သုံးပုံတစ်ပုံကျော် မှာ ထမင်းလျှော့စားနေရ
ဒီမိုကရေစီရမှ ထမင်းဝဝ စားနိုင်မည်
27 Feb 2023 By MPA ( အယ်ဒီတာ့ အာဘော်)
ရန်ကုန်မြို့ အဆင်းရဲဆုံးဒေသများတွင် နေထိုင်သူ ပြည်သူတို့၏ လေးပုံတစ်ပုံမှာ ပြီးခဲ့သည့် ၁၂လ တာအတွင်းဝင်ငွေ မရှိခဲ့ကြောင်း ကုလသမဂ္ဂ ဖွံ့ဖြိုးရေးအစီအစဉ် (UNDP)၏ အစီရင်ခံစာသစ်၌ ဖော်ပြထားသည်။
UNDP က ရန်ကုန်မြို့တွင် လူ ၃၀၀၀ ကို စစ်တမ်းကောက်ယူသည်။ ထို ၃၀၀၀ ထဲက သုံးပုံတစ်ပုံကျော် မှာ ထမင်းလျှော့စားနေရကြောင်း ဖြေကြားခဲ့သလို လေးပုံတစ်ပုံကျော်က ၎င်းတို့၏မိသားစုများ ဆေးဝါးနှင့်ကုသမှုမရှိဘဲ နေထိုင် နေကြကြောင်း ဆိုသည်ဟု အစီရင်ခံစာက ဖော်ပြသည်။
ဝင်ငွေမရှိသော တစ်နှစ်တာ၊ ကြောက်မက်ဖွယ်ကောင်းသော တစ်နှစ်တာ။ ထိုတစ်နှစ်တာကို မည်သို့မည်ပုံ ပင်ပန်းဆင်းရဲကြီးစွာ ဖြတ်သန်းခဲ့ကြသနည်း။ ထိုမေးခွန်း၏အဖြေမှာ တစစ်စစ်နာကျင်ကိုက်ခဲနေသော အစာအိမ်ကို ဖြစ်ညှစ်ဖြေဆိုရမည်ဖြစ်သလို ကြားရမည့်စကားသံများမှာလည်း နားစည်ထဲ ချော်ရည်များ လောင်းချလိုက်သလို ပူလောင်နေမည်က သေချာသည်။
မအောင်မြင်သော အာဏာသိမ်းမှုစတင်ပြီး သိပ်မကြာ၊ စစ်ကောင်စီ၏ စီမံခန့်ခွဲမှုကို တတိယလှိုင်း ကိုဗစ်က မေးခွန်း ထုတ်လိုက်သည်။ ရန်ကုန်တစ်မြို့လုံး အလောင်းချင်းထပ်ကာ ဖြစ်သလိုသင်္ဂြိုဟ်ခြင်း အမှုကိုပင် အလျဉ်မမီသဖြင့် သုဿန်များရှေ့ အလောင်းများ တန်းစီစောင့်ခဲ့ရသည်။
တတိယလှိုင်းကိုဗစ် ကာလ၊ ကိုယ့်အသက် မသေလျှင်ပြီးရော ကိုယ့်အသက် ကိုယ့်ဘာသာ ပြန်လုနေရသည့်အချိန်တွင် ထမင်း၂နပ်မှန်ရေးကိုပင် နှလုံးမသွင်းနိုင်။ တတိယလှိုင်းအလွန်၊ဖြူကာပြာကာကျနေသော ဘဝများကို ပြန် လည်ဖာထေး ပြုပြင်တော့မည်ဆိုတော့လည်း အသက်ငင်နေသော စီးပွားရေးလုပ်ငန်းများအား ပြန်လည်နှိုးဆွပေးနိုင်စွမ်းမရှိသည့်အတွက် ရန်ကုန်မြို့ပြ ဆင်ခြေဖုံးဒေသက စက်ရုံအလုပ်သမားများမှာ တန်းစီ အလုပ်ပြုတ်ရပြန်သည်။
ထို့နောက် စစ်ကောင်စီ၏ အဆင်ခြင်ကင်းမဲ့သော အာဏာသိမ်းမှုနှင့် အာဏာသိမ်းမှုကိုခုခံသော ပြည်သူများအား ခေါင်းတည့်တည့်ပစ် အမြစ်ဖြတ်နေမှုများအရ နိုင်ငံခြားရင်းနှီးမြှုပ်နှံမှုလုပ်ငန်းအချို့ မြန်မာမြေပေါ်မှ ပြန်လည်ဆုတ်ခွာတော့ အစုလိုက်အပြုံလိုက် အလုပ်လက်မဲ့ဖြစ်မှုမှာ ထပ်တစ်ကြိမ် ဒီတက်ခဲ့ပြန် သည်။
ထို့နောက် ၂၀၂၁ခုနှစ်အကုန်နှင့် ၂၀၂၂ နှစ်သစ် စတင်ချိန်တွင် လျှပ်စစ်ကား၊ လျှပ်စစ်ရထားနှင့်မြေအောက်ရထား နိုင်ငံတစ်ဝန်းပြေးဆွဲတော့မည့်ပမာ မင်းအောင်လှိုင် ကယောင်ကတမ်းထအော်နေချိန်၌ တစ်နိုင်ငံလုံးအနှံ့ ဆိုးဆိုးရွားရွား လျှပ်စစ်အငတ်ဘေးသင့်ခြင်းဒဏ် ရင်ဆိုင်ခဲ့ကြရပြန်သည်။ ထို့အပြင် လောင်စာ ဆီဈေးကပါ မိုးထိထောင်တက်ခဲ့လေတော့ တအီအီရှိုက်သံမျိုးဖြင့် မလည့်ချင်လည်ချင် ဖြည်းဖြည်းချင်း လည်နေသော မြို့ ပြစက်ရုံများစွာကိုတင်မက အသေးစား အိမ်တွင်းလုပ်ငန်းများကိုပါ ထိုးရပ်သွားအောင် ဆောင့် ဆွဲလိုက်တော့သည်။
