ရဲရင့်ငယ်🌹

တနင်္သာရီမြို့နယ်တွင် တိုက်ပွဲမရှိဘဲ စစ်ကောင်စီက ကျေးရွာနှစ်ရွာကို လေကြောင်းတိုက်ခိုက်

ကျော်ဇော/People's Spring

တနင်္သာရီမြို့နယ်တွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က ကျေးရွာနှစ်ရွာကို လေကြောင်းမှ ပစ်ခတ်ခဲ့ကြောင်း မြိတ်ခရိုင် ပြည်သူ့ကာကွယ်ရေးပူးပေါင်းစစ်ကြောင်း (၂)မှ တာဝန်ရှိသူတစ်ဦးက လူထုနွေဦးသို့ ပြောသည်။

ယနေ့(ဇွန်လ ၁၃)မွန်းလွဲ ၃နာရီခန့်က တနင်္သာရီမြို့နယ်၊ တကူတိုက်နယ်ရှိ ခြောက်အိမ်စုရွာ၊နှင့် ပြည်အေးရွာတို့မှ စာသင်ကျောင်းအနီးနှင့် မီးသတ်ရုံးနေရာအပါအဝင် သုံးနေရာကို ဗုံးသီး ၁၈ လုံးကြဲချ ပစ်ခတ်ခဲ့ခြင်း ဖြစ်သည်။

"ဘာတိုက်ပွဲမှ မရှိပါဘူး။ အကြောင်းမဲ့ လာရောက်ပစ်ခတ်သွားတာပါ"ဟု မြိတ်ခရိုင်ပြည်သူ့ကာကွယ်ရေးပူးပေါင်းစစ်ကြောင်း (၂)မှတာဝန်ရှိသူက ပြောသည်။

စစ်ကောင်စီက စာသင်ကျောင်းအနီးနှင့် စစ်ရေးပစ်မှတ်မဟုတ်သော ပြည်သူများနေထိုင်ရာ နေအိမ်များကို ပစ်မှတ်ထား၍ Mi-2 ရဟတ်ယာဉ်ဖြင့် လာရောက်ပစ်ခတ်ခြင်းဖြစ်ပြီး ပစ်ခတ်မှုကြောင့် အဆောက်အအုံအချို့ထိခိုက်ပျက်စီးကာ အမျိုးသားတစ်ဦး ထိခိုက်ဒဏ်ရာရခဲ့ကြောင်း ၎င်းက ဆက်ပြောသည်။

လေကြောင်းမှ ပစ်ခတ်ခံရသော ကျေးရွာများသည် ပြည်သူ့ကာကွယ်ရေးတပ်မတော်(PDF) ထိန်းချုပ်နယ်မြေအတွင်းပါဝင်ပြီး အမျိုးသားညီညွတ်ရေးအစိုးရ(NUG)မှ ဖွင့်လှစ်ထားသော စာသင်ကျောင်းများနှင့် ဆေးခန်းများရှိကြောင်း ပူးပေါင်းစစ်ကြောင်း(၂)ထံမှ သိရသည်။

"PDF ထိန်းချုပ်နယ်မြေပါ။ အပြည့်အဝတော့မဟုတ်သေးဘူးပေါ့။ NUG အစိုးရရဲ့ ကျောင်းတွေ၊ ဆေးခန်းတွေ ဖွင့်ထားတယ်။ ပြည်သူ့အုပ်ချုပ်ရေးနဲ့ လုုခြုံရေးအဖွဲ့တွေလည်း ဖွဲ့ထားပြီဖြစ်ပါတယ်"ဟု တကူတိုက်နယ်အတွင်း နယ်မြေစိုးမိုးမှုအခြေအနေကို စစ်ကြောင်း(၂)မှ တာဝန်ရှိသူက ရှင်းပြသည်။

လက်ရှိအခြေအနေတွင် စစ်ကောင်စီနှင့် ၎င်း၏လက်အောက်ခံ လက်နက်ကိုင်အဖွဲ့များက ပြည်သူများအား ပစ်မှတ်ထားတိုက်ခိုက်လျှက်ရှိရာ မိဘပြည်သူများအနေဖြင့် သတိထားသွားလာနေထိုင်ကြရန် တော်လှန်ရေးတပ်ဖွဲ့များက အသိပေးထားသည်။

(လေကြောင်းမှပစ်ခတ်ရာတွင် စစ်ကောင်စီတပ်အသုံးပြုသော ဗုံးသီးနှင့် ထိခိုက်ပျက်စီးသွားသော အဆောင်အအုံအချို့ကို တွေ့ရစဥ်။

ဓာတ်ပုံ - ပေးပို့)

ဆက်ဖတ်ရန် →

ဝန်ထမ်းလစာတိုးပေးခဲ့သည့် ပုဂ္ဂလိကကုမ္ပဏီလုပ်ငန်းရှင် ၁၀ ဦးထက်မနည်းကို စစ်ကောင်စီက ဖမ်းဆီး

📅 💬 မှတ်ချက်

ကျပ်ငွေတန်ဖိုးထိုးကျမှုနှင့်ကုန်စျေးနှုန်းမြင့်တက်မှုကြောင့် ဝန်ထမ်းလစာတိုးပေးခဲ့သည့် ပုဂ္ဂလိကကုမ္ပဏီလုပ်ငန်းရှင် ၁၀ ဦးထက်မနည်းကို စစ်ကောင်စီက ဖမ်းဆီး

ရန်ကုန်၊ ဇွန် ၁၃ ခေတ်သစ်

မြန်မာကျပ်ငွေတန်ဖိုးထိုးကျမှုနှင့်ကုန်စျေးနှုန်းမြင့်တက်မှုကြောင့် ဝန်ထမ်းများကို လစာတိုးပေးသော ရုံးတွင်းအမိန့်စာများ Facebook လူမှုကွန်ရက်တွင် တင်ခဲ့သည့် ပုဂ္ဂလိကကုမ္ပဏီလုပ်ငန်းရှင် ၁၀ ဦးထက်မနည်းကို စစ်ကောင်စီက ဖမ်း ဆီးလိုက်ကြောင်း ပြည်ထဲရေးဝန်ကြီးဌာန သတင်းရင်းမြစ်က ရန်ကုန်ခေတ် သစ်သတင်းဌာနထံသို့ ပြောဆိုသည်။

မေလနှောင်းပိုင်းအတွင်း မြန်မာကျပ်ငွေတန်ဖိုး တရှိန်ထိုးကျဆင်းခဲ့သည့်အတွက် ကုန်စျေးနှုန်းများ မြင့်တက်ပြီး ဝန်ထမ်းများ လစာဖြင့် မလောက်ငှမည်ကို စိုးရိမ်ကြသည့် ပုဂ္ဂလိက လုပ်ငန်းရှင်များက ၎င်းတို့၏ ဝန်ထမ်းများ အတွက် လစာများ တိုးမြှင့်ပေးခဲ့ကြကြောင်း၊ ထိုသို့ လစာတိုးမြှင့်သည့် အမိန့်စာကိုလည်း လူမှုကွန်ရက် Facebook စာမျက်နှာများတွင် ဖော်ပြခဲ့ကြကြောင်း၊ ထိုသို့ လစာတိုးမြှင့်သည့် အမိန့်စာများကို လူမှုကွန်ရက်တွင် ဖော်ပြမှုသည် နိုင်ငံတော်ကို မတည်မငြိမ်ဖြစ်စေရန်၊ငွေကြေးဖောင်းပွမှုနှင့် ကျပ်ငွေတန်ဖိုးထိုးကျစေရန်၊ လက်ရှိ စစ်ကောင်စီကို Non-CDM ဝန်ထမ်းများက လစာမတိုးပေးမှုဖြင့် အကြည်ညိုပျက်စေရန် လုပ်ဆောင်သည်ဟုဆိုကာ ဖမ်းဆီးလိုက်ခြင်းဖြစ်ကြောင်း သိရှိရသည်။

ဝန်ထမ်းများကို လစာတိုးမြှင့်ပေးသည့် ကုမ္ပဏီနှင့်လုပ်ငန်းများတွင် ရန်ကုန်မြို့မှ Zaw Zaw Mobile လည်းပါ ဝင် ခဲ့ပြီး ဇွန်လ ၁၁ ရက်နေ့တွင် သင်္ဃန်းကျွန်းမြို့နယ်၊ စံပြစျေးရှိ Zaw Zaw Mobile ဆိုင်ကို စစ်ကောင်စီက ချိတ်ပိတ်သွားခဲ့သည်ဟု မျက်မြင် ပြည်သူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

လက်ရှိတွင် အကြမ်းဖက်စစ်ကောင်စီက ဝန်ထမ်းများ လစာတိုးမြှင့်သည်ဟု လူမှုကွန်ရက်တွင် ရုံးတွင်း အမိန့်စာ များ ဖော်ပြခဲ့ကြသည့် ကုမ္ပဏီပိုင်ရှင်များ၊ လုပ်ငန်းရှင်များကို ဖမ်းဆီး အမှုဖွင့်ထားကြောင်း၊ အဓိကအားဖြင့် ဝန်ထမ်းလစာတိုးသည့် ရုံးတွင်း အမိန့်စာများကို လူမှုကွန်ရက်တွင် ဖော်ပြခြင်းကြောင့် ဖမ်းဆီးခြင်းဖြစ်ကြောင်း ပြည်ထဲရေး သတင်းရင်းမြစ်က ဆိုသည်။

"အခုကတော့ သူတို့ ဘာရည်ရွယ်ချက်နဲ့ ဒီလို ဝန်ထမ်းလစာတိုးတဲ့ ရုံးတွင်း အမိန့်စာတွေကို လူမှုကွန်ရက် တင်သလဲဆိုတာကို စစ်ဆေးနေတယ်။ စစ်ဆေးပြီးရင်တော့ ပုဒ်မတွေတပ်ပါလိမ့်မယ်။ ဖမ်းတာက ၁၀ ဦးကျော်တယ်။ ဒီလောက်ပဲ ပြောလို့ရမယ်" ဟု ပြည်ထဲရေး သတင်းရင်းမြစ်က ပြောဆိုသည်။

အကြမ်းဖက်စစ်ခေါင်းဆောင် မင်းအောင်လှိုင်ကမူ ကျပ်ငွေတန်ဖိုးထိုးကျပြီး တိုင်းပြည်စီးပွားရေး ကမောက်ကမ ဖြစ်စေရန် ဝိသမ စီးပွားရေးသမားများက လုပ်ဆောင်နေသည်ဟုဆိုကာ ရွှေလုပ်ငန်းရှင်များ၊ ဒေါ်လာဝယ်ရောင်းများ၊ ထိုင်းနိုင်ငံတွင် ကွန်ဒိုဝယ်ယူသူများ အပါအဝင် စီးပွားရေးသမားများကို ဖမ်းဆီးအရေးယူမှုများ ဆက်တိုက် လုပ်ဆောင်လျက်ရှိကြောင်း သိရှိရသည်

။

ဆက်ဖတ်ရန် →

တောင်ဒဂုံ ၇၂ရပ်ကွက်သစ္စာပန်းလမ်းကရဲအိမ်

📅 💬 မှတ်ချက်

သံလျှင်တံတားမစ်ရှင်အဖမ်းခံရတဲ့လူငယ်တွေပြဿနာမှာအဓိကပါဝင်သူ ဖမ်းတဲ့နေ့က သူ့အိမ်မှာအောင်ပွဲခံတယ်

စောင်လှန်းထားတဲ့အိမ်

Credit.

