တေဇ (CDM)
စစ်ကောင်စီ၏ အဓိကအားထားသည်မှာ ရုရှား၊ တရုတ်စသည့် အင်အားကြီးနိုင်ငံများ မဟုတ်ပါ။ နိုင်ငံရေး၊ သံတမန်အရေးတွင်တော့ အားကိုးအားထား ပြုလုပ်နိုင်ပါသည်။ သို့သော် ကျွန်တော်အနေဖြင့် နိုင်ငံရေးနားမလည်သည့်အတွက် သိပ်မပြောလိုပါ။ စစ်ရေးပိုင်းအရ စစ်ကောင်စီကို အဓိကဒေါက်တိုင်အဖြစ် အထောက်အကူပေးနေသည်မှာ စစ်ကောင်စီတပ်များအတွက် စစ်လက်နက်ခဲယမ်းအင်အားကို ပြည့်၀စေရန် ထုတ်လုပ်ပေးနေသော ကာကွယ်ရေး ပစ္စည်းစက်ရုံ (ကပစ) များသာ ဖြစ်ပါသည်။
ကာကွယ်ရေးပစ္စည်းစက်ရုံများသည် ကာကွယ်ရေးပစ္စည်းထုတ်လုပ်ရေးအရာရှိချုပ်ရုံး (ကကထုတ်) အောက်တွင် ရှိသည်။ ကကထုတ်ရုံးတွင် ထုတ်အရာရှိချုပ်အဖြစ် လက်ရှိတာဝန်ယူထားသူမှာ ဒုတိယဗိုလ်ချုပ်ကြီးကံမြင့်သန်းဖြစ်ပြီး နေပြည်တော် ဇေယျာသီရိမြို့နယ်ရှိ စစ်ရုံးအမှတ် (၈) တွင် ရုံးထိုင်ကွပ်ကဲပါသည်။ ထုတ်ချုပ်၏လက်အောက်တွင် ဒုထုတ်ချုပ်နှစ်ဦး ရှိသည်။ ၎င်းတို့မှာ ဗိုလ်ချုပ်ကိုကိုလွင်နှင့် ဗိုလ်ချုပ်မျိုးအောင်တို့ ဖြစ်သည်။ ဗိုလ်ချုပ်ကိုကိုလွင်သည် တပ်မတော်အကြီးစားစက်ရုံများကို တာဝန်ယူကွပ်ကဲပြီး ဗိုလ်ချုပ်မျိုးအောင်သည် တပ်မတော်စစ်လက်နက်ပစ္စည်းစက်ရုံများကို တာဝန်ယူကွပ်ကဲသည်။
ကကထုတ်လက်အောက်တွင် ကပစ စက်ရုံများအပြင် ရန်ကုန် ကမ္ဘာအေး (၁၀၆) ရှိ၊ ကာကွယ်ရေးပစ္စည်းထောက်ပံ့ပို့ဆောင်ရေးတပ် (ကထပ)၊ မိတ္ထီလာရှိ တပ်မတော်အကြီးစားစက်ရုံ (တကစ) အမှတ်(၁) နှင့် (၁၀) စက်ရုံ၊ ယင်းမာပင်တွင် အမှတ် (၂) စက်ရုံ၊ ပဲခူးတိုင်း ဥသျှစ်ပင်မြို့ ကွင်းလှကျေးရွာအနီးရှိ ကာကွယ်ရေးပစ္စည်းထုတ်လုပ်မှုတပ်ဖွဲ့သင်တန်းကျောင်း (ကထက) ရှိသည်။ ထို့အပြင် ယခုနောက်ပိုင်းအသစ်ထပ်မံဖွဲ့စည်းသော မကွေးမြို့ တကစ၊ မလွန် တကစ၊ ထုံးဖို တကစသည့် တပ်မတော်ပိုင်အကြီးစားထုတ်လုပ်မှုတပ်များ ရှိသည်။ ကပစစက်ရုံများ၏ တည်နေရာနှင့်ထုတ်လုပ်သည့်လက်နက်များကို ကျွန်တော့်အနေဖြင့်သိရှိသလောက် ပြောပြလိုပါသည်။ ကကထုတ်လက်အောက်တွင် ကပစ (၂၅) တပ် ရှိပါသည်။
ကပစ (၁)
