ဖျက်သိမ်းခံထားရသည့် နှင်းဆီပါတီကို ပြည်ထောင်စုဒီမိုကရေစီပါတီအဖြစ် အမည်ပြောင်းလဲ၍ မှတ်ပုံတင်ရန် ပြင်ဆင်နေ
Author ကိုပေါက်
CategoriesPublished on Feb 07, 2023
နှင်းဆီပါတီဟု လူသိများသည့် ညီညွတ်သောဒီမိုကရက်တစ်ပါတီ(UDP)ကို ပြည်ထောင်စုဒီမိုကရေစီပါတီ (Union Democracy Party)ဟု အမည်ပြောင်းကာ ပြည်ထောင်စုအဆင့်ပါတီ အနေဖြင့် ရွေးကောက်ပွဲကော်မရှင်တွင် မှတ်ပုံတင်ရန် ပြင်ဆင်နေသည်ဟု နိူင်ငံရေးပါတီအချို့ထံမှ သိရသည်။
စစ်ကောင်စီသည် ယခုနှစ် ဇန်နဝါရီ ၂၆ ရက်က နိူင်ငံရေးပါတီများ မှတ်ပုံတင်ခြင်း ဥပဒေအသစ် ပြဌာန်းလိုက်ပြီးနောက် ပါတီဝင်ဦးရေ သိန်းနှင့်ချီရှိသည့် ဖျက်သိမ်းခံထားရသည့် နှင်းဆီပါတီမှ ပါတီအသစ် ပြန်လည်ဖွဲ့စည်းရန် ပြင်ဆင်နေတာဖြစ်သည်ဟု ကြံ့ခိုင်ရေးပါတီဝင်တစ်ဦးက CJ Platform ကိုပြောသည်။
“နှင်းဆီပါတီမှာ ရင်းနှီးတဲ့မိတ်ဆွေတွေရှိတယ် သူတို့ပါတီကို ပြန်အသက်သွင်းမယ်ပေါ့ ပါတီကို အခြားနာမည်နဲ့ ပြန်လျှောက်မယ်ပေါ့”ဟု ပြောသည်။
၂၀၂၀ ရွေးကောက်ပွဲတွင် NLD ပါတီပြီးလျှင် ကိုယ်စားလှယ်အများဆုံးဖြင့် ဝင်ရောက် ယှဥ်ပြိုင်ရန် ပြင်ဆင်ခဲ့သည့် ပါတီမှာ နှင်းဆီပါတီဖြစ်ပြီး ကိုယ်စားလှယ်ဦးရေ ၁၁၃၁ ဦးရှိသည့်အတွက် အမှန်တကယ် မှတ်ပုံတင်ခွင့်ရရှိပါက ကြံ့ခိုင်ရေးပါတီနှင့်အပြိုင် ပါတီတစ်ခုဖြစ်လာနိူင်သည်ဟု နိူင်ငံရေးလေ့လာသူတစ်ဦးက သုံးသပ်သည်။
နှင်းဆီပါတီဥက္ကဌ ဦးကျော်မြင့်ကို ထောင်ပြေးမှုဖြင့် ၂၀၂၀ခုနှစ် စက်တင်ဘာ ၃၀ ရက် ညပိုင်းက လှိုင်သာယာမြို့နယ် ပန်းလှိုင်အိမ်ရာတွင် ရဲတပ်ဖွဲ့က ဖမ်းဆီးခဲ့ပြီး မန္တလေးဗဟိုအကျဥ်းထောင်သို့ ပို့ဆောင်ခဲ့သည်။
၂၀၂၀ ခုနှစ် နိုဝင်ဘာလ ၂၂ ရက်နေ့တွင် ချမ်းအေးသာစံမြို့နယ်တရားရုံးမှ ထောင်ပြေးမှုပုဒ်မဖြင့် ထောင်ဒဏ် ၁၁ နှစ် အမိန့်ချမှတ်ကာ အင်းစိန်အကျဥ်းထောင်သို့ ပြန်လည်ပို့ဆောင်ခဲ့သည်။
အင်းစိန်အကျဥ်းထောင်ရှိ အထူးတရားရုံးမှ ၂၀၂၂ ခုနှစ် ဒီဇင်ဘာလ ၆ ရက်တွင် ငွေရေးကြေးရေးအဖွဲ့အစည်းများဥပဒေ ပုဒ်မ ၈၂ ၊ ပုဒ်မ ၁၇၁ တို့ဖြင့် ထောင်ဒဏ်ခြောက်နှစ်နှင့် ငွေဒဏ် တစ်သိန်းချမှတ်ခဲ့သည်ဟု တရားရုံးနှင့် နီးစပ်သူတစ်ဦးက ပြောသည်။
“အမိန့်ချတော့ ပထမထင်တာ စစ်ကောင်စီ ၂ နှစ်ပြည့်မှာ လွှတ်ပေးမယ်ထင်တာ မလွတ်ဘူး လဝကဥပဒေပုဒ်မ ၃
(၁)ရယ် ငွေကြေးခဝါချမှု တိုက်ဖျက်ရေးဥပဒေ ပုဒ်မ ၄၃ နှစ်မှုကျန်သေးတယ် “ဟု ပြောသည်။
လက်တလောတွင် ပါတီဥက္ကဌဦးကျော်မြင့်အား အင်းစိန်အကျဥ်းထောင်တွင် လှိုင်သာယာမြို့နယ်ရဲတပ်မှူးမှ တရားလိုပြုလုပ်၍ တရားစွဲဆိုထားသည့် လဝကဥပဒေပုဒ်မ ၃ (၁)နှင့် ငွေကြေးခဝါချမှုတိုက်ဖျက်ရေးဥပဒေ ပုဒ်မ ၄၃ တို့ကို ထပ်မံရင်ဆိုင်နေရသည်။
မန္တလေးဗဟိုအကျဥ်းထောင်မှ ၁၉၉၉ ခုနှစ်ထွက်ပြေးခဲ့သည့် ဦးကျော်မြင့်သည် ညီညွတ်သော ဒီမိုကရက်တစ်ပါတီ (UDP)ကို ဦးဆောင်ကာ ၂၀၁၀ ခုနှစ်တွင် ပြည်ထောင်စုရွေးကောက်ပွဲကော်မရှင်တွင် မှတ်ပုံတင်ခဲ့သည်။
နှင်းဆီပါတီသည်၂၀၁၂ ကြားဖြတ်ရွေးကောက်ပွဲ၊၂၀၁၅ ရွေးကောက်ပွဲ၊၂၀၂၀ ရွေးကောက်ပွဲတွင် ဝင်ရောက် ယှဥ်ပြိုင်ခဲ့ရာ အနိူင်ရရှိခြင်းမရှိပေ။
နှင်းဆီပါတီသည် ၂၀၂၀ရွေးကောက်ပွဲတွင် မြို့အများစုတွင် ဝင်ရောက်ယှဉ်ပြိုင်နိုင်ရန် ကိုယ်စားလှယ်လောင်းများအား အခကြေးငွေပေးကာ ငှါးရမ်းခြင်း၊ ဆိုင်ကယ်ပြင်မှအစ ဘိလိယက်ခုံများတွင်ပါ ပါတီရုံးခန်းအဖြစ် ငှါးရမ်းဖွင့်လှစ်ခြင်းများကို လုပ်ဆောင်ခဲ့သည့် ပါတီတစ်ခုဖြစ်သည်။
ပရိသတ်တွေ စိတ်တိုတာခံနေရတဲ့ မင်းသားမြင့်မြတ်
Shwe S N | February 4, 2023 | Celebrity |
BGF ခေါင်းဆောင် စောချစ်သူ၏ လက်ရုံးဟု လူသိများသည့် ဗိုလ်မှူးနိုင်မောင်ဇော်က မြင့်မြတ်နှင့် တွဲရိုက်ထားသည့် ဓာတ်ပုံကို လူမှုကွန်ရက်၌ တင်ထားသည်။ နယ်ခြားစောင့်တပ်ဖွဲ့ (BGF)မှာ အကြမ်းဖက်စစ်ကောင်စီတပ် သြဇာခံသောအဖွဲ့များဖြစ်သည်။
Facebook လူမှုကွန်ရက်ကို မြစ်သံလွင်အမည်ဖြင့် အသုံးပြုနေသည့် နိုင်မောင်ဇော်က မြင့်မြတ်၊Kညီတို့နှင့်တွဲရိုက်ထားသည့် ဓာတ်ပုံကို တင်ကာ ” Dinner အတွက်ကျေးဇူးပါ ညီလေး” ဟု ရေးထားသည်။ညစာစားပွဲတွင် ဟင်းအမယ်စုံနှင့်အကြမ်း
ဖက်စစ်တပ်ထုတ်မြန်မာဘီယာပုလင်းများနှင့်အတူ ပြုံးရွှင့်ကြစားသောက်နေကြသည်ကိုတွေ့ရသည်။
ထိုအပြင်အဆိုပါညစာစားပွဲတွင်မော်တော်ဆိုင်ကယ်နှင့်ကားများတင်သွင်းရောင်းချနေသော Easy Rider Moterbike ကုမ္ပဏီနှင့် Naga Lady Auto Mobile ပိုင်ရှင် တင်ကျော်နန္ဒ လည်းပါဝင်သည်ကိုတွေ့ရသည်။ Easy Rider သည် မြန်မာ-ထိုင်းနယ်စပ်မှတစ်ဆင့် စစ်ကောင်စီနှင့် BGF များကိုဆက်ကြေးပေးကာ ဆိုင်ကယ်တင်သွင်းနေသောလုပ်ငန်းဖြစ်ကြောင်းနယ်စပ်မှလုပ်ငန်းရှင်တစ်ဦးက ပြောသည်။
