မလုပ်ရဲတာ ဘာမှ မရှိသော စစ်အာဏာသိမ်း အဖွဲ့
- U.S. Foreign Policy Magazine
***********************************
ကုလသမဂ္ဂ အတွင်းရေးမှုး ချုပ် အန်တိုနီ ဂူတာရက်ဇ် မှ နိုင်ငံတော် အတိုင်ပင်ခံ အပေါ် အပြီးသတ် ပြစ်ဒဏ် စီရင်ခဲ့မှု အပေါ် လွန်စွာ စိုးရိမ်မကင်း ဖြစ်ရကြောင်းနှင့် သူမနှင့် နိုင်ငံတော် သမ္မတ ဦးဝင်းမြင့်တို့အား ပြန်လွှတ်ပေးရန် တောင်းဆိုလိုက်သည်။
မြန်မာ ဆိုင်ရာ ကုလ လူ့အခွင့်အရေး အထူး ညှိနှိုင်းရေးမှုး တွန် အင်ဒရူးက မူ ကမ္ဘာခေါင်းဆောင်များ အနေဖြင့် ပါးစပ်ဖြင့် ရှုတ်ချနေခြင်းထက် လက်က လှုပ်ဖို့ ပိုအရေးကြီးသည်ဟု သူ၏ တွစ်တာ တွင် ရေးသားလာခဲ့သည်။
အမေရိကန် Foreign Policy မဂ္ဂဇင်းကြီးကလည်း စစ်အာဏာသိမ်း အဖွဲ့သည် ဖျောင်းဖျနားချ၍ မရသူများဟု ရေးသားလာသည်။ မလုပ်ရဲတာ ဘာမျှ မရှိ Myanmar Junta’s has no limit ဟူသော ခေါင်းစဉ်ဖြင့် ၎င်းတို့၏ လက်ရှိ အချိန်အထိ ရက်စက်ကြမ်းကြုပ်စွာ ကျုးလွန်ခဲ့မှုများကို တန်းစီ ရေးသား ချပြခဲ့သည်။ ထိုဆောင်းပါးတွင်ပင် အမေရိကန်၏ Burma Act ဖြင့် မြန်မာ ဒီမိုကရေစီ လှုပ်ရှားမှု အတွက် လောလောဆယ် တနှစ် ဒေါ်လာ သန်း ငါးဆယ်ဖြင့် ငါးနှစ်ဆက်တိုက် ထောက်ပံ့သွားမည် ဖြစ်သည့် အပြင် လူသားချင်း စာနာ ထောက်ထားသည့် အကူအညီ အဖြစ် ဒေါ်လာ သန်း ၂၂၀ ပါ ပေးသွားမည် ဖြစ်သည်ဟု ပါရှိသည်။
စစ်ကောင်စီသည် လွတ်လပ်ရေး နေ့ဟု ဆိုကာ အကျဉ်းသားပေါင်း ၇,၀၂၁ ဦး ပြန်လွှတ်ပေးလိုက်ပြန်သည်။ ထိုအထဲတွင် သာသနာရေး ဝန်ကြီး သူရ ဦးအောင်ကို၊ ရန်ကုန်တိုင်း စည်ပင် ကော်မတီ အဖွဲ့ဝင် ဒေါ်သန်းမြင့်အောင် နှင့် စာရေးဆရာ ဦးထင်လင်းဦး တို့ ပါဝင်သည်ဟု သိရသည်။
၎င်းတို့သည် နိုင်ငံရေး အတွက် အကျိုးအမြတ် တစုံတရာ ရရေး အတွက်သာ ဖြစ်ပြီး ဂီယာ ချိန်းမည့် သူများ မဟုတ်သည်က လွှတ်ပေးသည့် ပုံစံသည် ယခင်အတိုင်းပင် ဖြစ်နေသည်၊ ၎င်းတို့အား အန္တရာယ် ပေးလာနိုင်သူများ၊ ရန်ငြိုးသိုဝှက်ခံထားရသူများ အား နဂိုကတည်းက ပြစ်မှု တစုံတရာ ကျုးလွန်ခြင်း မရှိပဲ ဖမ်းဆီးခဲ့ကြခြင်း မရှိပဲ စိတ်ချရပြီဟု ယူဆသည့် အခါ ပြန်လွှတ်ပေးခဲ့ခြင်း မျိုးသာ ဖြစ်သည်။ ထိုသို့ လွှတ်ပေးသူများသည် ရာဂဏန်းမျှ ပင် မပြည့်သော်လည်း နိုင်ငံရေး အရ ဖမ်းဆီးထားသူများကို ဂုဏ်တင်ပေးသလို ဖြစ်မည် စိုး၍ ရာဇဝတ်မှု ဖြင့် ကျခံနေရသော အကျဉ်းသား များ အား ထောင်ပေါင်းများစွာ နှင့် အတူ အုတ်ရောရော ကျောက်ရောရော ပြန်လွှတ်ပေးနေကျလည်း ဖြစ်သည်။
တရားဥပဒေ စိုးမိုးမှု အဖက်ဖက် က ယို့ယွင်း ပျက်စီးနေသော အနယ်နယ် အရပ်ရပ် ရှိ လူအများ အဖို့ ရင်မအေးဖွယ် လုပ်ရပ်မျိုးကိုလည်း အမြဲလို ဖန်တီးပေးတတ်စမြဲပင် ဖြစ်သည်။ ထိုသို့ ဖြစ်မှ ၎င်းတို့ အပေါ် ပို၍ အားထားလာကြမည်ဟုလည်း တွက်ဆထားတတ်ကြပြန်သည်။
