YTU ဘောကွင်း မြေသိမ်းဖို့ စစ်တပ်ကြံစည်
ဒီမနက်မှာ စစ်တပ်က အရာရှိအချို့ (အရပ်၀တ်နဲ့) YTU ဘောလုံးကွင်းကို ရောက်လာတယ်လို့ ဆိုပါတယ်။ ရောက်လာတဲ့ထဲက သူတစ်ယောက်မှာ ဂေါက်ရိုက်ပစ္စည်းတွေလည်း ပါလာတယ်လို့ ပြောပါတယ်။
ဒီကွင်းကို မြက်ရှင်းပြီး ဂေါက်ကွင်းအဖြစ် ဖန်တီးမယ်၊ ဒီကိစ္စကို ရန်ကုန်တိုင်းစစ်ဌာနချုပ်ထံတင်ပြမယ်၊ လောလောဆယ် အင်းစိန်အတွက် တာ၀န်ခံ (စစ်ဗိုလ်) က ဘယ်သူလဲဆိုပြီး အချင်းချင်း ပြောနေတယ်လို့ သိရတယ်။
ဆိုတော့ ဒီကွင်းနေရာဟာ ဟိုး BIT စစတုန်းက ဂေါက်ရိုက်ဖို့အတွက်လည်း အသုံးပြုခဲ့တဲ့နေရာဆိုတာ စာထဲဖတ်ဖူးပါတယ်။ အဲ့တုန်းကဘောကွင်းက အခု MJTDC 2 ရှိတဲ့နေရာ G Hall ရှေ့မှာပါ။ နောက်မှ ရေကန်ကြီးတူးပစ်လိုက်တာပါ။
ပြီးခဲ့တဲ့ နအဖ သန်းရွှေခေတ်မှာ RIT ၀န်းနဲ့ကပ်လျက် အောင်သိန္ဓိထဲက မြေကွက်တခုကို နအဖ အတွင်းရေးမှူး(၁) ဗိုလ်ချုပ်ကြီး သီဟသူရတင်အောင်မြင့်ဦးက ယူလိုက်တယ်။ အဲလိုယူလိုက်တဲ့အထဲ YTU မြေ ပေ ၁၀၀ လောက် ပတ်ပတ်လည်ပါသွားတယ်။ ဘယ်နေရာလည်းဆိုရင် F ဆောင် မျက်စောင်းထိုး (အားကစားရုံသစ်ကြီး ဘက် သွားတဲ့အခြမ်းက) ရေကန်ကြီးရဲ့ ဟိုဖက်ကမ်းပါ။
စစ်တပ်ဟာ ရန်ကုန်တက္ကသိုလ်ထဲ လှိုင်နယ်မြေထဲက မြေတွေအများအပြားကို သန်းရွှေခေတ်မှာသိမ်းခဲ့တယ်။ လှိုင်နယ်မြေထဲမှာ ပုဂ္ဂလိက လုံးချင်းအိမ်တွေဖြစ်ကုန်တယ်။
စစ်တပ်ဟာ လှိုင်နယ်မြေအ၀င် (ပါရမီပွိုင့်အနား) က ရေကန်ကြီးထဲက ကျွန်း (အရင်က လူငယ်အပန်းဖြေစခန်း) ကိုလည်းသိမ်းလိုက်ပြီး အခုလောလောလတ်လတ်ကိုပဲ အထပ်မြင့်တိုက်ကြီးဆောက်နေတာ သတိထားမိမှာပါ။
စစ်တပ်နဲ့ ပလဲပနံသင့်တဲ့ ကုမ္ပဏီတွေဟာ သတင်းအချက်အလက် တက္ကသိုလ် UIT ပိုင်မြေကိုပါ မချန် သိမ်းပိုက်ထားခဲ့လို့ ကျောင်းမှာ အားကစားကွင်းတောင် ထည့်မရတဲ့အထိပဲ။ အဆောက်အုံနဲ့တင် ပြည့်ကျပ်နေတယ်။
UIT နဲ့ကပ်လျက် မင်းဓမ္မဥယျာဉ်မြို့တော်စီမံကိန်းဘေးက ပညာရေး၀န်ကြီဌာနရဲ့ သိပ္ပံပစ္စည်းစက်ရုံနေရာကိုလည်း ရယူသိမ်းပိုက်ခဲ့တယ်။ အဲ့ဥယျာဉ်မြို့တော်စီမံကိန်းဆိုတာဟာ ပညာရေးပိုင်မြေတွေကို သိမ်းထားပြီး အမျိုးစုံတဲ့ စီးပွားရေးလုပ်ငန်းတွေအတွက် ဖန်တီးထားတယ်။ ဒီအတွက် အဲ့တုန်းက ကျောင်းသားသမဂ္ဂတွေ ဝိုင်းကန့်ကွက်ခဲ့ကြတယ်။ မြေပြင်ထိလည်း သွားပြီး ကွင်းဆင်းကြည့်ခဲ့ကြတယ်။
စစ်တပ်ရဲ့မြေသိမ်းမှုဟာ ပြီးခဲ့တဲ့ (၅) နှစ်ကာလမှာ ဗဟိုကော်မရှင်ပါဖွဲ့ပြီး ကိုင်တွယ်ရတဲ့အထိ ကြီးမားကျယ်ပြန့်တယ်။ အမျိုးမျိုးသော ရည်ရွယ်ချက်တွေ ပေးနေပေမယ့် တကယ်တမ်းကျ မတရားမြေသိမ်းဖို့ပဲဖြစ်တယ်။ စစ်တပ်ဟာ ရန်ကုန်မြို့အချက်အခြာနေရာတွေထဲက မြေလွတ်တွေ၊ ရေစုကန်တွေပါမချန် သိမ်းဆည်းပြီး ကိုယ်ကျိုးစီးပွားအတွက် ဆောင်ရွက်ဖို့ရည်ရွယ်ချက်က အမြဲရှိတယ်။
အခု YTU ပိုင်မြေကို ထပ်ပြီး မျက်စ ပစ်နေပြီ။ ကျောင်းထဲက သခင်အားရတွေကလည်း ဆက်သအပ်ပါသည် လုပ်မှာပဲ။ တကယ်ကို စိတ်ပျက်စရာကောင်းတယ်။ ဒီလို တစစ ပျက်သုဉ်းနေတာတွေ အမြန်ရပ်တန့်နိုင်ဖို့ဆိုရင် တော်လှန်ရေးကို အားလုံး ပိုပြီးတက်ညီလက်ညီ ပါ၀င်မှဖြစ်ပါမယ်။