မြင့်မြတ်သည် စစ်အာဏာသိမ်းမှုနှင့်ပတ်သက်၍ နေတိုး၊ စိုင်းစိုင်းခမ်းလှိုင်တို့ကဲ့သို့ နှုတ်ဆိတ်နေပြီး ရုပ်ရှင်ကြည့်ပရိတ်သတ်များ၏ ပြစ်တင်ဝေဖန်ခံနေရသည်။ထို့အပြင် မြင့်မြတ်သည်စစ်ကောင်စီအမာခံထောက်ခံသူ အဆိုတော်ယုန်လေးနှင့် ရင်းနှီးသော မိတ်ဆွေဖြစ်သလို ၊ အာဏာသိမ်းခေါင်းဆောင်မင်းအောင်လှိုင် ၏သမီး ခင်သီရိသက်မွန် အဓိကပိုင်ဆိုင် 7th Sense ရုပ်ရှင်ထုတ်လုပ်ရေးနှင့်စာချုပ်ချုပ်ဆိုထားသော အဓိကမင်းသားဖြစ်သည်။
စစ်ဒေသအလိုက်လွတ်မြောက်နယ်မြေဖော်ထုတ်ပြီးတစ်နိုင်ငံလုံးလွတ်မြောက်ရေးဆောင်ရွက်ရန်စီမံထား NUG ကာကွယ်ရေးဝန်ကြီး အသိပေး
-သက်ဝေ/People’s Spring
စစ်အာဏာရှင် တိုက်ဖျက်ရေး တစ်နှစ်တာ အစီအစဉ်အတိုင်း ဆက်လက် အကောင်အထည်ဖော်သွားမည်ဖြစ်ပြီး စစ်ဒေသအလိုက်လွတ်မြောက်ရေး၊ ထိုမှတဆင့် တစ်နိုင်ငံလုံးအတိုင်းအတာ လွတ်မြောက်ရေးကို ဆောင်ရွက်ရန် စီမံချက်ချထားကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီး ဦးရည်မွန်က ပြောသည်။
ကမ္ဘာတစ်ဝန်းရောက်နေသောမြန်မာပြည်သူ များနှင့် အမျိုးသားညီညွတမရေးအစိုးရ(NUG)မှတာဝန်ရှိသူများဖေဖော်ဝါရီ ၅ ရက်တွင် အွန်လိုင်းမှတွေ့ဆုံ၍ မေးမြန်းဖြေကြားကြသော Myanmar Global Town Hall 2023 "ပြည်သူ့ခုခံတော်လှန်စစ် မေးကြမယ် ဖြေကြမယ် အစီအစဉ်" အစီအစဥ်၌ ဝန်ကြီးက ထိုသို့ ပြောကြားခြင်းဖြစ်သည်။
ယခု ရက်ပိုင်း စစ်ကောင်စီက သက်တမ်း ၆လထပ်မံ တိုးမြှင့်ခြင်း၊ မြို့နယ် ၃၇ခုကို စစ်အုပ်ချုပ်ရေး ကြေညာခြင်းတို့ ပြုလုပ်ခဲ့ရာ ယင်းလုပ်ရပ်များသည် စစ်ကောင်စီ ထိန်းချုပ်နိုင်စွမ်းများစွာ အားနည်းနေသည်ကို ပြသနေခြင်းဖြစ်ကြောင်း ကာကွယ်ရေးဝန်ကြီးက ပြောသည်။တော်လှန်ရေးအင်အားစုများက ရှေ့တွင် တစ်နှစ်စီမံချက်ကို အစီအစဉ်တိုင်း ပိုမိုဆောင်ရွက်မည်ဖြစ်သည်ဟုအသိပေးသည်။
“ဖြစ်လာရင် ပိုပြီးတော့မှ စစ်ကောင်စီကို အထိနာအောင် ဆောင်ရွက်နိုင်လိမ့်မယ်။ ဒီအထဲမှာ စစ်ဒေသအလိုက် လွတ်မြောက်နယ်မြေလို့ ပြောနိုင်တဲ့ ဒေသတွေ ဖော်ထုတ်ရေး ဆိုတာကလည်း အရေးကြီးတဲ့ ရည်မှန်းချက်တွေဖြစ်မယ်။ ဒီအတွက်လည်းအရေးကြီးတဲ့အကောင်အထည်ဖော်မှုတွေ အခုကတည်းက စတင်ဆောင်ရွက်နေတာဖြစ်ပြီ” ဟုကာကွယ်ရေးဝန်ကြီး ဦးရည်မွန်က ပြောသည်။
တစ်ချိန်တည်း၌ပင် တစ်နှစ်စီမံချက်အရ ယခုနှစ်အတွင်း မည်သူနိုင်မည် မည်သူရှုံးဆိုသည့် သေချာသည့် အဆင့်တစ်ခု ဖြစ်ပေါ်လာမည်ဟုလည်းဆက်ပြောသည်။
“ဒီအဆင့်တစ်ခုကို သေသေချာချာ ဖော်ပြပြီးတော့ဒေသအလိုက်သာမကဘဲ တစ်နိုင်ငံလုံးအတိုင်းအတာနဲ့လွတ်မြောက်ရေးကိုလည်း ဆက်တိုက် စီမံချက်ချပြီး အကောင်အထည်ဖော်နေတာဖြစ်ပါတယ်” ဟုဦးရည်မွန်ကဆိုသည်။
နိုင်ငံတကာကစစ်ကောင်စီအနေဖြင့် အာဏာသိမ်း ၂ နှစ်တာကာလအခြေအနေတွင် နိုင်ငံကို ထိန်းချုပ်နိုင်စွမ်းမရှိတော့သည်ကိုလက်ခံလာကြောင်း ဝန်ကြီးကဆက်ပြောသည်။
ဖေဖော်ဝါရီ ၁ရက်က နိုင်ငံတစ်နိုင်ငံမှ တာဝန်ရှိသူတစ်ဦးနှင့် ဆွေးနွေးရာတွင် မြန်မာပြည်သူများ၏ စိတ်အားဓာတ်သန်မှု၊ ညီညွတ်မှုကို သတိပြုမိကြောင်း ထုတ်ဖော်ဆွေးနွေးလာကြောင်းဝန်ကြီးက ပြောပြသည်။
“ဒါက အင်မတန်အရေးကြီးတဲ့ ဖော်ပြချက်ဖြစ်တယ်ဆိုပြီး သူ့ဘက်က အသိပေးဆွေးနွေးခဲ့တာရှိပါတယ်” ဟု ဝန်ကြီး ဦးရည်မွန်က ပြောသည်။
စစ်ကောင်စီက ၃၇ မြို့နယ်ကို မာရှယ်လောထုတ်ခြင်း၊ စစ်ကောင်စီ သက်တမ်း ခြောက်လတိုးသည့်ကိစ္စတို့သည် နိုင်ငံတကာ၏ အမြင်အပေါ် သက်ရောက်မှု များစွာဖြစ်စေခဲ့သည်ဟု ဆိုသည်။
“စစ်ကောင်စီက နောက်ထပ် ခြောက်လ သက်တမ်းတိုးမယ်လို့ ထုတ်ဖော်ပြောဆိုလာတာသည်ပင်လျင်သူ့အနေနဲ့ဒီနိုင်ငံကို ထိန်းချုပ်နိုင်စွမ်းမရှိတော့ဘူးလို့ ဝန်ခံရာလည်းရောက်နေတယ်လို့ သူကအဲဒီလို သုံးသပ်ပါတယ်” ဟုကာကွယ်ရေးဝန်ကြီးကပြောပြသည်။
စစ်ကောင်စီက ၂၀၂၃ အတွင်း ရွေးကောက်ပွဲတစ်ခုလုပ်မည်ဟု ကြိမ်ဖန်များစွာ ပြောထားသော်လည်းအမှန်တကယ် ရွေးကောက်ပွဲ လုပ်နိုင်မည်လားဆိုသည်ကို နိုင်ငံတကာက စောင့်ကြည့်နေကြသည်ဟုဆိုသည်။
