စစ်ကောင်စီတပ်ဖွဲ့တွေ ရေရှည်ရပ်တည်ဖို့ ခက်ခဲလာနေကြောင်း ဒုဗိုလ်ချုပ်ကြီးဂွမ်မော် ပြောကြား
Updated 12:53 PM Dec 15, 2022
■ စစ်ကောင်စီတပ်ဖွဲ့တွေဟာ အင်အားစွမ်းရည်ချိနဲ့နေပြီဖြစ်တဲ့အတွက် ရေရှည်ရပ်တည်နိုင်တော့မှာမဟုတ်ဘူးလို့ KIC ကချင်လွတ်မြောက်ရေး ကောင်စီ ဒုဥက္ကဋ္ဌ (၁) ဒုတိယဗိုလ်ချုပ်ကြီး ဂွမ်မော်က ပြောကြားလိုက်ပါတယ်။ ဒါ့အပြင် ဗိုလ်ချုပ်မှူးကြီးမင်းအောင်လှိုင်ဟာ ဂစ်တာတစ်လက်ကို ကြိုးမညှိဘဲ တီးခတ်နေသူနဲ့ အလားသဏ္ဍာန်တူတယ်လို့လည်း သူကပြောပါတယ်။
တစ်ဆက်တည်းမှာပဲ အနန့်ပါဗုံးကြဲမှုဟာ ကချင်လူမျိုးတွေရဲ့ နှလုံးသားကို သံမှိုနဲ့ နှက်လိုက်တာဖြစ်ကြောင်း၊ သူတို့ KIO နဲ့ NUG အပြည့်အဝ ပူးပေါင်းဆောင်ရွက်နေကြောင်း၊ လူငယ် တော်လှန်ရေးသမားတွေဟာ အလွန်ရဲရင့်ပြီး ဆုံးဖြတ်ချက်ခိုင်မာကြောင်းနဲ့ တော်လှန်ရေးမုချ အောင်မြင်မှာဖြစ်ကြောင်း စသဖြင့်လည်း ပြောဆိုခဲ့ပါတယ်။
ဒုတိယ ဗိုလ်ချုပ်ကြီး ဂွမ်မော်ကို RFA အဖွဲ့သား ဦးခင်မောင်စိုး ဆက်သွယ်မေးမြန်းထားပါတယ်။
_______________
“အင်တာဗျူးကောက်နုတ်ချက်များ”
မေး။ ။ ဗိုလ်ချုပ်ကြီး တော်လှန်ရေးသမားဘဝ စတင်တာဟာ ဘယ်ခုနှစ် ဘယ်ကာလလောက်ကတည်းကလဲ ခင်ဗျ။
ဖြေ။ ။ ၁၉၈၇ နှစ်ဆန်းပိုင်းမှာ KIO ထဲကို ရောက်လာတာပေါ့နော်။ ဒါတော့ လက်တွေ့ဝင်လာတဲ့ တော်လှန်ရေးအစဆိုရင်တော့ ၁၉၈၇ နှစ်ဆန်းပိုင်းဖြစ်ပါတယ်။
မေး။ ။ အရင်ကဖြစ်ပွားနေတဲ့ တော်လှန်ရေးက တိုင်းရင်းသားဒေသတွေမှာသာဖြစ်ပြီး အခု တော်လှန်ရေးကတော့ တစ်ပြည်လုံးမှာဖြစ်ပါတယ်။ ဝါရင့်တော်လှန်ရေးသမားတစ်ဦးအနေနဲ့ လက်ရှိ မြန်မာတစ်ပြည်လုံးရဲ့ တော်လှန်ရေးကို ဗိုလ်ချုပ်ကြီး ဘယ်လိုသုံးသပ်ပါသလဲ ခင်ဗျာ။
ဖြေ။ ။ အခုအခြေအနေကတော့ အာဏာရှင်စနစ် အဆုံးသတ်မယ့်ပွဲ၊ အဆုံးသတ်မယ့်အပိုင်းလို့ ကျနော်တို့ ပြောလို့ရပါတယ်။ ဘာဖြစ်လို့လဲဆိုတော့ အရင်တုန်းကဆိုရင်တော့ တစ်နိုင်ငံလုံးမှာ အခုလို ခုခံတော်လှန်တဲ့ အနေအထားတွေ မရှိခဲ့ဘူး။ ဒီတစ်ကြိမ်မှာတော့ အကုန်လုံးဘယ်နေရာမှာမှ မကျန်ဘဲ တော်လှန်ရေးတွေ ခုခံစစ်တွေဖြစ်နေတယ်ဆိုတော့ ဒီအာဏာရှင်စနစ် အဆုံးသတ်မယ့်အချိန် အဆုံးသတ်မယ့်ပွဲလို့ ဒီလိုပဲမှတ်ယူလို့ ရပါတယ်။