ဆက်ဖတ်ရန် →

လားရှိုးမြို့ တိုက်ခိုက်ခံရမည်ကို စစ်တပ်က ကြောက်လန့်နေ

📅 💬 မှတ်ချက်

လားရှိုးမြို့အဝင် လမ်းပိုင်းများကို စစ်တပ်က မြေတူးစက်များဖြင့် ဖျက်ဆီး၊ လားရှိုးမြို့ တိုက်ခိုက်ခံရမည်ကို စစ်တပ်က ကြောက်လန့်နေ

ရန်ကုန်၊ ဇွန် ၁၃ ခေတ်သစ်

ရှမ်းပြည်နယ်၊ လားရှိုးမြို့ အဝင် လမ်းပိုင်းများကို အကြမ်းဖက် စစ်တပ်က မြေတူးစက်များဖြင့် လိုက်လံ ဖျက်ဆီးနေပြီး လားရှိုးမြို့ တိုက်ခိုက်ခံရမည်ကို စစ်တပ်က ကြောက်လန့်နေကြောင်း PSLF/TNLA သတင်းနှင့် ပြန်ကြားရေးဌာနက ပြောဆိုသည်။

ယနေ့ ဇွန်လ ၁၃ ရက်နေ့တွင် အကြမ်းဖက် စစ်တပ်က လားရှိုးမြို့အဝင် လမ်းပိုင်း ၃ နေရာကို မြေတူးစက်များဖြင့် လိုက်လံ ဖျက်ဆီးနေခြင်း ဖြစ်ကြောင်း၊ အကြမ်းဖက် စစ်တပ်က ဖျက်ဆီးခဲ့သော လမ်းပိုင်း ၃ နေရာသည် လားရှိုး-မိုင်းယော် သို့ သွားသည့် ကောင်းဟုန်းရွာ၊ နမ့်ဖရွာနှင့် မန်နားရွာတို့တွင် ဖြစ်ကြောင်း သိရှိရသည်။

၁၀၂၇ စစ်ဆင်ရေးအတွင်း စစ်ရှုံးနေသည့် အကြမ်းဖက် စစ်တပ်သည် တော်လှန်ရေးတပ်ဖွဲများ လားရှိုးမြို့အတွင်း ဝင်ရောက်တိုက်ခိုက်မည်ကို စိုးရိမ်ကြောက်လန့်၍ မြို့အဝင်လမ်းမများကို ဖြတ်တောက်နေခြင်းဖြစ် ကြောင်း သိရသည်။

အလားတူ ဇွန်လ ၁၂ ရက်နေ့ကလည်း သီပေါမြို့နယ် ကွန်စံလိတ်ရွာအထက် သီပေါ - နမ္မတူ လမ်းပိုင်းကို မြေတူး စက်များ ဖျက်ဆီးခဲ့ကြောင်း သိရှိရသည်။

အကြမ်းဖက် စစ်တပ်၏ လုပ်ဆောင်ချက်သည် တော်လှန်ရေး အင်အားစုများကို ဟန့်တား နိုင်ရန် ရည်ရွယ်ခြင်း ဖြစ်သော်လည်း အရပ်သား ပြည်သူများသာ ထိခိုက်နစ်နာစေခဲ့ပြီး သွားလာရေးခက်ခဲခြင်း၊ ကုန်စည်သယ်ယူပို့ ဆောင်ရေး ရပ်တန့်ရခြင်းတို့နှင့် ကြုံတွေ့နေရကြောင်း PSLF/TNLA သတင်းနှင့် ပြန်ကြားရေးဌာနက ပြောဆိုသည်။

ဆက်ဖတ်ရန် →

စစ်တပ်လက်အောက်ခံ စည်ပင်သာယာစျေးများတွင် ကြက်သား၊ ဝက်သား၊ အမဲသားနှင့်ဆိပ်သားများကို သတ်မှတ်စျေးနှုန်းဖြင့်သာ ရောင်းရန် ဖိအားပေးခံနေရသဖြင့် စျေးသည်များအခက်တွေ့

📅 💬 မှတ်ချက်

ရန်ကုန်၊ ဇွန် ၁၃ ခေတ်သစ်

အကြမ်းဖက်စစ်တပ်လက်အောက်ခံ စည်ပင်သာယာစျေးများတွင် ကြက်သား၊ ဝက်သား၊ အမဲသားနှင့်ဆိပ်သားများကို သတ်မှတ်စျေးနှုန်းဖြင့်သာ ရောင်းရန် ဖိအားပေးခံနေရသဖြင့် စျေးသည်များအခက်တွေ့ နေကြောင်း စျေးသည်များက ရန်ကုန်ခေတ်သစ်သတင်းဌာနထံသို့ ပြောဆို

သည်။

မကွေးတိုင်းအတွင်းရှိ စစ်ကောင်စီလက်အောက်ခံ စည်ပင်သာယာရေးစျေးများအားလုံးတွင် ကြက်သား၊ ဝက်သား၊ အမဲသားနှင့် ဆိတ်သားများကို သတ်မှတ်စျေးဖြင့် ရောင်းရန် စျေးသည်များကို ဖိအားပေးလာခြင်းဖြစ်ကြောင်း၊ သတ်မှတ်စျေးဖြင့် မရောင်းပါက စျေးရောင်းချခွင့် ပိတ်ပင်မည့်အပြင် ဒဏ်ရိုက်ခြင်း၊ ထောင်ချခြင်းများပါ ဆောင်ရွက်မည်ဟု ပြောဆိုလာကြောင်း သိရှိရသည်။

"ကြက်သား၊ဝက်သား၊ အမဲသားနဲ့ ဆိပ်သားတွေကို တစ်ပိဿာ တစ်သောင်းနဲ့ တစ်သောင်းခွဲအတွင်းပဲ ရောင်းရမယ်။ အဲဒါထက်ကျော်ရောင်းတာ။ အရိုးရောတာတွေကို စျေးရောင်းချခွင့် ပိတ်မယ့်အပြင် ဒဏ်ရိုက်၊ ထောင်ချမယ်လို့ ခြိမ်းခြောက်တယ်။ သူတို့သတ်မှတ်တဲ့စျေးနဲ့ မရောင်းနိုင်ရင် စျေးလာမရောင်းနဲ့ပေါ့ အဲဒီလို ပြောတယ်" ဟု နတ်မောက်မြို့နယ်၊ စည်ပင်သာယာရေးကော်မတီစျေးတွင် စျေးရောင်းနေရသူ ပြည်သူတစ်ဦးက ပြောဆိုသည်။

လက်တွေ့ ပြင်ပစျေးကွက်တွင် ကြက်သား၊ အမဲသား၊ ဝက်သားနှင့်ဆိတ်သားစျေးနှုန်းများမှာ တစ်ပိဿာလျှင် ငွေကျပ် နှစ်သောင်းဝန်းကျင်နှင့်နှစ်သောင်းကျော်အထိ မြင့်တက်နေကြောင်း သိရှိရသည်။

စစ်ကောင်စီက ကျပ်ငွေတန်ဖိုး မြင့်တက်စေရန်၊ ဒေါ်လာစျေးနှုန်း၊ ကုန်စျေးနှုန်း၊ ရွှေစျေးနှုန်းများ ကျဆင်းစေရန်အတွက် ကုန်သည်များနှင့်လုပ်ငန်းရှင်များကို ဖမ်းဆီး အရေးယူမှုများ ဆက်တိုက် လုပ်ဆောင်နေပြီး ယခုနောက်ဆုံး စည်ပင်သာယာစျေးများတွင် အခြေခံစားကုန်စျေးနှုန်းကိုပါ ခြိမ်းခြောက်ဖိအားပေး လာခြင်းဖြစ်ကြောင်း သိရှိရသည်။

ဆက်ဖတ်ရန် →

စစ်ကောင်စီဘက်က နမခဇုန်ကို နည်းဗျူဟာအပြောင်းအလဲလုပ်ဆောင်လာ

📅 💬 မှတ်ချက်

စစ်ကောင်စီဘက်က နမခဇုန်ကို နည်းဗျူဟာအပြောင်းအလဲလုပ်ဆောင်လာတာ။

စစ်ကောင်စီဘက်က မြေပြင်တိုက်ပွဲမှာ-

#ပိုင်မှလုပ်တဲ့ဗျူဟာစနစ်ကျင့်သုံးလာတာကို

(25.6.23)နေ့ စစ်ကိုင်းမြို့နယ်၊ ကင်းတော်ရွာမှာ PDFစခန်းတစ်ခု စီးနင်းခံရပြီး တော်လှန်ရေးသမား(17)ဦး အသက်စွန့်ခဲ့ရတာတွေကြည့်ခြင်းအားဖြစ်သိရနိုင်ပါတယ်။

နောက်တစ်ချက်(28.6.23)နေ့ စစ်ကိုင်း-ရွှေဘိုလမ်းပိုင်းပေါ်က စဉ့်ကိုင်နဲ့တလိုင်းကျွန်းရွာအနီး စခစစ်ကြောင်းနဲ့ ထိတွေ့တိုက်ပွဲဖြစ်ပြီး PDF (14)ဦး အသက်စွန့်ခဲ့ရတယ်။ဒါတွေဟာ စစ်ကောင်စီဘက်က ပိုင်မှလုပ်တဲ့နည်ူဗျူဟာစနစ်ကို ကျင့်သုံးလာတာကို တွေရပါတယ်။

Dead bodyတွေကြည့်ရသလောက် တပြိုင်နက်ထဲ စုပြုံချေမှုန်းခံရတဲ့ အနေအထားပဲ။နောက်တစ်ချက်က နမခတိုင်းမှူးကို နေပြည်တော်ခေါ်ယူပြီးနောက် ကစထမှူး တေဇာကျော်ကိုယ်တိုင် နမခဇုန်ကို ဆင်းပြီး ကိုင်တွယ်နေတယ်ဆိုတဲ့ သတင်းလည်း ကြားသိရတယ်။