“အခုလို စစ်အာဏာကို ခြောက်လ သက်တမ်းတိုးလိုက်ပြီ ဆိုတဲ့ ကိစ္စက သူရွေးကောက်ပွဲလည်း သူမျှော်မှန်းတဲ့အတိုင်း မလုပ်နိုင်တော့ဘူး ၊ရွေးကောက်ပွဲမလုပ်နိုင်တာကသူ့ရဲနယ်မြေထိန်းချုပ်မှု အင်မတန်အားနည်းနေပြီဆိုတာဖော်ပြတဲ့အချက်ဖြစ်တဲ့အတွက် နိုင်ငံတကာ အနေနဲ့ဒီအပေါ်မှာ အံ့အားသင့်ရတယ်ဆိုပြီး ပြောဆိုတာရှိတယ်။မာရှယ်လောထုတ်ပြန်တဲ့ကိစ္စဟာလည်းတစ်ဖက်မှာ ဪသူ့ရဲ့နယ်မြေထိန်းချုပ်နိုင်စွမ်း အားပျော့နေပြီဆိုတာကို ဝန်ခံရာလည်းရောက်တယ်ဆိုပြီး ဆွေးနွေးချက်လေးတစ်ခုရှိပါတယ်” ဟု ဝန်ကြီး ဦးရည်မွန်က ပြောသည်။
စစ်ကောင်စီကမြို့နယ်၃၇မြို့နယ်ကိုမာရှယ်လောထုတ်သည်ဆိုသော်လည်း တကယ်တန်းတွင် ယခုထက်ပိုမိုသည့် မြို့နယ်များစွာကို မာရှယ်လောထုတ်ရမည့် အခြေအနေဖြစ်ကြောင်း ဝန်ကြီးက ပြောသည်။ ယခု ထုတ်ပြန်ကြေညာခဲ့သည့် မြို့နယ်များသည် တော်လှန်ရေးရဲဘော်များ စိုးမိုးထိန်းချုပ်ထားသည့် မြို့နယ် ဒေသများဖြစ်နေပြီဖြစ်ကြောင်း ၎င်းကဆိုသည်။
“ဒီမြို့နယ်တွေဆိုရင် စစ်ကောင်စီက သူ့တပ်ရှိတယ်ဆိုရင် တပ်ထဲက အပြင်တောင်မှ ထွက်ရဲတဲ့ မြို့နယ်တွေမဟုတ်တော့ဘူး” ဟု NUG ကာကွယ်ရေးဝန်ကြီးကပြောသည်။
NUG ၏ ကာကွယ်ရေးဝန်ကြီးဌာနအောက်တွင်း တပ်ရင်းပေါင်း ၃၀၀ ကျော်ဖွဲ့စည်းထားပြီး ၊ပကဖ အဖွဲ့ပေါင်း ၂၀၀ ကျော်ရှိကြောင်း ၊ထိုအပြင် PDF အဖွဲ့များပင်ဆိုနိုင်သော ကရင်နီ ပြီနယ်တွင် တော်လှန်ရေးမဟာမိတ် အဖွဲ့ဖြစ်သောKNDF ကတပ်ရင်း ၂၀ ကျော် ၊ ချင်းပြည်နယ်တွင် လည်း တော်လှန်ရေးမဟာမိတ် CDF တပ်ရင်းပေါင်း ၅၀ ကျော်ရှိနေပြီဖြစ်ကြောင်းလည်း ဝန်ကြီးကပြောသည်။ ထို့အပြင် PDF များကို ခိုလှုံခွင့်ပေးပြီးစစ်ပညာသင်ပေးကာ အဓိက တော်လှန်ရေးမဟာမိတ် တိုင်းရင်းသားလက်နက်ကိုင်အဖွဲ့များဖြစ်သော KIO/KIA ၊ KNU/KNLA ၊KNPP/KA နှင့်CNF/CNA တို့တွင်လည်း နွေဦးကာလတွင် တပ်ဖွဲ့ဝင်အင်အား ယခင်ကထက်ပိုမိုတောင့်တင်းလာကြောင်းသိ့ရသည်။
NUG ကာကွယ်ရေးဝန်ကြီးဌာနနှင့် တိုင်းရင်းသားလက်နက်ကိုင်အဖွဲ့များပူးပေါင်း၍စစ်တိုင်းများအဖြစ် မြောက်ပိုင်းတိုင်း၊တောင်ပိုင်းတိုင်းနှင့် အလယ်ပိုင်းတိုင်း တို့စနစ်တကျဖွဲ့စည်းသည်။ထို့အပြင် စစ်ဒေသမှူးများကို တိုင်းရင်းသားလက်နက်ကိုင်အဖွဲ့ခေါင်းဆောင်များကိုတာဝန်ပေးအပ်ထားပြီး စစ်ဆင်ရေးများကို စနစ်တကျ ဗျူဟာချမှတ်ဆောင်ရွက်နေမှုများကိုလည်း ဝန်ကြီးက အသိပေးပြောကြားခဲ့သည်။
(PDF တပ်ဖွဲ့ဝင်များ ။ ဓါတ်ပုံ-MPDF ၊ NUG)
တရုတ်နိုင်ငံမှာ ဆန္ဒပြသူများ တဦးပြီးတဦး ဖမ်းဆီးခံနေရ၊ ဆိုရှယ်မီဒီယာတွင် အကူအညီတောင်းသည့် ဗီဒီယို ပျံ့နှံ့နေ။
Era’s eye
၂၀၂၃ ခုနှစ်၊ ဇန်နဝါရီ (၁၉) ရက်၊ ဘေဂျင်း။
ပြီးခဲ့သည့်နိုဝင်ဘာလက ဘေဂျင်းတွင် တရုတ်နိုင်ငံ၏ "ဇီးရိုး-ကိုရိုနာ" ပေါ်လစီကို ဆန့်ကျင်သော လူငယ်များက ဆန္ဒပြခဲ့ရာ ဆန္ဒပြခဲ့သူများကို တဦးပြီးတဦး တရုတ်အာဏာပိုင်များက ဖမ်းဆီးနေသည်ဟု စွပ်စွဲထားသည်။ ယင်းကဲ့သို့ ပြောဆိုထားသည့်ဗီဒီယိုသည် အင်တာနက်ပေါ်တွင် ပျံ့နှံ့သွားခဲ့သည်။
၎င်းဗီဒီယိုပိုင်ရှင်သည် ဘေကျင်းမြို့ရှိ ပုဂ္ဂလိကုမ္ပဏီတစ်ခုတွင် အလုပ်လုပ်နေသော အသက် ၂၆ နှစ်အရွယ် အမျိုးသမီး တစ်ဦးဖြစ်ပြီး ယမန်နှစ် နိုဝင်ဘာ ၂၇ ရက်နေ့ ညက ဘေဂျင်းမြို့လယ်တွင် ဖြစ်ပွားခဲ့သည့် ဆန္ဒပြပွဲတွင် ပါဝင်ခဲ့သည်။ အဆိုပါ ဗီဒီယိုသည် ယခု ဇန်နဝါရီလ (၁၈) ရက်နေ့တွင် Twitter နှင့် အခြားမီဒီယာများတွင် ပျံ့နှံ့သွားခဲ့သည်။ အဆိုပါ ဗီဒီယိုတွင် အမျိုးသမီးငယ်တဦးသည် ဆန္ဒပြပွဲတွင် ပါဝင်ခဲ့သည့် သူမ၏ သူငယ်ချင်းလေးယောက် အဖမ်းခံလိုက်ရပြီး မကြာခင် သူမလည်း အဖမ်းဆီးခံရတော့မည် ဖြစ်ကြောင်းနှင့် သူမတို့ကို ပြည်တွင်းနှင့် ပြည်ပမှ အကူအညီပေးကြရန် တောင်းဆိုထားသည့် ဗီဒီယိုဖြစ်သည်။ ကျမရဲ့ ဒီဗီဒီယိုကို အားလုံးက ကြည့်ရတဲ့အခါမှာ ရဲတွေက ငါ့သူငယ်ချင်းတွေနဲ့အတူ ငါ့ကို ခေါ်သွားပြီ” လို့ မှတ်ယူနိုင်ကြောင်း သူကက ပြောခဲ့သည်။ အဆိုပါ ဗီဒီယိုအား သူမ မရှိတော့သည့်အချိန်တွင် ထုတ်ပြန်ပေးရန် သူငယ်ချင်းတစ်ဦးထံ အပ်နှံထားကာ ဒီဇင်ဘာ ၂၄ ရက်နေ့ကတည်းက အဆက်အသွယ်ပြတ်သွားသည်ဟု သူမသူငယ်ချင်းက ပြောသည်။
အမျိုးသမီး၏ ပြောကြားချက်အရ နိုဝင်ဘာ (၂၉) ရက်မှ စတင်ကာ ရဲတပ်ဖွဲ့က ဆန္ဒပြသူများကို တစ်ဦးချင်း ဖမ်းဆီးခဲ့ပြီး ၎င်းတို့ကို စတင် စစ်ဆေးမေးမြန်းခဲ့သည်။ အစောပိုင်းတွင် ၎င်းတို့အား (၂၄) နာရီအကြာတွင် ပြန်လွှတ်ပေးခဲ့သော်လည်း ဒီဇင်ဘာလလယ်ခန့်မှ စတင်ကာ ပြန်လည်ခေါ်ဆောင်သွားသောသူများ ပြန်မလာသေးသည့် ဖြစ်ရပ်များ ဆက်တိုက် ဖြစ်ပွားခဲ့သည်။ စွဲချက်နဲ့ ချုပ်နှောင်ထားတဲ့နေရာကို ထုတ်ဖော်ပြောကြားခြင်း မရှိပါ။
