ပုသိမ်ထောင်တာဝန်ရှိသူတွေရဲ့ ထောင်တွင်းလူသတ်မှုအကြောင်း (သတင်းဆောင်းပါး)
ဆလိုင်းသန့်စင်/ဧရာ၀တီတိုင်းမ်
ဇန်နဝါရီလ ၇ ရက်
ဧရာ၀တီတိုင်း၊ ပုသိမ်မြို့က ပုသိမ်အကျဉ်းထောင်မှာ ဇန်နဝါရီလ ၆ ရက်နေ့က ထောင်ဆူပူမှုနဲ့ အဓိကရုဏ်းတချို့ ဖြစ်ပွားခဲ့ပြီး နိုင်ငံရေးအကျဉ်းသား ၁ ဦး သေဆုံးကာ အကျဉ်းသားအများအပြား ဒဏ်ရာရရှိခဲ့တဲ့ဖြစ်စဉ် ဖြစ်ပွားခဲ့ပါတယ်။
ဧရာ၀တီတိုင်းမ်သတင်းဌာနအနေနဲ့ စုံစမ်းသိရှိရတဲ့အချက်အလက်တွေအရ ထောင်ဆူပူမှုဖြစ်စဉ်ဟာ မြန်အောင်မြို့နယ်က သေဒဏ်ချမှတ်ခံခဲ့ရတဲ့ မူလတန်းပြကျောင်းဆရာ ကိုကောင်းခန့်ကျော်(ခ) စောကျော်စုကိစ္စနဲ့ ပတ်သတ်ပါတယ်။
မြန်အောင်မြို့နယ်၊ ထိပ်ပုတ်ကုန်းကျေးရွာ အထက်တန်းခွဲ ကျောင်းမှာ မူလတန်းပြအဖြစ် စာသင်ကြားပြီး စစ်တပ်အာဏာသိမ်းပြီးနောက်ပိုင်း စစ်အာဏာရှင်စနစ်ဆန့်ကျင်ကာ CDM ပြုလုပ်ခဲ့တဲ့ ကျောင်းဆရာ အသက် ၂၅ နှစ်အရွယ် ကိုကောင်ခန့်ကျော်(ခ)စောကျော်စုကို မြန်အောင်ခရိုင်တရားရုံးကနေ ဒလန်သတ်တယ်ဆိုပြီး ဒီဇင်ဘာလ ၃၀ ရက်နေ့မှာ သေဒဏ် ချမှတ်ခဲ့ပါတယ်။
သေဒဏ်ချမှတ်ခံထားရတဲ့ ကျောင်းဆရာ ကိုကောင်းခန့်ကျော်ကို စစ်ကောင်စီက ဧရာ၀တီတိုင်းမှာ အကြီးဆုံးထောင်ဖြစ်တဲ့ ပုသိမ်ထောင်မှာ ပြောင်းရွှေ့ချုပ်နှောင်ခဲ့ပါတယ်။ ဒီရက်ပိုင်းအတွင်း ကျောင်းဆရာ ကိုကောင်းခန့်ကျော်ကို ကြိုးမိန့်ပေး ကွပ်မျက်ဖို့အတွက် ပုသိမ်ထောင်မှာ ကြိုးစင်ဆောက်ဖို့ ထောင်တာဝန်ရှိသူတွေက ပြင်ဆင်ခဲ့ကြောင်း သိရပါတယ်။
နိုင်ငံရေးအကျဉ်းသား ကျောင်းဆရာကို ကြိုးမိန့်ချကာ ကွပ်မျက်မယ့်ကိစ္စနဲ့ပတ်သတ်ပြီး ပုသိမ်ထောင်မှာ အကျဉ်းချခံထားရတဲ့ ကို၀င်းမင်းထက် (ခ) ကိုမဲကြီးဦးဆောင်တဲ့ နိုင်ငံရေးအကျဉ်းသား ၈ ဦးက ပုသိမ်ထောင် တာဝန်ရှိသူတွေကို ကန့်ကွက်ခဲ့ကြောင်း သိရပါတယ်။