(ကစထမှူးဆိုတာ စစ်တိုင်းမှူးသုံး၊လေးဦးရဲ့အထက်က အမိန့်ပေးနေတဲ့ commander ပါပဲ။ ကစထ(1)မှာ နမခ၊ လပခနဲ့ မပခ စစ်တိုင်းမှူးသုံးဦးကို ကစထမှူး ဒုဗမကတေဇာကျော်က ကိုင်ထားတယ်)။

ဒါ့အပြင် ပုလဲနယ်အနောက်ခြမ်းက Air Strike တိုက်ခိုက်မှု၊ ဟားခါးမြို့နယ် သီးမစ်လွင်ပြင်စစ်ဆင်ရေးတို့ကိုပါ သုံးသပ်ရရင် ဖက်စစ်တပ်အနေနဲ့ နမခဇုန်မှာ ဗျူဟာအပြောင်းအလဲလုပ်နေပြီဆိုတာ ထင်ရှားတယ်။

#အကြပ်အတည်း

ဖက်စစ်တပ်ရဲ့ ယခုချိန်မှာကြုံနေရတဲ့အကြပ်အတည်းကတော့ human resources နည်းပါးနေခြင်းဖြစ်တယ်။

ဒါကြောင့်မို့ လက်လွှတ်သင့်တဲ့ရှေ့တန်းကင်းစခန်းတချို့ကို ဖြုတ်ပြီး အဓိကကျတဲ့ ဗျူဟာနေရာတွေမှာ အင်အားစုစည်းကာ ပြန်ထိုင်တယ်။ တပ်ပြောင်း၊တပ်ရွှေ့နဲ့ မဖြစ်မနေလုပ်ရမယ့် မြေပြင်စစ်ဆင်ရေးတွေကလွဲလို့ ထိုးစစ်ကြီးတွေ မလုပ်တော့ဘဲ အထိုင်နေရာတွေကပဲ ခံစစ်ပြင်တယ်။

စစ်ကိုင်းဇုန်မှာ သူတို့အဓိကတည်ဆောက်နေတာက သတင်းကွန်ရက်ပဲ။ သတင်းကို သေချာခိုင်အောင်လိုက်တယ်။ အရင်ကလို အနံ့လောက်ရရုံနဲ့ စစ်ဆင်ရေးမလုပ်သေးဘူး၊ လွှတ်ထားတယ်၊ မျှောထားတယ်၊ လေ့လာတယ်၊ ပိုင်ပြီဆိုမှ ဝင်ဝုန်းတယ်။ အမြန်ပြန်ဆုတ်တယ်။

ပြောရရင် လူအင်အားနည်းပါးမှုနဲ့ လိုက်လျောညီထွေဖြစ်မယ့် ဗျူဟာ၊ ပိုင်မှ လုပ်တဲ့ဗျူဟာ ပါပဲ။

#ကိုယ့်သတင်းလုံဖို့လို

ရန်သူ့သတင်းရဖို့နဲ့ မိမိသတင်းလုံဖို့ဆိုတာ စစ်ပွဲရဲ့အသက်သွေးကြောဖြစ်တယ်ဆိုတာ အတော်များများသိရှိကြပြီးဖြစ်ပေမယ့် လက်တွေ့ကျင့်သုံးမှုနည်းနေတာက ပြဿနာပဲ ဖြစ်မယ်ထင်တယ်။

ကိုယ့်သတင်းလုံဖို့ဆိုရင် ဘာတွေလုပ်ရမလဲ။ သူတို့ ကိုယ့်သတင်းရနိုင်မယ့် နည်းလမ်းနှစ်မျိုးရှိတယ်။ မြေပြင်ထောက်လှမ်းခြင်းနဲ့ နည်းပညာအကူအညီရယူထောက်လှမ်းခြင်း။

Air Strike အတော်များများက နည်းပညာနဲ့သတင်းထောက်လှမ်းရယူပြီး တိုက်ခိုက်တာလို့ ယူဆမိတယ်။ အဓိကက ဖုန်းတွေကတဆင့် ထောက်လှမ်းတာ၊ အဲဒီနည်းပညာမျိုး အစ္စရေးစစ်တပ်မှာသုံးတာ ဖတ်ဖူးတယ်။

တနေရာထဲမှာ active ဖြစ်နေတဲ့ဖုန်းတွေ စုပြုံနေတာမျိုးကို တာဝါတိုင် source တွေကနေ ခြေရာခံတဲ့ နည်းပညာပဲ။ အဲလိုစုပြီဆိုတာနဲ့ စုတဲ့နေရာကို ငှက်နဲ့သွားထုတော့တာပဲ။

မြေပြင်သတင်းထောက်လှမ်းတာကတော့ ပျူ/ဒလန်တွေကို သုံးတာဖြစ်နိုင်သလို ကိုယ့်ဖက်ကပေါ့လျော့လို့ ကိုယ့်သတင်းအလွယ်တကူပေါက်ကြားတာလည်း ဖြစ်နိုင်တယ်။

Social media ကို လက်လွတ်စပယ်သုံးတာ၊ စစ်ဆင်ရေးကို အလှူလှည့်သလိုသွားတာ၊ တပ်စခန်းမှာမနေဘဲ မလိုအပ်ဘဲ ရပ်ရွာထဲမှာ အချိန်ဖြုန်းတာမျိုးက PDFတွေ အထူးရှောင်ကျဉ်သင့်တယ်လို့ မြင်မိတယ်။

စစ်ဆင်ရေးတစ်ခေါက်ပြန်ရင် အမေ့အိမ်တခေါက်ပြန်လိုက်ရမှ၊ ရည်းစားနဲ့ တခါတွေ့လိုက်ရမှ ဆိုတာမျိုးက လူငယ်တွေမို့ နားလည်ပေးရပေမယ့် မိမိအသက်အန္တရာယ်ကို ဖိတ်ခေါ်နေသလိုဖြစ်နေတယ်ဆိုတာ သတိချပ်စေချင်လှတယ်။

တပ် အထိုင်ချတဲ့အခါ ကင်းမပြတ်လပ်စေဖို့(အထူးသဖြင့် မနက်ဝေလီဝေလင်းနဲ့ အစာစားနားချိန်မျိုးဟာ ကင်းပေါ့တတ်လို့ အလစ်ဝင်တိုက်ခံရနိုင်ချေ အများဆုံးအချိန်တွေ ပါပဲ)၊ လှုပ်ရှားတဲ့အခါ ကိုယ်ဖျောက်လျှို့ဝှက်ဖို့တွေက အရမ်းသတိထားရမယ့်ကိစ္စရပ်တွေလို့ စေတနာဖြင့် သတိပေးအပ်ပါတယ်။

အနှစ်ချုပ် ပြောရရင် နမခဇုန်မှာ ဖက်စစ်တွေဗျူဟာအပြောင်းအလဲလုပ်လာတာ သေချာပါတယ်။

အပြောင်းအလဲဆိုပေမယ့် အသစ်အဆန်းလို့တော့မမြင်မိ၊ မိမိရဲ့ပေါ့လျော့မှု၊ သတိအလစ်ကို ချောင်းမြောင်းပြီး ပိုင်မှ ဝင်သုတ်တဲ့ တန်ပြန်ပြောက်ကျားဗျူဟာ သာ ဖြစ်တယ်လို့ နားလည်ရပါတယ်။ ။

စိုးဝင်းဆွေ(HPD)

ပြည်သူ့သားကောင်းတွေ ထာဝရဘေးကင်းကြပါစေ💪💪💪

ဆက်ဖတ်ရန် →

စစ်ကောင်စီကို ဘဏ္ဍာရေး အကြံပေးနေကြသူများ

📅 💬 မှတ်ချက်

၁။ ဦးမင်းဝင့်ဦး

ရာထူး - မန်နေဂျင်း ဒါရိုက်တာ (AYA Bank)

ရုံးချုပ်လိပ်စာ - အမှတ် ၄၁၆၊ မဟာဗန္ဓုလလမ်း၊ ကျောက်တံတားမြို့နယ်၊ ရန်ကုန်။

၂။ ဦးမြင့်ဇော်

ရာထူး - အမှုဆောင်အရာရှိချုပ် (AYA Bank)

၃။ ဦးဇော်လင်းထွဋ်

ရာထူး - ဒုဥက္ကဌ (A Bank)

ရုံးချုပ်လိပ်စာ - အမှတ် ၁၀၈၊ ကမ္ဘာအေး ဘုရားလမ်းနှင့် နတ်မောက်လမ်းထောင့်၊ ဗိုလ်ချို ၁ ရပ်ကွက်၊ ဗဟန်းမြို့နယ်၊ ရန်ကုန်။

၄။ ဦးကျော်စိုးလင်း

ရာထူး - အမှုဆောင်အရာရှိချုပ် (Yoma Bank)

ရုံးချုပ်လိပ်စာ - အမှတ် ၁၄၊ ကျိုက်ခေါက် ဘုရားလမ်း၊ စတားစီးတီး၊ သန်လျင်မြို့နယ်၊ ရန်ကုန်။

အထက်ပါ ပုဂ္ဂိုလ်များသည် နိုင်ငံတကာမှ ပိတ်ဆို့ အရေးယူခြင်း ခံထားရသော မင်းအောင်လှိုင်၏ စစ်ကောင်စီကို ဘဏ်စနစ်နှင့် ဘဏ္ဍာရေး ဆိုင်ရာ အကြံဥာဏ်များ ပေးနေကြသည့် သူများ ဖြစ်ကြပါသည်။

သို့သော် အဆိုပါ ပုဂ္ဂိုလ်များထဲတွင် တော်လှန်ရေးကို ကူညီခဲ့ဖူးသူများ ပါဝင်နေသည်ကို ထောက်ရှူ၍ နောက်ဆုံး အကြိမ် အဖြစ် ပြင်းထန်စွာ သတိပေး လိုက်ပါသည်။

နောင်တွင် စစ်ကောင်စီနှင့် ဆက်လက် ပူးပေါင်း ဆောင်ရွက်နေပါက ထိုက်သင့်သည့် အရေးယူ မှုများ ပြုလုပ်သွားမည် ဖြစ်ကြောင်း အသိပေး အပ်ပါသည်။

