတန် (ဇာတကဝတ္ထုများတွင် အဋ္ဌာရသဆယ့်ရှစ်ရပ်သင်ကြားရာ တက္ကသီလာကျောင်းတော်တည်ရှိခဲ့ရာ) နိုင်ငံများတွင် မျက်မှောက်ခေတ်၌ အစ္စလာမ်ဘာသာ စိုးမိုးနေပုံများကို မကြာခဏထည့်သွင်းဟောပြောခဲ့သည်။ ထိုဟောပြောချက်များဖြင့် ၎င်းသည် မြန်မာဗုဒ္ဓဘာသာလူထုကို ကာကွယ်နေသည့် ခေါင်းဆောင်အဖြစ် လှည့်စားပြီး၊ တစ်ဖက်တွင် မိရိုးဖလာဗုဒ္ဓဘာသာမဟုတ်သူများကို အမုန်းတရားဖြင့် ရှုမြင်စေရန် လှုံ့ဆော်ခဲ့ခြင်းဖြစ်သည်။

ထိုအချက်သည် ဗုဒ္ဓ၏ အရိုးရှင်းဆုံးလမ်းညွှန်ချက်ဖြစ်သော သတ္တဝါအားလုံးပေါ်တွင် မေတ္တာထားရှိကြဆိုသည့် သဗ္ဗေသတ္တာ ဘဝန္တုသုခိတတ္တာဆိုသော အချက်ကို ပြောင်ပြောင်တင်းတင်း ဆန့်ကျင်ခဲ့ခြင်းဖြစ်သည်။ သမိုင်းဆိုသည်မှာ သင်ခန်းစာယူဖွယ်လေ့လာ၍ ရသကဲ့သို့ လက်နက်တစ်ခုအဖြစ်လည်း အသုံးချ၍ရသော အရာဖြစ်သည်။

ဗုဒ္ဓဘာသာဝင်အများစု နေထိုင်ရာ ထိုင်းနိုင်ငံ အယုဒ္ဓယမြို့တော်ကို ဗုဒ္ဓဘာသာဝင်အများစု မြန်မာတို့ မည်ကဲ့သို့ဝင်ရောက်ဖျက်ဆီးခဲ့ကြပုံ၊ ထိုင်းအမျိုးသမီးများကို အဓမ္မဖမ်းဆီး၍ မတရားပြုကျင့်သည်ကို သိမ်းပိုက်တော်မူသည်ဟုလည်းကောင်း၊ စစ်သုံ့ပန်းများကို ဖမ်း၍ အဓမ္မလုပ်အားပေးခိုင်းစေသည်ကို ယိုးဒယားမှ အနုလက်မှုပညာသည်များကို ခေါ်ဆောင်ခဲ့သည်ဟုလည်းကောင်း မြန်မာကျောင်းသုံးစာအုပ်များတွင် ဝါဒဖြန့်ထားသော သမိုင်းမျိုးကို သီတဂူ၏ တရားများတွင် ဘယ်သောအခါမျှ ကြားခဲ့ရသည်မဟုတ်ပါ။ ထိုသမိုင်းမျိုးကို သင်ကြား၍ မြန်မာတို့က စိတ်ကြီးဝင်လျှင်လည်းကောင်း၊ ထိုင်းတို့က မြန်မာတို့ကို ဆက်လက်မုန်းတီးနေကြလျှင်လည်းကောင်း အဘယ်သို့အဓိပ္ပာယ်ရှိမည်နည်း။ စဉ်းစားကြပါကုန်။

Gopr0909.Jpg

စစ်ကောင်စီတပ်ဖွဲ့ ဖျက်ဆီးခဲ့သည့် စစ်ကိုင်းတိုင်း၊ ကန့်ဘလူမြို့နယ် ကျီစု(ကျည်စု) ရွာရှိ ပလီတစ်လုံးကို ၂၀၂၂ ဒီဇင်ဘာလဆန်းတွင် တွေ့ရစဉ်။ (ဓာတ်ပုံ - Myanmar Now)

သို့ရာတွင် သီတဂူကား ၂၀၁၃ ဇူလိုင်တွင် ရန်ကုန် အင်းစိန်မြို့နယ် အမျိုးဘာသာ သာသနာကာကွယ်စောင့်ရှောက်ရေးအသင်းညီလာခံတွင် ဟောပြောခဲ့သော ဟောပြောချက်တွင် ရန်ကုန်ရှိ သိမ်ကြီးစျေးအနီး ရှေးဗုဒ္ဓဘာသာစေတီများ ပျောက်ကွယ်ပြီး မွတ်စလင်ဗလီများနေရာယူခဲ့ပုံကို ဟောပြောခြင်းဖြင့် အမုန်းတရားများလှုံ့ဆော်ခဲ့သည်။

၂၀၁၇ ခုနှစ် မေလ တပ်တွင်းတရားပွဲတစ်ခုတွင် ငါးပါးသီလမလုံသောသူများကို သတ်ဖြတ်လျှင် အကုသိုလ်မကြီးမားကြောင်း ဟောပြောမှုသည် သီတဂူ၏ ကျဆုံးမှုကို သိသာစွာဖြစ်ပေါ်စေသော အကြောင်းအရင်းတစ်ခုဖြစ်သည်။ ထိုဟောပြောမှုဖြစ်ပေါ်ပြီး မကြာမီ ရခိုင်ပြည်နယ်ရှိ နယ်ခြားစောင့်ရဲကင်းစခန်းများကို ရိုဟင်ဂျာလက်နက်ကိုင် အာဆာအဖွဲ့က တိုက်ခိုက်သည်ဆိုကာ ရခိုင်ပြည်မြောက်ပိုင်းရှိ ရိုဟင်ဂျာရွာများကို စစ်တပ်က ဝင်ရောက်စီးနင်းမြေလှန်တိုက်ခိုက်ခြင်း၊ ထောင်နှင့်ချီသော ရိုဟင်ဂျာများကို သတ်ဖြတ်ခဲ့ခြင်းများကျူးလွန်ခဲ့သည်။

သီတဂူ၏ အဆိုအရဆိုလျှင် ထိုကဲ့သို့ သတ်ဖြတ်ခံရသူ ရိုဟင်ဂျာများသည် ဗုဒ္ဓဘာသာဝင်များမဟုတ်သဖြင့် အကုသိုလ်မကြီးမားပေ။