ဒီကိစ္စနဲ့ပတ်သတ်ပြီး ဧရာ၀တီတိုင်း အကျဉ်းဦးစီးဌာန ညွန်ကြားရေးမှူး ဦးဇော်စစ်အောင်နဲ့ ပုသိမ်ထောင်ကို အသစ်ရောက်လာတဲ့ ထောင်မှူးအသစ် နေမင်းထက်တို့က ကျေနပ်မှုမရှိတဲ့အတွက် နိုင်ငံရေးအကျဉ်းသားတစ်ဦးဆိမှာ Keypad ဖုန်း တွေ့တယ်လို့ စွပ်စွဲပြီး ကို၀င်းမင်းထက် (ခ) ကိုမဲကြီး၊ ကိုဝင်းထွန်းနိုင်(ခ)ကိုခေါလေး တို့ပါဝင်တဲ့ နိုင်ငံရေး အကျဉ်းသား ၈ ဦးကို ဇန်နဝါရီလ ၅ ရက်နေ့ည ၁၁ နာရီခင်္န့မှာ အကျဉ်းထောင်အချုပ်ဆောင်ထဲကနေ ဆွဲခေါ်ထုတ်သွားပြီး နာရီပေါင်းများစွာ ရိုက်နှက်ညှဉ်းပန်းနှိပ်စက်မှုတွေ ပြုလုပ်ခဲ့ကြောင်း ပုသိမ်ထောင်နဲ့နီးစပ်တဲ့ သတင်းရင်းမြစ်တွေဆီက သိရပါတယ်။
"ကိုမဲကြီးတို့၊ ကိုခေါလေးတို့ပါတဲ့ ၈ ယောက်ကို ညဘက်ကြီး အချုပ်ဆောင်ထဲက ဆွဲထုတ်သွားပြီး ထောင်ညွှန်မှူးနဲ့ ထောင်ပိုင်အဖွဲ့က နာရီပေါင်းများစွာ တညလုံး ရိုက်နှက်နှိပ်စက်တယ်။ မိုးလင်းတော့မှ ကိုခေါလေးအပါအဝင် ၇ ယောက်ကို အချုပ်ဆောင်ထဲ ပြန်မပို့ဘဲ တိုက်ပိတ်ပစ်ခဲ့တယ်။ ပြန်ရောက်လာတဲ့ ၇ ယောက်က မတရားအရိုက်ခံထားရလို့ သွားတွေကျွတ်ထွက်တဲ့လူကထွက်၊ သွေးအန်တဲ့လူကအန်နဲ့ ရေတောင် မသောက်နိုင်ကြဘူး"လို့ ပုသိမ်ထောင်နဲ့နီးစပ်တဲ့ သတင်းရင်းမြစ်တစ်ဦးက ဧရာ၀တီတိုင်းမ်ကို ပြောပါတယ်။
ထောင်တာဝန်ရှိသူတွေက နိုင်/ကျဉ်း ၇ ဦးကို တိုက်ပိတ်ခဲ့ပြီး ကိုမဲကြီးကတော့ အချုပ်ဆောင်ထဲလည်း ပြန်ရောက်မလာသလို၊ တိုက်ပိတ်တဲ့အထဲလည်း မပါဝင်ဘဲ ပျောက်ဆုံးနေခဲ့ပါတယ်။ ဒါကြောင့် နိုင်ငံရေးအကျဉ်းသား ၆၀ ခန့်က ဇန်နဝါရီ ၆ ရက် မနက် ၉ နာရီခန့်မှာ ထောင်တာဝန်ရှိသူတွေထံ ကိုမဲကြီးကို ပြန်ထုတ်ပေးဖို့နဲ့ တိုက်ပိတ်ထားသူတွေကို ပြန်လွှတ်ပေးဖို့ အေးချမ်းစွာ တောင်းဆိုခဲ့ကြပါတယ်။