ဗီဒီယိုတွင် တရုတ်အာဏာပိုင်များ၏ ဖမ်းဆီးခြင်းကို ခံခဲ့ရပြီး မည်သည့်နေရာတွင် ရှိနေသည်ကို မသိရသေးသော အမျိုးသမီးများ အပါအဝင် စုစုပေါင်း လူ ၁၃ ဦး၏ အမည်များနှင့် အလုပ်အကိုင်များကို မိတ်ဆက်ပေးထားသည်။ စာရေးဆရာများ၊ အယ်ဒီတာများနှင့် မီဒီယာသမားများလည်း ပါဝင်ပါသည်။
Virtual Private Network (VPN) ကို အသုံးမပြုဘဲ Twitter ကို တရုတ်နိုင်ငံတွင် ကြည့်ရှုနိုင်မည် မဟုတ်ပါ။ အမျိုးသမီး၏ ဗီဒီယိုတွင် အင်္ဂလိပ်စာတန်းထိုး ပါရှိပြီး ဆန္ဒပြသူများ၏ လက်ရှိအခြေအနေနှင့်ပတ်သက်၍ နိုင်ငံတကာအသိုင်းအဝိုင်းကို အကူအညီတောင်းထားသည်။
Source: JIJI
Video Source: Twitter
တရုတ်နိုင်ငံမှာ ဆန္ဒပြသူတွေ တယောက်ပြီးတယောက် ဖမ်းဆီးထိန်းသိမ်းခံနေရတဲ့ လက်ရှိအခြေအနေတွေကို ပြောပြနေတဲ့ အမျိုးသမီးတစ်ဦးရဲ့ ဗီဒီယို https://youtu.be/qw_BFbsT0Wg
ပဲခူးတိုင်းအတွင်း စစ်အုပ်ချုပ်ရေး ကြေညာထားရာ ၅ မြို့နယ်က PDF တွေ လက်နက်အပ်ဖို့ လိုက်ကြေညာ
ပဲခူး၊ ဖေဖော်ဝါရီလ ၇၊ ၂၀၂၃။
စစ်အုပ်ချုပ်ရေးကြေညာထားတဲ့ ပဲခူးတိုင်းဒေသကြီးထဲက ၅ မြို့နယ်မှာ စစ်ကောင်စီက အစစ်ဆေး တင်းကြပ်နေပြီး PDF တွေ လက်နက်အပ်ဖို့ လိုက်ကြေညာနေတယ်လို့ ဒေသခံတွေဆီက သိရပါတယ်။
ဇန်နဝါရီလ ၅ ရက်နေ့လောက်က စတင်ပြီး စစ်ကောင်စီဘက်က မြို့ဝင်မြို့ထွက်ဂိတ်တွေ၊ မြို့ထဲနေရာတွေမှာ အစစ်ဆေးတင်းကြပ်နေပြီး စစ်ကောင်စီ၊ ရဲ၊ ထွေအုပ်ပါဝင်တဲ့အဖွဲ့တွေက PDF တွေအနေနဲ့ လက်နက်အမြန်အပ်ဖို့ လိုက်လံကြေညာနေတယ်လို့ ပေါင်းတည်ဒေသခံတဦးက ပြောပါတယ်။
"သူတို့ အဲလိုလုပ်နေတာ ၅ ရက်နေ့လောက်ကစပြီး လုပ်နေတာ။ နေ့ခင်းပိုင်းဆို မိုက်တွေနဲ့ လိုက်ကြေညာတယ်။ ညဘက်တွေဆို မြို့ဝင်မြို့ထွက်ဂိတ်တွေမှာ စစ်ဆေးတင်းကြပ်တယ်။ အရင်ကထက်စာရင် ပိုလုပ်လာတော့ ပြည်သူတွေကတော့ သတိထားဖို့ လိုတယ်" လို့ ပြောပါတယ်။
ဖေဖော်ဝါရီလ ၂ ရက်နေ့က စတင်ပြီး စစ်ကောင်စီက မြန်မာတစ်နိုင်ငံလုံးက မြို့နယ်ပေါင်း ၃၇ မြို့နယ်ကို စစ်အုပ်ချုပ်ရေးကြေညာခဲ့ရာ ပဲခူးတိုင်းထဲက ထန်းတပင်၊ အုတ်ဖို၊ နတ်တလင်း၊ ပေါင်းတည်နဲ့ ပေါက်ခေါင်းမြို့နယ်တွေ ပါဝင်ခဲ့ပါတယ်။
စစ်ကောင်စီဘက်က စစ်အုပ်ချုပ်ရေး ကြေညာထားပြီးပါက စစ်ကြောင်းအကြီးအကျယ် ထိုးတာတွေ၊ ပြည်သူတွေအပေါ်ဖိနှိပ်မှုတွေ၊ အကြမ်းဖက်လုပ်ရပ်တွေ ယခင်ကထက် ပိုမိုလုပ်လာနိုင်လို့ ပြည်သူတွေကော ကာကွယ်ရေးအဖွဲ့တွေအနေနဲ့ သတိထားလုပ်ကိုင်ဖို့ လိုတယ်လို့ ပဲခူးတိုင်း ပကဖ တာဝန်ရှိသူတွေကလည်း သတိပေးထားပါသေးတယ်။
စစ်အုပ်ချုပ်ရေး ကြေညာထားတဲ့ ပေါင်းတည်မြို့နယ်ထဲမှာ ဖေဖော်ဝါရီလ ၄ ရက်နေ့က သိမ်ကုန်းကျေးရွာက ပျူစောထီးခေါင်းဆောင် အောင်ဖာ(ခ)မင်းနိုင်ဦးကို သဲကုန်းမြို့နယ် ပကဖ မြို့ပြပြောက်ကျားတပ်ဖွဲ့က ပစ်ခတ်ရှင်းလင်းလို့ သေဆုံးခဲ့သေးတယ်လို့ သိရပါတယ်။
#မြေလတ်အသံ
မြန်မာ့အရေး အဖွဲ့ကွဲခြင်းကို ရှောင်ရှားရန် အာဆီယံက တိုက်တွန်း
ဧရာဝတီ
အရှေ့တောင်အာရှနိုင်ငံများအသင်းမှ နိုင်ငံခြားရေးဝန်ကြီးများသည် နှစ်ရက်ကြာ ဆွေးနွေးပြီးနောက် တနှစ်တာ၏ ပထမဆုံးသော ဝန်ကြီးအဆင့်အစည်းအဝေးကို စနေနေ့တွင် ပြီးဆုံးသွားသည်။ အဖွဲ့ဝင်နိုင်ငံများသည်အကျပ်အတည်းဖြစ်ပွားနေသော မြန်မာနိုင်ငံအတွက် ငြိမ်းချမ်းရေးအစီအစဉ်ကို အကောင်အထည်ဖော်ရာတွင်စည်းလုံးမှုရှိကြောင်း အင်ဒိုနီးရှား နိုင်ငံခြားရေးဝန်ကြီးက ပြောကြားခဲ့သည်။
အဖွဲ့၏ အလှည့်ကျ ဥက္ကဋ္ဌတာဝန်ကို ထမ်းဆောင်နေသည့် အင်ဒိုနီးရှား နိုင်ငံခြားရေးဝန်ကြီး ရတ်နိုမာဆူဒီ က အာဆီယံသည် အဖွဲ့၏ ကျယ်ပြန့်သော ပံ့ပိုးကူညီမှုဖြင့် ငြိမ်းချမ်းရေး အစီအစဉ်ကို အကောင်အထည်ဖော်ရန် ညှိနှိုင်းဆွေးနွေးခဲ့ကြောင်း ပြောကြားခဲ့သည်။ မြန်မာစစ်တပ်က ခန့်အပ်ထားသော နိုင်ငံခြားရေး ဝန်ကြီးကို အစည်းအဝေးတက်ရောက်ခွင့် ပိတ်ပင်ထားသည်။
“ဒီအစီအစဉ်က အာဆီယံဥက္ကဋ္ဌအတွက် အထူးအရေးကြီးပါတယ်၊ မြန်မာနိုင်ငံက အခြေအနေတွေကို စည်းစည်းလုံးလုံးနဲ့ ဖြေရှင်းဖို့ လမ်းညွှန်ချက်တခုအနေနဲ့ အာဆီယံအတွက် အလွန်အရေးကြီးပါတယ်” ဟု ရတ်နိုမာဆူဒီက အစည်းအဝေးအပြီး သတင်းထောက်များအား ပြောကြားခဲ့သည်။ “ဘုံသဘောတူညီချက် ၅ ရပ်ကိုအကောင်အထည်ဖော်ဖို့ အာဆီယံအဖွဲ့ဝင်တွေက ခိုင်မာတဲ့ စည်းလုံးမှုကို ပြသကြပါတယ်” ဟုလည်း ၎င်းကပြောသည်။
ဘုံသဘောတူညီချက် ၅ ရပ်သည် ၂၀၂၁ ခုနှစ် ဖေဖော်ဝါရီလတွင် မြန်မာစစ်တပ်မှ ရွေးကောက်ခံအစိုးရကို ဖြုတ်ချပြီးနောက် ဧပြီလ၌ ပြုလုပ်သော အဖွဲ့၏ အရေးပေါ် ထိပ်သီးအစည်းအဝေးတွင် သဘောတူညီခဲ့ပြီး အကြမ်းဖက်မှုများကို ရပ်တန့်ရန် တောင်းဆိုမှု ပါဝင်သည်။ .