အလွန်ပင်ကြောက်စရာကောင်းသော ထိုဟောပြောချက်များသည် သွေးဆာနေသော စစ်ခေါင်းဆောင်များအတွက် ကျိန်းသေပေါက် စိတ်ပိုင်းဆိုင်ရာပံ့ပိုးမှုဖြစ်ခဲ့မည်ဖြစ်သည်။ ၂၀၂၁ အာဏာသိမ်းပြီးနောက် စစ်ခေါင်းဆောင် မင်းအောင်လှိုင်က ၎င်းအနေဖြင့် ကုလားဆိုးများကို တိုင်းပြည်မှ နှိမ်နင်းတိုက်ခိုက်ခဲ့ကြောင်း မတ်လ ၂၇ ရက် တပ်မတော်နေ့မိန့်ခွန်းတွင် ပြောင်ပြောင်တင်းတင်း ထုတ်ဖော်ပြောကြားခဲ့သည်။

မင်းအောင်လှိုင်သည် အာဏာသိမ်းမှုအတွက် ကြိုတင်ပြင်ဆင်မှုများပြုလုပ်ခဲ့ရာတွင် ၂၀၂၀ ဖေဖော်ဝါရီလ ၉ ရက်နေ့က ၎င်းကို မြန်မာနိုင်ငံဗုဒ္ဓဘာသာကလျာဏယုဝအသင်း (YMBA) က အဂ္ဂမဟာမင်္ဂလဓမ္မဇောတိကဓဇဆိုသည့်ဘွဲ့ကို ပေးအပ်သော ဖြစ်စဉ်လည်း တစ်ခုပါဝင်သည်။ အာဏာသိမ်းပြီး ရက်ရက်စက်စက်သတ်ဖြတ်မှုများကို ကျူးလွန်တော့မည့် ၎င်း၏ ဒကာဖြစ်သူအတွက် သီတဂူကိုယ်တိုင်စီမံသောပွဲဖြစ်သည်။ စစ်တပ်ပိုင် ရန်ကုန် ဇေယျာသီရိဗိမာန်တွင် ပြုလုပ်သော ထိုအခမ်းအနားတွင် သီတဂူနှင့် တရားမဝင်မဘသအဖွဲ့၏ ဥက္ကဋ္ဌ အင်းစိန်ရွာမဆရာတော် တိလောကာဘိဝံသရှေ့မှောက်၌ နိုင်ငံတော်သံဃမဟာနာယက ဥက္ကဋ္ဌ ဗန်းမော်ဆရာတော် ကုမာရဘိဝံသက မင်းအောင်လှိုင်ကို ဘွဲ့ပေးခြင်းဖြစ်သည်။ ကိလေသာတိုက်ဖျက်ရေးလုပ်ငန်းများမလုပ်ဘဲ မင်းဆရာဖြစ်ချင်သော ဘွဲ့ထူးဂုဏ်ထူးများဖြင့် ယစ်မူးနေသော သီတဂူသည် အာဏာရှင်တို့၏ အသုံးတော်ခံဖြစ်ခဲ့သည်၊ ဖြစ်နေဆဲလည်း ဖြစ်သည်။

Mah_ymba.jpg

သီတဂူစီမံသည့် မင်းအောင်လှိုင်ကို YMBA ဂုဏ်ပြုဆုပေးပွဲကို ရန်ကုန်ရှိ စစ်တပ်ပိုင် ဇေယျာသီရိဗိမ္မာန်တွင် ၂၀၁၉ ဖေဖော်ဝါရီ ၉ ရက်နေ့က ပြုလုပ်ခဲ့ပုံ။ 

ယခုအခါတွင် သီတဂူ၏ အခြေပြုရာ စစ်ကိုင်းတိုင်းတွင် စစ်အာဏာရှင်မင်းအောင်လှိုင်၏ တပ်များက ရွာစဉ်လှည့်၍ မီးရှို့သတ်ဖြတ်နေသည်၊ သီတဂူကို နှစ်ပေါင်းများစွာ ပံ့ပိုးလှူဒါန်းခဲ့သော ဗုဒ္ဓဘာသာဝင်တို့သည် အိုးမဲ့အိမ်မဲ့ဖြင့် အတိဒုက္ခရောက်နေကြပြီဖြစ်သည်။

Img_9407.Jpg

စစ်ကိုင်းတိုင်း ဒီပဲယင်းမြို့နယ် လက်ယက်ကုန်းရွာကို ၂၀၂၂ စက်တင်ဘာလအတွင်း စစ်ကောင်စီ၏ လေကြောင်းတိုက်ခိုက်မှုကြောင့် ထိခိုက်ပျက်စီမှု။ ထိုဖြစ်စဉ်တွင် ကလေး ၇ ဦး၊ လူကြီး ၆ ဦးထက်မနည်း သေဆုံးခဲ့ရသည်။ (ဓာတ်ပုံ - Myanmar Now)

သီတဂူမှာ မင်းအောင်လှိုင်ကို သာသာနာပြုမင်းကောင်းမင်းမြတ်အဖြစ် ဟောပြောနေမှုများနှင့် မင်းအောင်လှိုင်၏ လှုပ်ရှားမှုများကို ပြောင်ပြောင်တင်းတင်းထောက်ခံပေးနေမှုများကြောင့် မြန်မာလူထုထဲတွင် စက်ဆုပ်ရွံရှာဖွယ်ရာ ရှုမြင်ခံနေရပြီဖြစ်သည်။ ဆင်ခြင်တုံတရားနှင့် ဗဟုသုတပေါကြွယ်လာသော ၂၁ ရာစုလူငယ်ထုသည် အစဉ်အလာစံနှုန်းများကို မျက်စိပိတ်လက်မခံဘဲ သီတဂူကဲ့သို့ ပုဂ္ဂိုလ်များကို ပြောင်ပြောင်တင်း ရှုတ်ချနေကြပြီဖြစ်လေသည်။ ထိုအရာသည်ပင် နွေဦးတော်လှန်ရေး၏ အောင်မြင်မှု တစ်စိတ်တစ်ဒေသဖြစ်လေသည်။ 