နေပြည်တော်၊ တပ်ကုန်းအနီးတွင် တည်ရှိပါသည်။ အဓိကထုတ်လုပ်သည့် လက်နက်များမှာ Small Arm များဖြစ်ပါသည်။ အဓိကအနေဖြင့် MA-1, MA-2, MA-3, MA-4 အမျိုးအစား ချေမှုန်းရေးရိုင်ဖယ်များ ဖြစ်ပါသည်။
ကပစ (၂)
မကွေးတိုင်း၊ အထက်မင်းလှမြို့နယ်၊ မလွန်မြို့ဟောင်းအနီး တည်ရှိပါသည်။ အဓိကထုတ်လုပ်သည့် ခဲယမ်းများမှာ 80-mm launcher၊ 120-mm launcher၊ MA-10 RPG launcher များအပြင် 5.56-mm ကျည်ဆန်များ ထုတ်လုပ်လျက်ရှိပါသည်။
ကပစ (၃)
ပဲခူးတိုင်း၊ ပြည်မြို့တစ်ဖက်ကမ်း ဆင်တဲကျေးရွာအနီး တည်ရှိသည်။ အဓိကထုတ်လုပ်သည့်လက်နက်ခဲယမ်းများမှာ RPG ဗုံးသီး၊ ၆၀-မမ၊ ၈၁-မမ၊ ၁၂၀-မမမော်တာ ဗုံးသီးများနှင့် 50-kg၊ 100-kg၊ 200-kg လေကြောင်းဗုံးများ ဖြစ်သည်။ လက်ရှိတွင် 500-kg ဗုံးများလည်း စမ်းသပ်ထုတ်လုပ်နေပါသည်။
ကပစ (၄)
နေပြည်တော်၊ တပ်ကုန်းမြို့ ကပစ(၁) နှင့်အနီးတွင် တည်ရှိသည်။ ကပစအားလုံး၏ အဓိကအကျဆုံးသော ကပစ (၄) သည် စက်ပြုပြင်နှင့် ပုံစံထုတ်စက်ရုံ ဖြစ်သည်။ တပ်မတော်မှသုတေသနပြုထုတ်လုပ်လိုသော လက်နက်အသစ်များအား ဒီဇိုင်းများဆွဲခြင်း၊ သင့်တော်သော ကပစများသို့ဖြန့်ဝေ၍ အသစ်ထုတ်လုပ်စေခြင်း စသည်တို့အား အဓိကလုပ်ဆောင်ပါသည်။ ကပစတပ်အားလုံး၏ စက်များအား လိုက်လံပြင်ဆင်ပေးခြင်းလည်း ပြုလုပ်သည်။
ကပစ (၅)
ပဲခူးတိုင်း၊ ဥသျှစ်ပင်မြို့၊ ကမြိုင်ကျေးရွာအနီးတည်ရှိသည်။ အဓိကအားဖြင့် ယမ်းချက်စက်ရုံဖြစ်သည်။ ကပစအားလုံးအတွက် လိုအပ်သောယမ်းများအား အဓိကထုတ်လုပ် ဖြန့်ဖြူးပေးလျက်ရှိသည်။
ကပစ (၆)
ပဲခူးတိုင်း၊ ဥသျှစ်မြို့၊ ညောင်ခြေထောက်ကျေးရွာအနီး တည်ရှိသည်။ သံရည်ကြိုစက်ရုံ ဖြစ်သည်။ ကပစတပ်များအားလုံးအတွက် လိုအပ်သော သံမဏိများ၊ သံများကို ပုံသဏ္ဍာန်အမျိုးမျိုးဖြင့် ထုတ်လုပ်လျက်ရှိသည်။
ကပစ (၇)
ပဲခူးတိုင်း၊ ပြည်မြို့ ကျော်စွာဓာတ်မြေဩဇာစက်ရုံအနီးတွင် တည်ရှိသည်။ လက်ပစ်ဗုံး၊ ရေမြှုတ်ဗုံး၊ နင်းမိုင်းအမျိုးမျိုး၊ ရှေ့ထွက်မိုင်း၊ တိုက်မိုင်းစသည်တို့ကို အဓိကထုတ်လုပ်သည်။
ကပစ (၈)