အစည်းအဝေးအပြီး သတင်းစာရှင်းလင်းပွဲတွင် ရတ်နိုမာဆူဒီသည် မြန်မာနိုင်ငံတွင် စစ်တပ်မှ အာဏာသိမ်းမှုနှင့်ပတ်သက်၍ အဖွဲ့အတွင်း သဘောထားကွဲလွဲမှုများအပေါ် စာတမ်းတင်ရာတွင် အရေးကြီးကြောင်း မီးမောင်းထိုးပြကာ “စည်းလုံးခြင်း” ဟူသော စကားလုံးကို ထပ်ခါတလဲလဲ အသုံးပြုခဲ့သည်။
မြန်မာစစ်တပ်နှင့် ခိုင်မာသော ဆက်ဆံရေးရှိသည့် ထိုင်းနိုင်ငံသည် ဒီဇင်ဘာလတွင် မြန်မာစစ်တပ်မှ ခန့်အပ်ထားသော နိုင်ငံခြားရေး ဝန်ကြီး ဦးဝဏ္ဏမောင်လွင်နှင့် တရားဝင်မဟုတ်သော တွေ့ဆုံပွဲတရပ်ကို ကျင်းပခဲ့သည်။ကမ္ဘောဒီးယား၊ ဗီယက်နမ်နှင့် လာအိုနိုင်ငံတို့ တက်ရောက်ခဲ့ပြီး အခြားအဖွဲ့ဝင်ငါးနိုင်ငံဖြစ်သည့် အင်ဒိုနီးရှား၊ မလေးရှား၊ စင်ကာပူ၊ ဖိလစ်ပိုင်နှင့် ဘရူနိုင်းတို့ မတက်ခဲ့ကြပေ။
“အာဆီယံနိုင်ငံတွေကြား ကုန်းကြောင်းနဲ့ ပင်လယ်ရေကြောင်းဆိုင်ရာ ကွာခြားမှုက ချဉ်းကပ်ပုံကို ကွာခြားမှု ဖြစ်စေပါတယ်” ဟု စင်ကာပူရှိ အာဆီယံလေ့လာရေးစင်တာမှ အကြီးတန်းလုပ်ဖော်ကိုင်ဖက်နှင့် ညှိနှိုင်းရေးမှူးSharon Seah က Nikkei Asia သို့ ပြောကြားခဲ့သည်။ “ထင်ရှားတာက ထိုင်းနိုင်ငံရဲ့ အစပျိုးမှုဟာ အဲဒီကွာဟချက်ကို တံတားထိုးဖို့ ကြိုးစားတာပါ၊ ဒါပေမယ့် ကွာဟချက်က ပိုကွာဟသွားပြီး နောက်ပြန်ဆုတ်သွားတယ်လို့ ယူဆနိုင်ပါတယ်” ဟုလည်း ပြောသည်။
မြန်မာအရေးအပြင် တောင်တရုတ်ပင်လယ်အငြင်းပွားမှုနှင့် အာဆီယံအသင်းတွင် အရှေ့တီမော၏ ပါဝင်ဆောင်ရွက်ရေး အစီအစဉ်များကိုလည်း ထည့်သွင်းထားသည်။ အရှေ့တီမော နိုင်ငံခြားရေးဝန်ကြီးကို လေ့လာသူအဖြစ် ပထမဆုံးအကြိမ် အစည်းအဝေးသို့ စေလွှတ်ခဲ့သည်။ အာဆီယံခေါင်းဆောင်များသည် အရှေ့တီမောကိုအဖွဲ့၏ ၁၁ ယောက်မြောက် အဖွဲ့ဝင်အဖြစ် အသိအမှတ်ပြုကာ လေ့လာသူအဆင့်ကို ပေးအပ်ရန် နိုဝင်ဘာလတွင်သဘောတူခဲ့သည်။
တောင်တရုတ်ပင်လယ်အတွင်း ပိုင်နက်ထပ်နေသည့် ပိုင်နက်တောင်းဆိုမှုများကို ကိုင်တွယ်ဖြေရှင်းရန် ကျင့်ဝတ်ဆိုင်ရာ “တတ်နိုင်သမျှ အမြန်ဆုံး” နှင့် ဆွေးနွေးမှု အပြီးသတ်ရန် ဝန်ကြီးများသည် အဖွဲ့၏ ကတိကဝတ်ကို ထပ်မံအတည်ပြုခဲ့သည်။
ကိုးကား။ ။ Nikkei Asia
နျူနည်းပညာရရှိရေး အပူတပြင်းကြိုးပမ်းနေသည့် မင်းအောင်လှိုင်
၂၀ ရာခိုင်နှုန်း သန့်စင်ထားသည့် ယူရေနီယမ်လောင်စာတောင့်သည် လက်နက်ထုတ်လုပ်ရေးအတွက်ပင် ရည်ရွယ်နိုင်ကြောင်း နိုင်ငံတကာစွမ်းအင်ကုမ္ပဏီမှ အင်ဂျင်နီယာတစ်ဦးက ဆိုသည်။
Published on Feb 7, 202
နျူစင်တာဖွင့်ပွဲတွင် ရုရှားအချို့နှင့်အတူ တွေ့ရသည့် အာဏာသိမ်ခေါင်းဆောင်။
စစ်အာဏာရှင်ဟောင်း ဦးသန်းရွှေလက်ထက်တွင် မြောက်ကိုရီးယားသို့ ထိပ်တန်းစစ်ဗိုလ်ချုပ်များ စေလွှတ်ကာ ဖျက်အားပြင်းမဟာဗျူဟာမြောက်လက်နက်များပိုင်ဆိုင်ခွင့်ရရေး ကြိုးပမ်းခဲ့ဖူးရာ လက်ရှိ အာဏာသိမ်းခေါင်းဆောင် မင်းအောင်လှိုင်သည်လည်း နျူလက်နက်ပိုင်ဆိုင်ရေး စိုင်းပြင်းနေဖွယ်ရှိသည်။
အာဏာသိမ်းမှုဖြစ်စဉ်ကြောင့် နိုင်ငံတကာအသိုင်းအဝိုင်းမှ ဖယ်ကြဉ်ခံထားရသည့် မင်းအောင်လှိုင်အနေဖြင့် ရုရှားနိုင်ငံသို့ အကြိမ်ကြိမ်သွားရောက်ခဲ့သည့်နည်းတူ နှစ်နိုင်ငံပူးပေါင်းဆောင်ရွက်ရေးကိစ္စများ မနေမနားကြိုးပမ်းနေသည်။
ယမန်နေ့ (ဖေဖော်ဝါရီ ၆) က ရန်ကုန်မြို့တွင် ပြုလုပ်သည့် နျူကလီးယားစင်တာဖွင့်ပွဲကို ရုရှားနိုင်ငံပိုင် အနုမြူကော်ပိုရေးရှင်း Rosatom မှ ညွှန်ကြားရေးမှူးချုပ်နှင့်အတူ အာဏာသိမ်းခေါင်းဆောင် တက်ရောက်ခဲ့သည်။ ရုရှားနှင့် နျူကလီးယားနည်းပညာ ပူးပေါင်းဆောင်ရွက်ရေးအတွက် ကနဦးလုပ်ငန်းစဉ်အဖြစ် နျူစင်တာဖွင့်လှစ်နိုင်ခြင်းဖြစ်သည်။
ရုရှားနှင့် ပူးပေါင်း၍ စစ်ကောင်စီဖွင့်လှစ်လိုက်သည့် နျူကလီးယားအသိပညာပေးစင်တာမှာ ရန်ကုန်မြို့၊ လှိုင်မြို့နယ်အတွင်း ပါရမီလမ်းမရောက်မီ ပြည်လမ်းဘေး၌ တည်ရှိသည်။ ၂၀၁၉ ခုနှစ်တွင် အကြမ်းထည်အဖြစ်သာ ရှိခဲ့သော ထိုနေရာ၌ စစ်ကောင်စီက နှစ်နှစ်အတွင်း နျူကလီးယားစင်တာဖြစ်အောင် အလျင်အမြန်တည်ဆောက်ခဲ့ခြင်းဖြစ်သည်။
နျူကလီးယားနည်းပညာ ပူးပေါင်းဆောင်ရွက်ရေးအတွက် နားလည်မှုစာချွန်လွှာအဆင့်ဆင့် လက်မှတ်ရေးထိုးခဲ့ပြီးနောက် ထိုစင်တာဖွင့်လှစ်နိုင်ခဲ့ခြင်းလည်းဖြစ်သည်။ နျူနည်းပညာအသုံးချရေးနှင့် ပတ်သက်၍ နယ်ပယ် ၁၄ ခုတွင် ရှေ့ဆက်ဆောင်ရွက်သွားရန် အစိုးရချင်း ပူးပေါင်းဆောင်ရွက်ရေးဆိုင်ရာ ဘဘောတူညီချက်ကိုလည်း ယမန်နေ့တွင် လက်မှတ်ရေးထိုးကြသည်။