သို့ရာတွင် ယခုကဲ့သို့ ပြောင်းလဲလာသောအမြင်များသည် စစ်တပ်၏ ရက်စက်မှုများကို နာကြည်းခြင်းသက်သက်အပေါ် အခြေမခံသင့်ပါ။ လူ့အဖွဲ့အစည်းအတွင်း လူအချင်းချင်း အတိဒုက္ခတို့ကို ပေါ်ပေါက်အောင်လုပ်သော မည်သည့်ဘာသာရေးကိုယ်စားပြုပုဂ္ဂိုလ်များကိုမဆို လက်မခံမှုနှင့် ကိလေသာတိုက်ဖျက်ရေးလုပ်ငန်းကို ဇောက်ချမလုပ်ကိုင်ဘဲ ဘာသာရေးကို အသုံးချ၍ ကြီးပွားချမ်းသာလိုသော၊ သြဇာထူထောင်လိုသော မည်သည့်ဘာသာရေးအသွင်ပုဂ္ဂိုလ်ကိုမျှ လက်မခံလိုမှုကို ဒီမိုကရေစီရရှိရေးတော်လှန်ရေးနှင့်အတူ ထူထောင်မှသာလျှင် နောင်သီတဂူများ မပေါ်ပေါက်အောင် တားမြစ်နိုင်မည်ဖြစ်သည်။

Thidagu_and_mah_2.Jpeg

၂၀၂၀ တွင် ပြုလုပ်သည့် အခမ်းအနားတစ်ခုတွင် သီတဂူဆရာတော် အရှင်ဉာဏိဿရ အာဏာသိမ်း စစ်ခေါင်းဆောင်တို့ကို ယှဉ်တွဲတွေ့ရစဉ်။ (ဓာတ်ပုံ - Myanmar Now)

ဆက်ဖတ်ရန် →

ဝမ်ပေါင်ကုမ္ပဏီစောင့် ရဲတပ်ရင်းကို လက်နက်ကြီး အလုံး၁၀၀ဖြင့် ပစ်ခတ်တိုက်ခိုက်

ဝမ်ပေါင်ကုမ္ပဏီစောင့် ရဲတပ်ရင်းကို လက်နက်ကြီး အလုံး၁၀၀ဖြင့် ပစ်ခတ်တိုက်ခိုက်

📅 💬 မှတ်ချက်

ကောင်းချစ်အောင်

ဇန်နဝါရီ ၅၊ ၂၀၂၃။

 

 

ယင်းမာပင်မြို့နယ်အတွင်းရှိ တရုတ်ပိုင် ဝမ်ပေါင်ကုမ္ပဏီကို‌ စောင့်ကြပ်ပေးနေသည့် ရဲတပ်ရင်း (၂၈)ကို ယနေ့ နံနက်တစ်နာရီခွဲခန့်တွင် ပြည်သူ့ကာကွယ်ရေးတပ်ဖွဲ့များပူးပေါင်းကာ လက်နက် ကြီးအလုံးရေ ၁၀၀ခန့်ဖြင့် ပစ်ခတ်တိုက်ခိုက်ခဲ့သည်ဟု သိရသည်။

အဆိုပါရဲတပ်ရင်းတွင်ခန့်မှန်းခြေအင်အား၂၀၀ ဝန်းကျင်ရှိပြီး မဟာမိတ်တပ်ဖွဲ့၇ဖွဲ့ပူးပေါင်းကာ ညသန်းခေါင်ကျော်အချိန်တွင် လက်နက်ကြီးအလုံးရေ ၁၀၀ခန့် ပစ်ခတ်တိုက်ခိုက်ခဲ့ခြင်းဖြစ်သည်ဟု National Revolutionary Guards (NRG)အဖွဲ့ ပြန်ကြားရေးတာဝန်ခံက သံလွင်ခက်ကိုပြောသည်။

"ရဲတွေအိပ်မောကျနေချိန် တိုက်ခိုက်တာဆိုတော့ ထိခိုက်မှုများနိုင်တယ်"ဟု ၎င်းကပြောသည်။

မဟာမိတ်တပ်ဖွဲ့များပစ်ခတ်လိုက်သည့် လက်နက်ကြီးကျည်များသည်ထိရောက်မှုရှိပြီး အဆောက်အဦးများအပေါ် အများကြီးကျရောက်ခဲ့ကြောင်း၊ တပ်ရင်းအတွင်း ငိုယိုသံတွေကြားရကြောင်း မြေပြင်ရဲဘော်တစ်ဦးကပြောသည်။

 

 

 

"ခေါင်မိုးပေါ် လက်နက်ကြီးကျသံတွေ ငိုယိုသံတွေ ဆူညံနေတာပဲ"ဟု အဆိုပါရဲဘော်ကပြောသည်။

ထို့အပြင်ရဲတပ်ရင်းအတွင်းမှ ပြန်လည်ပစ်ခတ် သောကြောင့် နှစ်ဖက်ထိတွေ့တိုက်ပွဲဖြစ်ပွားခဲ့ကြောင်း၊ မဟာမိတ်တပ်ဖွဲ့များအနေဖြင့် အထိအခိုက်မရှိဆုတ်ခွာနိုင်ခဲ့သည်ဟု သိရသည်။

လက်နက်ကြီးများဖြင့်တိုက်ခိုက်မှုတွင် နေ့လည် ၂နာရီ နောက်ဆုံးသိရသည့် အတွင်းသတင်းအရ ရဲတပ်သား၇ဦးခန့်ကျဆုံးခဲ့ပြီး အဆောက်အဦးနှင့် စာရွက်စာတမ်းများ ပျက်စီးခဲ့သည်ဟု သိရသည်။

"လက်နက်ကြီးတွေတအားသုံးတော့ ကုန်ကျစရိတ်အတော်များတယ်။ အခုတော့ ခဲယမ်းကျည် တွေလိုအပ်နေတယ် ကူညီပေးကြပါဦး"ဟု NRG ပြန်ကြားရေးတာဝန်ခံက တိုက်တွန်းပြောဆိုထားသည်။

ယင်းမာပင်မြို့နယ်အတွင်းရှိ ရဲတပ်ရင်း ၂၈သည် ‌နီးစပ်ရာရွာများကို စစ်ကြောင်းထိုးခြင်း၊ ပုသိမ်-မုံရွာလမ်းတစ်လျှောက် ဆက်ကြေးကောက်ခံခြင်း၊ တရုတ်ပိုင် ဝမ်ပေါင် ကုမ္ပဏီကို စောင့်ကြပ်ပေးနေခြင်းများ လုပ်ဆောင်နေသည်ဟု ဒေသခံများထံမှသိရသည်။