ထပ်မံအလုပ်ပြုတ်ကြပြန်သည်။ တချို့သော စက်ရုံဝန်ထမ်းများမှာ တရားဝင် ဝန်ထမ်းဘဝမှ လျော်ကြေးငွေ တစ်ပြား တစ်ချပ်မှမရဘဲ နေ့စားဘဝသို့ သက်ဆင်းခဲ့ရသော်လည်း လုံးဝအပြတ် အလုပ်မပြုတ်သွားခြင်းမှာ ကံကောင်း သည်ဟု ကိုယ့်ကိုယ်ကိုယ် ဖြေတွေးတွေးရသည်။
အလုပ်လက်မဲ့ပြဿနာ တစ်ဆင့်ပြီးတစ်ဆင့် ကြီးထွားလာခြင်းနှင့်အပြိုင် ရေနစ်သူကို ရေနစ် သေ လျှင်သေ၊မသေလျှင်လည်းရေထဲ၌ မသေအောင်အသက်လုရုန်းနေရသည့်ဘဝမှ ဆက်မတက်နိုင်အောင် ဝါးကူ ထိုးပေးနေသော ခိုင်မာတောင့်တင်းလှသည့် ဝါးလုံးကြီးတစ်လုံးမှာ မြန်မာကျပ်ငွေတန်ဖိုး ဇောက်ထိုးဆင်းကာ ထိန်းမနိုင်သိမ်းမရ ကုန်ဈေးနှုန်းတက်ခြင်းဖြစ်သည်။
တိုင်းပြည်အာဏာ ရူးမတတ်လိုချင်နေသော စစ်ကောင်စီမှာ တိုင်းပြည်ဖျက်သည့်နေရာတွင် ပြိုင်စံရှား သလောက် အပြုသဘော တွေးခေါ်မျှော်မြင် လုပ်ကိုင်နိုင်စွမ်းသော အရည်အချင်း ကင်းမဲ့သူများဖြစ်ကြသဖြင့် ကုန်ဈေးနှုန်းတက်တော့လည်း တက်သည်ဟုမှတ်ကာ ငုတ်တုတ်ထိုင်ကြည့်နေရုံကတစ်ပါး အခြားမရှိပေ။
ထို့အပြင် လိုက်၍မမီအောင် ပြေးနေသော ကုန်ဈေးနှုန်း၏နောက်တွင် လုပ်ခလစာက ပြတ်ကျန်နေခဲ့ခြင်းအရ အလုပ်လုပ်သူများကလည်း လုပ်ရင်းနှင့် ငတ်ကြတော့သည်။
ထိုသို့ အငတ်ဘေးသင့်နေမှန်းသိလျက် ရန်ကုန်၊ မန္တလေးနှင့် မြို့ကြီးများတွင် ကျူးကျော်ရှင်းလင်းရေး ခေါင်းစဉ်တပ်ကာ ပြည်သူ့အိုးအိမ်ကို အဓမ္မ ဖယ်ရှားပစ်ခြင်းကြောင့်လည်း တစ်ပူပေါ်နှစ်ပူဆင့် နေစရာမဲ့ဘဝ အဖြစ်သို့ သက်ဆင်းခဲ့ရပြန်သည်။
ယခုရက်ပိုင်းအတွင်း မီဒီယာတစ်ခုက ရန်ကုန်မြို့တွင် ဟင်းအစားထိုး အကြော်များဝယ်ယူကာ စရိတ် ချွေတာနေကြခြင်းကြောင့် ဈေးကွက်ထဲ အကြော်စုံ အရောင်းသွက်နေသည်ဟုဆိုသည်။ ပြည်သူတို့မှာ ဖြစ်သလို ရသလို ကိုယ့်ဘဝကိုယ် လွတ်ထွက်မသွားအောင် အားကုန်ဆုပ်ကိုင်ထားနေကြရသည်။
ဝင်ငွေမရှိ၍ ထမင်းလျှော့စားနေရကြောင်း မင်းအောင်လှိုင်ကို ပြောပြအကြံတောင်းပါက တစ်ချိန်က နာမည်ကျော်စကားတစ်ခွန်းဖြစ်သော ထမင်းတစ်နပ်လျှော့စားဟုသာ ပြန်ပြောတတ်ပေမည်။ လတ်တလော ကျပ်တည်းမှုသည် ပိုမိုဆိုးရွားသောကျပ်တည်းမှုများဆီသို့သာ ဦးတည်နေခြင်းကြောင့် ပြည်သူ-ပြည်သူချင်း တတ်နိုင်သမျှဖေးမကူညီခြင်းဖြင့်သာ အံကြိတ်အားစိုက်ဖြတ်ကျော်ရပေမည်။
ယခုလိုအကျပ်အတည်းကြီးမှာ စစ်အာဏာရှင်များ ရှိသ၍ ဆက်လက်လောင်မြိုက်နေမည်ဖြစ်၍ ပြည် သူတစ်ဦးချင်းစီအနေနှင့် စစ်အာဏာရှင်ဖုတ်သွင်းသင်္ဂြိုဟ်ခန်းတွင် နိုင်ရာဝန်ထမ်းရန် လိုအပ်ပါကြောင်း တိုက်တွန်းလိုက်ရပါသည်။
#စစ်ကောင်စီ #ပြည်သူ #ဝင်ငွေ #အာဏာသိမ်းကာလ #MPA
.