ဆက်ဖတ်ရန် →

ထွန်းမင်းလတ်နှင့် ဆက်စပ်သည့် ကုမ္ပဏီသုံးခု ဖျက်သိမ်း

📅 💬 မှတ်ချက်

ဇွန် ၂၆

အာဏာသိမ်းစစ်ခေါင်းဆောင်၏ သားသမီးများ အကျိုးစီးပွားပက်သက်နေသည့် လက်နက်ပွဲစား ထွန်းမင်းလတ်၏လုပ်ငန်းစုနှင့် ဆက်နွယ် သော ကုမ္ပဏီသုံးခုအား စာရင်းရှင်းလင်းဖျက်သိမ်းမည်ဖြစ်ကြောင်း ပြန်တမ်းများတွင်ဖော်ပြထားသည်။

အဆိုပါ ကုမ္ပဏီသုံးခုသည် ထိုင်းနိုင်ငံတွင် မူးယစ်ဆေးဝါးမှု၊ ငွေကြေးခဝါချမှုနှင့် နယ်စပ်ဖြတ်ကျော်ပြစ်မှုများဖြင့် ဖမ်းဆီးတရားစွဲခံထား ရသူ လက်နက်ပွဲစားထွန်းမင်းလတ်ချုပ်ကိုင်ထားသည့် Star Sapphire လုပ်ငန်းနှင့် ဆက်နွယ်နေသည့် Star Sapphire Phoenix co.,Ltd၊ Star Sapphire Dragon co.,Ltd နှင့် Royal Mawtaung Mining Co.,Ltd တို့ဖြစ်ကြသည်။

လက်နက်ပွဲစား ထွန်းမင်းလတ်နှင့် စစ်အုပ်စုသားသမီးများ အကျိုးစီးပွားဆက်နွယ်နေသည့် ကုမ္ပဏီသုံးခု ဖျက်သိမ်းမှုနှင့် ပတ်သက်ပြီး အရင်းခံအကြောင်းအချက်အား သိရှိနိုင်ရန် ခက်ခဲသော်လည်း ၎င်းတို့အနေဖြင့် လုပ်ငန်းစုတခုလုံးနှင့် လူပုဂ္ဂိုလ်တဦးချင်းစီအပေါ် ပိတ်ဆို့ ဒဏ်ခတ်မှုများအား ကြိုတင်ရှောင်တိမ်းရန်ကြိုးပမ်းမှုဖြစ်နိုင်ကြောင်း မြန်မာစစ်အုပ်စု၏ စီးပွားရေးအရင်းအမြစ်နှင့် လက်နက်ရောင်းဝယ်မှုများအပေါ် လေ့လာနေသည့် Justice For Myanmar အဖွဲ့မှ မရတနာမောင်ကပြောသည်။

၎င်းက “ Star Sapphire အုပ်စုရဲ့ ကွန်ရက်တခုလုံးနဲ့ လူပုဂ္ဂိုလ်တဦးချင်းစီ ဒဏ်ခတ်ပိတ်ဆို့မှုတွေ မရောက်လာသေးခင် ကြိုတင်ပြီး ရှောင်တိမ်းဖို့ ကြိုးပမ်းတာမျိုး ဖြစ်နိုင်ပါတယ်၊ Star Sapphire ရဲ့ လုပ်ငန်းတခုလုံးကို ထိခိုက်နစ်နာစေခဲ့တဲ့ ထွန်းမင်းလတ်နဲ့ အပေါင်းအပါတွေ ကို ပိတ်ဆို့အရေးယူခံရမှုတွေမှာ သူတို့ရဲ့လုပ်ငန်းတွေပါ ဒုက္ခရောက်နေတာမျိုးလည်းဖြစ်နိုင်ပါတယ်။ Star Sapphire အုပ်စုနဲ့ ကွန်ရက်တခုလုံးအပေါ် ပိတ်ဆို့အရေးယူတာတွေအပါအဝင် အခြားခရီုနီလုပ်ငန်းစုတွေနဲ့ လက်နက်ပွဲစားတွေအားလုံးကို သတိကြီးကြီးထားပြီး ဆက် လက်ဖိအားပေးနိုင်ဖို့က အားလုံးအတွက် အရေးကြီးပါတယ်” ဟု ပြောသည်။

ဖျက်သိမ်းရန်ကြေညာထားသည့် Star Sapphire Phoenix co.,Ltd ၏ ရုံးချုပ်မှာ ရန်ကုန်မြို့၊ ဗဟန်းမြို့နယ်၊ သံလွင်လမ်းတွင် ဖွင့်လှစ် ထားကြောင်း ဖော်ပြထားပြီး ကုမ္ပဏီမှ ရရန်ရှိနှင့် ပေးရန်ရှိသည်များအား ဩဂုတ်လ ၁၆ ရက်နေ့နောက်ဆုံးထားကာ စာရင်းရှင်းလင်း ဖျက်သိမ်းရေးအရာရှိထံ ပေးသွင်းခြင်း၊ တောင်းခံခြင်းများပြုလုပ်နိုင်ကြောင်းလည်း ကြေညာထားသည်။

ယင်းအပြင်အခြားကုမ္ပဏီနှစ်ခုဖြစ်သည့် Star Sapphire Dragon co.,Ltd နှင့် Royal Mawtaung Mining Co.,Ltd တို့၏ ရုံးချုပ်မှာ နေပြည်တော်၊ ဥတ္တရသီရီမြို့နယ်၊ ရွှေအင်ကြင်းလမ်းတွင် ဖွင့်လှစ်ထားကြောင်းဖော်ပြထားပြီး Royal Mawtaung Mining Co.,Ltd အတွက် ပေးရန်ရှိ၊ရရန်ရှိစာရင်းများအား ဩဂုတ် ၂ ရက်နေ့နှင့် Star Sapphire Dragon co.,Ltd အတွက် စာရင်းများအား ဩဂုတ် ၉ ရက်နေ့ နောက်ဆုံးထားကာ ဆောင်ရွက်ကြရန်လည်း ဖော်ပြထားသည်။

အဆိုပါ ကုမ္ပဏီများ၏ ဒါရိုက်တာနှင့် ရှယ်ယာရှင်များစာရင်းတွင် လက်နက်ပွဲစားထွန်းမင်းလတ်၏ ဇနီးဖြစ်သူ ဒေါ်ဝင်းမင်းစိုး၊ အငြိမ်းစား ဗိုလ်မှူးချုပ် ဇင်ယော်၏သားဖြစ်သူ ထက်အောင်တို့ပါဝင်နေသည့်အပြင် အထူးသဖြင့် Royal Mawtaung Mining Co.,Ltd သည် အာဏာ သိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်၏ သမီးဖြစ်သူ ဒေါ်ခင်သီရိသက်မွန် ဦးစီးတည်ထောင်ခဲ့သည့် Star Thiri Investment Limited အား အမည်ပြောင်းလဲထားသည့် ကုမ္ပဏီတခုဖြစ်သည်။ သို့သော် ဒေါ်ခင်သီရိသက်မွန်သည် ၎င်းကုမ္ပဏီ ဒါရိုက် တာစာရင်းမှ ၂၀၂၀ ခုနှစ်တွင် နှုတ်ထွက်ထားကြောင်းလည်း သိရသည်။

လက်နက်ပွဲစားထွန်းမင်းလတ်နှင့် စစ်ခေါင်းဆောင်သားသမီးများကြား အကျိုးစီးပွားဆက်နွယ်မှုအနေဖြင့်လည်း ထိုင်းရဲတပ်ဖွဲ့က ယမန်နှစ် စက်တင်ဘာလတွင် ထွန်းမင်းလတ်အား ဖမ်းဆီးကာ ပိုင်ဆိုင်မှုများ စစ်ဆေးစဉ် စစ်ခေါင်းဆောင်သားဖြစ်သူ ဦးအောင်ပြည့်စုံနှင့် သမီးဖြစ် သူ ဒေါ်ခင်သီရိသက်မွန်တို့၏ ဘဏ်စာအုပ်များ၊ ဘန်ကောက်ရှိ အဆင့်မြင့်ကွန်ဒိုတိုက်ခန်း ပိုင်ဆိုင်မှုများပါ တွေ့ရှိခဲ့သည်။

ယင်းအတွက် အာဏာသိမ်းစစ်ခေါင်းဆောင်က မူးယစ်ဆေးဝါးမှု၊ ငွေကြေးခဝါချမှု၊ နယ်စပ်ဖြတ်ကျော်မှုခင်းများဖြင့် တရားစွဲခံထားရ သည့် ထွန်းမင်းလတ်အမှုတွင် သမီးဖြစ်သူ၏ အမည်ပါဝင်နေမှုအား ပယ်ဖျက်ပေးရန် ထိုင်းအာဏာပိုင်များအား ပုဂ္ဂိုလ်ရေးအရ တောင်း ဆိုခဲ့ဖူးကြောင်း ဧရာဝတီ၏သတင်းအရင်းအမြစ်များက ပြောထားသည်။

Justice For Myanmar အဖွဲ့က ထွန်းမင်းလတ်အမှုတွင် ပါဝင်ပတ်သက်နေသည့် အောင်ပြည့်စုံနှင့် ခင်သီရိသက်မွန်တို့၏ ပိုင်ဆိုင်မှုများအား ထိုင်းအာဏာပိုင်များအနေဖြင့် သိမ်းဆည်းကာ ထွန်းမင်းလတ်၏ မူးယစ်ဆေးဝါနှင့် ငွေကြေးခဝါချမှုများတွင် ၎င်းတို့အနေဖြင့် အကျိုးအမြတ်ရရှိခဲ့ခြင်း ရှိမရှိအား စုံစမ်းစစ်ဆေးရန် တိုက်တွန်းခဲ့ပြီး ထိုင်းနိုင်ငံ၏ ဥပဒေအား တစုံတရာချိုးဖောက်မှုရှိပါက တရားစွဲဖို့လည်း တောင်းဆိုခဲ့သည်။

လက်ရှိတွင် ပြည်သူများအပေါ် အကြမ်းဖက်သတ်ဖြတ်မှုများ ကျူးလွန်နေသည့် မြန်မာစစ်တပ်အား စစ်လက်နက်များတင်သွင်းပေးရာ တွင် ထွန်းမင်းလတ်နှင့် ၎င်း၏ Star Sapphire လုပ်ငန်းစုအနေဖြင့် ပါဝင်ပတ်သက်နေသည်ဟုဆိုကာ အမေရိကန်နိုင်ငံနှင့် ဗြိတိန်နိုင်ငံတို့ က ပိတ်ဆိုအရေးယူမှုများ ချမှတ်ထားသည်။

