NUG မှ စစ်ဦးစီးချုပ်ရုံး ဖွဲ့စည်းပြီ *******************************
အမျိုးသား ညီညွတ်ရေး အစိုးရမှ ဗဟိုကွပ်ကဲ ညှိနှိုင်းရေး ကော်မတီ Central Control and Coordination Committee (C3C) အား တိုင်းရင်းသား လက်နက်ကိုင် ခေါင်းဆောင်များ နှင့် အတူ ပူးတွဲ ဖွဲ့စည်း လိုက်ပြီ ဟု ကာကွယ်ရေး ဝန်ကြီးဌာန အမြဲတမ်း အတွင်းဝန် ဦးနိုင်ထူးအောင်က ဧရာဝတီသို့ ထုတ်ဖေါ် အသိပေး လိုက်သည်။
တနိုင်ငံလုံး အနှံ့ ပြန့်ကျဲနေသော ရာပေါင်းများစွာ ရှိသည့် ပြည်သူ့ကာကွယ်ရေး တပ်ဖွဲ့များအား တစု တစည်း တည်း ပေါင်းစည်းရန် ရည်ရွယ် လုပ်ဆောင်လာခြင်း ဖြစ်သည်။ တပ်ရင်း တပ်ဖွဲ့ အမည်များကိုလည်း စနစ်တကျ သတ်မှတ်သွားပြီး C3C ၏ ကွပ်ကဲမှု နှင့် ဟန်ချက်ညီညီ လှုပ်ရှားသွားမည်ဟု မျှော်လင့်ရပေသည်။
အာဏာရှင် များကတော့ သေမထူး နေမထူး ဇာတ်ခင်းကာ အာဆီယံ မှ ပါဝင် သက်ဆိုင်နေသူများနှင့် ဆွေးနွေး ရန် အတန်တန် တိုက်တွန်း နေသည့်ကြားမှ အသက် ၇၉ နှစ်ရှိ NLD ၏ ဗဟို အလုပ်အမှုဆောင် ကော်မတီဝင် ဦးဝင်းထိန် အား ထောင်ဒဏ် အနှစ် နှစ်ဆယ် ချမှတ်လိုက်ခြင်း ဖြင့် တုန့်ပြန်ခဲ့ပေသည်။
သို့သော် လက်ရှိတွင် မြို့ပေါ်ရှိ NLD အမတ် အတော်များများ အနေဖြင့် နိုင်ငံရေး နှင့် မပတ်သက်ပါ ကြောင်း လက်မှတ် ရေးထိုးပြီး စစ်တပ်ကို အညံ့ခံထားရသည့် အတွက် ထိုသူတို့ကို အသုံးချပြီး ဆွေးနွေး နေပါသည်ဟု လူသိရှင်ကြား လုပ်လာနိုင်သည့် အလားအလာ ကိုလည်း မမေ့မလျော့ ထည့်တွက် ထားကြရန် လိုမည်ဟု ယူဆမိသည်။
မနေ့က AP သတင်းဌာနမှ အာဏာသိမ်း အဖွဲ့၏ စစ်ကြောရေး တွင် လူပေါင်း ၁၃၁ ဦး သေဆုံးခဲ့ပြီး ဖြစ်သည်နှင့် ညှင်းပမ်းနှိပ်စက်ခံရသည့် သက်သေအထောက်အထား များကို ကမ္ဘာသိ ထုတ်ပြန်လိုက်သည့် သတင်း အပေါ် အမေရိကန် နိုင်ငံခြားရေး ဝန်ကြီးဌာနက စုံစမ်း စစ်ဆေးမှုများ ပြုလုပ်ရန် တောင်းဆိုလာခဲ့သည်။ အမေရိကန် ကွန်ဂရက် အမတ်များကလည်း အလားတူ ပြုလုပ်ရန် တောင်းဆိုလာပြီး BURMA ACT ကို အမြန်ဆုံး အတည် ပြုနိုင်ရေး တိုက်တွန်းလာခဲ့သည်။