****************************************

အောက်ဖော်ပြပါလင့်တွေမှာ သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram - > https://t.me/newstlk

YouTube -> https://youtu.be/V3197tp3kqU

Website -> https://thanlwinkhetdotnet.wpcomstaging.com/

Website ->https://eng.thanlwinkhet.net/

ဆက်ဖတ်ရန် →

စစ်တပ်အရာရှိအမိန့် အာဏာရှင်ဆန်သည်ဟုခန့်စည်သူပြောပြီ

စစ်တပ်အရာရှိအမိန့် အာဏာရှင်ဆန်သည်ဟုခန့်စည်သူပြောပြီ

📅 💬 မှတ်ချက်

ဆက်ဖတ်ရန် →

လျှို့ဝှက်စာတွေ ပေါက်ကြားနေပြန်လို့ ပြည်နယ်/တိုင်း ညွှန်ကြားစာတွေမှာ အသားတံဆိပ်တွေ ထည့်သွင်းခိုင်းပြန်

လျှို့ဝှက်စာတွေ ပေါက်ကြားနေပြန်လို့ ပြည်နယ်/တိုင်း ညွှန်ကြားစာတွေမှာ အသားတံဆိပ်တွေ ထည့်သွင်းခိုင်းပြန်

📅 💬 မှတ်ချက်

ရန်ကုန်၊ ဇန်နဝါရီ ၆ ခေတ်သစ်

အကြမ်းဖက်စစ်ကောင်စီက ထုတ်ပြန်နေတဲ့ လျှို့ဝှက်စာတွေ ပေါက်ကြားမှု မဖြစ်စေဖို့ ပုံစံအမျိုးမျိုး နည်းအမျိုးမျိုးနဲ့ လုပ်ဆောင်ခဲ့ပေမယ့်လည်း အခု အချိန်အထိ မထိန်းနိုင်တာမို့ ထပ်မံပြီး ပြည်နယ်/တိုင်း အသားတံဆိပ်တွေ စာတွေမှာ ထည့်သွင်းဖို့ ညွှန်ကြားပြန်ပါတယ်။ 

နေပြည်တော်မှာရှိတဲ့ အကြမ်းဖက်စစ်ကောင်စီက ပြည်နယ်/တိုင်းစစ်ကောင်စီ တွေ ကို လျှို့ဝှက် ညွှန်ကြားချက်တွေ ပေးပို့ရာမှာ စာတွေ မထိန်းနိုင်ဘဲ ပေါက် ကြားမှု တွေရှိနေတာလည်းဖြစ်ပါတယ်။ မူလက တိုင်း/ပြည်နယ်နဲ့ ဝန်ကြီး ဌာန ညွှန်ကြားတွေမှာ ကုတ်နံပါတ် ဂဏန်းတွေ လျှို့ဝှက် ထည့်သွင်း ပေးပို့ပေ မယ့် အဲဒီလို လျှို့ဝှက်ဂဏန်းတွေ ထည့်သွင်းခိုင်းတယ်ဆိုတဲ့ သတင်းကလည်း ပေါက်ကြားခဲ့ပါတယ်။ 

ခေတ်သစ်သတင်းဌာနက  သတင်းဖော်ပြခဲ့တဲ့ လျှို့ဝှက်ပေါက်ကြားစာတွေမှာ  လျှို့ဝှက်ကုတ်ဂဏန်းတွေကို ဖယ်ရှားပြီး တင်ပြခဲ့တဲ့နောက်ပိုင်းမှာ အခုလို အသားတံဆိပ် ထည့်သွင်းဖို့ ညွှန်ကြားချက်ထွက်ပေါ်လာတာဖြစ်ပါတယ်။ 

လျှို့ဝှက်ညွှန်ကြားစာတွေမှာ ညွှန်ကြားခံရတဲ့ ပြည်နယ်/တိုင်း အသားတံဆိပ် ထည့်သွင်းခြင်းက ပေါက်ကြားတဲ့ ပြည်နယ်/တိုင်းစစ်ကောင်စီဌာနတွေကို ခြေရာခံနိုင်အောင်ဖြစ်တယ်လို့ သိရပါတယ်။ 

"အမိန့်စာတွေ၊ ညွှန်ကြားစာတွေ သတင်းပေါက်ကြားမှု ရှိခဲ့ရင် ပေါက်ကြား တဲ့တိုင်း/ပြည်နယ် သိရအောင် အောင် အောက်ခံ  အသားတံဆိပ်တွေတပ် ပေးပို့ရန် စစ်ကောင်စီကညွှန်ကြားတာပါ။ ဥပမာ ရန်ကုန်ဆိုရင် စာရွက်အပြည့် ဘေးတိုက် YGN စာလုံးပါမယ်" လို့ နေပြည်တော်သတင်းရင်းမြစ်က ပြောပါ တယ်။ 

စစ်ကောင်စီအနေနဲ့ ဖရဲသီးပပျောက်ရေး ဆိုပြီး စီမံချက်တွေ လုပ်ဆောင်နေ ပေမယ့်လည်း သတင်းအချက်အလက်နဲ့ လျှို့ဝှက်စာတွေ ပေါက်ကြားမှုကို အာဏာသိမ်းမှု ၂ နှစ်တာ ကာလအတွင်း ထိန်းသိမ်းနိုင်ခြင်းမရှိသေးပါဘူး။

ဆက်ဖတ်ရန် →

တိုက်လေယာဉ် အတက်အဆင်း သ တင်း များပေါက်ကြား၍ လေကြောင်းစစ်ဆင်ရေးများကို နေပြည်တော် အေလာ လေတပ်သို့ ပြောင်းရွှေ့

တိုက်လေယာဉ် အတက်အဆင်း သ တင်း များပေါက်ကြား၍ လေကြောင်းစစ်ဆင်ရေးများကို နေပြည်တော် အေလာ လေတပ်သို့ ပြောင်းရွှေ့

📅 💬 မှတ်ချက်

အမှတ် ၆၂ YAK-130 တိုက်ခိုက်ရေးအုပ်မှ ပိုင်းလော့များ၏လျှို့ဝှက် အမည် များကို ယက္ခ မှ စစ်မင်း ဟု ပြောင်းလဲ၊ တိုက်လေယာဉ် အတက်အဆင်း သ တင်း များပေါက်ကြား၍   လေကြောင်းစစ်ဆင်ရေးများကို နေပြည်တော် အေလာ လေတပ်သို့    ပြောင်းရွှေ့ 