ယင်းအပြင် စစ်ခေါင်းဆောင်၏ သားသမီးများဖြစ်သည့် ဦးအောင်ပြည့်စုံနှင့် ဒေါ်ခင်သီရိသက်မွန်တို့ကိုလည်း အမေရိကန်နှင့် ကနေဒါနိုင်ငံ တို့က ပိတ်ဆို့အရေးယူမှုများ ပြုလုပ်ထားသည်။

လက်နက်ပွဲစား ထွန်းမင်းလတ်နှင့် အာဏာသိမ်းစစ်ခေါင်းဆောင်၏ သားသမီးများ အကျိုးစီးပွားပတ်သက်ဆက်နွယ်နေသည်။

Credit ဧရာဝတီ

ဆက်ဖတ်ရန် →

သာသနာ့ မြေ ၇ ဧက ကျော်ကို မင်းအောင်လှိုင် ပြန်မပေးဘဲ အဓမ္မ သိမ်းခဲ့မှု ဆရာတော့် အခေါင်းထမ်းရုံနဲ့ ကျေနိုင်ရိုးလား

📅 💬 မှတ်ချက်

နိုင်ငံတော် သံဃာ မဟာနာယက ဥက္ကဋ္ဌ ဆရာတော်ထံမှ ကမ္ဘာအေးသာသနာ့ မြေ ၇ ဧက ကျော်ကို မင်းအောင်လှိုင် ပြန်မပေးဘဲ အဓမ္မ သိမ်းခဲ့မှု ဆရာတော့် အခေါင်းထမ်းရုံနဲ့ ကျေနိုင်ရိုးလား

By ရန်ကုန်ခေတ်သစ်

နိုင်ငံတော်သံဃမဟာနာယက အဖွဲ့ ဥက္ကဋ္ဌ ဆရာတော်ကြီး ဒေါက်တာဘဒ္ဒန္တကုမာရာဘိဝံသ မေလ ၂၅ ရက်နေ့မှာ ပျံလွန်တော်မူပြီး ဇွန်လ ၇ ရက်နေ့မှာ ဆရာတော်ကြီးရဲ့ ကြွင်းကျန်ရစ်တဲ့ အရိုးပြာတွေကို ဧရာ၀တီမြစ်ထဲမျှောလို့ ဈာပန အခမ်းအနား ပြီးစီးခဲ့ပါတယ်။

ဆရာတော်ကြီး ပျံလွန်တော်မူချိန်မှာ မင်းအောင်လှိုင်က ဆရာတော်ကြီးရဲ့ အခေါင်းကို ထမ်းတာ ၊ ရုပ်ကလပ်ကို ရှစ်ခိုးတာတွေနဲ့ ဈာပနကို တက်ရောက်တာတွေ လုပ်ခဲ့ပါတယ်။ ဒါပေမယ့် ဒီလိုတွေ လုပ်ပေမယ့်လည်း မင်းအောင်လှိုင်က ဆရာတော်ကြီးဆီကနေ သာသနာ့မြေ လုယူ သိမ်းဆည်းခဲ့တဲ့ အပြစ်ကိုတော့ ကျေနိုင်မှာ မဟုတ်ပါဘူး။

ကမ္ဘာအေး သာသနာ့မြေထဲက မြေဧက ၇ ဒသမ ၃၀၉ ကို မင်းအောင်လှိုင်ရဲ့ စစ်တပ်က သိမ်းယူခဲ့ပါတယ်။ ဆရာတော်ကြီးက သာသနာ့မြေကို ပြန်ပေးဖို့ စာရေးပြီး တောင်းဆိုပေမယ့်လည်း မင်းအောင်လှိုင်က ပြန်မပေးတဲ့ အပြင် ဆရာတော်ကြီးကိုပါ စိတ်ဆိုးမာန်ဆိုး တုံ့ပြန်ခဲ့ပါသေးတယ်။

ဆရာတော်ကြီး ပျံလွန်တော်မူချိန်မှာတော့ သူမဟုတ်တဲ့အလား မင်းအောင်လှိုင်က အခေါင်းသယ်၊ ရုပ်ကလပ် ရှစ်ခိုးတာတွေ လုပ်ခဲ့ပေမယ့်လည်း ဆရာတော်ကြီးကို ကျူးလွန်ခဲ့တဲ့ အပြစ်တွေကို မကျေနိုင်ပါဘူး။

နိုင်ငံတော်သံဃမဟာနာယကအဖွဲ့ ဥက္ကဋ္ဌ ဆရာတော်က သာသနာရေးအတွက် လှူဒါန်းထားတဲ့ မြေတွေကို စစ်တပ်က သိမ်းယူတာဟာ အသုံးပြုသူတွေကို ပစ္စုပ္ပန် သံသ ရာ နှစ်ဖြာအကျိုးပျက်စီးစေနိုင်တယ်လို့ မင်းအောင်လှိုင်ကို သတိပေးခဲ့ပေမယ့် မင်းအောင်လှိုင်က နားမထောင်ခဲ့ပါဘူး။

ကမ္ဘာအေး သာ့သနာမြေကို မင်းအောင်လှိုင် သိမ်းယူခဲ့ခြင်း

=============================================

စစ်တပ်က သာသနာပိုင်ကမ္ဘာအေးကုန်းမြေထဲက မြေတွေကို တပ်ပိုင်မြေတွေအဖြစ် သိမ်းယူထားခဲ့တာရှိပါတယ်။ အဲဒီမြေတွေကို NLD အစိုးရ၊ သာသနာရေးဝန်ကြီး ဦးအောင်ကိုက မင်းအောင်လှိုင်ဆီက ပြန်တောင်းယူခဲ့ပါတယ်။ ဒါကို မင်းအောင်လှိုင်က အကြီးအကျယ် စိတ်ဆိုး‌ခဲ့ပြီး မြေတွေကို ပြန်မပေးခဲ့ပါဘူး။

စစ်ခေါင်းဆောင် သန်းရွှေလက်ထက် ၂၀၀၁ ခုနှစ် ကာကွယ်ရေးဝန်ကြီးဌာနကို မရမ်းကုန်းမြို့နယ် ၊ ကုန်းမြင့်သာ ရိပ်သာကို ပြောင်းရွှေ့တဲ့အချိန်မှာ လုံခြုံရေးအရ ကမ္ဘာအေး သာသနာမြေ မြေဧက ၇ ဒသမ ၃၀၉ ကို စစ်တပ်က သိမ်းယူခဲ့ပါတယ်။

စစ်တပ်က သိမ်းယူလိုက်တဲ့ သာသနာပိုင် ကမ္ဘာအေးကုန်းမြေဧက ၇ ဒသမ ၃၀၉ အတွင်းမှာ ဆဋ္ဌသံဂါယနာတင် အဆောက်အဦး၊ ပိဋကတ်တိုက်၊ ညောင်ရမ်းဆရာတော်ကြီး ဩဝါဒဖြင့် တည်ထားသော ညောင်ရမ်းစေတီ၊ ကပ်ကျော်စေတီတွေပါ ပါသွားခဲ့ပါတယ်။

ဒါပေမယ့် ၂၀၀၆ ခုနှစ် နေပြည်တော်ကို ကာကွယ်ရေးဝန်ကြီးဌာနပြောင်းရွှေ့သွားတဲ့အချိန်မှာလည်း စစ်တပ်က လုံခြုံရေးအရ သိမ်းယူထားတဲ့ သာသနာပိုင်မြေတွေကို ပြန်မပေးပါဘူး။ စစ်တပ်က သာသနာပိုင်မြေတွေကို ပြန်မပေးတော့ဘဲ ဂေါက်ကွင်း ရေတွန်းပို့တဲ့ ရေတွန်းစက်၊ ရေတွန်းစက်ဝန်ထမ်း အိမ်ရာတွေ ဆောက်လုပ်ပြီး မြေတွေကို အငှားပြန် ချတာတွေလုပ်ဆောင်ပါတယ်။

စစ်တပ်က သာသနာ့မြေတွေကို ဒီလို ပြန်မပေးဘဲ အလွဲသုံးစားလုပ်နေလို့ ၂၀၁၆ ခုနှစ် NLD အစိုးရလက်ထက်မှာ သာသနာရေးဝန်ကြီး သူရဦးအောင်ကိုက ပြန်တောင်းသလို နိုင်ငံတော်သံဃမဟာနာယက အဖွဲ့ ဥက္ကဋ္ဌ ဆရာတော်ကြီး ဒေါက်တာဘဒ္ဒန္တကုမာရာဘိဝံသ ကိုယ်တိုင်က ၂၀၁၆ ခုနှစ် နိုဝင်ဘာလ ၆ ရက်နေ့မှာ မင်းအောင် လှိုင်ဆီစာရေးပြီး စစ်တပ်က သိမ်းဆည်းထားတဲ့ ကမ္ဘာအေးကုန်းမြေမှ သာသ နာပိုင် မြေဧက ၇ ဒသမ ၃၀၉ ကို ပြန်ပေးဖို့ စာရေးသားပေးပို့ပါတယ်။

နိုင်ငံတော်သံဃမဟာနာယကအဖွဲ့ ဥက္ကဋ္ဌ ဆရာတော်က သာသနာရေးအတွက် လှူဒါန်းထားတဲ့ မြေတွေကို သိမ်းယူတာဟာ အသုံးပြုသူတွေကို ပစ္စုပ္ပန် သံသ ရာ နှစ်ဖြာအကျိုးပျက်စီးစေနိုင်တယ်လို့ မင်းအောင်လှိုင်ကို စာထဲမှာ သတိပေးခဲ့ပါတယ်။

နိုင်ငံတော်သံဃမဟာနာယကအဖွဲ့ ဥက္ကဋ္ဌ ဆရာတော်ကိုယ်တိုင် မင်းအောင် လှိုင်ဆီ စာရေးပေမယ့် ကမ္ဘာအေးကုန်းမြေဧက ၇ ဒသမ ၃၀၉ ကို လုံး၀ ပြန်မပေးဘဲ ခြံစည်းရိုး ပတ်ဝန်းကျင်မှာသာ ပါဝင်တဲ့ မြေဧက ၂ ဒသမ ၆၁၈ ဧကကိုပဲ မင်းအောင်လှိုင်က ပြန်ပေးခဲ့ပါတယ်။

မင်းအောင်လှိုင်အကြီးအကျယ်စိတ်ဆိုးခြင်း

============================

နိုင်ငံတော်သံဃမဟာနာယက ဥက္ကဋ္ဌ ဆရာတော်က မင်းအောင်လှိုင်ထံ ရေးတဲ့စာထဲမှာ မြေသိမ်းအသုံးပြုရင် အသုံးပြုတဲ့သူတွေ ပစ္စုပ္ပန်သံသရာနှစ်ဖြာ အ ကျိုး ပျက်စီးစေနိုင်တယ်လို့ ရေးသားပေးပို့ ခဲ့ပါတယ်။