အဆိုပါ သတင်းကို မထုတ်ပြန်မီ ဇော်မင်းထွန်း နှင့် ဆက်သွယ်ပြီး မေးမြန်းသော်လည်း ထိုသို့ အဓိပ္ပါယ် မရှိ သည့် သတင်းမျိုး အတွက် မဖြေလို ဟု ပြောဆိုသွားခဲ့ရာ အဆိုပါ သတင်းကို မြင်ရတွေ့ရသူ အပေါင်းက သူ့လို သဘောထားခြင်း ရှိမည် မဟုတ်သည်ကို နားလည် နိုင်စွမ်း မရှိပေ။
ယခုအခါ AP ၏ စုံစမ်း တွေ့ရှိချက် များသည် လွန်စွာ အရေးပါသော အနေအထား သို့ ရောက်လာခဲ့ပြီ ဖြစ် သည်။ အမေရိကန် တို့၏ လုပ်ရပ်သည် ၂၀၀၃ ခုနှစ် အီရတ်ကို မကျူးကျော်မီ ကုလသမဂ္ဂမှ ငြင်းပယ်၍ မရလောက်သည့် ခိုင်လုံသော အကြောင်း ရင်းခံများ တဖြေးဖြေး တည်ဆောက်လာပုံ နှင့် ဆင်ဆင်တူနေသည်။
အာဏာသိမ်း အဖွဲ့သည် PDF ကို ထောက်ခံသည်ဟု မှတ်ယူထားသော ကျေးရွာ များ ကို လက်တုန့်ပြန်သည့် အနေဖြင့် မီးရှို့ခြင်း၊ NLD ရုံး အချို့အား ဖေါက်ခွဲခြင်းများ ပြုလုပ်လာခဲ့ခြင်းသည်ပင် ၎င်းတို့ ကိုယ် ၎င်းတို့ အစိုးရ အဖွဲ့ဟု ခံယူနိုင်ခြင်း မရှိတော့ဘဲ တာဝန်မဲ့စွာ ဖြင့် non-state actor များအလား ပြုမူလာနေကြသည်။ မင်းအောင်လှိုင်သည် သူ့မိသားစု အတွက် အသက်ပေးနေရသော တပ်သားများ အား မည်သို့မျှ ဟန့်တား ရဲခြင်း မရှိတော့သည့်အပြင် လုပ်ချင်တာ လုပ် ဟု ခွင့်ပြုထားရပုံ ရှိနေသည်ကလည်း တကြောင်း အပါအဝင် ဖြစ်သည်။
ဖယ်ခုံ၊ ဖရူးဆိုး၊ ဘော်လခဲ မြို့နယ်များ အတွင်း စစ်ဆင်ရေး တခုတွင် စစ်ကောင်စီ တပ် များသည် သက်ကြီးရွယ်အိုများ အပါအဝင် ရွာသား ၁၉ ဦးအား ၎င်းတို့ သွားရာ လမ်းတ လျှောက်တွင် သူရဲဘော ကြောင်စွာ လူသား ဒိုင်းသဖွယ် အသုံးချလာနေသည့် သတင်းကလည်း ဓါတ်ပုံ အထောက်အထား များဖြင့် ဖေါ်ပြလာကြသည်။
ချင်းပြည်နယ် ထန်တလန် မြို့ကိုလည်း လက်နက်ကြီး များ ဖြင့် ပစ်ခတ်တိုက်ခိုက်လာကြပြီး အဆောက်အဦးများ ကို မီးရှို့ တိုက်ခိုက်ခဲ့ကြရာတွင် မိမိတို့ ရုံး အဆောက်အအုံကို သိသိကြီး နှင့် မီးလောင်တိုက်သွင်းခဲ့သည်ဟု ဓါတ်ပုံ အထောက်အထား နှင့် တကွ Save the Children နိုင်ငံတကာ ပရဟိတ အသင်းကြီးက ကြေညာချက် ထုတ်ပြန်ခဲ့သည်၊ မြို့နေလူထု အားလုံး မြို့ကို စွန့်ခွာ ထွက်ပြေးခဲ့ကြရသည်ဟု သိရသည်။