ထိုသဘောတူညီချက်နှင့် ပတ်သက်၍ စစ်ကောင်စီနှင့် ရုရှားနိုင်ငံပိုင် အနုမြူကော်ပိုရေးရှင်းတို့က အသေးစိတ်ထုတ်ပြန်ခြင်း မရှိပေ။ အသုံးချမှုနယ်ပယ် ၁၄ ခုမှာ မည်သည့်ကဏ္ဍများဖြစ်သည်ကို အပြည့်အစုံ မသိရပေ။
ယခု ဖွင့်လှစ်လိုက်သည့် နျူသတင်းအချက်အလက်စင်တာသည် နျူကလီးယားဓာတ်ပေါင်းဖိုများ၊ နျူနည်းပညာအသုံးပြု အခြားအသုံးချနယ်ပယ်များနှင့် ပတ်သက်၍ အသိပညာဖြန့်ဝေခြင်းအပြင် လေ့ကျင့်သင်ကြားပေးခြင်းပါ ဆောင်ရွက်မည်ဖြစ်ကြောင်း Rosatom ကော်ပိုရေးရှင်း၏ ယမန်နေ့ထုတ်ပြန်ချက်တွင် ဖော်ပြသည်။
“ဒီနေ့ ရုရှားနဲ့ မြန်မာအကြား သမိုင်းမှတ်တိုင်သစ်တစ်ခု ဖွင့်လိုက်တာပါပဲ။ နျူကလီးယားနည်းပညာဟာ သိပ္ပံပညာရပ်၊ ပညာရေးနှင့် လေ့ကျင့်သင်ကြားရေးကိစ္စတွေ ဖွံ့ဖြိုးတိုးတက်ဖို့ အလွန်စွမ်းအားကြီးတဲ့ တွန်းအားတစ်ရပ်ဖြစ်ပါလိမ့်မယ်” ဟု Rosatom ညွှန်ကြားရေးမှူးချုပ် Alexey Likhachev က ထုတ်ပြန်ချက်တွင် ပြောဆိုသည်။
ဖေဖော်ဝါရီ ၆ ရက်နေ့က ဖွင့်လှစ်ခဲ့သည့် ရုရှားအကူအညီဖြင့် တည်ဆောက်ထားသည့် နျူနည်းပညာစင်တာ တည်နေရာ။
နျူနည်းပညာစင်တာမှာ ရုရှားနိုင်ငံပိုင် အနုမြူကော်ပိုရေးရှင်း၏ ၂၅ ခုမြောက်ဖြစ်ပြီး ရုရှားနိုင်ငံပြင်ပတွင် ခြောက်ခုမြောက်စင်တာဖြစ်သည်ဟု သိရသည်။
နျူနည်းပညာသတင်းအချက်အလက်စင်တာ ဖွင့်လှစ်ပြီး နောက်တစ်ဆင့်အနေဖြင့် အသေးစား နျူကလီးယားဓာတ်ပေါင်းဖို တည်ဆောက်မည်ဖြစ်သည်။
စစ်ကောင်စီဘက်က တရားဝင် ထုတ်ဖော်ပြောဆိုခြင်း မရှိသေးသော်လည်း နျူကလီးယားနည်းပညာသုံးသုတေသနဓာတ်ပေါင်းဖိုကို နေပြည်တော်အနီး ပေါင်းလောင်းမြစ်ပေါ်တွင် တည်ဆောက်ဖွယ်ရှိနေသည်။
လက်ရှိလည်ပတ်နေသော ပေါင်းလောင်းမြစ်ရှိ ရေအားလျှပ်စစ်ထုတ်လုပ်ရေးစီမံကိန်းများကို ရုရှားနှင့် စစ်ကောင်စီဘက်မှ တာဝန်ရှိသူများ မြေပြင်လေ့လာမှုများ ဆောင်ရွက်ထားကြောင်း နီးစပ်သူအချို့ထံမှ သိရသည့်နည်းတူ စစ်ကောင်စီ၏ လျှပ်စစ်ဝန်ကြီးဌာန တာဝန်ရှိသူများ မကြာခဏ သွားလေ့စစ်ဆေးနေကြောင်း သတင်းများထုတ်ပြန်ထားသည်။
ပေါင်းလောင်းမြစ်ပေါ်တွင် ရုရှားနှင့် ပူးပေါင်းတည်ဆောက်မည့် အပူစွမ်းအင်သုံး ဓာတ်အားပေးစက်ရုံစီမံကိန်း ဖြစ်မြောက်နိုင်စွမ်းကို လေ့လာပြီးဖြစ်ကာ အသေးစား နျူကလီးယားဓာတ်ပေါင်းဖို တည်ဆောက်ရေးအတွက်လည်း ဆက်လက်ဆောင်ရွက်နေကြောင်း စစ်ကောင်စီ၏ လျှပ်စစ်ဝန်ကြီးဌာနက ပြီးခဲ့သည့် ဒီဇင်ဘာလအတွင်း သတင်းထုတ်ပြန်သည်။
စစ်ကောင်စီပြောဆိုသည့် အပူစွမ်းအင်သုံး ဓာတ်အားပေးစက်ရုံဆိုသည်မှာ နျူကလီးယားနည်းပညာပင်ဖြစ်ကြောင်း နိုင်ငံတကာစွမ်းအင်ကုမ္ပဏီတစ်ခုမှ အင်ဂျင်နီယာတစ်ဦးက ပြောသည်။
“အပူစွမ်းအင်ဆိုတာ နျူကို ပြောတာပဲ။ ပေါင်းလောင်းနားမှာ လုပ်မယ်ဆိုတာ ဖြစ်နိုင်ခြေ အများကြီးရှိပါတယ်။ ဘာလို့ဆို နျူကလီးယားက ရေအများကြီးလိုတယ်။ ရေချိုပေါ့။ အဲဒီမှာ ရေအားလျှပ်စစ်စီမံကိန်းတွေရှိပြီးသားလေ။ နောက်ပြီး အဲနေရာက ငလျင်ကြောနဲ့လည်း လွတ်တယ်လို့ သိရတယ်” ဟု ၎င်းက ပြောသည်။
နျူကလီးယားစွမ်းအင်သုံး ဓာတ်အားပေးစက်ရုံ တည်ဆောက်ရန် စစ်ကောင်စီနှင့် လက်မှတ်ရေးထိုးခဲ့ကြောင်း ရုရှားနိုင်ငံပိုင် Rosatom က ပြီးခဲ့သည့် နိုဝင်ဘာ ၂၂ ရက်တွင် သတင်းထုတ်ပြန်ခဲ့သည်။ ထိုသဘောတူညီချက်ကို ရုရှားခရီးစဉ်အတွင်း စစ်ကောင်စီ၏ လျှပ်စစ်ဝန်ကြီး ဦးသောင်းဟန်၊ သိပ္ပံနှင့်နည်းပညာဝန်ကြီး ဒေါက်တာမျိုးသိန်းကျော်တို့က လက်မှတ်ရေးထိုးခဲ့ခြင်းပင်။
နေပြည်တော်အနီး တည်ဆောက်နေသည့် အလယ်ပေါင်းလောင်းရေအားလျှပ်စစ်စီမံကိန်းတွင် ရုရှားစွမ်းအင်ကုမ္ပဏီတစ်ခုဖြစ်သော Inter RAO Export ပါဝင်လုပ်ကိုင်မည်ဖြစ်ကြောင်း ရုရှားသတင်းဌာနတစ်ခုဖြစ်သော Interfax က ယမန်နှစ် နိုဝင်ဘာ ၅ ရက်တွင် ရေးသားခဲ့သည်။ ရုရှားကုမ္ပဏီသည် မြန်မာနိုင်ငံရှိ အပူစွမ်းအင်သုံး ဓာတ်အားပေးစက်ရုံအဟောင်းများ အဆင့်မြှင့်တင်ရေး စဉ်းစားခဲ့သည်ဟုလည်း ထိုသတင်းတွင် ဖော်ပြသည်။
နေပြည်တော်၊ ပျဉ်းမနားမြို့အရှေ့ဘက် မိုင် ၂၀ ခန့်အကွာတွင် တည်ဆောက်နေသည့် အလယ်ပေါင်းလောင်းရေအားလျှပ်စစ်စီမံကိန်းတွင် ၇၆ မဂ္ဂါဝပ်ရှိ စက်နှစ်လုံးဖြင့် လျှပ်စစ်ဓာတ်အားထုတ်လုပ်မည်ဟု စစ်ကောင်စီ၏ လျှပ်စစ်ဝန်ကြီးဌာနက ထုတ်ပြန်ထားသည်။