မေး။ ။ အာဏာသိမ်းစစ်ကောင်စီဟာ အရင်ခေတ်အဆက်ဆက်က စစ်တပ်ခေါင်းဆောင်တွေထက် ပိုမိုဆိုးဝါးပြီး အနမ့်ပါနှစ်သစ်ကူးပွဲနဲ့ ကလေးသူငယ်တွေ စာသင်တဲ့ကျောင်းကို ဗုံးကြဲပစ်ခတ်မှုတွေ၊ ကိုဂျင်မီနဲ့ ကိုဖြိုးဇေယျာသော်တို့ အပါအဝင် သေဒဏ်ချမှတ်ခံရသူတချို့ကို မကြာခင်က ကွပ်မျက်မှုတွေ၊ ကျောင်းသားတွေကို လတ်တလော သေဒဏ်ချမှတ်ခဲ့မှုတွေ။ ရွာတွေကို နေ့စဉ်ရက်ဆက် မီးရှို့သတ်ဖြတ်နေတာတွေစတဲ့ လူမဆန်မှုတွေကို နေ့စဉ်ရက်ဆက် ကျူးလွန်နေပါတယ်။ ဗိုလ်ချုပ်ကြီး ဘယ်လိုမြင်ပါသလဲ ခင်ဗျ။
ဖြေ။ ။ အခုမေးတဲ့ မေးခွန်းမှာကိုမှ လူမဆန်မှုလို့ ပြောတဲ့ဟာက တော်တော်လေး အဓိပ္ပာယ်ရှိပါတယ်။ တာသွားတာပေါ့။ ဒါက စစ်ကောင်စီက သူလျှောက်မယ့်လမ်းကို သူကိုယ်တိုင်ပြနေတယ်လို့ ဦးဆုံးပြောချင်တယ်။ နိုင်ငံတကာက အာဏာသိမ်းတဲ့ အချိန်ကစပြီး အကုန်လုံးက သတိပေးနေတာဖြစ်ပါတယ်။ လူသားချင်းစာနာမှုတို့ အနာဂတ်တို့၊ ဖယ်ဒရယ်တို့ ဒီမိုကရေစီတို့ စသဖြင့်ပေါ့။ ပြီးလို့ရှိရင် ကိုဂျင်မီတို့၊ ကိုဖြိုးဇေယျာသော်တို့ သူတို့တစ်ဖွဲ့လုံးကို စီရင်ချက်တွေ မချဖို့ အကုန်လုံးတားနေတဲ့ကြားထဲကနေ ဒါတွေလုပ်တယ်။ ပြီးလို့ရှိရင် စစ်ရေးပစ်မှတ်မဟုတ်တဲ့ နေရာတွေကို အကြီးအကျယ် ထိုးစစ်ဆင်တယ်။ နောက်ဆုံးမှာတော့ ကျနော်တို့ အနမ့်ပါ အခြေအနေတွေဖြစ်လာတယ်ဆိုတော့ စစ်ကောင်စီက သူလျှောက်မယ့်လမ်းကို သူ ငါတို့ကတော့ ဒီလိုလျှောက်မယ်လို့ ပြလိုက်တဲ့ အနေအထားလို့မြင်တယ်။ နောက်တစ်ခုက သူဒီလိုလုပ်နေတာဟာ သူ့မှာလူလူချင်းစာနာတဲ့စိတ်၊ လူသားစိတ်ဆိုတာ မရှိတော့ဘူး။ တတိယအချက်ကတော့ စစ်ကောင်စီဟာ ပြည်သူနဲ့အတူ ဘယ်တော့မှ ဘက်တဘက်တည်းမှာ နေလို့မရတော့ဘူးဆိုတာ သူထင်ထင်ရှားရှား ပြနေတယ်လို့ပဲ ပြောချင်ပါတယ်။
မေး။ ။ အနမ့်ပါ ဗုံးကြဲတိုက်ခိုက်ခံရမှုအပြီးမှာ အားလုံးရဲ့ ဝမ်းနည်းကြေကွဲမှုနဲ့ မျက်ရည်တွေဟာ တန်ဖိုးမဖြတ်နိုင်တဲ့ ရင်းနှီးမှုတွေဖြစ်လာမှာပါလို့ ဗိုလ်ချုပ်ကြီး မှတ်ချက်ချခဲ့ပါတယ်။ ဘယ်လိုရင်းနှီးမှုတွေကို ဗိုလ်ချုပ်ကြီး ဆိုလိုတာလဲ။ KIA အနေနဲ့ ဒီကိစ္စကို ဘယ်လိုဆောင်ရွက်ဖို့ရှိပါသလဲ။