နိုင်ငံတော်သံဃာမဟာနာယက ဥက္ကဋ္ဌ ဆရာတော်က သူ့ဆီကို ဒီလို စာရေးရတာဟာ သူရဦးအောင်ကို ရေးခိုင်းတာနဲ့ မြှောက်ပေးတာကြောင့်လို့ဆိုပြီး မင်းအောင်လှိုင်က အကြီးအကျယ်စိတ်ဆိုး‌ ဒေါသထွက်ခဲ့ပါတယ်။ မင်းအောင်လှိုင်က NLD သာသနာရေး ဝန်ကြီး သူရဦးအောင်ကို အပေါ် အကြီးအကျယ် အငြိုး ထားခဲ့ပါတယ်။

မြေသိမ်းခဲ့ပေမယ့် အသုံးပြုတဲ့သူအနေနဲ့ ပစ္စုပ္ပန်သံသရာနှစ်ဖြာအကျိုး ပျက်စီးစေနိုင်တယ်လို့ ဆိုခဲ့တဲ့ ဆရာတော်ကြီးရဲ့ မိန့်ကြားမှုစကားအတွက် မင်းအောင်လှိုင်က အာဏာသိမ်းပြီးတဲ့နောက်မှာ သူရဦးအောင်ကိုကို အလုပ်နဲ့ထောင် ဒဏ် နှစ်ရှည်တွေ ချမှတ်ခဲ့ပါတယ်။

မင်းအောင်လှိုင်ဟာ သူ့အကျိုးအတွက်ဆိုရင် ကမ္ဘာအေးကုန်းမြေလို သာသနာ ပိုင်မြေကိုတောင် သိမ်းယူဖို့နဲ့ ပြန်မပေးဖို့ လုပ်ရဲသူဖြစ်ပါတယ်။

မင်းအောင်လှိုင်ဟာ ပါးစပ်က ဘုရား၊ ဘုရား လုပ်နေပေမယ့် နိုင်ငံတော်သံဃမဟာနာယက ဥက္ကဋ္ဌ ဆရာတော် ကိုယ်တိုင် ဖျောင်းဖြ မေတ္တာရပ်ခံနေတာကို နားမဝင်ဘဲ ဘုရားပိုင်မြေတွေ မျက်နှာပြောင်ပြောင် သိမ်းယူထားခဲ့ပါတယ်။

မင်းအောင်လှိုင်က ဘာသာရေးနဲ့ ဗုဒ္ဓဘာသာကို သူ့အကျိုးစီးပွားအတွက် စည်း ရုံးအသုံးချဖို့လောက်ပဲ စိတ်ဝင်စားပြီး တကယ်တမ်း ဗုဒ္ဓဘာသာနာပိုင် နိုင်ငံ တော် သံဃာမဟာနာယက ဥက္ကဋ္ဌဆရာတော်ကြီးရဲ့ မေတ္တာရပ်ခံကိုတောင် ပယ်ချဝံ့သူဖြစ်ပါတယ်။

သာသနာပိုင် ကမ္ဘာအေးကုန်းမြေကို မင်းအောင်လှိုင်က ပြန်မပေးဘဲ သိမ်းယူခဲ့တဲ့ လုပ်ရပ်က မင်းအောင်လှိုင်ဟာ လူသတ်ကောင်၊ စစ်ရာဇ ဝတ်ကောင် အယောင် ဆောင် ဗုဒ္ဓဘာသာဝင်၊ "ဘုရား၊ တရား၊ သံဃာ"ကို နားမလည်တဲ့လူမိုက် တစ်ဦးသာဖြစ်တယ် ဆိုတာကို သက်သေပြနေပါတယ်။

ဆက်ဖတ်ရန် →

ကိုကောင်းဇာနည်ဟိန်း ၏ မိခင်နှင့် အစ်မ တို့ကို မဘသနှင့်ပျူစောထီးများက ပစ်ခတ်သတ်ဖြတ်

📅 💬 မှတ်ချက်

အမျိုးသားရေး အစွန်းရောက် လီလီနိုင်ကျော်ကို ပစ်သတ်သူ အဖြစ် စစ်တပ်၏ စွပ်စွဲ ဖမ်းဆီးခံထားရသော ကိုကောင်းဇာနည်ဟိန်း ၏ မိခင်နှင့် အစ်မ တို့ကို မဘသနှင့်ပျူစောထီးများက ပစ်ခတ်သတ်ဖြတ်

■ ထန်းတပင်မြို့နယ် မဘသ ဒုဥက္ကဋ္ဌ လူမိုက် ပျူစောထီး နိုင်ကြီးအဖွဲ့က သတ်ဖြတ်မှုတွင် ဦးဆောင်ပါဝင်ခဲ့

ရန်ကုန်၊ ဇွန် ၇

ရန်ကုန်တိုင်း၊ ရန်ကင်းတွင် ပစ်ခတ်ခံရပြီး သေဆုံးခဲ့သော အမျိုးသားရေး အ စွန်း ရောက် လီလီနိုင်ကျော်ကို ပစ်သတ်သူအဖြစ် စစ်တပ်၏ စွပ်စွဲဖမ်းဆီးမှု ခံရသော ကိုကောင်းဇာနည်ဟိန်း၏ မိခင်နှင့် အစ်မ တို့ကို မဘသနှင့်ပျူစောထီးများက ယမန်နေ့ညပိုင်း ပစ်ခတ်သတ်ဖြတ်သွားကြောင်း တော်လှန်ရေးသတင်းရင်းမြစ်၊ မဘသအသိုင်းအဝိုင်းနှင့် စစ်ဘက်သတင်းရင်းမြစ် တချို့ထံမှ သိရှိရသည်။

မေလ ၃၀ ရက်နေ့တွင် အမျိုးသားရေး အမည်ခံ အစွန်းရောက် လီလီနိုင်ကျော် ပစ်သတ်ခံရပြီးနောက် ဇွန်လ ၄ ရက်နေ့တွင် အကြမ်းဖက်စစ်ကောင်စီက ကိုကောင်းဇာနည်ဟိန်း(ခ)လပြည့်နှင့် ကိုကျော်သူရ(ခ) အီးတီတို့ကို လုပ်ကြံ သတ်ဖြတ်သူများအဖြစ် ဖမ်းဆီးသွားခဲ့ကြောင်း၊ ယင်းနောက် ဇွန်လ ၆ ရက်နေ့ ညပိုင်းတွင် လီလီနိုင်ကျော်ကို သတ်ဖြတ်သူအဖြစ် စွပ်စွဲခံရသူ ကိုကောင်းဇာနည်ဟိန်း(ခ) လပြည့်၏ မိခင် ဒေါ်သဲမာလာဝင်းနှင့် အစ်မဖြစ်သူ မဆောင်းသဇင်ဦးတို့ကို ရန်ကုန်တိုင်း၊ ထန်းတပင်မြို့နယ်၊ ရိုးကြီးကျေးရွာ၊ အမှတ်၉၀ အေးမေတ္တာလမ်း၊ နေအိမ်တွင် မဘသနှင့်ပျူစောထီးများက ဝင်ရောက် ရိုက်နှက်၊ ပစ်ခတ်သတ်ဖြတ်သွားခဲ့ကြောင်း သိရှိရသည်။

"သေနတ်နဲ့ မပစ်ခင်မှာ နှစ်ဦးစလုံးကို စိတ်တိုင်းကျ ရိုက်နှက် ညှဉ်းပန်းတယ်။ မပစ်ခင်ကတည်းက အရမ်းရိုက်နှက်ခံရထားတော့ သေလုမျောပါးဖြစ်တယ်။ ပြီးမှ သေတာသေချာအောင် သေနတ်နဲ့ ပစ်ခတ်သွားတာ။ လိပ်စာအတိအကျနဲ့ကိုလာသတ်သွားတာ" ဟု ရန်ကုန်ခေတ်သစ်၏ သတင်းရင်းမြစ်က ပြောဆိုသည်။

ရဲဘက်သတင်းရင်းမြစ်တစ်ခုကမူ ကိုကောင်းဇာနည်ဟိန်း၏ လိပ်စာဖြစ်သော ရန်ကုန်တိုင်း၊ ထန်းတပင်မြို့နယ်၊ ရိုးကြီးကျေးရွာ၊ အမှတ်၉၀ အေးမေတ္တာလမ်း၊ နေအိမ် လိပ်စာကို စစ်ဘက်ရေးရာလုံခြုံရေးအဖွဲ့(စရဖ)က ပျူစောထီးများထံ ပေးပို့ ရှယ်ခဲ့ကြောင်း ပြောဆိုသည်။

အမျိုးသားရေးအစွန်းရောက် သတင်းရင်းမြစ်တချို့ကမူ တင့်လွင်နှင့် လီလီနိုင်ကျော်တို့ အသတ်ခံရပြီးနောက် မဘသနှင့်ပျူစောထီးများက NLD ပါတီဝင်များ၊ နာမည်ကြီး နွေဦးတော်လှန်ရေး တက်ကြွလှုပ်ရှားသူများ၏ မိသားစုများ ကို လုပ်ကြံသတ်ဖြတ်ရန် အစည်းအဝေးများ လုပ်ဆောင်ခဲ့ကြောင်း၊ လက်ရှိ ထန်းတပင်မှ အမျိုးသမီး ၂ ဦး အသတ်ခံရမှုသည် ယင်းအစည်းအဝေးများ၏ နောက်ဆက်တွဲ ဟု ဆိုရမည်ဖြစ်ကြောင်း ရန်ကုန်ခေတ်သစ်သတင်းဌာနထံသို့ ပြောဆိုသည်။

ယခုနောက်ဆုံး ဝင်ရောက်လာသော သတင်းများအရ ကိုကောင်းဇာနည်ဟိန်း(ခ) လပြည့်၏ မိခင်နှင့် အစ်မတို့ကို သတ်ဖြတ်သူများမှာ ထန်းတပင်မြို့နယ်၊ ရိုးကြီးကျေးရွာမှ ပျူစောထီး နိုင်ကြီး(ခ) အရုပ်ကြီး လူမိုက်အဖွဲ့နှင့် အတူ ပါလာသော မဘသ အမျိုးသားရေး အစွန်းရောက်များ ဖြစ်ကြောင်း သိရှိရသည်။