"နိုင်/ကျဉ်းတွေက မဲကြီးကို ပြန်လွှတ်ပေးဖို့ အေးအေးဆေးဆေးပဲ တောင်းဆိုတာ။ အဲ့အချိန်မှာ နိုင်ကျဉ်းတယောက်က အမှိုက်သွန်တာကို ထောင်ဝါဒါက ပလိန်းကြီး အဲ့နိုင်ကျဉ်းကို နံပါတ်တုတ်နဲ့ ၂ ချက် ရိုက်တယ်။ အဓိကက ပွဲဆူအောင်လုပ်တာ။ အဲ့အချိန် နိုင်ကျဉ်းတွေက ထအော်တော့ အဲ့မှာထောင်စဆူတာ"လို့ ပုသိမ်ထောင်နဲ့နီးစပ်သူက ဆိုပါတယ်။
ထောင်ဆူတဲ့အချိန်မှာ ပုသိမ်ထောင်တာဝန်ရှိသူတွေက ထောင်ထဲမှာရှိတဲ့ စစ်ပြေး၊ ရဲပြေးတွေနဲ့ ဖွဲ့စည်းထားတဲ့ အကျဉ်းသား ၂၀ ခန့်ရှိတဲ့အဖွဲ့ဟာ ခေါင်းမှာအဝတ်နက်တွေစွတ်ပြီး တုတ်ကိုယ်စီကိုင်ကာ အချုပ်ဆောင်ထဲ ရောက်ရှိလာပြီး အချုပ်ဆောင် စင်္ကြန်တလျှောက် နေရာယူခဲ့ကြတယ်လို့ ဇန်နဝါရီ ၆ ရက် မနက်ပိုင်းဖြစ်စဉ်ကို သိရှိထားသူ ပုသိမ်မြို့ခံတစ်ဦးက ပြောပြပါတယ်။
"စစ်ပြေးရဲပြေးအဖွဲ့က ခေါးစွပ်တွေစွတ်ထားတယ်။ တုတ်တွေကိုင်ထားပြီး အချုပ်ဆောင်စင်္ကြန်မှာ နေရာယူတယ်။ အဲ့အချိန် အချုပ်ခန်းထဲက နိုင်ကျဉ်းတွေနဲ့ အဲ့စစ်ပြေးရဲပြေးအဖွဲ့တွေ စကားများကြတယ်။ မကြာဘူး ရဲတွေ အင်အား ၅၀ လောက် ထောင်ထဲ ဝင်လာပြီး နိုင်ကျဉ်းတွေကို သေနတ်နဲ့ ပစ်တယ်။ အဲ့မှာ ၀ရုန်းသုန်းကားတွေဖြစ်ကုန်တယ်။ နောက်တော့ ထောင်ဆူပူမှုမှာပါတယ်လို့ သံသယရှိတဲ့ နိုင်ကျဉ်းတွေကို တယောက်ပြီး တယောက် အချုပ်ဆောင် အခန်းထဲက ဆွဲထုတ်ပြီး ထောင်ကဖွဲ့ထားတဲ့ ခေါင်းစွပ်အဖွဲ့ရော ရဲတွေကရော ဝိုင်းရိုက်တာ"လို့ ပုသိမ်ဒေသခံက ပြောပြပါတယ်။
ပုသိမ်ထောင်မှ နိုင်ငံရေးအကျဉ်းသား ၆၀ ခန့်ကို ရဲတွေနဲ့ ထောင်က ဖွဲ့စည်းထားတဲ့ ခေါင်းစွပ်အမည်းနဲ့အဖွဲ့က လက်ပြန်ကြိုးတုပ်ပြီး ရိုက်နှက်ခဲ့တဲ့အတွက် နိုင်ငံရေးအကျဉ်းသားတချို့တွေ ခြေကျိုး၊ လက်ကျိုး၊ ခါးရိုးကျိုးတဲ့ ဒဏ်ရာတွေ ပြင်းထန်စွာရရှိခဲ့တယ်လို့ ပုသိမ်မြို့နယ်၊ ပြည်သူ့ကာကွယ်ရေးတပ်ဖွဲ့ - ပကဖကလည်း ထုတ်ပြန်ပါတယ်။