ဖြေ။ ။ အနမ့်ပါကတော့ ကချင်တွေရဲ့ နှလုံးသားထဲမှာ သံပူနဲ့တံဆိပ်ရိုက်ပေးသလိုဖြစ်သွားပြီလို့ ပြောချင်ပါတယ်။ အရင်အနမ့်ပါ မဖြစ်ခင်မှာတော့ စစ်ကောင်စီဟာ တစ်စုံတစ်ရာ သူလူထုကို ငဲ့ညှာတာမျိုးတွေ ရှိမလား၊ နိုင်ငံရေးအရသူ ညှိုနှိုင်းတာတွေ သူ့မှာကောင်းမွန်တဲ့ စိတ်ထားများရှိမလားလို့ တွေးကြတဲ့ ကချင်လူမျိုးတွေ တော်တော်များများရှိပါတယ်။ ဒါပေမဲ့ ဒီအနေအထားကို ကြုံတွေ့ရတဲ့ အခါမှာတော့ ကချင်တွေရဲ့စိတ်ထဲမှာ ခိုင်မာတဲ့၊ ပြတ်သားတဲ့ စိတ်ဓာတ်တွေ ပိုပြီးမှ ပေါ်ထွက်လာတယ်။ ငါတို့ အရှုံးပေးလို့မရဘူးဆိုတဲ့ အသိတရားတွေလည်း ပိုပြီးမှသိလာတယ်။ ဒါတွေဟာ အကုန်လုံးခွန်အားအဖြစ် ပြောင်းလဲသွားတာဖြစ်ပါတယ်။ ဒါဟာ တန်ဖိုးမဖြတ်နိုင်တဲ့ ရင်းနှီးမှုတွေလို့ ပြောချင်တာပါ။
မေး။ ။ စစ်ကောင်စီက မြန်မာနိုင်ငံအနှံ့တောင်ပေါ်မြေပြန့်မှာ ထိုးစစ်တွေကို ပြုလုပ်နေပါတယ်။ တကယ်လို့ KIA တပ်ဖွဲ့တွေကို အပြင်းအထန်ထိုးစစ်ဆင်လာခဲ့မယ်ဆိုရင် ဘယ်လိုခုခံဖို့ ပြင်ဆင်ထားပါသလဲ။
ဖြေ။ ။ စစ်ရေးပရိယာယ်ဆိုတာကတော့ ပြင်ဆင်မှုတွေ၊ ကြိုတင်ပြီးမှ စဉ်းစားထားတာတွေ အများကြီးရှိပါတယ်။ ပြင်းပြင်းထန်ထန် တိုက်လို့ရှိရင်တော့ ပြင်းပြင်းထန်ထန် ခုခံကာကွယ်တာဆိုတဲ့ အနေအထားကို ရောက်သွားမှာဖြစ်ပါတယ်။ ပြီးလို့ရှိရင် ဘက်တဘက်က ပြင်းပြင်းထန်ထန်လုပ်ရင် ပြန်ပြီးတုံ့ပြန်မှုကလည်း ပြင်းပြင်းထန်ထန်ဖြစ်မှာပါ။ ဒါကျနော်တို့ကတော့ အစီစဉ်တွေကို စဉ်းစားထားတာရှိသလို စိတ်ဓာတ်ရေးအရလည်း ပြင်ဆင်မှုအပြည့်ရှိတယ်လို့ ကျနော် ပြောချင်ပါတယ်။
မေး။ ။ ဗိုလ်ချုပ်ကြီးတို့ KIA နဲ့ NUG အကြား ပူးပေါင်းဆောင်ရွက်မှုကရော ဘယ်လိုရှိပါသလဲခင်ဗျ။ NUG အမျိုးသားညီညွတ်ရေးအစိုးရရဲ့ လက်ရှိလုပ်ဆောင်ချက်တွေကိုရော ဘယ်လိုမြင်ပါသလဲခင်ဗျ။
ဖြေ။ ။ NUG နဲ့ ကျနော်တို့ ပူးပေါင်းဆောင်ရွက်မှုတွေက ယုံယုံကြည်ကြည်နဲ့ တကယ့်ကို အားကောင်းကောင်းနဲ့ ပူးပေါင်းနေပါတယ်။ အဓိကကတော့ ကချင် KIO လို့တောင် မဟုတ်တော့ဘူး၊ ကျနော်တို့က ကချင်တစ်မျိုးသားလုံးကနေပြီးမှ CRPH နဲ့ NUG နဲ့ နားလည်မှုအပြည့်နဲ့ ပူးပေါင်းတာဖြစ်တယ်။ စစ်ရေးမှာတော့ KIA က NUG ရဲ့ MOD နဲ့ C3C လို့ခေါ်တဲ့ အစုအဖွဲ့မှာ ကျနော်တို့က အစစအရာရာတိုင်ပင်ပြီးတော့ ကျနော်တို့ ဒီစစ်အာဏာရှင်စနစ်ကို ချုပ်ငြိမ်းအောင် ဘယ်လိုလုပ်ကြမလဲဆိုတဲ့ အပိုင်းကို စဉ်ဆက်မပြတ် ပူးပေါင်းဆောင်ရွက်နေတာဖြစ်ပါတယ်။ အဲတော့ ကျနော်တို့ တကယ်ပူးပေါင်းဆောင်ရွက်မှုတွေမှာ ကျေနပ်တယ်၊ ပြီးလို့ရှိရင် စဉ်ဆက်မပြတ် ကျနော်တို့ ကြိုးစားနေတယ်လို့ သတင်းစကားပါးချင်ပါတယ်။
