ခမရ ၄၀၅ တပ်ရင်းမှူး ရှေ့တန်းမှာ ဖမ်းဆီးခံရပြီးနောက် သရက်ချောင်း နောက်တန်းတပ်ရင်း ၃ ခုမှာ အောင်ခြင်းရှစ်ပါးနဲ့ ပရိတ်တရားခွေကို နေ့ရောညပါ လော်စပီကာနဲ့ ဖွင့်နေ
ကိုကိုလေး/ဧရာဝတီတိုင်းမ်
(သရက်ချောင်း)၊ ဇန်နဝါရီလ ၈ ရက်
တနင်္သာရီတိုင်း၊ ထားဝယ်ခရိုင်၊ သရက်ချောင်းမြို့နယ်အခြေစိုက် စစ်ကောင်စီတပ်များဖြစ်သည့် ခမရ ၄၀၃၊ ၄၀၄၊ ၄၀၅ တပ်ရင်းများအတွင်း ကြာနီကန်ဆရာတော်၏ အောင်ခြင်းရှစ်ပါး၊ပဌာန်းနှင့်ဓာရဏပရိတ်တရားများပါ ဝင်သည့် တရားခွေကို လော်စပီကာဖြင့် နေ့ရောညပါ ဖွင့်လှစ်နေကြောင်း ဒေသခံများထံကသိရသည်။
အဆိုပါ သရက်ချောင်းအခြေစိုက်တပ်ရင်းများသည် ကရင်ပြည်နယ်အတွင်းတိုက်ခိုက်ရေးဝင်ရောက်နေသည့်တပ်ရင်းများဖြစ်ပြီး ပြီးခဲ့သည့် ဒီဇင်ဘာလ ၁၅ ရက်နေ့က ဖာပွန်ခရိုင်အတွင်းရှိ မဲဝိုင်စခန်းကိုစစ်ကူ သွားရောက်ရန် ခမရ ၄၀၅ ကို အမိန့်ပေးစေခိုင်းမှုအား ငြင်းဆန်ခဲ့မှုကြောင့် ခမရ ၄၀၅ မှ တပ်ရင်းမှူး ဒုဗိုလ်မှူးကြီး လှိုင်မင်းထွဋ်အပါအဝင် အကြီးတန်းအရာရှိ ၃ ဦးဖမ်းဆီးခံခဲ့ရပြီးနောက်ပိုင်းကာလများတွင် ယင်းတပ်ရင်း ၃ ရင်းမှ တရားခွေများကိုနေ့စဥ်ဖွင့်လှစ်နေခြင်းဖြစ်သည်ဟု ဆိုသည်။
"၄၀၅ ရင်းမှူး အဖမ်းခံရပြီး ဒီဇင်ဘာလဝက်လောက်နောက်ပိုင်းကနေ နေ့တိုင်းဖွင့်တာ ကြာနီကန်ဆရာတော်ရဲ့ အောင်ခြင်းရှစ်ပါး ဂါထာ၊ ပဌာန်း၊ ပရိတ်ကြီး၊ဓာရဏပရိတ် အဲ့တာတွေနေ့ရောညရောဖွင့်တာ။ သူတို့တွေဖြစ်ပျက်နေတာမြို့ပေါ်နေတဲ့သူတွေကတော့သိတာပေါ့။ မနက်အစောပိုင်းနဲ့ ညပိုင်းတွေ ပိုပြီးဖွင့်လာတယ်။ အရင်ဒါမျိုးဖွင့်တာမကြားဘူး။ အခုမှ ကြောက်ပြီး ဘုရားတနေလို့ မရတော့ဘူး" လို့ သရက်ချောင်းမြို့ခံတစ်ဦးက ဧရာဝတီတိုင်းမ်ကိုပြောသည်။
ထို့အပြင် ခမရ ၄၀၃၊ ၄၀၄၊ ၄၀၅ တပ်ရင်းများ၏ ပတ် ပတ်လည်တွင် ဝါးချွန်များဖြင့်ခြံစည်းရိုးများကာရံထားပြီး မြေမြှုပ်မိုင်းထောင်ထားကြောင်းသရက်ချောင်း မြို့မစျေးအတွင်း သတင်းလွှင့်ထားကြောင်း ဒေသခံများက ပြောပြချက်အရသိရှိရသည်။
စစ်ကောင်စီတပ် ခမရ ၄၀၃၊ ၄၀၄၊ ၄၀၅ တပ်ရင်းများ သည် ထားဝယ်မြို့အခြေစိုက် အမှတ် ၈ စစ်ဆင်ရေးကွပ် ကဲမှုဌာနချုပ် (စကခ ၈) လက်အောက်ခံတပ်ရင်းများဖြစ်ကြပြီး စကခ ၈ နှင့်လက်အောက်ခံတပ်ရင်းများသည် ကရင်ပြည်နယ် KNU တပ်မဟာ ၅ နှင့် ၆ နယ်မြေများအတွင်း တိုက်ခိုက်ရေးဝင်ရောက်နေသည် မှာ ၂ နှစ်ကျော်အကြာရှိပြီဖြစ်ကြောင်း ကရင်ပြည်နယ်စစ်ရေးသတင်းရင်းမြစ်များထံကသိရသည်။
ကရင်ပြည်နယ် KNU တပ်မဟာနယ်မြေ တကျော့ပြန်တိုက်ပွဲများအတွင်း စစ်ကောင်စီတပ်မှ စကခ ၈ ၊ စကခ ၁၃ ၊ တပ်မ ၄၄ စသည့်တပ်မ ၃ခု၊ တပ်မ ၁၁ လက် အောက်ခံတပ်ရင်းတချို့ နဲ့ ကရင်ပြည်နယ် နယ်မြေခံ အရှေ့တောင်တိုင်းစစ်ဌာနချုပ်(ရတခ) လက်အောက်ခံတပ်ရင်းအများအပြားဖြင့် တိုက်ခိုက်ရေးဝင်ရောက်နေကာ ထိခိုက်သေဆုံးမှုများပြားလျက်ရှိကြောင်း သိရသည်။
ဓာတ်ပုံ - လူမှုကွန်ရက်
# Ayeyarwaddy_Times
မှတ်ချက်များ
Post a Comment