" ရဲနဲ့စစ်တပ်နောက်လိုက် ပျူစောထီး နိုင်ကြီး (ခေါ်) အရုပ်ကြီးဆိုတဲ့လူမိုက်အဖွဲ့တွေနဲ့အတူပါလာတဲ့အဖွဲ့ပါ။ ပရိုဘောက် ကားနဲ့ဝင်လာတယ်။ အဲဒီကားနဲ့ပြန်ထွက်သွားတယ်။ ပျူစောထီးနိုင်ကြီး(ခေါ်) အရုပ်ကြီး လူမိုက်အဖွဲ့က မဘသတွေလည်းဖြစ်ပါတယ်။ ထန်းတပင်မှာလည်း မဘသ ဒုဥက္ကဌလည်း ဖြစ် တယ်။ ကျေးရွာအတွင်းမှာလည်းထင်တိုင်းကြဲမိုက်ရိုင်းနေတဲ့လူတွေလည်းဖြစ်ပါတယ်" ဟု ရန်ကုန်ခေတ်သစ်၏ သတင်းရင်းမြစ်က ပြောဆိုသည်။

ဆက်ဖတ်ရန် →

အစွန်းရောက်အဖွဲ့ဝင် VIP လီလီနိုင်ကျော် ပစ်ခတ်ခံရပြီး

📅 💬 မှတ်ချက်

ထိပ်တန်းစစ်ဗိုလ်ချုပ်များနှင့်ရင်းနှီးသူ၊ မဘသနှင့်အမျိုးသားရေး အစွန်းရောက်အဖွဲ့ဝင် VIP လီလီနိုင်ကျော် ပစ်ခတ်ခံရပြီး ဆေးရုံတွင် အရေးပေါ် ကုသနေရာမှ သေဆုံး

ရန်ကုန်၊ မေ ၃၀ ခေတ်သစ်

ရန်ကုန်တိုင်း၊ ရန်ကင်းမြို့နယ်တွင် စစ်တပ်ထောက်ခံပြီး ထိပ်တန်း စစ်ဗိုလ် ချုပ် များနှင့်ရင်းနှီးသူ စစ်ကောင်စီအတွက် အလုပ်လုပ်ပေးနေသူ မဘသနှင့် အမျိုးသားရေး အစွန်းရောက် အဖွဲ့ဝင် VIP လီလီနိုင်ကျော် ပစ်ခတ်ခံရပြီး ဆေးရုံတွင် အရေးပေါ် ကုသနေရာမှ သေဆုံးသွားကြောင်း သိရှိရသည်။

မေလ ၂၉ရက် ည ၇ နာရီအချိန် ရန်ကင်းမြို့နယ်၊ အမှတ်(၂)ရပ်ကွက်၊ ရန်အောင် လမ်း၊ တိုက်အမှတ်၂၆၅ နေထိုင်သူ စစ်တပ်ထောက်ခံသူ၊ မဘသနှင့် အမျိုးသားရေးအစွန်းရောက် အဖွဲ့ဝင် လီလီနိုင်ကျော်ကို မြိုပြပျောက်ကြားတပ် ဖွဲ့က ပစ်ခတ်ခဲ့ကြောင်း၊ လီလီနိုင်ကျော်သည် စစ်ကောင်စီ ၏ စစ်ခေါင်း ဆောင်ပိုင်းများနှင့်ထဲထဲဝင်ဝင် ရင်းနှီးသူဖြစ်ပြီး တော်လှန်ရေးရဲဘော်များ၏ သတင်းအချက်လက်များနှင့် တော်လှန်ရေး လှုပ်ရှား မှုများကို စစ်တပ်အတွက် စုံစမ်းထောက်လှမ်းပေးသူဖြစ်ကြောင်း ရန်ကုန်မြို့ပြပျောက်ကျားတပ်ဖွဲ့က ပြောဆိုသည်။

"ပစ်ခတ်ခံရတဲ့အချိန်ကတည်းက မေးစေ့နဲ့ နားထင် (ခေါင်း)ကို ဖောက်ထွက်သွားတာ။ ဆေးရုံရောက်ကတည်းက အသက်ငွေ့ငွေ့ပဲ ကျန်တော့တာလို့ ပြောပါတယ်။ သေသွားတာတော့ သေချာပြီလို့ သိရတယ်" ဟု ရန်ကုန်ခေတ်သစ်၏ သတင်းရင်းမြစ်က ပြောသည်။

လီလီနိုင်ကျော်သည် ၂၀၂၁ ခုနှစ်၊ ဖေဖော်ဝါရီလအတွင်း နွေဦးတော်လှန် အရှိန် အဟုန်မြင့် စတင်ချိန်မှ စပြီး အေးချမ်းစွာဆန္ဒပြကြသည့်အများ ပြည်သူ လူထုများ၊ သပိတ်လူငယ်များ နှင့် ရပ်ကွက်အတွင်း သံပုံးတီးဆန့် ကျင် သည့် နေအိမ်များကို အာဏာသိမ်းစစ်တပ်က ဖမ်းဆီးစေရန် သတင်းပေး၍ ဖမ်းဆီး စေခြင်း၊ ရန်ကင်းမြို့နယ်အတွင်း ရန်ကင်း ၁၂လုံးတန်းမှ တော်လှန်ရေး လူငယ် များ အပါအ၀င် ရွှေအုန်းပင်မှ‌ တော်လှန်ရေးလူငယ်များ၏ သတင်းအချက် အလက်များကို စစ်ကောင်စီထံ သတင်းပေးခြင်းများ လုပ်ဆောင်ခဲ့သည့် သက်သေအထောက် အထားများရရှိထားကြောင်း သိရှိရသည်။

ထို့ပြင် လီလီနိုင်ကျော်သည် အကြမ်းဖက်စစ်ကောင်စီမှ ဒုတိယ ဗိုလ်ချုပ်မှူး ကြီးစိုးဝင်း၊ ဗိုလ်ချူပ် ဇော်မင်းထွန်းနှင့် တခြားသော စစ်ခေါင်းဆောင်တို့နှင့် ထိတွေ့ ဆက်ဆံနေသူဖြစ် သည့်အပြင် အကြမ်းဖက် စစ်ကောင်စီ၏ လက်ဝေခံ တယ်လီဂရမ် သတင်းချန်နယ် မီဒီယာများသို့ တော်လှန်ရေးရဲဘော်များ၏ အချက် အလက်များကိုလည်း သတင်းပေးနေသူဖြစ်ကြောင်း၊ လီလီနိုင်ကျော်သည် ၇၈ နှစ်မြောက် တပ်မတော်နေ့အခမ်းအနားသို့လည်း VIP နံပါတ် ၉၇၄ လည်ဆွဲကတ် ဖြင့် တက်ရောက်ခဲ့ကြောင်း သိရှိရသည်။

ဆက်ဖတ်ရန် →

ရန်ကုန်မြို့ရဲ့ မြို့နယ်အမည်တွေ ဘယ်လိုဖြစ်လာသလဲ

📅 💬 မှတ်ချက်

ဟိုးတုန်းကတော့ ရန်ကုန်ဟာ

ရွှေတိဂုံဘုရားကို ဗဟိုပြုထားတဲ့

ငါးဖမ်းရွာလေးတစ်ရွာသာ ဖြစ်ပါတယ်။

အေဒီ ၆ ရာစုက စလို့ မွန်လူမျိုးများက

ဒဂုံ အဖြစ်ပြောင်းလဲ တည်ထောင်ခဲ့ကြပါတယ်။

ဒဂုံ ဆိုသည်မှာ ဒဂုင်လွုင် ဟူသော

ရွှေတိဂုံစေတီတော်ကြီး၏ ဘွဲ့အမည်မှ

ဆင်းသက်လာခဲ့ကြောင်း သိရပါတယ်။

မွန်ဝေါဟာရအရ ကုန်းမြင့်ပေါ်က စေတီ လို့

အဓိပ္ပါယ်ရပါတယ်။

၁၇၅၅ ခုနှစ်မှာ အလောင်းဘုရားဟာ

ဒဂုံကို အောင်နိုင်ပြီး ရန်ကုန် ဟူ၍

စတင်ပြောင်းလဲခဲ့ပါတယ်။

အဲဒီနောက် ကုန်းဘောင်ခေတ် ၊

ကိုလိုနီခေတ်များကို ကျော်ဖြတ်ခဲ့ပြီး

ယနေ့အချိန်မှာတော့ ရန်ကုန်ဟာ

မြန်မာနိုင်ငံရဲ့ အစည်ကားဆုံး နဲ့

အဓိကအကျဆုံး မြို့အဖြစ်ရပ်တည်နေပါတယ်။

ရန်ကုန်မြို့ဟာ ကမာရွတ်၊ တာမွေ ၊

စမ်းချောင်း စတဲ့ မြို့နယ်ခွဲပေါင်းများစွာနဲ့

ဖွဲ့စည်းထားတဲ့မြို့တစ်မြို့ဖြစ်ပါတယ်။

ထိုမြို့တွေရဲ့အမည် ဟာ ဘယ်ကနေ

ဖြစ်ပေါ်လာပါသလဲ။ အများစုကတော့ မွန်နာမည်

အခေါ်အဝေါ်ကနေ ဆင်းသက်လာခဲ့ပါတယ်။

မသိသေးသူများ သိစေဖို့ ဗဟုသုတအဖြစ်

မျှဝေလိုက်ပါတယ်။

ကမာရွတ် -

မွန်ဘာသာ ဖြစ်ပြီး ကမာဆိုတာ ရေကန် ၊

ရွတ် ဆိုတာ ရတနာ ဖြစ်ပါတယ်။

ရတနာကန် ဆိုတဲ့ အဓိပ္ပါယ်ရပါတယ်

အင်းလျားကန်ကို ရှေးတုန်းက ခေါ်တဲ့နာမည်ပေါ့။

ကျောက်တံတား -

ကုန်းဘောင်ခေတ်ဦးတုန်းက

ဆူးလေတစ်ဝိုက်ဟာရေပတ်လည်ဝိုင်းနေတဲ့

နေရာပါ။ အဲဒီအနီးအနားမှာ ဘုရားဘက်ကို

ကူးသွားနိုင်တဲ့ ကျောက်တံတားကြီးတစ်ခု

ရှိခဲ့ဖူးရာကနေ ဒီနာမည် ဖြစ်လာပါသတဲ့။

ကြည့်မြင်တိုင် -

မွန်ဘာသာအမည် ကမနျဋျုငျက

ဆင်းသက်လာတာပါ။ မြို့ရိုးရှိတဲ့ မြို့လို့

အဓိပ္ပါယ်ရပါတယ်

ကံဘဲ့ -

မွန်ဘာသာအမည် ခပင်း(ခပေင်) ကို

မြန်မာဘာသာနဲ့ ခေါ်ရာ ကနေ ကန်ဘဲ့ ဆိုပြီး

ဖြစ်လာတာပါ။ အဓိပ္ပါယ်က သစ်ပင် ဖြစ်ပါတယ်။

ကုက္ကိုင်း -

မွန်ဘာသာ ကော့ကောင်း က ဆင်းသက်

လာတာ ဖြစ်ပါ တယ်။ ကော့ဆိုတာ ကုန်း၊

ကောင်းဆိုတာက မရွေးပင်ကိုခေါ်တာမို့

အစကတော့ မရွေးပင်ကုန်းလို့ ခေါ်တဲ့နေရာပါ။

စမ်းချောင်း -

စတင်တည်ထောင်စအချိန်မှာ တောင်ကုန်းဖြစ်ခဲ့ပြီး အဲဒီတောင်ကုန်းတွေကြားမှာ စမ်းချောင်းကလေးတစ်ခု စီးဆင်းနေ ပါသတဲ့။ အဲဒီစမ်းချောင်းကို အစွဲပြုပြီး ခေါ်ခဲ့ခြင်း ဖြစ်ပါတယ်။