မေး။ ။ NUG အမျိုးသားညီညွတ်ရေးအစိုးရ လက်ရှိလုပ်ဆောင်ချက်တွေကရော အားရကျေနပ်စရာရှိလား၊ တစ်ခုခုများ အကြံဉာဏ်ပေးဖို့ ရှိလားခင်ဗျ။
ဖြေ။ ။ အားရတယ်ဆိုတာထက် ကျနော်တို့ ကျေနပ်တယ်။ မျှော်လင့်ချက်ထားတယ်။ ဘာဖြစ်လဲဆိုတော့ အမြဲတမ်းစဉ်ဆက်မပြတ် ကြိုးစားနေတာတွေ့ရတယ်။ ပြီးရင် ယုံကြည်မှုအပြည့်နဲ့ အရှေ့ကိုသွားမယ်ဆိုတဲ့စိတ်ဓာတ်နဲ့ သွားနေတာတွေ့ရတော့ တကယ်ကို ကျေနပ်ပါတယ်။ အားရတယ် ဆိုတာကတော့ ဒါအများကြီးကြိုးစားရမယ် NUG တစ်ခုတည်းမဟုတ်ဘူးပေါ့နော် ကျနော်တို့ အားလုံးဝိုင်းပြီး ကြိုးစားရမှာဖြစ်ပါတယ်။
မေး။ ။ စစ်ကောင်စီတပ်တွေရဲ့ အင်အားနဲ့ စွမ်းရည်ကိုရော ဗိုလ်ချုပ်ကြီး ဘယ်လိုမြင်သလဲခင်ဗျ။ ဗိုလ်ချုပ်မှူးကြီး မင်းအောင်လှိုင်ရဲ့ လုပ်ကိုင်ဆောင်ရွက်နေပုံတွေကိုရော ဘယ်လိုသုံးသပ်ပါသလဲ ခင်ဗျာ။
ဖြေ။ ။ စစ်ကောင်စီတပ်ရဲ့ အင်အားနဲ့စွမ်းရည်ကတော့ ၂ ခုစလုံး ချိနဲ့နေပြီလို့ ဒီလိုပဲမြင်တယ်။ နောက်ထပ်အင်အားတိုးလာစရာလည်း မရှိတော့ဘူး။ ရှိပြီးသား အင်အားတွေကလည်း ချိနဲ့နေပြီ။ စိတ်ဓာတ်ရေးရာအရရော၊ လုပ်ဆောင်ချက်တွေရော အကုန်ချိနဲ့နေပြီလို့မြင်တယ်။ ရေရှည်ခံဖို့ဆိုတာ သူတို့အတွက် မျှော်လင့်ချက်မရှိသလောက် ဖြစ်သွားပါပြီ။ ဗိုလ်ချုပ်မှူးကြီး မင်းအောင်လှိုင်ရဲ့ လုပ်ကိုင်ဆောင်ရွက်နေပုံ ဘယ်လိုမြင်သလဲမေးတော့ နည်းနည်းညှာညှာတာတာနဲ့ ဝေဖန်ရမယ်ဆိုရင်တော့ ဗိုလ်ချုပ်မှူးကြီးက ကြိုးမညှိဘဲ ဂစ်တာတီးနေတဲ့ပုံပဲလို့ ကျနော် ဒီလိုပဲ ဥပမာပြချင်ပါတယ်။
မေး။ ။ အခု ဗိုလ်ချုပ်ကြီးတို့ KIA က PDF ပေါ့နော် ပြည်သူ့ကာကွယ်ရေးတပ်ဖွဲ့တွေ ဘယ်လောက်များများကို သင်တန်းပေးပြီးပြီလဲခင်ဗျ။
ဖြေ။ ။ ကျနော်တို့ KIA ကနေ တိုက်ရိုက် အခြေခံစစ်သင်တန်းပေးတာကတော့ ၄ ထောင်ကျော်ရှိပါတယ်။ ပထမပိုင်းမှာ MOD အနေနဲ့ အဆင်သင့်မဖြစ်သေးတဲ့ အချိန်မှာ ကျနော်တို့က အခြေခံစစ်သင်တန်းတွေကို KIA အနေနဲ့ တာဝန်ယူပြီးပေးတာဖြစ်ပါတယ်။ ၄ ထောင်ကျော်။ အဲဒီ့နောက်ပိုင်းမှာတော့ ဆင့်ပွား သင်တန်းတွေကိုတော့ NUG, MOD က သူတို့အစီစဉ်နဲ့ သူတို့ လုပ်နေတယ်။ ကျနော်တို့ KIA ကတော့ ဆင့်ပွားသင်တန်းတွေကို အဓိကမလုပ်တော့ဘဲနဲ့ အခြားမွန်းမံသင်တန်းများနဲ့ အခြားအထူးလေ့ကျင့်ပေးရမယ့် သင်တန်းများ၊ ပူးပေါင်းဆောင်ရွက်မှု လေ့ကျင့်ရေးများကို ဆက်ပြီးလုပ်ဆောင်နေတာဖြစ်ပါတယ်။