ရုရှားကုမ္ပဏီများ ပါဝင်လုပ်ကိုင်မည့် နေပြည်တော်အနီးရှိ အလယ်ပေါင်းရေအားလျှစ်စစ်စီမံကိန်းကို ၂၀၂၂ ခုနှစ် မေလအတွင်းက တွေ့ရစဉ်။ (ဓာတ်ပုံ - လျှပ်စစ်စွမ်းအားဝန်ကြီးဌာန)
နေပြည်တော်၌ စစ်ရုံးချုပ်တည်ရှိရာ ဇေယျာသီရိမြိုန့ယ် ဇီးရိုင်းရွာ၊ သစ်တော်ကျေးရွာအုပ်စု၊ ငါးတဲစုကျေးရွာတို့အနီး အပူစွမ်းအင်စီမံကိန်းအတွက် ရေရရှိနိုင်မှု၊ ငလျင်ပြတ်ရွေ့လေ့လာခြင်း၊ သယ်ယူပို့ဆောင်ရေးလမ်းကြောင်းတို့ကို လျှပ်စစ်ဝန်ကြီးဌာနနှင့် Rosatom ကိုယ်စားလှယ်များ ပြီးခဲ့သည့် ဒီဇင်ဘာ ၉ ရက်နေ့ သတင်းထုတ်ပြန်ခဲ့သည်။
အာဏာသိမ်းပြီးနောက် မင်းအောင်လှိုင်ကိုယ်တိုင် ရုရှားသို့ သုံးကြိမ်သွားရောက်ခဲ့သည့်နည်းတူ နျူကလီးယားနည်းပညာနှင့် ပတ်သက်၍ ၎င်း၏ဝန်ကြီးများကိုလည်း နှစ်ကြိမ်ထက်မနည်း စေလွှတ်ခဲ့သည်။ ရုရှားနိုင်ငံတွင် ပဏာမ နားလည်မှုစာချွှန်လွှာများ လက်မှတ်ထိုးပြီးနောက် ရုရှားနိုင်ငံပိုင် အနုမြူကော်ပိုရေးရှင်းမှ ပုဂ္ဂိုလ်များ နေပြည်တော်သို့ အကြိမ်ကြိမ်လာရောက်ခဲ့ပြီး စစ်ကောင်စီတာဝန်ရှိသူများအပြင် ဝန်ကြီးဌာနဆိုင်ရာများနှင့် သီးသန့်ဆွေးနွေးပွဲများ ကျင်းပခဲ့သည်။
အပူစွမ်းအင်သုံး အပါအဝင် နျူနည်းပညာသုံး ဓာတ်အားထုတ်လုပ်ရေးစက်ရုံများ တည်ဆောက်ရေးနှင့် ပတ်သက်၍ ရင်းနှီးမြှုပ်နှံမှုအတွက် ချေးငွေအမြောက်အမြား ရယူမည်ဖြစ်ရာ စစ်ကောင်စီအနေဖြင့် မည်သည့်နိုင်ငံမှ ချေးငွေရယူမည်ကို မသိရပေ။
ယမန်နေ့က Rosatom တာဝန်ရှိသူများနှင့် လျှပ်စစ်ဝန်ကြီး ဦးသောင်းဟန်တို့ ရန်ကုန်မြို့တွင် သီးသန့်ဆွေးနွေးစဉ် စီမံကိန်းတည်ဆောက်ရေးအတွက် ရင်းနှီးမြှုပ်နှံမှုနှင့် ချေးငွေရယူရေးကိစ္စများ ဆွေးနွေးသည်ဟု စစ်ကောင်က သတင်းထုတ်ပြန်သော်လည်း အသေးစိတ်ဖော်ပြခြင်း မရှိပေ။
မြန်မာနိုင်ငံတွင် လျှပ်စစ်ဓာတ်အားထုတ်လုပ်ရေး နျူကလီးယားဓာတ်ပေါင်းဖိုတစ်ခု တည်ဆောက်ရန်ရှိကြောင်း၊ ရုရှားရောက် မြန်မာစစ်ပညာတော်သင်များတွင် နျူးနည်းပညာ လေ့လာနေသူများ ပါဝင်ကြောင်း Rosatom တာဝန်ရှိသူများက ၂၀၁၆ ခုနှစ်အတွင်း ထုတ်ဖော်ပြောဆိုခဲ့သည်။
ရုရှားအကူအညီဖြင့် စစ်ကောင်စီတည်ဆောက်မည့် နျူကလီးယားဓာတ်ပေါင်းဖို ပုံစံငယ်။
ရုရှားနိုင်ငံတွင် စစ်ဘက်ပညာတော်သင် ၇၀၀၀ ကျော်ရှိကြောင်း၊ ပူးပေါင်းဆောင်ရွက်မှုများ အတွက် ရုရှားကိုကျေးဇူးတင်ကြောင်း အာဏာသိမ်းခေါင်းဆောင် မင်းအောင်လှိုင်ကလည်း ၂၀၂၁ ခုနှစ် အတွင်း ရုရှားရောက်ရှိစဉ် ထုတ်ဖော်ပြောဆိုခဲ့သည်။
ထို့ပြင် ပြီးခဲ့သည့်နှစ် စက်တင်ဘာလက ရုရှားခရီးစဉ်အတွင်း သမ္မတပူတင်၌ တွေ့ဆုံခွင့်ရစဉ် ပူတင် သည် ရုရှားနိုင်ငံ၏ ခေါင်းဆောင်မျှသာမက ကမ္ဘာကြီးတည်ငြိမ်အေးချမ်းရေး ဦးဆောင်နေသည့် ကမ္ဘာ့ခေါင်းဆောင်ကြီးဖြစ်သည်ဟုပင် မင်းအောင်လှိုင်က လွန်လွန်ကျူးကျူး မြှောက်ပင့်ပြောဆိုခဲ့သည်။
အာဏာသိမ်းမှုဖြစ်စဉ်ကြောင့် ဘက်ပေါင်းစုံများ ဖိအားများရင်ဆိုင်နေရသည့် မင်းအောင်လှိုင် အနေဖြင့် အင်အားကြီးရုရှား၏ အားပေးထောက်ခံမှုကို မဖြစ်မနေ လိုအပ်နေသည်ဖြစ်ရာ ပြီးခဲ့သည့် ရက်ပိုင်းက စစ်ကောင်စီထိန်းချုပ် နိုင်ငံပိုင်သတင်းစာများတွင် ရုရှား - မြန်မာဆက်ဆံရေးအကြောင်း နေ့စဉ်ရက်ဆက် အကျယ်တဝံ့ဖော်ပြနေသည်။
စစ်ကောင်စီ၏ အာဘော်ဆောင်းပါးတစ်ပုဒ်တွင် ကြွက်တစ်ကောင်မှ ရုရှားလူမျိုးများဖြစ်လာပြီး အစွမ်းထက်လက်နက်များကို ပိုင်ဆိုင်ကာ ကမ္ဘာ့အင်အားကြီးနိုင်ငံဖြစ်ချိန် မြန်မာနှင့် မိတ်ဖက်များဖြစ်လာလိမ့် မည်ဟု လွန်ခဲ့သော နှစ်ပေါင်း ၂၀၀၀ ကျော်က ဘုရားရှင်ဟောကြားခဲ့သယောင် ပုံဖော်ရေးသားထားသည်။
ဦးသန်းရွှေလက်ထက် နျူကလီးယားစီမံကိန်း
စစ်ကောင်စီက လက်ရှိအကောင်အထည်ဖော်နေသော နျူကလီးနည်းပညာ ရရှိရေးစီမံကိန်းသည် သမ္မတဦးသိန်းစိန်လက်ထက် ၂၀၁၅ ခုနှစ်တွင် Rosatom နှင့် လက်မှတ်ရေးထိုးခဲ့သည့် ကနဦး သဘောတူညီချက်၏ အဆက်ပင်ဖြစ်သည်။
မြန်မာနှင့် ရုရှားအကြား နျူနည်းပညာ ပူးပေါင်းဆောင်ရေးသည်၂၀၀၇ ခုနှစ်က သဘောတူညီချက် ကို အခြေခံကြောင်း နျူကလီးယားနည်းပညာနှင့်ဆိုင်သော သတင်းများဖော်ပြောသည့် Nuclear Engineering International ဂျာနယ်၏ ၂၀၂၂ ခုနှစ် ဇူလိုင်လထုတ် သတင်းတစ်ပုဒ်တွင် ဖော်ပြသည်။