ရန်ကုန်၊  ဇန်နဝါရီ ၆ ခေတ်သစ်မီဒီယာ

အကြမ်းဖက်စစ်ကောင်စီလက်အောက်တွင် တိုင်းရင်းသားနယ်မြေများနှင့် စစ်ကိုင်း၊ မကွေး၊ ပဲခူးကဲ့သို့သော တိုင်းဒေသကြီးများကို အဆက်မပြတ် ဗုံးကျဲ နေသည့် အမှတ် ၆၂ Yak-130 တိုက်ခိုက်ရေးလေယာဉ်အုပ်စုမှ ပိုင်း လော့များ ၏ လျှို့ဝှက် အမည်များကို ယက္ခမှ စစ်မင်းသို့ ပြောင်းလဲ လိုက်ကြောင်း သိရှိရ သည်။ 

၂၀၂၂ ခုနှစ် ဖေဖော်ဝါရီလ ၂၁ ရက်နေ့တွင် အမှတ် ၆၂ တိုက်ခိုက်ရေးအုပ်မှ Yak-130 လေယာဉ်မှူးများ၏ အမည်များကို ယက္ခဟု ပြောင်းလဲခဲ့ပြီးနောက် ၂၀၂၂ ခုနှစ် နှစ်ကုန်ပိုင်းတွင် လျှို့ဝှက် အမိန့်စာ ပေါက်ကြားခဲ့သဖြင့် ယက္ခ အမည်ဝှက်များကို စစ်မင်း အမည်ဝှက်အဖြစ် ပြောင်းလဲလိုက်ခြင်းဖြစ်ကြောင်း သိရှိရသည်။ 

ထို့ပြင် တံတားဦးလေတပ်၊ အမှတ် ၆၂ တိုက်ခိုက်ရေးအုပ်မှ Yak-130 မှ ပိုင်း လော့များကို ယခင်က မှော်ဘီသို့ စစ် ဆင် ရေးအဖြစ် လအလိုက် အလှည့် တာဝန်ရွှေ့ပြောင်းထမ်းဆောင်းခိုင်းရာမှ ယခုရက်ပိုင်းအတွင်း မှော်ဘီအစား  နေပြည်တော်၊ အေလာသို့ ပြောင်းရွှေ့ တာဝန်ထမ်းဆောင်ခိုင်းကြောင်း သိရှိရသည်။ 

"အခုက ဗျူဟာပြောင်းတယ် အရင် စစ်ဆင်ရေးအတွက်  မှော်ဘီလေတပ်ကို ၃ လ ၁ ကြိမ် သွားရတာ။ Yak-130 အဖွဲ့ ၆၂ အုပ်က။ အခုတော့ စစ်ဆင်ရေး ၃ လ ၁ ကြိမ်ကို အလှည့်ကျကို နေပြည်တော်၊ အေလာကို စစ်ဆင်ရေး ပြောင်းရွှေ့ တာဝန်ထမ်းဆောင်ခိုင်းတယ်။ မှော်ဘီမသွားရတော့ဘူး။ မှော်ဘီကို စိတ်မချ တော့ဘူး။ အခုက တံတားဦးကနေ တိုက်ရိုက် စစ်ဆင်ရေးနေရာကို မသွားဘူး။ ဒီဘက်က လေယာဉ်တက်တာနဲ့ သတင်းပေါက်နေလို့ဆိုပြီး အေ လာ ဘက်ကို  ဝင်ပြီးမှ စစ်ဆင်ရေးနေရာကို သွားတယ်။ အပြန်လည်း တိုက်ရိုက် ပြန်မလာဘူး။ အေလာကို ဝင်ပြီးမှ ပြန်လာတယ်" ဟု နေပြည်တော် လေတပ် သတင်း ရင်းမြစ် က ပြောသည်။ 

 

တံတားဦးအခြေစိုက် Yak-130 တိုက်ခိုက်ရေးလေယာဉ် အမှတ် ၆၂ တိုက်ခိုက် ရေး အုပ်မှူးမှာ-ဗိုလ်မှူး  ရဲဇော်နိုင်ဖြစ်ပြီး ကချင်ပြည်နယ်၊ ဖားကန့်တွင် ၂၀၂၂ ခုနှစ်၊ အောက်တိုဘာလ ၂၃ ရက်နေ့ လူပေါင်းရာချီသေဆုံးခဲ့သော လေယာဉ် ဖြင့် ဗုံးကျဲတိုက်ခိုက်မှုကို  တိုက်ခိုက်ဆောင်ရွက်ခဲ့သော စစ်လေယာဉ်မောင်း ပိုင်းလော့ အမှတ် ၆၂ တိုက်ခိုက်ရေးအုပ်မှူးအဖွဲ့မှ ဖြစ်ကြောင်း  သိရှိရသည်။

ဆက်ဖတ်ရန် →

ဂျပုက အတော် ဆိုက်ကိုဖောက်နေသတဲ့

ဂျပုက အတော် ဆိုက်ကိုဖောက်နေသတဲ့

📅 💬 မှတ်ချက်

  

ဂျပုအကြောင်း အတွင်းသတင်း ရထားတယ်။ ဂျပုက အတော် ဆိုက်ကိုဖောက်နေသတဲ့။ ဟိုတခေါက်က သူ့ကားတန်းကို ရထားတိုက်မိမလို ဖြစ်တဲ့ကိစ္စလေ… သူ့ကို လုပ်ကြံတာလားချည်း ကြောက်လန့်တကြား မေးတာတဲ့။ ဘာသံကြားကြား သူ့လုပ်ကြံတော့မယ်ပဲ ထင်နေသတဲ့။ 

တိုက်ပွဲသတင်းတွေဆို ရှုံးတဲ့သတင်း သူ့ဆီ ပို့လို့မရဘူး။ ပို့ရင် ဖိုင်တွဲနဲ့ ကောက်ပေါက်တာတဲ့။ သူ့အောက်က ခပ်ကြီးကြီးအကောင်တွေလည်း ရာထူးပြုတ်မှာကြောက်ပြီး နိုင်ပါတယ်ဆိုပြီး သတင်းအင်ထုပြီး တင်နေရသတဲ့။ 