မြန်မာ အကျပ်အတည်းကြီးက နိုင်ငံတကာ အာရုံစိုက်လာရသည့် အရေးအခင်းကြီး တခု ပြောင်းလဲသွားခဲ့ပြီ ဖြစ်သည်။
ထိုကဲ့သို့ ဖြစ်ပေါ်လာနေမှုများကြောင့် အမေရိကန် သမ္မတ၏ အမျိုးသား လုံခြုံရေး အကြံပေး ဂျိတ် ဆူလီဗန်သည် NUG အစိုးရနှင့် တရားဝင် ဆွေးနွေးလာခဲ့ခြင်းဖြင့် အာဏာသိမ်း အဖွဲ့ အပေါ် စိတ်ကုန်ခမ်းစ ပြုလာနေသော အာဆီယံ အား သွယ်ဝိုက်၍ လမ်းပြလာခဲ့ခြင်း ဖြစ်သည်။
အာဆီယံသည် အမေရိကန် ဦးဆောင်သော စစ်ရေး မဟာမိတ် အဖွဲ့ နှစ်ခုဖြစ်သော QUAD နှင့် AUKUS တို့ ဖွဲ့စည်း ပေါ်ပေါက်လာသည်နှင့် အတူ မသိချင်ယောင်ဆောင် ငြင်းပယ်ကာ ကြားနေဖို့ အရေး မဖြစ်နိုင်သလောက် နီးနီး ဟု Nikkei Asia Review က ထောက်ပြလာခဲ့သည်။ သို့သော် ကမ္ဘောဒီယား မှ ထိုသို့ အနေအထား ဖြစ်မလာအောင် အကျောက်အကန် ခုခံ ကာကွယ်သွားနိုင်ကြောင်း ယူဆရပေသည်။
လာအို ရဲ အဖွဲ့သည် မြန်မာ-ထိုင်းနယ်စပ်မှ ဝင်ရောက်လာသော မက်ဆေးပြား ၅၅.၆ သန်း နှင့် ခရစ်စတယ် မက် ၁.၅ တန် ကို ဖမ်းဆီးရမိသွား၍ အာရှ တွင် စံချိန်တင်သွားခဲ့သလို မြန်မာနိုင်ငံ အတွင်း အုပ်ချုပ်ရေး ပျက်ပြား လာနေပြီး ထင်တိုင်း ကျဲလာမှု များ ကြောင့် တရုတ်သည်လည်း မူးယစ်ဆေးဝါးများ တိုးလျှိုပေါက် ဝင်ရောက် လာနိုင်သည့် အလားအလာများ ကို ဟန့်တားရန်အတွက် ကိုဗစ် အကြောင်းပြုပြီး နယ်စပ် ကုန်သွယ်ရေးအား ပိတ်ပင်ထားခဲ့သဖြင့် အာဏာသိမ်း အဖွဲ့ အဖို့ နယ်စပ် ကုန်သွယ်ရေးမှ အခွန်အကောက်များ ဆုံးရှုံးနေရပြီ ဖြစ်သည်။
ကုလသမဂ္ဂ မူးယစ် ဆေးဝါး တိုက်ဖျက်ရေး အေဂျင်စီမှ ထိုသို့ ဒေသတွင်း မူးယစ်ဆေးများ ပျံ့ပွားလာနိုင်သည့် အလားအလာများကို သတိပေး စကား ပြောဆိုလာနေကြသည်။
မည်သို့ပင် ဖြစ်စေ အမျိုးသား ညီညွတ်ရေး အစိုးရ နိုင်ငံခြားရေး ဝန်ကြီး ဒေါ်ဇင်မာအောင်မှ တော်လှန်ရေးကြီး အောင်မြင်ဖို့ မိမိတို့ကိုယ် မိမိတို့ အားကိုးရမည် ဖြစ်သည်ဟု မြန်မာ နောင်း နှင့် တွေ့ဆုံ မေးမြန်းခန်းတွင် ထုတ်ဖေါ် သတိပေးသွားခဲ့သည်။
တော်လှန်ရေးကြီး မုချအောင်ရမည်!!!
ဆရာလှစိုးဝေ ရေးသားသည်။
(ပုံတွင် Safe the Children မှ ထုတ်ပြန်သော ထန်းတလန် မြို့ သတင်း ဓါတ်ပုံကို တွေ့နိုင်သည်)