မေး။ ။စစ်ကောင်စီ ၂ဝ၂၁ ခုနှစ် အာဏာသိမ်းပွဲအပြီးမှာ တော်လှန်ရေးသမားအသစ်တွေ အဓိကအားဖြင့် လူငယ်တွေဆိုပါတော့ အများကြီးပေါ်ထွက်လာခဲ့ပါတယ်။ သူတို့ရဲ့ ခံယူချက်တွေ၊ လုပ်ကိုင်ဆောင်ရွက်ပုံတွေနဲ့ အရည်အချင်းတွေနဲ့ ပတ်သက်ပြီး ဝါရင့်တော်လှန်ရေးသမားတစ်ဦးအနေနဲ့ ဗိုလ်ချုပ်ကြီးရဲ့ ရှုမြင်ပုံကို ကျနော် သိပါရစေခင်ဗျ။
ဖြေ။ ။ လူငယ်တွေကတော့ တကယ်ရဲရင့်တဲ့ ဆုံးဖြတ်ချက်တွေ ချနိုင်တယ်လို့ မြင်တယ်။ ပြီးရင် သတ္တိရှိတယ်။ တီထွင်စွမ်းအားလည်း ရှိတယ်။ စိတ်ဓာတ်လည်းပဲ ပြင်းထန်တယ်။ အရေးကြီးတာကတော့ မိမိတို့လျှောက်ရမယ့် အနာဂတ်ကို ရှာဖွေတွေ့ရှိထားပြီးသားဖြစ်တယ်လို့ မြင်တယ်။ တစ်ချက်ပဲ ပြောရမှာကတော့ ဒီလိုပြည့်စုံနေတဲ့လူငယ်တွေ တော်လှန်ရေး အင်အားတွေအားလုံးက စုစည်းညီညွတ်ဖို့အတွက် စနစ်တကျသွားဖို့ပဲ လိုပါတယ်။ အဓိက အရေးကြီးဆုံးက ကျနော်တို့ အနာဂတ်ဘယ်လိုသွားမလဲ ဆိုတာကို လူငယ်တွေရော တော်လှန်ရေးသမားတွေအကုန်လုံးက ရှာဖွေတွေ့ရှိထားပြီးသားဖြစ်တယ်လို့ ယုံကြည်ပါတယ်။
မေး။ ။ လက်ရှိ တော်လှန်တိုက်ခိုက်မှုတွေမှာ တိုင်းရင်းသား တော်လှန်ရေးအဖွဲ့အစည်းအားလုံး မပါဝင်ကြသေးတာ ဘာကြောင့်လဲခင်ဗျ။ လတ်တလော AA နဲ့ စစ်ကောင်စီအကြား ယာယီအပစ်ရပ်မှုကိုရော ဘယ်လိုမြင်ပါသလဲ။
ဖြေ။ ။ အဓိကကတော့ ကျနော်တို့ မြန်မာနိုင်ငံမှာ အမြဲတမ်းပြောနေတာကတော့ လက်နက်ကိုင်တပ်ဖွဲ့လို့ သုံးကြတာပေါ့။ ကျနော်တို့ကတော့ လက်နက်ကိုင်တော်လှန်ရေးအဖွဲ့လို့ သုံးပါတယ်။ တိုင်းရင်းသား လက်နက်ကိုင်တော်လှန်ရေးအဖွဲ့တွေ အကုန်လုံး တိုက်ပွဲတွင်းမှာ မပါဝင်သွားလည်းပဲ မူအရတော့ ဆန့်ကျင်ဘက်ဖြစ်ပါတယ်။ တချို့ကတော့ အခြေနေအမျိုးမျိုးကြောင့် လောလောဆယ် တိုက်ပွဲတွေမှာ မပါနိုင်ဘူး။ ဒါပေမဲ့ မူဝါဒချင်းတူညီတာ မဟုတ်ပါဘူး။ ဒါအင်မတန် အရေးကြီးပါတယ်။ နောက်တစ်ခုက မပါဝင်နိုင်တာကတော့ အားနည်းချက်တွေ ကိုယ်စီရှိကြပါတယ်။ အဖွဲ့တိုင်းမှာပေါ့လေ။ ဥပမာ- မိမိအစပျိုးထားတဲ့ လမ်းကြောင်းအရ ပါဝင်လို့ မရတာမျိုးတွေဖြစ်တယ်။ တချို့အနည်းစုကတော့ အင်အားသိပ်မရှိတဲ့အခါမှာ မဆုံးဖြတ်ရဲတာလည်း ရှိပါတယ်။ ဒါပေမဲ့ တိုင်းရင်းသား တော်လှန်ရေးလက်နက်ကိုင်လို့ စပြီးဖွဲ့စည်းလာတဲ့ အကုန်လုံးကတော့ မူအရဆန့်ကျင်ဘက်ပဲဖြစ်တယ်။ တစ်ချိန်ချိန်မှာ ဒီလူတွေအကုန်လုံးဟာ မတူညီတဲ့မူအောက်မှာ သူတို့နဲ့ တပေါင်းတစည်းတည်း နေလို့မရတဲ့အခါမှာ အကုန်လုံးတိုက်ပွဲထဲမှာ ပါဝင်လာမှာဖြစ်ပါတယ်။ နောက်တစ်ခုကတော့ AA နဲ့ စစ်ကောင်စီကြား ယာယီအပစ်အခတ်ရပ်စဲမှုကတော့ ကျနော်တို့ သံသယမရှိပါဘူး။ AA အပေါ်မှာ ကျနော်တို့ တကယ်ယုံကြည်ပါတယ်။ ဘာဖြစ်လို့လဲဆိုတော့ သူတို့ပြောတာက လူသားချင်းစာနာမှုအရ ယာယီအပစ်အခတ်ရပ်တယ်လို့ ပြောတယ်။ နောက်တစ်ချက်က သူတို့ရခိုင်ပြည်မှာရှိတဲ့ ပြည်သူလူထုရဲ့အကျပ်အတည်းပေါ့နော်။ ဒါကို သူတို့ အဓိကထားတာဖြစ်တယ်။ ဘာဖြစ်လို့လဲဆိုတော့ အခြားပြည်နယ်တိုင်းတွေ ကျနော်တို့ ကချင်ဒေသတွေမှာကျတော့ လမ်းကြောင်းတွေကို စစ်ကောင်စီက ပိတ်လို့မရဘူး။ လမ်းကြောင်းတွေ အများကြီးရှိတယ်။ ကားလမ်းတွေ အများကြီးရှိတယ်။ မြစ်ကြောင်းတွေ ရှိတယ်။ ရခိုင်ပြည်ဘက်မှာကြတော့ အဲလိုမဟုတ်ဘူး၊ ဆက်သွယ်ရေးလမ်းကြောင်းတွေကလည်း နည်းတဲ့အခါကျတော့ သူက လမ်းကြောင်းတစ်ခု၊ ၂ ခုကို ပိတ်လိုက်လို့ရှိရင် ပြည်သူလူထုက အင်မတန်မှ ဒုက္ခရောက်တယ်။ အဲဒီအခါမှာ ကိုယ့်ရဲ့လူထုကို ငဲ့ညှာရတာဖြစ်တယ်။ အဲတော့ စစ်ကောင်စီက ဒီလိုလုပ်နေတာကတော့ လူထုကို ဓားစာခံလုပ်တာပဲဖြစ်တယ်။ ဒါကြောင့်မို့လို့ AA က လူသားချင်းစာနာမှုအရ သူယာယီအပစ်အခတ်ရပ်စဲရေး လုပ်တဲ့အပေါ်မှာ ကျနော်တို့ KIO အနေနဲ့ သံသယမရှိပါဘူး။ ယုံကြည်မှုလည်း လျော့ပါးမသွားပါဘူး။ ဒါဟာသိပ်ပြီးမှ အချိန်အကြာကြီးလုပ်နိုင်မယ့် အနေအထားမျိုးလည်း မတွေ့ရပါဘူး။
မေး။ ။ တိုင်းရင်းသား လက်နက်ကိုင် တော်လှန်ရေးအဖွဲ့အစည်းတွေ အနေနဲ့ လက်ရှိကာလမှာ ဘယ်လိုသဘောထားနဲ့ ဘယ်လိုရပ်တည်ချက်တွေရှိသင့်တယ်လို့ ဗိုလ်ချုပ်ကြီး ပြောနိုင်မလဲ ခင်ဗျာ။
ဖြေ။ ။ အဓိကတော့ အာဏာရှင်စနစ် လုံးဝချုပ်ငြိမ်းသွားရေးကို အဓိကအားပြုရမယ်။ မျက်ခြေမပြတ် လုပ်ရမယ်လို့ မြင်ပါတယ်။ ဘာဖြစ်လို့လဲဆိုတော့ အာဏာရှင်ဆိုတာက သူ့ရဲ့ ပုလ္လင်မလှုပ်မချင်း သူရဲ့ ဆုံးဖြတ်ချက်တွေ သူဘယ်တော့မှ အလျော့မပေးဘူး၊ အဲတော့ ကျနော်တို့က အာဏာရှင် အဓိကကတော့ လောလောဆယ် ကြုံတွေ့နေရတဲ့ စစ်အာဏာရှင်စနစ်ဟာ ဘယ်လိုချုပ်ငြိမ်းသွားမလဲဆိုတာ ကျနော်တို့ အာရုံပြုဖို့လိုပါတယ်။ ပြီးလို့ရှိရင် ခုနက ကျနော်တို့ ပြောခဲ့ကြသလိုပဲ ကျနော်တို့ လျှောက်ရမယ့် အနာဂတ် တွေ့ထားပြီးသား ကျနော်တို့ဆီမှာ ရှိပြီးသား အဖြေကို အကောင်အထည်ဖော်ဖို့ လိုပါတယ်။ ဒီလိုသွားတဲ့အခါမှာ တော်လှန်ရေးသတိ၊ တော်လှန်ရေးသစ္စာနဲ့ ပြည်သူလူထုနဲ့ အတူတကွပူးပေါင်းဖို့လိုပါတယ်။ တော်လှန်ရေးရယ်၊ ပြည်သူရယ် ပူးပေါင်းဖို့ အင်မတန် အရေးကြီးတယ်လို့ ပြောချင်ပါတယ်။