မကွေးတိုင်း၊ ဆင်ပေါင်ဝဲမြို့အနီး တည်ရှိသည်။ အမြှောက်နှင့် လက်နက်ကြီး အစိတ်အပိုင်းများ၊ ဟောက်ဝစ်ဇာအမြှောက်များ၊ 122-mm MLRS အတွဲလိုက်ပစ်ဒုံးများ၊ ယာဉ်တင်အမြှောက်ပစ်စင်များစသည်တို့ကို အဓိကပြုလုပ်ပါသည်။
ကပစ (၉)
ပဲခူးတိုင်း၊ ဥသျှစ်ပင်မြို့၊ ကျောက်ဖူးကျေးရွာအနီး တည်ရှိသည်။ Small Arm ကျည်ဆံများ ထုတ်လုပ်သည်။ 5.56-mm ကျည်ဆံ၊ 7.62-mm ကျည်ဆံ၊ 9-mm ကျည်ဆံများ ထုတ်လုပ်လျက်ရှိပါသည်။
ကပစ (၁၀)
မကွေးတိုင်း၊ အထက်မင်းလှမြို့နယ်၊ ကုန်းကြီးကျေးရွာအနီး တည်ရှိသည်။ RPG ဗုံးသီး Fuse၊57-mm လေတပ်သုံး Rocket များ၊ 122-mm MLRS နှင့် 240-mm MLRS Rocket များ ထုတ်လုပ်လျက်ရှိသည်။
ကပစ (၁၁)
ရန်ကုန်တိုင်း၊ တိုက်ကြီးမြို့နယ်တွင် ရှိသည်။ ကပစ (၁) ကဲ့သို့ MA စီးရီး Small Arm များ ထုတ်လုပ်လျက်ရှိသည်။
ကပစ (၁၂)
မကွေးတိုင်း၊ သရက်မြို့၊ စခန်းကြီးကျေးရွာအနီးတည်ရှိသည်။ 60-mm၊ 81-mm၊ 120-mm မော်တာဗုံးသီးများ အဓိကထုတ်လုပ်သည်။
ကပစ (၁၃)
မကွေးတိုင်း၊ ဆင်ပေါင်ဝဲမြို့နယ်၊ လက်ပံကျေးရွာအနီး တည်ရှိသည်။ ယမ်းချက်စက်ရုံဖြစ်သည်။ Detonator အစပျိုးယမ်းများ၊ ပေါက်ကွဲယမ်းများ အဓိကထုတ်လုပ်သည်။
ကပစ (၁၄)
မကွေးတိုင်း၊ ငဖဲမြို့နယ်တွင် တည်ရှိသည်။ SA-16 MANPADS လေကြောင်းရန်ကာကွယ်ရေး ဒုံးလက်နက်များ ထုတ်လုပ်သည်။
ကပစ (၁၅)
မကွေးတိုင်း၊ အောင်လံမြို့နယ်၊ ရွာမဆုံးကျေးရွာအနီး တည်ရှိသည်။ 60-mm၊ 80-mm မော်တာဗုံးသီးများ အဓိကထုတ်လုပ်သည်။
ကပစ (၁၆)
ပဲခူးတိုင်း၊ ဥသျှစ်ပင်မြို့နယ်၊ မသုန်ကျေးရွာအနီး တည်ရှိသည်။ ကပစ (၅) နှင့် ထိစပ်လျက်ရှိသည်။ Acidအမျိုးမျိုး ထုတ်လုပ်သည်။ ယမ်းအနည်းငယ်ထုတ်လုပ်လျက် ရှိသည်။
ကပစ (၁၇)
မကွေးတိုင်း၊ အောင်လံမြို့နယ်၊ ရွှေပန်းတောကျေးရွာအနီး တည်ရှိသည်။ 60-mm မော်တာဗုံးသီး Fuse (AZDM, fuse) များ ထုတ်လုပ်သည်။
ကပစ (၁၈)
မကွေးတိုင်း၊ တောင်တွင်းကြီးမြို့နယ်၊ ညောင်မှော်ရွာအနီး တည်ရှိသည်။ စစ်သုံးမှန်ဘီလူးများ ထုတ်လုပ်ခြင်း၊ scope များပြုလုပ်တပ်ဆင်ခြင်းများ ပြုလုပ်သည်။
ကပစ (၁၉)