ဆင်မလိုက် -

ရှေးအခါက နွံထူတဲ့အရပ်ဖြစ်တာကြောင့်

ဆင်တွေဟာ အဲဒီနေရာရောက်ရင်

ဆက်မသွား ၊ ဆက်မလိုက်တော့ပဲ

ရပ်တန့် သွားတတ်ရာကနေ ဆင်မလိုက် ဆိုပြီး

ဖြစ်လာပါသတဲ့။

တာမွေ -

မွန်အမည် တာမွေ ကနေ တိုက်ရိုက်

ဆင်းသက်လာပါတယ်။ ထန်းပင်တစ်ပင် ဆိုတဲ့

အဓိပ္ပါယ်ရပါတယ်။

ပုဇွန်တောင် -

မွန်ဘာသာ ပုဇွန်ဒေ ကလာတာပါ။

တောင်ကုန်းငါးခု လို့ အဓိပ္ပါယ်ရပါတယ်

အဲဒီကုန်းတွေက မလွှကုန်း ၊ မအူကုန်း ၊

သစ်ဆိမ့်ကုန်း ၊ ချစ်တီးကုန်း နဲ့

ပုရွက်ဆိတ်ကုန်း တို့ဖြစ်ပါတယ်။

ဗဟန်း -

ဗဟန်းဆိုတာကလည်း မွန်ဘာသာကနေ

ဆင်းသက်လာပြီး အဝါရောင်ရှိတဲ့မြေလို့

အဓိပ်ပါယျရပါတယျ။ ရှေးအခါက ကန့်ထွက်တဲ့

အရပ်ဒေသ ဖြစ်ခဲ့ဟန် တူပါတယ်။

ဘောက်ထော် -

မွန်ဘာသာ ပေါက်ထောကနေလာပြီး

ရွှေဟင်္သာလို့ အဓိပ္ပါယ်ရပါတယ်။

မင်္ဂလာဒုံ -

မွန်အမည် ဍုံဒရိုင်မငေ ကနေ

ဆင်းသက်လာပါတယ်။ အဓိပ္ပါယ်က

မင်္ဂလာသမင်မြို့ ဖြစ်ပါတယ်။

အဲဒီကနေ မြန်မာဘာသာ တိုက်ရိုက်

ယူသုံးရာကနေ မင်္ဂလာဒုံမြို့ဆိုပြီး ဖြစ်လာပါတယ်။

မြေနီကုန်း -

၁၈၄၁ခုနှစ် သာယာဝတီမင်းလက်ထက်

အခုမြို့မကျောင်းနား က ကွင်းပြင်မှာ

အောင်မြေရန်နှင် နန်းမြို့တည်ဆောက်စဉ်

မြို့တော်တံခါးတွေထဲမှာ မြေနီကုန်းတံခါး

ဆိုတာ ပါ ပါတယ်။ အဲဒီတံခါးကနေ ထွက်လိုက်ရင် အနီရောင်တောင်ကုန်းငယ်ကလေးကို တွေ့ရှိနိုင်လို့ပဲ ဖြစ်ပါတယ်။

လသာ -

ရန်ကုန်ကို အင်္ဂလိပ်တွေသိမ်းပြီး

မြို့ကွက်ရိုက်ရာမှာ လမ်းနာမည်ကို

သူတို့အရာရှိတွေရဲ့အမည်တွေပေးခဲ့ပါတယ်။

အင်္ဂလိပ်-မြန်မာ ဒုတိယစစ်ပွဲမှာပါဝင်ခဲ့တဲ့

ကတ်ပတိန်လတ္တာ (Capt.Lattar) ကို

ဂုဏ်ပြု တဲ့အနေနဲ့ပေးခဲ့တာဖြစ်ပါတယ်။

လတ္တာလမ်းကို မြန်မာလိုခေါ်ခဲ့ကြရာမှာ

လသာလမ်း ဆိုပြီးဖြစ်လာပါတယ်။

အဲဒီနားတဝိုက်ကိုလည်း လသာရပ် ဆိုပြီး

ခေါ်ခဲ့ကြပါတယ်။

လမ်းမတော် -

သာယာဝတီမင်း ရန်ကုန်မြို့ကိုကြွလာစဉ်တုန်းက သင်္ဘောဆိပ်ကနေ အောင်မြေရန်နှင်နန်းမြို့ကို သွားတဲ့လမ်းဖြစ်ပါတယ်။ ဘုရင်သွားတဲ့လမ်းမ ဖြစ်တာကြောင့် တော်တပ်ခေါ်ရာနေ လမ်းမတော် ဆိုပြီးဖြစ်လာပါတယ်။

အင်းစိန် -

မွန်ဘာသာ အန်းစိန်(အင်စိင်)ကနေ

ဆင်းသက်လာပြီး ဆင်တွေရေကစားရာအရပ် လို့ အဓိပ္ပါယ်ရပါတယ်

Crd : One Daily Media Knowledge

ဆက်ဖတ်ရန် →

ရွေးကောက်ပွဲအနိုင်ရ Move Forward ပါတီခေါင်းဆောင် Pita Limjaroenrat က မြန်မာဘာသာဖြင့် သူ၏ တွစ်တာ လူမှုကွန်ရက်တွင် သတင်း ထုတ်ပြန်ထား

📅 💬 မှတ်ချက်

" မြန်မာပြည်သူတွေ၊ အထူးသဖြင့် မိုခါဆိုင်ကလုန်းကြောင့် အသက်အိုးအိမ် စည်းစိမ်ပျက်စီးခဲ့ရတဲ့ ပြည်သူတွေနဲ့အတူ ကျနော် ဒီနေ့မှာ မျှဝေခံစားတဲ့ စိတ်အာရုံနဲ့အတူ မေတ္တာပို့ဆုမွန်ကောင်းတောင်းပါ တယ်။ မုန်တိုင်းဘေး ဒဏ်ကြောင့် ထိခိုက်ခံစားရတဲ့ပြည်သူတွေကို လူသားချင်းစာနာတဲ့အကူအညီ တွေ ပေးအပ်မှုကို အဆောတလျင်အမြန်ဆုံးဆောင်ရွက်ဖို့ ထိုင်းနိုင်ငံ ကြားကာလ အစိုးရနဲ့ နိုင်ငံတကာ အသိုင်းအဝန်းကို ကျနော်တောင်းဆိုပါတယ်။ သေရေး ရှင်ရေးတမျှ အကူအညီတွေလိုအပ်နေတဲ့ မုန်တိုင်းဘေးဒုက္ခသည် တွေ ကို ဦးစားပေးအနေနဲ့ ပထမဆုံး အထောက်အပံ့တွေပေးရမှာပါ။ ဒါဟာ ဝန်ကြီးချုပ် အသစ်အဖြစ် ရွေးကောက်ခံထားရတဲ့ ကျနော်ရဲ့ နိုင်ငံခြားရေး မူဝါဒအသစ်နဲ့ကိုက်ညီတဲ့ တောင်းဆိုချက်ဖြစ်ပါတယ်" ဟု ထိုင်းနိုင်ငံ ရွေးကောက် ပွဲအနိုင်ရ Move Forward ပါတီခေါင်းဆောင် Pita Limjaroenrat က ပြောဆိုသည်။

မြန်မာ့အရေးနှင့်ပတ်သက်ပြီး အရေးပါသည့် အင်အားစုတိုင်းက ဆက်သွယ်ညှိနှိုင်းရမည်ဖြစ်ပြီး လူသားဘ၀လုံခြုံရေး အခြေခံမူဝါဒဖြင့် ဆောင်ရွက်ရမည်ဟု ၎င်းက ဆိုသည်။

"မြန်မာနိုင်ငံဆိုင်ရာ ကျနော်ရဲ့ မူဝါဒဟာ လူသားဘ၀လုံခြုံရေး စဉ်းစားချက် အပေါ် အာရုံစိုက်ပြီး အရေးပါတဲ့အင်အားစုတိုင်းနဲ့ ဆက်သွယ်ညှိနှိုင်း မယ့်မူဝါဒ ဖြစ်ပါတယ်။ ဒီလူသားဘ၀လုံခြုံရေး အခြေခံတဲ့မူဝါဒမှာ လူသားချင်း စာနာ ထောက် ထားမှုအပိုင်းရော၊ စီးပွားရေး ဘ၀လုံခြုံတိုးတက်ရေး အပိုင်းတွေပါ ပါဝင်ပါတယ်။ ဒီမူဝါဒကို အကောင်အထည်ဖော်ရာမှာ ထိုင်း-မြန်မာနှစ်နိုင်ငံ၊ အာဆီယံအဖွဲ့ကြီးတခုလုံးအပြင် နိုင်ငံတကာ အသိုက်အမြုံ အတွက်ပါ အပြန်အလှန်ငြိမ်းချမ်းရေးနဲ့ သာယာ၀ပြောရေးကို ဆောင်ကြဉ်း ရရှိစေရေး ဆိုတဲ့အမြင်နဲ့ အကောင်အထည်ဖော်ဆောင်ရွက်မှာ ဖြစ်ပါတယ်" ဟု ထိုင်းနိုင်ငံ ရွေးကောက်ပွဲအနိုင်ရ Move Forward ပါတီခေါင်းဆောင် Pita Limjaroenrat က မြန်မာဘာသာဖြင့် သူ၏ တွစ်တာ လူမှုကွန်ရက်တွင် သတင်း ထုတ်ပြန်ထားသည်။

@KTM

ဆက်ဖတ်ရန် →