မေး။ ။ ဒီတော်လှန်ရေးမှာ နိုင်ငံတကာရောက် မြန်မာပြည်ဖွားတွေ နိုင်ငံခြားမှာမွေးတဲ့ မြန်မာနွယ်ဖွားတွေရဲ့ ထောက်ခံကူညီမှုကိုရော ဘယ်လိုမြင်သလဲ ခင်ဗျ။
ဖြေ။ ။ နိုင်ငံတကာရောက်တဲ့ မြန်မာပြည်ဖွားတွေပေါ့နော်။ နိုင်ငံတကာကို အကြောင်းအမျိုးမျိုးကြောင့် ရောက်သွားတဲ့လူတွေရဲ့ အင်အားဟာ အင်မတန်မှ အရေးကြီးပါတယ်။ အဆုံးအဖြတ်ကို ခွန်အားဖြစ်စေမယ့် အင်အားတစ်ခုဖြစ်ပါတယ်။ ဥပမာ- တချို့ဖြစ်ခဲ့တဲ့ နိုင်ငံတွေကို ကြည့်မယ်ဆိုရင် မြင်တွေရမှာက အရှေ့တီမောဖြစ်ပါတယ်။ နိုင်ငံတကာရောက်တဲ့ မိမိနိုင်ငံက လူတွေရဲ့အင်အားဟာ အရေးကြီးပြီးမှ ခွန်အားဖြစ်စေသလဲဆိုတာကို တွေ့ရမှာဖြစ်ပါတယ်။ ဒုတိယအချက်ကတော့ ဒီကနေ့ နွေဦးတော်လှန်ရေးမှာလည်း နိုင်ငံတကာရောက်နေတဲ့ ကျနော်တို့ နိုင်ငံသားတွေ ပြည်သူတွေက အင်မတန်မှ အကူအညီပေးနေတာကို တွေ့ရတယ်။ ငွေရေးကြေးရေးအရရော၊ နိုင်ငံရေးအရရော၊ စိတ်ဓာတ်ခွန်အားအရရော ပေးနေပါတယ်။ အဲဒီ့ထက်တဆင့် တက်သွားတာကတော့ ခုနကပြောသလို အဆုံးအဖြတ်အတွက် လုပ်ပေးနိုင်တဲ့ အင်အားတွေ အများကြီးရှိပါတယ်။ ဒါကြောင့် သိပ်ကိုအရေးကြီးတယ်လို့ ပြောချင်ပါတယ်။
မေး။ ။ လက်ရှိတော်လှန်ရေးအောင်မြင်ဖို့ အဓိက ဘာတွေလိုအပ်လဲ ဗိုလ်ချုပ်ကြီး။ တကယ်လို့များ တော်လှန်ရေးအဖွဲ့တွေအနေနဲ့ လေယာဉ်ပစ်လက်နက်တွေ ရရှိမယ်ဆိုရင် အခြေအနေတွေက ဘယ်လိုများ ပြောင်းလဲလာနိုင်ပါသလဲ ခင်ဗျ။
ဖြေ။ ။အဓိကကတော့ လက်ရှိတော်လှန်ရေး အောင်မြင်ဖို့ကတော့ အင်အားရှိဖို့လိုတာပေါ့။ အင်အားလို့ပြောတဲ့အခါမှာ စစ်လက်နက်အင်အား၊ လူအင်အား၊ ငွေရေးကြေးရေးဘဏ္ဍာရေး၊ အသိပညာစသဖြင့် အင်အားပေါင်းစုံလိုပါတယ်။ ကိုယ့်ရဲ့အင်အားကို ကြီးအောင်လုပ်ရမယ်။ ပြီးလို့ရှိရင် စုစုစည်းစည်းဖြစ်အောင် လုပ်ရမယ်။ လေယာဉ်ပစ်လက်နက်ဆိုတာကတော့ တကယ်လိုအပ်ပါတယ်။ ဒါပေမဲ့ လေယာဉ်ပစ် ဒုံးတွေကိုပဲ မျှော်နေလို့မရပါဘူး။ တခြားနည်းတွေ လုပ်ရမှာဖြစ်ပါတယ်၊ နည်းလမ်းပေါင်းစုံနဲ့ လုပ်ရမှာဖြစ်ပါတယ်။ အဲတော့ ခုနကပြောသလိုပဲ ကျနော်တို့ နိုင်ငံတကာရောက်နေတဲ့ နိုင်ငံသူ၊ နိုင်ငံသားများကလည်း တဘက်ကနေပြီးတော့မှ ဝိုင်းဝန်းကြိုးပမ်းကြမယ်။ သူ့ရဲ့အင်အား ရန်သူရဲ့အင်အားကို ဘယ်လိုချိနဲ့အောင်လုပ်ရမလဲဆိုတဲ့ နည်းပေါင်းစုံ ကျနော်တို့ ကြိုးစားရမှာဖြစ်ပါတယ်။ အဲတော့ ခွန်အားတွေလည်း ပေးကြရမယ်။ တဘက်နဲ့တဘက်ပေါ့နော် တစ်ယောက်နဲ့တစ်ယောက် ဒီတော်လှန်ရေးကာလမှာ ခွန်အားမဖြစ်စေဘဲနဲ့ အပုပ်ချတဲ့ဟာတွေကို ကျနော်တို့ လျော့ချဖို့လိုပါတယ်။ တစ်ခါတလေမှာ အားမလိုအားမရဖြစ်ပြီးမှ တဘက်နဲ့တဘက်အပြစ်တင်တာတို့ အပုပ်ချတာမျိုးမဖြစ်အောင် ကြိုးစားရမယ်။ ကိုယ့်ရဲ့ အင်အားတွေကို ဖြုန်းတီးတာမျိုးမဖြစ်အောင် ကြိုးစားရမယ်လို့ ပြောချင်ပါတယ်။
မေး။ ။ ဒီတော်လှန်ရေးဟာ စစ်အာဏာရှင်စနစ်ကိုသာမက လူမျိုးကြီးဝါဒ၊ တစ်ပြည်လုံးမှာဖြစ်ပွားနေတဲ့ အကျင့်ပျက်ခြစားမှုတွေကို အမြစ်ဖြတ်ပြီး ဖယ်ဒရယ်ဒီမိုကရေစီ နိုင်ငံတော်သစ်ကို တည်ထောင်နိုင်မယ်လို့ ဗိုလ်ချုပ်ကြီး ယုံကြည်ပါသလား ခင်ဗျ။
ဖြေ။ ။ ကျနော်ကတော့ ယုံကြည်တယ်။ တကယ် ယုံကြည်ပါတယ်။ ဒါပေမဲ့ ကျနော်တို့ အလွယ်တကူတော့ ရောက်သွားမှာ မဟုတ်ပါဘူး။ အပြန်အလှန်နားလည်မှုတွေ တည်ဆောက်ရမှာဖြစ်တယ်။ အခုလို ခက်ခဲတဲ့အချိန်တွေကို ကျော်ဖြတ်ရင်းနဲ့ နားလည်မှုကို၊ ယုံကြည်မှုကို တည်ဆောက်ရမှာဖြစ်ပါတယ်။ ခက်ခဲတဲ့အချိန်ကို ရင်ဆိုင်ရလေ ဒီအခက်အခဲကို အတူတကွ အောင်မြင်ကျော်ဖြတ်ကြလေ အချင်းချင်းရဲ့ ယုံကြည်မှု ပိုပြီးခိုင်မြဲလေဖြစ်ပါတယ်။ ဒါကြောင့်မို့လို့ ဒီပန်းတိုင်ကိုရောက်ဖို့ အလွယ်တကူမဟုတ်ဘူး၊ ကြိုးစားရမယ်ဆိုတာလည်း ကျနော်တို့ သတိချပ်ဖို့လိုပါတယ်။
မေး။ ။မြန်မာပြည်သူအားလုံးကို ဗိုလ်ချုပ်ကြီး တခြားဘာများဖြည့်စွက်ပြောချင်ပါသေးလဲ ခင်ဗျ။
ဖြေ။ ။ ဒီ နွေဦးတော်လှန်ရေးအတွက် ပေးဆပ်ခဲ့တဲ့သူတွေ အားလုံးကို လေးစားပါတယ်။ ဂုဏ်ပြုပါတယ်။ ဆက်ပြီးလည်း ကြိုးစားဖို့လိုပါတယ်။ ပြီးရင် ကျနော်တို့ မှန်ကန်တဲ့ လမ်းကြောင်းပေါ်မှာ ရောက်နေပြီလို့ ကျနော်တော့ ဒီလိုယုံကြည်ပါတယ်။ မှန်ကန်တဲ့ လမ်းကြောင်းပေါ်မှာ ရောက်နေကြပြီဖြစ်လို့ ခိုင်မာတဲ့ ဆုံးဖြတ်ချက်နဲ့ အရှေ့ကို အတူတကွ အောင်မြင်အောင် ဆက်သွားဖို့လိုပါတယ်။ ဒီလို ဆက်သွားရအောင်လို့ အားလုံးကိုလည်း တိုက်တွန်းချင်ပါတယ်။
_________
