ကျားဖြူစစ်ကြောင်း — IDFA ဖွင့်ပွဲရုပ်ရှင် ဖြစ်လာတဲ့ မြန်မာ PDF မှတ်တမ်းရုပ်ရှင်
ရဲရင့်ငယ် — ၁၃ နိုဝင်ဘာ ၂၀၂၆
White Tiger Column ပိုစတာ — Photo: Nocte Films
မြန်မာ့ တော်လှန်ရေးကို ရိုက်ကူးထားတဲ့ မှတ်တမ်းရုပ်ရှင် White Tiger Column (ကျားဖြူစစ်ကြောင်း) ဟာ ကမ္ဘာ့အကြီးဆုံး မှတ်တမ်းရုပ်ရှင်ပွဲတော်တွေထဲက တစ်ခုဖြစ်တဲ့ ဟော်လန်၊ အမ်စတာဒမ်က IDFA (International Documentary Film Festival Amsterdam — နိုင်ငံတကာ မှတ်တမ်းရုပ်ရှင်ပွဲတော်) ရဲ့ ဖွင့်ပွဲရုပ်ရှင်အဖြစ် နိုဝင်ဘာ ၁၂ ရက်ညက Royal Theatre Carré မှာ ကမ္ဘာ့ရှေးဦးပြသ (world premiere) ပြသခဲ့ပါတယ်။
ဒီရုပ်ရှင်ကို ကနေဒါ ဒါရိုက်တာ သုံးဦး — Robert Mentov, Dwight Jantzi, Bryan Dickie — က ရိုက်ကူးထားပြီး ၉၅ မိနစ် ကြာပါတယ်။ ထုတ်လုပ်သူက Tom Edgerton နဲ့ Dwight Jantzi တို့ပါ။
ရုပ်ရှင်ထဲမှာ မြန်မာ့ ပြည်သူ့ကာကွယ်ရေးတပ်ဖွဲ့ (PDF — People's Defence Force) ရဲ့ ကျားဖြူစစ်ကြောင်း တပ်ဖွဲ့ဝင်ဖြစ်လာမယ့် လူငယ်တွေကို တောထဲက လေ့ကျင့်ရေးစခန်းမှာ ၄၅ ရက်ကြာ လေ့ကျင့်နေပုံကို အနီးကပ် ရိုက်ကူးထားပါတယ်။ ကျောင်းသား၊ ဆရာ၊ ဧည့်လမ်းညွှန်တွေ ဖြစ်ခဲ့ကြတဲ့ လူငယ်တွေ၊ တချို့က ဆယ်ကျော်သက်တွေပါ။ Mondine, Cookie, Sugar တို့လို လူငယ်တွေရဲ့ ခံစားမှုနဲ့ အတွေ့အကြုံကို ထဲထဲဝင်ဝင် ပြထားပါတယ်။
ဖွင့်ပွဲည — ရုပ်ရှင်မပြခင် စင်ပေါ်မှာ အဖွဲ့သားတွေ ရှင်းပြနေစဉ်။ မိုက်ကိုင်ပြီး ရှင်းပြနေသူက ကနေဒါ ဓာတ်ပုံဆရာ ဘရိုင်ရန် ဒစ်ကီ (ဒါရိုက်တာ သုံးဦးထဲက တစ်ဦး) — မြန်မာပြည်ထဲအထိ ဝင်ရိုက်ခဲ့သူ။ ညာဘက်အစွန်ဆုံးက ဒေါ်နယ်မင်း — Photo: ကိုယ်ပိုင်ဓာတ်ပုံ
ဖွင့်ပွဲည — စင်ပေါ်မှာ အဖွဲ့သားများ၊ နောက်ခံ စခရင်မှာ 'Opening film 2026: White Tiger Column' — Photo: ကိုယ်ပိုင်ဓာတ်ပုံ
ရုပ်ရှင်ဟာ IDFA ရဲ့ International Competition (နိုင်ငံတကာ ပြိုင်ပွဲ၊ ၁၃ ကား) မှာ ပါဝင်နေပြီး Best First Feature (အကောင်းဆုံး ပထမဆုံး ရုပ်ရှင်) ဆုအတွက်လည်း စာရင်းဝင်ထားပါတယ်။ အကောင်းဆုံးရုပ်ရှင်ဆု (Best Film) က ယူရို ၁၅,၀၀၀၊ Best First Feature ဆုက ယူရို ၅,၀၀၀ ပါ။ ဆုပေးပွဲကို နိုဝင်ဘာ ၁၉ ရက် (ကြာသပတေး) ညနေမှာ ကျင်းပမှာဖြစ်ပြီး ဆုရမရ အဲဒီနေ့မှ သိရမှာပါ။
ဖွင့်ပွဲရုပ်ရှင်အဖြစ် ရွေးချယ်ခံရပြီး ဝေဖန်ရေးသမားတွေဆီက ချီးကျူးမှုတွေ ရထားတာကြောင့် အဖွဲ့က အကောင်းဆုံးဆုကို မျှော်လင့်နေကြပါတယ်။ Business Doc Europe က "IDFA could hardly have picked a more fitting documentary" (IDFA အနေနဲ့ ဒီထက် ပိုသင့်တော်တဲ့ ဖွင့်ပွဲရုပ်ရှင်ကို ရွေးလို့ မရနိုင်ဘူး) လို့ ရေးထားပြီး Breaking the Waves မဂ္ဂဇင်းက ကြယ် ၄ လုံး ပေးထားပါတယ်။
ဒီရုပ်ရှင်ဖြစ်မြောက်ရေးမှာ မြန်မာအသိုင်းအဝိုင်းက ဒေါ်နယ်မင်း (Donald Ming) က Cultural Liaison (ယဉ်ကျေးမှု ဆက်သွယ်ရေး)၊ Lead Translation (အဓိက ဘာသာပြန်မှု) နဲ့ Associate Producer (တွဲဖက် ထုတ်လုပ်သူ) အဖြစ် ပါဝင်ခဲ့ပြီး Elizabeth Khin (Eli) က Lead Translation အဖြစ် ပါဝင်ခဲ့ပါတယ်။ နှစ်ယောက်လုံး ဖွင့်ပွဲညမှာ အမ်စတာဒမ်ကို ဧည့်သည်အဖြစ် သွားရောက်ခဲ့ပါတယ်။
ရုပ်ရှင်ကို နိုဝင်ဘာ ၁၅ ရက် (တနင်္ဂနွေ) ၁၇:၁၅ မှာ Tuschinski 4 မှာ ဒါရိုက်တာတွေနဲ့ စကားဝိုင်းနဲ့အတူ ထပ်ပြမှာဖြစ်ပြီး နိုဝင်ဘာ ၁၆၊ ၁၇၊ ၁၉၊ ၂၁ ရက်တွေမှာလည်း ပြသမှုတွေ ရှိပါသေးတယ်။ ပွဲတော်က နိုဝင်ဘာ ၂၂ ရက်အထိ ကျင်းပမှာပါ။
ရင်းမြစ်များ
- https://festival.idfa.nl/en/film/99f4878d-139e-4eec-a7ce-373d92700e59/white-tiger-column/ (IDFA)
- https://festival.idfa.nl/en/news/start-idfa-2026/ (IDFA)
- https://businessdoceurope.com/idfa-2026-opening-film-review-white-tiger-column/ (Business Doc Europe)
- https://www.instagram.com/p/DecSr4hm89J/ (Nocte Films — ပိုစတာ)
မှတ်ချက်များ
Post a Comment