ပဲခူးတိုင်း၊ ပြည်မြို့နယ်၊ ပေါက်ခေါင်းမြို့အနီးတွင် တည်ရှိသည်။ စက်လက်နက် မထုတ်လုပ်ဘဲ ကပစ တပ်များ လိုအပ်သော စက်ရုံသုံး Tools နှင့် တိုင်းတာရေး Gauge များ ထုတ်လုပ်သည်။
ကပစ (၂၀)
မကွေးတိုင်း၊ စေကုတ္တရာမြို့အနီးတွင် တည်ရှိသည်။ လေယာဉ်ပစ် Anti-Aircraft cannon 25/30-mm စက်အမြှောက်များ ထုတ်လုပ်သည်။
ကပစ (၂၁)
မကွေးတိုင်း၊ ဆိတ်ဖြူမြို့နယ်၊ ပေါက်ခုံကျေးရွာအနီး တည်ရှိသည်။ လေတပ်သုံးဗုံးအမျိုးအစားများအား အဓိက ထုတ်လုပ်လျက်ရှိသည်။
ကပစ (၂၂)
မကွေးတိုင်း၊ ဘဆိတ်ဖြူမြို့နယ်၊ ရွှေပို့ကျွန်းကျေးရွာအနီးတွင် တည်ရှိသည်။ အထူးတပ်ဖွဲ့သုံးရိုင်ဖယ်အမျိုးအစားများဖြစ်သော Mark-1, Mark-2, Mark-3, Mark-4 အပါအဝင် ရဲတပ်ဖွဲ့သုံး အဓိကရုဏ်းနှိမ်နင်းရေးလက်နက်များ အဓိက ထုတ်လုပ်လျက်ရှိသည်။
ကပစ (၂၃)
မကွေးတိုင်း၊ ဂန့်ဂေါမြို့နယ်၊ ကျောမြို့အနီး တည်ရှိသည်။ ရေတပ်သုံး Missile များအား တရုတ်နည်းပညာအကူအညီဖြင့် စတင်ထုတ်လုပ်လျက် ရှိသည်။ စမ်းသပ်ထုတ်လုပ်နေဆဲသာ ဖြစ်သည်။
ကပစ (၂၄)
မကွေးတိုင်း၊ ပေါက်မြို့အနီး တည်ရှိသည်။ Aluminum အရည်ကြိုစက်ရုံ ဖြစ်သည်။ ကပစတပ်များ လိုအပ်သော Aluminum Raw များ ထုတ်လုပ်လျက်ရှိသည်။
ကပစ (၂၅)
မကွေးတိုင်း၊ ဆောမြို့နယ်၊ လောင်းရှည်မြို့အနီးတွင် တည်ရှိသည်။ ၂၀၁၄ ခုနှစ်တွင် စတင်တည်ဆောက်သည့်တပ်ဖြစ်ပြီး စမ်းသပ်တည်ဆောက်ဆဲ ဖြစ်ပါသည်။
ရေတပ်အတွက်စစ်လက်နက်များ ထုတ်လုပ်ပေးမည်ဟု ခန့်မှန်းရပါသည်။
အထက်ပါ ကပစတပ်များအပြင် မိတ္တီလာမြို့အနီးရှိ တကစ (၁) တွင် စစ်သုံးမော်တော်ယာဉ်များ (ဒုံးပစ်စဉ်တပ်ဆင်မည့်ကားများ) တပ်ဆင်ထုတ်လုပ်သည်။ တကစ (၁၀) တွင် အပေါ့စားအမောင်းသင်ဂျက်လေယာဉ် (K-8) အမျိုးအစားများ တပ်ဆင်ထုတ်လုပ်လျက် ရှိသည်။ လိုအပ်သော လေယာဉ်အင်ဂျင်၊ အပိုပစ္စည်းများကို တရုတ်နိုင်ငံမှ အဓိက တင်သွင်းသည်။ ယင်းမာပင်မြို့အနီးရှိ တကစ (၂) တွင် စစ်တပ်သုံးယာဉ်အပိုပစ္စည်းများ ထုတ်လုပ်လျက်ရှိသည်။ ယခု ထပ်မံအသစ်ဖွဲ့စည်းသော မကွေးတကစတွင် ကားပစ္စည်းများ၊ မလွန်တကစတွင် အင်ဂျင်အစိတ်အပိုင်းများ၊ ထုံးဘိုတကစတွင် အင်းလေးဂျစ်များ တပ်ဆင်ထုတ်လုပ်နေခြင်းများကို ဆောင်ရွက်လျက်ရှိသည်။