ညနေ ၅ နာရီ ၂၀ ခန့်အချိန်မှာ ဒဏ်ရာပြင်းထန်စွာရရှိထားတဲ့ နိုင်ငံရေးအကျဉ်းသားတွေကို စစ်ကောင်စီက အသစ် ဆောက်လုပ်ထားတဲ့ ပုသိမ်က ၉ ထပ်ဆေးရုံသစ်ကို ပို့ဆောင်ကာ ဆေးကုသမှု ပေးခဲ့တယ်လို့ သိရပါတယ်။
စစ်ကောင်စီဘက်က ထုတ်ပြန်ချက်မှာတော့ ထောင်ကျအကျဉ်းသား ၁ ဦးဆီက Keypad ဖုန်းတစ်လုံး တွေ့ရှိခဲ့ကြောင်း၊ ယင်းဖြစ်စဉ်ကို စစ်ဆေးအရေးယူဖို့ ဆောင်ရွက်တာကို မကျေနပ်လို့ ထောင်သားတွေ ဆူပူကြတာဖြစ်ပြီး ထောင်တာဝန် ရှိသူများနှင့် ရဲတပ်ဖွဲ့က ဖြောင်းဖျပေမယ့် အကျဉ်းသားများက မလိုက်နာဘဲ အကျဉ်းသားတွေက ထောင်အဆောက် အဦးကို ဖျက်ဆီးခြင်း၊ အုတ်နီခဲ၊ အင်္ဂတေအကျိုးများ၊ သစ်သားချောင်းများနဲ့ လုံခြုံရေးတပ်ဖွဲ့ဝင်များအား ပစ်ပေါက် တိုက်ခိုက်ခဲ့တယ်လို့ ထုတ်ပြန်ပါတယ်။
အကျဉ်းသားတွေက အခုလို လုံခြုံရေးတပ်ဖွဲ့ဝင်တွေကို တိုက်ခိုက်လာတဲ့အတွက် ရဲတပ်ဖွဲ့အနေနဲ့ အဓိကရုဏ်း နှိမ်နင်းရေးလက်နက်များနဲ့ ခြောက်လှန့်ပစ်ခတ်ခြင်း၊ တုတ်/ဒိုင်းများ အသုံးပြု ဖြိုခွင်းခြင်းများ ပြုလုပ်ခဲ့ကြောင်း၊ အဓိကရုဏ်းဖြစ်နေစဉ် အကျဉ်းသားအချင်းချင်း ရန်ဖြစ်ရိုက်နှက်၍ အကျဉ်းသား ၁ ဦး သေဆုံးခြင်းဖြစ်ကြောင်း၊ အကျဉ်းသားသေဆုံးမှုမှာ ၎င်းတို့လက်ချက်မဟုတ်ကြောင်း ထုတ်ပြန်ချက်မှာ ဖော်ပြထားပါတယ်။
"သူတို့ထုတ်ပြန်ချက်မှာပါတဲ့ အဓိကရုဏ်းဖြစ်နေတုန်း အကျဉ်းသားအချင်းချင်း ရန်ဖြစ်ရိုက်နှက်တယ်ဆိုတာ အဲဒါ သူတို့ခိုင်းထားတဲ့ ခေါင်းစွပ် အမည်းနဲ့ စစ်ပြေးရဲပြေးအဖွဲ့က နိုင်/ကျဉ်းတွေကို ဝိုင်းရိုက်တာကို ပြောတာ။ ဒီလောက် အဓိကရုဏ်းဖြစ်နေချိန် ဘယ်လိုလုပ်ပြီး အကျဉ်းသားအချင်းချင်း ရန်ဖြစ်ဖို့အချိန်ရှိမလဲ၊ နိုင်ငံရေးအကျဉ်းသားတွေက သူတို့ (ရဲတွေ) ကို ပြန်တိုက်ခိုက်ရအောင် စတီးဇွန်းတောင် ထောင်ထဲယူလို့မရတဲ့ဟာကို ဘာနဲ့ တိုက်ခိုက်မှာလဲ။ သူတို့ စိတ်တိုင်းကျ ရိုက်နှက်ပြီး လူသေတော့မှ အပြစ်လွတ်အောင် ဗြောင်လိမ်တဲ့ကောင်တွေ"လို့ ပုသိမ်ထောင်နဲ့နီးစပ်တဲ့ သတင်းရင်းမြစ်က ပြောပါတယ်။
ပုသိမ်ထောင် အဓိကရုဏ်းဖြစ်စဉ်အတွင်း ချောင်းသာဒေသခံ PDF တပ်ဖွဲ့ဝင်ဟောင်း တစ်ဦးဖြစ်တဲ့ ကိုဝေယံဖြိုး(ခ)ရာစု (အသက် ၃၅ နှစ်) ဟာ ဇန်နဝါရီလ ၆ ရက် ညပိုင်းမှာ ကွယ်လွန်သွားခဲ့ပါတယ်။ သေဆုံးသူ ကိုဝေယံဖြိုးဟာ သေနတ် ဒဏ်ရာနဲ့ သေဆုံးခဲ့တာဖြစ်တယ်လို့ မြို့ခံတွေရော၊ ပုသိမ် ပကဖအဖွဲ့ကပါ ပြောဆိုပါတယ်။ စစ်ကောင်စီဘက်ကတော့ နိုင်ငံရေးအကျဉ်းသား ကိုဝေယံဖြိုးသေဆုံးမှုအပေါ် တစုံတရာ ထုတ်ပြန်ခြင်း မရှိပါဘူး။
အခြားသော ဒဏ်ရာပြင်းထန်တဲ့ နိုင်ငံရေးအကျဉ်းသား ၁၃ ဦးဟာ ပုသိမ်မြို့ ၉ ထပ်ဆေးရုံကြီးမှာ အတွင်းလူနာအဖြစ် ဆေးကုသမှုခံယူနေရဆဲဖြစ်ပြီး အဆိုပါလူနာများထဲမှ ၄ ဦးမှာ အသက်အန္တရာယ်စိုးရိမ်ရကြောင်း သိရပါတယ်။
"ပုသိမ်ထောင်မှာ ရိုက်နှက်နှိပ်စက်ခံရတဲ့ နိုင်ငံရေးအကျဉ်းသား ၆၀ လောက်မှာ အများစုက အကြမ်းဖက်ပုဒ်မနဲ့ ထောင်ချ၊ တရားစွဲခံထားရတဲ့ PDF တပ်ဖွဲ့ဝင်ဟောင်းတွေလို့ သိရတယ်။ ဒဏ်ရာရသူတွေကို ပုသိမ်က ၉ ထပ်ဆေးရုံကြီးကိုပို့တော့ ဆေးရုံက အရပ်သားလူနာစောင့်တွေနဲ့ အောက်ခြေဝန်ထမ်းတွေကို နှင်ထုတ်ပြီးတော့ ပုသိမ်ဆေးရုံကြီးမှာ လုံခြုံရေးအပြည့် ချထားတာ"လို့ ပုသိမ်ဆေးရုံကြီးနဲ့နီးစပ်တဲ့မြို့ခံတစ်ဦးက ပြောပါတယ်။