TNLA ကိစ္စတုန်းက ဂျပုက အင်အနိုင် Reportတွေ ထိုင်ဖတ်၊ ကွန်ဖီးဒန့်လယ်ဗယ်တွေ ဆိုးဟိုက်ပြီး ဝင်တိုက်ခိုင်းတာတဲ့။ တင်နီလာအေးထိရင် သာကောနဲ့ မျက်နှာပျက်မယ်ဆိုတာ သိတယ်။ ဒါပေမယ့် ဂျပုအောက်က ကောင်တွေ မျက်နှာလိုမျက်နှာရနဲ့ ဖောထားတာက PDFတွေဆီပို့မယ် လက်နက်တိုက်ကို သတင်းရထားတယ်ဆိုပြီး ဖောထားတာ။ ဂျပုလည်း သာကောကို ဒီလက်နက်တိုက်ပြပြီး ဒါ့ကြောင့်ဝင်တိုက်တာပါဆိုပြီး ချော့မယ်ပေါ့။ 

အဘ… မြေပြင်က သွားလို့တော့ မရဘူးဆိုတော့ လေယာဉ်နဲ့ လူချကွာဆိုပြီး ရက်ရောတာ။ အကောင်၂၀၀ သတ်ကွင်းထဲမှာ ပိတ်မိရော။ ဒွမ်ကုန်တာ သောက်သောက်လဲ။ တင်နီလာအေးက ငါနယ်မြေဟဲ့ဆိုပြီး ဘယ်ပြန်ညာပြန်ဘေတာ။ 

အောက်မှာသာ ၂၀၀ လောက် ကြွကုန်တာ။ ဂျပုဆီတင်တဲ့ Report မှာ သူ့အောက်ကကောင်တွေက ဖိုင်တွဲနဲ့ ထုခံရမှာကြောက်ပြီး လက်နက်တိုက်ရတော့မယ်ဆိုပြီး ဆက်ဖောထား။ ဂျပုက ဓါတ်ပုံတောင်းတော့ ကြံရာမရဖြစ်ပြီး ရှိတဲ့လက်နက်တွေ စုပုံဓါတ်ပုံရိုက်ပြီး PDF တွေရဲ့လက်နက်တွေပါဆိုပြီး ဂျပုကို ပြန်ပြတာ။

Report အလိမ်နဲ့  ဘရိတ်ပေါက်နေတဲ့ ဂျပုက မီဒီယာမှာ ထုတ်ရှိုးကွာဆိုပြီး မီဒီယာမှာ ဓါတ်ပုံလိမ်ကြီးတင်။ ဘယ်PDF ရဲ့ ပစ္စည်းမှလည်း မဟုတ်၊ ကရင်နီကလည်း မသိ၊ စစ်ကိုင်းကလည်း ဘာလားပေါ့။

သတိထားမိလိုက်ကြလား။ TNLA စာထုတ်ပြီး ဒီလက်နက်တွေက TNLA ဆီကလက်နက်တွေ မဟုတ်ဘူးဆိုပြီး ပေါ်တင် စောက်ရှက်ခွဲတာ။ ဂျပုလည်း ဂျောက်ဂျက်တွေကွဲ ဒေါက်ဖိနပ်တွေပြဲပြီး ပြန်ငြိမ်သွား။ 

အခုလည်း ကြာအင်းဆိတ်ကြီးမှာ အကောင်ရာချီဒွမ်တာကို ဖုံးပြီး ဂျပုဆီ PDF  အယောက်၂၀၀၀ ကျပါတယ် ပြောပြီး Report လိမ်တင်နေလောက်ပြီ။ 

အမှန်လေး ဘာလေး Reportတင်ပေးလိုက်ကြပါ ဂေါင်းကြီးတို့ရဲ့။ နင်တို့ပထွေး ဖိုင်တွဲနဲ့ ကောက်မထုနိုင်ဘဲ ဦးနှောက်သွေးကြောပြတ်သွားအောင်။ 

အဟစ်ဟစ်

(ပန်ဆယ်လို)

ဆက်ဖတ်ရန် →

ဂျပန်မှာ မင်းအောင်လှိုင်အတင်းပြောခံရ

ဂျပန်မှာ မင်းအောင်လှိုင်အတင်းပြောခံရ

📅 💬 မှတ်ချက်

❝၂၀၂၀ ခုနှစ် ကျနော် အငြိမ်းစားယူပြီးရင် သမ္မတလုပ်ချင်လို့ တစ်ကြိမ်လောက်ကူညီပေးပါ❞ တဲ့— မင်းအောင်လှိုင်ကအဲ့ဒီ့လိုပြောတာ။

အဲ့တုန်းက မင်းအောင်လှိုင်နဲ့ အဖွဲ့က  ဂျပန်နိုင်ငံကို သွားပြီးနိပွန်ဖောင်ဒေးရှင်းကကျင်းပတဲ့ ပွဲကိုသွားတက်တာ။ အဲ့ပွဲကို မင်းအောင်လှိုင်နဲ့ အဖွဲ့ကလာတော့ ကြိုဆိုပွဲလုပ်ကြတာပေါ့။ ဂျပန်မြန်မာအသင်း ဥက္ကဋ္ဌ Mr. Hideo Watanabe (မစ္စတာ ဟီဒီယို ဝါတာနာဘေး) လည်း တက်တယ်။

အခမ်းအနားပြီးတော့ မင်းအောင်လှိုင်က မစ္စတာ ဟီဒီယို ဝါတာနာဘေး နဲ့ Mr. Yohei Sasakawa (ရောဟဲ ဆာဆာကာဝါ) အဲ့ဒီလိုပြောချလိုက်တာ။

❝ သမ္မတလုပ်ချင်လို့ တစ်ကြိမ်လောက်ကူညီပေးပါ❞ ဆိုပြီး— 

မင်းအောင်လှိုင်က အဲ့လိုကြီး ဆိုင်းမဆင့်ဗုံမဆင့် ရုတ်တရက်ပြောလိုက်တော့ ဟို ဂျပန်နှစ်ယောက်လဲ အံတွေဩကုန်တာ။

Mr. Watanabe က—  "ဒုသမ္မတကို စစ်တပ်အထဲကနေ ရွေးချယ်မှာမဟုတ်လား၊  ဒု-သမ္မတရာထူးနဲ့ မလုံလောက်သေးဘူးလား" လို့ တောင်ပြန်မေးခဲ့သေးတယ်တဲ့။

မင်းအောင်လှိုင်ယုံကြည်တဲ့ Mr. Watanabe ကပဲ အတွင်းလူတွေကို အတင်းတွေပြန်ပြောလို့ နိုင်ငံရေးဘက်က ဂျပန် အတော်များများသိကြတာ။ 

နံရံတွေမှာ နားရှိတယ်။

မရွှေမိုး-ကိုရီးယား

January 5th,2023.