အာဏာရှင်ဟောင်း ဦးသန်းရွှေလက်ထက်က ထိုသဘောတူညီချက်အရ မြန်မာနိုင်ငံအလယ်ပိုင်းတွင် ၁၀ မဂ္ဂါဝပ်ရှိ အသေးစား နျူကလီးယားဓာတ်ပေါင်းဖိုနှင့် ဓာတ်ခွဲခန်းများ တည်ဆောက်ရေး တို့ပါဝင်ပြီး ၂၀ ရာခိုင်နှုန်းအထိ သန့်စင်ထားသည့် U-235 ယူရေနီယမ်ကို အသုံးပြုမည်ဖြစ် ကြောင်း ထိုသတင်းက ဆိုသည်။
နိုင်ငံတကာစွမ်းအင်ကုမ္ပဏီမှ အင်ဂျင်နီယာ၏အဆိုအရ ၂၀ ရာခိုင်နှုန်း သန့်စင်ထားသည့် ယူရေနီ ယမ်လောင်စာတောင့်သည် လက်နက်ထုတ်လုပ်ရေးအတွက်ပင် ရည်ရွယ်နိုင်ကြောင်း ပုံမှန်အားဖြင့် ၅ ရာခိုင်နှုန်းဖြင့်ပင် လျှပ်စစ်ဓာတ်အားထုတ်လုပ်နိုင်ကြောင်း သိရသည်။
နျူကလီးယား နည်းပညာသုံး သုတေသနဓာတ်ပေါင်းဖိုတစ်ခု တည်ဆောက်မည့်အကြောင်း မြန်မာ စစ်တပ်က ၂၀၀၀ ပြည့်နှစ်အလွန်တွင် ထုတ်ဖော်ပြောဆိုခဲ့သည်။
မြန်မာစစ်တပ်သည် နျူကလီးယားလက်နက် ပိုင်ဆိုင်ခွင့်ရရန် ကြိုးပမ်းနေကြောင်း အဆိုပါစီမံကိန်း တွင် ပါဝင်ခဲ့သူ ဗိုလ်မှူးစိိုင်းသိန်းဝင်းက ၂၀၁၀ ပြည့်နှစ်တွင် ဖွင့်ချခဲ့သည်။ ၎င်းသည် ရုရှားနိုင်ငံမှ အနုမြူစွမ်းအင်ဆိုင်ရာ ပါရဂူဘွဲ့ရရှိထားသူဖြစ်ကာ စစ်ဗိုလ်ချုပ်များ၏ နျူလက်နက်စီမံကိန်းတွင် ဒုံးလက်နက်ကျွမ်းကျင်သူအဖြစ် ပါဝင်ခဲ့သူဖြစ်သည်။
ထို့နောက် မြန်မာစစ်တပ်သည် နျူကလီးယားလက်နက်ထုတ်လုပ်ရေး နည်းပညာရရှိရန် ကြိုးပမ်း အားထုတ်နေသည်မှာ ထင်ရှားကြောင်း နိုင်ငံတကာအနုမြူစွမ်းအင်အေဂျင်စီ (IAEA) ညွှန်ကြားရေး မှူးဟောင်းက ထုတ်ဖော်ပြောဆိုခဲ့သည်။
ဥရောပတွင် နိုင်ငံရေးခိုလှုံခဲ့သူ ဗိုလ်မှူးစိုင်းသိန်းဝင်က ထုတ်ဖော်ပြောဆိုပြီးနောက် မြန်မာ စစ်ဗိုလ်ချုပ်များ၏ နျူကလီးယားလက်နက်ပိုင်ဆိုင်ရေး စီမံကိန်းနှင့်ပတ်သက်၍ ထပ်ဆင့်ပေါက် ကြားခြင်းများ ပေါ်ပေါက်လာကာ နိုင်ငံတကာက အထူးတလည် သတိထားရသည်အထိ ရောက်ရှိ ခဲ့သည်။
ထိုစဉ်က စစ်တပ်တွင်း၌ နံပါတ်သုံးခေါင်းဆောင်ဖြစ်သော ဗိုလ်ချုပ်ကြီးသူရရွှေမန်းဦးဆောင်သော ကိုယ်စားလှယ်အဖွဲ့ မြောက်ကိုရီးယားနိုင်ငံသို့ သွားရောက်ခဲ့ကြောင်း ပေါ်ပေါက်ခဲ့သည်။ နှစ်နိုင်ငံ ဆက်ဆံရေး တိုးမြှင့်ရန် မြောက်ကိုရီးယားသွားခဲ့ခြင်းဖြစ်သာဖြစ်ကြောင်း ပြည်သူ့လွှတ်တော်ဥက္ကဋ္ဌ ဖြစ်ချိန်တွင် သူရဦးရွှေမန်းက ထုတ်ဖော်ပြောဆိုခဲ့သည်။
ဒေါ်အောင်ဆန်းစုကြည် ဦးဆောင်သော အမျိုးသားဒီမိုကရေစီအဖွဲ့ချုပ် (NLD) အစိုးရလက်ထက် တွင် နိုင်ငံတကာ နျူကလီးယားလက်နက် ပိတ်ပင်ရေးသဘောတူစာချုပ်ကို ပါဝင်ရန် ပြည်ထောင်စု လွှတ်တော်က အတည်ပြုပြီးနောက် ကုလသမဂ္ဂအထွေထွေညီလာခံတွင် မြန်မာက လက်မှတ်ရေး ထိုးခဲ့သည်။
ပခုက္ကူ-ရေစကြိုကားလမ်းတွင် စစ်ကောင်စီတပ်ဖွဲ့ဝင်များ လိုက်ပါသော ကား ၂ စီးကို ပစ်ခတ်တိုက်ခိုက်မှု စစ်သား ၁၀ ဦး သေဆုံးပြီး လက်နက်ခဲယမ်းများ သိမ်းဆည်းရမိ
ရန်ကုန်၊ ဖေဖော်ဝါရီ ၇ ခေတ်သစ်
မကွေးတိုင်း၊ ပခုက္ကူ-ရေစကြိုကားလမ်းတွင် စစ်ကောင်စီတပ်ဖွဲ့ဝင်များ လိုက် ပါသော ကား ၂ စီးကို ပစ်ခတ်တိုက်ခိုက်မှု စစ်သား ၁၀ ဦး သေဆုံးပြီး လက်နက်ခဲယမ်းများ သိမ်းဆည်းရမိကြောင်း ပြည်သူ့ကာကွယ်ရေးတပ်မတော် ပခုက္ကူခရိုင် တပ်ရင်း ၃ ထံမှ သိရှိရသည်။
ဖေဖော်ဝါရီလ ၄ ရက်နေ့ ညနေ ၄ နာရီခွဲ အချိန် ပခုက္ကူ - ရေစကြို ကားလမ်း တစ်နေရာရှိ ကိုရှိန်းဆီဆိုင်ရှေ့တွင် စစ်သားများ လိုက်ပါသော ကား၂ စီးကို ပြည်သူ့ကာကွယ်ရေးတပ်မတော် ပခုက္ကူခရိုင် တပ်ရင်း ၃ က ပစ်ခတ်တိုက်ခိုက်ရာ အကြမ်းဖက်စစ်ကောင်စီတပ်ဖွဲ့ဝင် ၇ ဦးကို နေရာတွင်ပင် သေဆုံးကြောင်း၊ ကားတစ်စီး လွတ်မြောက်သွားပြီး လွတ်မြောက်သွားသော CR-V ကားပေါ်တွင်ပါသွားသော စစ်သား ၃ ဦးမှာ ဆေးရုံတွင် ထပ်မံ သေဆုံးခဲ့ကြောင်း၊ တိုက်ခိုက်မှုကြောင့် စုစုပေါင်း စစ်သား ၁၀ ဦးသေဆုံးပြီး ၃ ဦး အပြင်းအထန်ဒဏ်ရာရရှိကြောင်း ၊ လက်နက်ခဲယမ်းများအား သိမ်းဆည်းရမိခဲ့ကြောင်း သိရှိရသည်။
ပစ်ခတ်တိုက်ခိုက်မှုသည် ၅ မိနစ်ဝန်းကျင် ကြာမြင့်ခဲ့ပြီး ပြည်သူ့ကာကွယ်ရေးတပ်မတော်သားများ အထိအခိုက် မရှိကြောင်း သိရှိရသည်။
သိမ်းဆည်းရမိသော လက်နက်ခဲယမ်းနှင့် ပစ္စည်းများမှာ -
-carbine ၆ လက်
-carbine ကျည်ဘောက် ၆ ဘောက်
-ကာဘိုင်ကျည် ၁၄၆ တောင့်
-MA4 တစ်လက်
-MA4 ကျည်ဘောက် ၅ ဘောက်
-၅.၅၆ ကျည် ၉၄ တောင့်
-လက်ပစ်ဗုံး ၃ လုံး
-40 mm ဗုံးသီး ၄ လုံး
-phone ၃ လုံး
-power bank ၁ လုံး
-equipment ၁ ခု
-ရေဗူး တစ်ဗူး
-super custom ကားတစ်စီး
-ဗလာကျည် ၃ တောင့် တို့ဖြစ်ကြောင်း သိရှိရသည်။