ပုသိမ်ထောင်မှာ အဓိကရုဏ်းဖြစ်ပွားပြီးတဲ့နောက် ခေါင်း၊ ခြေထောက်၊ လက်တွေနဲ့ တကိုယ်လုံးပတ်တီးစည်းထားတဲ့ နိုင်ငံရေးအကျဉ်းသားတွေကို မြင်တွေ့ရပြီး ဇန်နဝါရီလ ၆ ရက် ညပိုင်းမှာလည်း ထမင်းမကျွေးဘဲ အငတ်ထားခဲ့တယ်လို့ စုံစမ်းသိရှိရပါတယ်။
"အဓိကရုဏ်းဖြစ်စဉ်မှာပါတဲ့ နိုင်ငံရေးအကျဉ်းသားတွေကို မနေ့ညပိုင်းက ထမင်းမကျွေးဘဲ အငတ်ထားခဲ့တယ်။ ပြီးတော့ ဖြစ်စဉ်မှာပါသူ အကုန်လုံးကို ထောင်အာဏာပိုင်တွေက ကတုံးတုံးပစ်တယ်။ ပြီးတော့ ည ၁ နာရီထိုးတဲ့အထိ နိုင်/ကျဉ်းတွေကို စစ်ဆေးတာတွေလုပ်တယ်။ အခုဆို ထောင်ဝင်စာပို့တာကိုလည်း ပိတ်ထားတယ်"လို့ ပုသိမ်ထောင်ကို ထောင်ဝင်စာပေးပို့နေသူ နိုင်/ကျဉ်းမိသားစုဝင်တစ်ဦးက ပြောပါတယ်။
ပုသိမ်ထောင်မှာ အဓိကရုဏ်းတွေ ဖြစ်ပွားနေချိန်မှာရော၊ အဓိကရုဏ်းဖြစ်ပြီးတဲ့နောက်မှာရော ထောင်တာဝန်ရှိသူတွေ ဇန်နဝါရီလ ၅ ရက်နေ့ညကတည်းက ခေါ်ယူနှိပ်စက်ခဲ့တဲ့ နိုင်င့ရေးအကျဉ်းသား ကို၀င်းမင်းထက် (ခ) ကိုမဲကြီးရဲ့သတင်းက ပျောက်ဆုံးနေဆဲ ဖြစ်ပါတယ်။
"ကိုမဲကြီးသတင်းက အစအန ပျောက်တယ်။ ပုသိမ်ထောင် အချုပ်ဆောင်မှာရော တိုက်ပိတ်အခန်းမှာရော မရှိဘူး။ ပုသိမ်ဆေးရုံမှာ ကုသမှုခံနေလားဆိုတာလည်း ဘယ်သူမှ မသိဘူး။ ကိုမဲကြီးမိသားစုကလည်း သူတို့ကို ဘာမှ အကြောင်းကြားလာတာ မရှိဘူးပြောတယ်။ ပြီးတော့ ဒီနေ့မနက်ပိုင်းမှာ လူနာတင်ကားတစ်စီး ထောင်ထဲဝင်သွားပြီး တောင်ပေါ် နတခ (အနောက်တောင်တိုင်း စစ်ဌာနချုပ်) ဘက်ကို ပြန်မောင်းသွားတာ တွေ့လိုက်တယ်လို့ ပြောကြတယ်။ အဲတော့ အကုန်လုံးက မဲကြီးအတွက် စိတ်ပူနေကြတယ်"လို့ နိုင်ငံရေးအကျဉ်းသား ကိုမဲကြီးရဲ့မိသားစုနဲ့ နီးစပ်သူတစ်ဦးက ပြောပါတယ်။
ဧရာ၀တီတိုင်းမ်သတင်းဌာနအနေဖြင့် ကိုဝေယံဖြိုး(ခ)ရာစု သေဆုံးမှုကိုသာ အတည်ပြုနိုင်သေးပြီး နိုင်ငံရေး အကျဉ်းသား ကိုဝင်းမင်းထက်(ခ) ကိုမဲကြီးရဲ့အခြေအနေကို စုံစမ်းနေဆဲဖြစ်ပါတယ်။