စစ်ခွေးနိဂုံး— နှစ်ထောင့်နှစ်ဆယ့် |||

Reference— ဂျပန်နိုင်ငံမှာလက်ရှိနေထိုင်တဲ့ ကိုမျိုးမြင့်ဆွေက အချက်အလက်တွေစုဆောင်းပေးတာဖြစ်ပါတယ်။

ဆက်ဖတ်ရန် →

၂၀၂၂ ခုနှစ်အတွင်း ကွယ်လွန်ခဲ့သည့် ကမ္ဘာ့ထိပ်တန်းပုဂ္ဂိုလ်များစာရင်းတွင် ဦးဖြိုးဇေယျာသော် ပါဝင်

၂၀၂၂ ခုနှစ်အတွင်း ကွယ်လွန်ခဲ့သည့် ကမ္ဘာ့ထိပ်တန်းပုဂ္ဂိုလ်များစာရင်းတွင် ဦးဖြိုးဇေယျာသော် ပါဝင်

📅 💬 မှတ်ချက်

ဧရာဝတီ ၊ ဇန်နဝါရီ  ၅ ၊ ၂၀၂၃ ။

 

အမေရိကန်အခြေစိုက် နိုင်ငံတကာနှင့် နိုင်ငံခြားရေးမူဝါဒများကို လေ့လာနေသည့် Council on Foreign Relations အဖွဲ့မှ ထုတ်ပြန်သည့် ၂၀၂၂ ခုနှစ်အတွင်း သေဆုံးကွယ်လွန်ခဲ့သည့် ကမ္ဘာ့ထိပ်တန်းပုဂ္ဂိုလ်များ၏စာရင်းတွင် ဦးဖြိုးဇေယျာသော်ကို ထည့်သွင်း ဖော်ပြထားသည်။

 

ပြီးခဲ့သည့် ၂၀၂၂ ခုနှစ်အတွင်း ကွယ်လွန်ခဲ့သည့် ထိပ်တန်းပုဂ္ဂိုလ် ၁၀ ယောက်၏ စာရင်းထဲတွင် ဂျပန်ဝန်ကြီးချုပ် ရှင်ဇိုအာဘေး ၊ ဗြိတိန်ဘုရင်မကြီး အဲလိဇဘက် ၊ တရုတ်သမ္မတဟောင်း ကျန်ဇီမင်းစသည့် နိုင်ငံ့ခေါင်းဆောင်များနှင့်အတူ ဦးဖြိုးဇေယျာသော်ကို ထည့်သွင်း ဖော်ပြခြင်း ဖြစ်သည်။

 

ဦးဖြိုးဇေယျာသော်အား  နိုင်ငံရေးသမား ၊ ဟစ်ဟော့အဆိုတော် ၊ လွှတ်တော်ကိုယ်စားလှယ် ၊ ဒီမိုကရေစီအရေးတက်ကြွလှုပ်ရှားသူအဖြစ် ထိပ်တန်းပုဂ္ဂိုလ် ၁၀ ယောက်၏ နံပါတ် ၆ ယောက်နေရာတွင် ဖော်ပြထားသည်။ ယခင်ကာလတည်းကပင် စစ်အာဏာရှင်စနစ်ကို ဆန့်ကျင်သော ဦးဖြိုးဇေယျာသော်သည် ၂၀၀၇ ရွှေဝါရောင်တော်လှန်ရေး ပြီးနောက်  Generation Wave  ဟုခေါ်သော မျိုးဆက်သစ်လူငယ်များ အစည်းအရုံးကို တည်ထောင်သူထဲတွင် တဦးအပါအဝင် ဖြစ်ပြီး ၂၀၀၈ ခုနှစ်တွင် စစ်အစိုးရ၏ ဖမ်းဆီးထောင်ချခြင်း ခံခဲ့ရသူလည်း ဖြစ်သည်။

 

ဟစ်ဟော့ဂီတအဖွဲ့ ACID ၏အဖွဲ့ဝင်လည်းဖြစ်၊ NLD ပါတီ၏ လွှတ်တော် ကိုယ်စားလှယ်လည်းဖြစ်သည့် ဦးဖြိုးဇေယျာသော်၊ ၈၈ မျိုးဆက် ကျောင်းသား ခေါင်းဆောင် ဦးကျော်မင်းယု (ခေါ်)ကိုဂျင်မီတို့ အပါအဝင် နိုင်ငံရေးအကျဉ်းသား လေးဦးကို အာဆီယံ၊ ကုလသမဂ္ဂ နှင့် နိုင်ငံတကာ တို့မှ ကန့်ကွက်နေသည့်ကြားက ၂၀၂၂ ခုနှစ် ဇူလိုင် ၂၅ ရက်နေ့တွင် ကြိုးပေးကွပ်မျက်ခဲ့ကြကြောင်း စစ်ကောင်စီလက်အောက်ခံ သတင်းစာများမှတဆင့် ထုတ်ပြန်ခဲ့သည်။ 

#WhatsHappeningInMyanmar

#RejectMilitaryCoup

ဆက်ဖတ်ရန် →

ALP စစ်ဦးစီးချုပ်အပါအဝင် တပ်ဖွဲ့ဝင်သုံးဦး သတ်ဖြတ်ခံရမှု ULA/AA လက်ချက်မဟုတ်ဟု ငြင်းဆို

ALP စစ်ဦးစီးချုပ်အပါအဝင် တပ်ဖွဲ့ဝင်သုံးဦး သတ်ဖြတ်ခံရမှု ULA/AA လက်ချက်မဟုတ်ဟု ငြင်းဆို

📅 💬 မှတ်ချက်

 by MPA

 