ယခင်စစ်ခေါင်းဆောင် ဗိုလ်ချုပ်မှူးကြီးသန်းရွှေ လက်ထက် ၁၉၉၂ နောက်ပိုင်းမှစ၍ ဒုံးလက်နက်များထုတ်လုပ်မှုစီမံကိန်းကို စနစ်တကျရေးဆွဲခဲ့သည်။ လိုအပ်သော နည်းပညာနှင့် စက်ပစ္စည်း အကူအညီကို တရုတ်၊ ရုရှားနှင့် မြောက်ကိုရီးယားနိုင်ငံများ၏ အကူအညီကို ရယူခဲ့သည်။ နေပြည်တော်၌ ကျင်းပသည့် စစ်လက်နက်ပစ္စည်းတပ်ဖွဲ့နေ့ အခမ်းနားတွင် “ပြည်တွင်းထုတ်လုပ်သော အရည်အသွေးမြင့် စစ်လက်နက်ပစ္စည်းများဖြင့် တပ်မတော်တစ်ရပ်လုံး၏ စစ်လက်နက်လိုအပ်ချက်ကို ဖြည့်ဆည်းပေးနေကြောင်း” ဒုတပ်ချုပ် ဗိုလ်ချုပ်ကြီးစိုး၀င်းက ပြောကြားခဲ့သည်။ ဗမာ့တပ်မတော် စစ်လက်နက်ပစ္စည်းတပ် (Burma Army Ordnance Depot-BADO) အဖြစ် ဖွဲ့စည်းသည့် ၁၉၄၇ ဒီဇင်ဘာ ၁ ရက်နေ့ကို စစ်လက်နက်ပစ္စည်းတပ်ဖွဲ့နေ့အဖြစ် သတ်မှတ်ထားသည်။
မြန်မာနိုင်ငံအနေဖြင့် အဘက်ဘက်မှ ချို့ယွင်းဆုတ်ယုတ်နေသော်လည်း စဉ်ဆက်မပြတ် တိုးတက်ကြီးထွားနေသည်မှာ စစ်လက်နက်ပစ္စည်းများထုတ်လုပ်မှု ဖြစ်သည်။ စစ်ကောင်စီအနေဖြင့် ပြည်ပအကူအညီနည်းပါးစွာဖြင့် စစ်လက်နက်ပစ္စည်းများကို တိုးတက်ထုတ်လုပ်ရန် စဉ်ဆက်မပြတ် ကြိုးပမ်းနေဆဲ ဖြစ်သည်။ ယခုအချိန်ထိ စစ်ကောင်စီ အနေဖြင့် ကပစများ၏ ထုတ်လုပ်မှုကိုသာ အဓိကမှီခို၍ အာဏာရှင်သန်ရေးကို ကြိုးစားတည်ဆောက်နေရခြင်း ဖြစ်ပါသည်။
ပြည်သူ့ကာကွယ်ရေးတပ်ဖွဲ့များ၊ မြို့ပြ UG များအနေဖြင့် ကပစများ၏ အရေးပါမှုကို ဂရုပြုသင့်ပါသည်။ လေတပ်ကိုသာ စစ်ကောင်စီအနေဖြင့် အားထားနေရသည်ဆိုခြင်းမှာ အပြည့်အ၀မှန်ကန်မှုမရှိပါ။ စစ်ကောင်စီ ခြေလျင်တပ်သုံး လက်နက်ခဲယမ်းများ၊ လေတပ်သုံးဗုံး နှင့် ရော့ကတ်ဒုံးများအား အဓိကအားဖြည့် ထောက်ပံ့ပေးနေသည်မှာ ကပစတပ်များ ဖြစ်ပါသည်။
နိဂုံးချုပ်အနေဖြင့် တော်လှန်ရေးအင်အားစုများအနေဖြင့် စစ်ကောင်စီအတွက် ခဲယမ်းလက်နက် အဓိကအသက်သွေးကြောဖြစ်သည့် ကပစတပ်များ၏ စစ်ရေးအရ အရေးပါမှုကို အလေးအနက်ထား သတိပြုနိုင်ပါရန် သုံးသပ်တင်ပြအပ်ပါသည်။