ဒီကနေ့ နေ့လည်ပိုင်းအချိန်အထိ ရရှိတဲ့သတင်းတွေအရ စစ်ကောင်စီက သေဆုံးသူ ကိုဝေယံဖြိုးရဲ့အလောင်းကို မိသားစုထံ ပြန်မပေးတဲ့အပြင် အလောင်းကိုပါ ကြည့်ခွင့်မပေးဘဲ ၎င်းတို့အစီအစဉ်နဲ့ သဂြိုလ်ဖို့ ပြင်ဆင်နေတယ်လို့ သိရပါတယ်။
“ဒီနေ့လည်ပိုင်းအထိကို တွေ့ခွင့်မရသေးတာပါ၊ တစ်ခါထဲ သဂြိုလ်မယ်လို့လည်းပြောတယ်။ အလောင်းက ဆေးရုံမှာလိုလို ထောင်မှာလိုလိုလုပ်နေတယ်။ မိသားစုဝင်တွေကလည်းစောင့်နေတုန်းပါ”လို့ မိသားစုဝင်တွေနဲ့ နီးစပ်သူတစ်ဦးက ပြောပါတယ်။
နိုင်ငံရေးအကျဉ်းသားတွေကို ရက်စက်စွာ ရိုက်နှက်ညှဉ်းပန်းနှိပ်စက်သတ်ဖြတ်ခဲ့တဲ့ ပုသိမ်ထောင် အဓိကရုဏ်းဖြစ်စဉ်မှာ ထောင်ပိုင် နေမင်းထက်၊ ပုသိမ်မြို့မစခန်းမှူး ဒုရဲမှူး မြင့်အောင်နဲ့ ပုသိမ်နယ်မြေစခန်းမှူး ရဲအုပ်ကျော်စိုးတို့ ဦးဆောင် အကြမ်းဖက်ခဲ့တာဖြစ်တယ်လို့ ပုသိမ်မြို့နယ် ပကဖအဖွဲ့က ထုတ်ပြန်ပါတယ်။
ပုသိမ်ထောင်ဖြစ်စဉ်ဟာ စစ်ကောင်စီအနေနဲ့ နိုင်ငံရေးအကျဉ်းသားတွေကို ရည်ရွယ်ချက်ရှိရှိ နှိပ်စက်ညှဉ်းဆဲ သတ်ဖြတ်တဲ့ လူသတ်မှုဖြစ်ကြောင်းနဲ့ ယခုလုပ်ရပ်အတွက် ပြန်လည်ပေးဆပ်ရမယ်လို့ ဧရာ၀တီတိုင်းရှိ တော်လှန်ရေး အင်အားစုများက ပြောဆိုပါတယ်။
"ဒါဟာ စစ်ကောင်စီက နိုင်ငံရေးအကျဉ်းသားတွေကို ရည်ရွယ်ချက်ရှိရှိကို နှိပ်စက်ညှဉ်းဆဲသတ်ဖြတ်တဲ့လုပ်ရပ် ဖြစ်တယ်။ ဘယ်ခေတ်အဆက်ဆက်မှာမှ အကျဉ်းထောင်ထဲမှာ လူသေမှုဖြစ်တဲ့အထိ ရိုက်နှက်ခဲ့တဲ့သမိုင်း မရှိပါဘူး။ ဒါဟာ အရမ်း ဆိုးရွားတဲ့သမိုင်းပါ။ အဲဒီအတွက် သူတို့တန်ရာတန်ကြေး ပြန်လည်ပေးဆပ်ရလိမ့်မယ်"လို့ ဧရာ၀တီစစ်ဒေသကွပ်ကဲရေး ကော်မတီအဖွဲ့ဝင် ဗိုလ်နေလက ပြောပါတယ်။