 Jan 5, 2023

ရခိုင်ပြည် လွတ်မြောက်ရေးပါတီ (ALP) မှ စစ်ဦးစီးချုပ်အပါအဝင် တပ်ဖွဲ့ဝင်သုံးဦး သတ်ဖြတ်ခံရခြင်းသည် ရက္ခိုင်အမျိုးသားအဖွဲ့ချုပ်/ရက္ခိုင့်တပ်တော် (ULA/AA) ၏ လက်ချက်ဖြစ်ကြောင်း ALP က ဇန်နဝါရီလ ၅ ရက်၊ ယနေ့တွင် ကြေညာစွပ်စွဲထားသည်။

အဆိုပါ ကြေညာချက်ထုတ် စွပ်စွဲထားပြောဆိုချက်မှာ အခြေအမြစ်မရှိသည့် စွပ်စွဲချက်သာဖြစ်ကြောင်း ULA/AA က တုံ့ပြန် ငြင်းဆိုထားသည်။

” ဒီလိုကျနော်တို့ကို နာမည်ထုတ်ပြီးတော့ အခြေအမြစ်မရှိ စွပ်စွဲတာကတော့ နာမည်သေနေတဲ့ သူတို့ ALP ကို နာမည်ကြီးအောင်လုပ်ချင်လို့ လုပ်တာလည်းဖြစ်နိုင်ပါတယ်” ဟု ULA/AA ၏ ပြောရေးဆိုခွင့်ရှိသူခိုင်သုခက MPA သို့ ပြောသည်။

ရခိုင်ပြည်နယ်၊ စစ်တွေမြို့တွင် ဇန်နဝါရီလ ၄ ရက်၊ မနေ့က ပြည်နယ်စစ်ကောင်စီကျင်းပသည့် လွတ်လပ်ရေးနေ့ အခမ်းအနားသို့ ALP မှ တက်ရောက်ခဲ့ကြသည်။

ထိုပွဲမှပြန်လာစဥ် ALP မှ စစ်ဦးစီးချုပ် ဗိုလ်ချုပ်ခိုင်စိုးမြ၊ အမှတ် (၁၀၁) တပ်ရင်းမှူး၊ ဒုတိယဗိုလ်မှူးကြီးခိုင်ကျော်စိုးနှင့် ဗိုလ်ကြီးခိုင်သူရိန္ဒတို့မှာ ကားလမ်းပေါ်တွင် သေနတ်ဖြင့်ပစ်ခတ်ခံရပြီး ကားပေါ်တွင် သေဆုံးသွားခဲ့သည်။

ထိုကဲ့သို့ အကြမ်းလုပ်ကြံသတ်ဖြတ်ခံရခြင်းမှာ ULA/AA ၏ လက်ချက်ဖြစ်ကြောင်း ဇန်နဝါရီလ ၅ ရက်၊ ယနေ့တွင် ရခိုင်ပြည်လွတ်မြောက်ရေးပါတီ (ALP) က ထုတ်ပြန်ကြေညာခဲ့သည်။

” နောက်တစ်ခုကတော့ သူတို့ ALP အချင်းချင်း နှစ်ဖွဲ့ကွဲပြီးတော့ တစ်ဘက်နဲ့တစ်ဘက် တိုက်ခိုက်နေကြတာတွေ၊ နောက်ပြီးရင် နေပြည်တော်ကို အစည်းအဝေး သွားမယ်ဆိုရင်တောင်မှ နှစ်ဖွဲ့ လုနေကြတဲ့ အခြေအနေတွေ အဲဒီလိုဟာမျိုးတွေ ရှိပါတယ်” ဟု ခိုင်သုခက ဆက်ပြောသည်။

” ULA/AA က မိမိတို့ ပါတီ/တပ်မတော်မှ ခေါင်းဆောင်းများ၊ ပါတီဝင်များနှင့် တပ်ဖွဲ့ဝင်များအား ဖမ်းဆီးနှိပ်စက်ခြင်း၊ လုပ်ကြံသတ်ဖြတ်ခြင်းတို့ကို ပြုလုပ်လျှက်ရှိသည်သာမက ရခိုင်နိုင်ငံရေးပါတီမှ ခေါင်းဆောင်များ၊ ပါတီဝင်များ၊ အပြစ်မဲ့ ရဟန်း၊ သံဃာများနှင့် ပြည်သူများပါမချန် ဥပဒေမဲ့ ဖမ်းဆီးနှိပ်စက်ခြင်းများ၊ လုပ်ကြံသတ်ဖြတ်ခြင်းများကို ဆက်တိုင်းပြုလုပ်နေခြင်းအတွက် တရားမျှတမှုရရှိအောင် ဆောင်ရွက်သွားမည်ဖြစ်ကြောင်း” လည်း ALP ထုတ်ပြန်ချက်တွင် ရေးသားထားသည်။

” နောက်တစ်ခု စဉ်းစားစရာကတော့ အခြားအင်အားစုတစ်ခုခုကလည်း ပြဿနာရှုပ်ထွေးအောင် ဖန်တီးချင်တာကြောင့် ဒီလိုသတ်ဖြတ်တာတွေလည်း ရှိနိုင်ပါတယ်။ ဒီလိုအရှုပ်ထုပ်တွေကြားမှာ ဘယ်သူက ဘယ်လိုလုပ်သွားမှန်း မသိတဲ့အတွက်ကြောင့် ကျနော်တို့ ULA / AA အနေနဲ့ ဒီကိစ္စကို မှတ်ချက်ပေးစရာမရှိပါဘူး” ဟု ခိုင်သုခက ဆိုသည်။

ALP တပ်ဖွဲ့ဝင်များအား ULA/AA က ရခိုင်အမျိုးသားအချင်းချင်းအကြား လူသားမဆန် အကြမ်းဖက်လုပ်ကြံခြင်းသည် ရခိုင်တစ်မျိုးသားလုံးစည်လုံးညီညွတ်ရေးကို ထိခိုက်ပျက်စီးစေသည်သာမက ရခိုင်ပြည်သူများကိုပါ တုန်လှုပ်ခြောက်ခြားစေသည့်အတွက် ပြင်းပြင်းထန်ထန် ကန့်ကွက်ရှုတ်ချကြောင်းလည်း ALP က ဆိုထားသည်။

Link - —-https://mpapress.com/%E1%80%9E%E1%80%90%E1%80%84%E1%80%BA%E1%80%B8/15782/?fbclid=IwAR0xr6bnLcU3nwQPo6_ydwbpT6IPRjRzuQ3arR9plzJT7m2sLRMufz0pu64

ဆက်ဖတ်ရန် →