မင်းအောင်လှိုင်သည် သူ၏ ၇၅ နှစ်မြောက် လွတ်လပ်ရေးနေ့ စကားတွင် မိမိတို့အား နိုင်ငံတကာ အဖွဲ့အစည်း အချို့နှင့် နိုင်ငံ အချို့က ရှုတ်ချနေသော်လည်း မိမိတို့ ရပ်တည်ချက်ကို ကမ္ဘာအလယ်တွင် အခိုင်အမာ ရပ်တည်သွားမည် ဖြစ်ပြီး အိမ်နီးချင်း နိုင်ငံများ နှင့် ပူးပေါင်းဆောင်ရွက်သွားမည်ဟု ပြောလာသည်။
သို့သော် နိုင်ငံ လွတ်လပ်ရေး နေ့အတွက် သဝဏ်လွှာ ပေးပို့ရန် ရှိနေသည့် သံတမန် အဆက်အသွယ် ထူထောင်ပြီး နိုင်ငံ ၁၂၅ နိုင်ငံ အနက် အိမ်နီးချင်း နိုင်ငံ တနိုင်ငံမျှ မပါပဲ ရုရှား၊ ကမ္ဘောဒီယား နှင့် နီပေါ သုံးနိုင်ငံ ခေါင်းဆောင်များ ထံမှသာ လက်ခံရရှိခဲ့ရှာသည်။ မင်းအောင်လှိုင် လုပ်မည်ဟု ကြွေးကျော် နေသည့် ရွေးကောက်ပွဲ အတွက် အားတက်စရာပင် ဖြစ်သည်။ ထိုသို့ နေပြည်တော်တွင် စလွယ်ကြီး လွယ်ပြီး ဗိုလ်ရှုခံနေချိန်တွင် အောက်ခြေ တပ်သားများ၏ အသက်သွေး များက ဖေါခြင်းသောခြင်း စတေးခံနေကြရပြီ ဖြစ်သည်။
ကရင်ပြည်နယ် ကြာအင်းဆိပ်ကြီး မြို့နယ် ဘုရားသုံးဆူ တဝိုက်တွင် တော်လှန်ရေး မဟာမိတ် တပ်ဖွဲ့ များ နှင့် အကြမ်းဖက် စစ်တပ် ၏ စစ်ကောင်စီ တပ်ရင်း သုံးရင်းကို တပြိုင်တည်း ဝင်ရောက်တိုက်ခိုက်နိုင်သည် အထိ စစ်စွမ်းရည် မြင်တက်လာခဲ့ပြီး တိုက်ပွဲများ ပြင်းထန်စွာ ဖြစ်ပွားနေသည်ဟုလည်း သိရသည်။ လောလောဆယ်တွင် အကြမ်းဖက် စစ်တပ်၏ တပ်ရင်း နှစ်ရင်းကို သိမ်းပိုက် နိုင်ခဲ့ပြီး အရှင် ဖမ်းဆီးနိုင်ခဲ့သူ အများ အပြား ရှိနေသည်ဟု ခေတ်သစ် မီဒီယာ မှ ရှေ့တန်းမှ လာသော သတင်းများကို ကိုးကားပြီး ဖေါ်ပြထားသည်။
ရခိုင်ပြည် လွတ်မြောက်ရေး ပါတီ (ALP) မှ စစ်ဦးစီးချုပ် ဗိုလ်ချုပ် ခိုင်စိုးမြ အပါအဝင် ခေါင်းဆောင် သုံးဦး စစ်တွေမြို့ လွတ်လပ်ရေး အခမ်းအနား သို့ တက်ရန် အသွားတွင် လုပ်ကြံသတ်ဖြတ်ခံလိုက်ရသည်ဟူသော သတင်းများ ထွက်ပေါ်လာခဲ့သည်။
စစ်ကောင်စီသည် ၂၀၂၃ အားလည်း ယခင်ကကဲ့သို့ ပင် အကြမ်းဖက်မှု များ နှင့် စတင် ဖွင့်လှစ်လာခဲ့ရပြီ ဖြစ်သည်။ ၎င်းတို့ အဖို့ လက်ရှိ အနေအထား သည် ချောက်ကမ်းပါးထဲ ကျလုကျခင် ဖြစ်နေ၍ မည်သို့မှ အလျော့ပေး၍ မရ ဖြစ်လာနေသည်။
ပြည်သူများ၏ ရွေးချယ်တင်မြှောက်ခံ နိုင်ငံ ခေါင်းဆောင် အစစ်အမှန် များကတော့ ဗိုလ်ရှုခံ လုပ်ရန် စိတ်မဝင်စားပဲ တိုင်းပြည် အကျိုးရှိရာ ရှိကြောင်း လုပ်ငန်းများ အတွက်သာ သုံးစွဲခဲ့ကြသော်လည်း အတုအယောင် သမားများကတော့ နိုင်ငံ ဘဏ္ဍာငွေများ ကျပ် ဘီလီယံချီ၍ သုံးကာ ပြုလုပ်နေကြရသည်။
ကုလ လုံခြုံရေးကောင်စီ မှ နှစ်ပေါင်း ၇၀ အတွင်း ပထမဆုံးအကြိမ် အဖြစ် ပြဋ္ဌာန်းလာသော ဆုံးဖြတ်ချက် ၂၆၆၉ အပေါ် ရှက်ရကောင်းမှန်း မသိပဲ ငါတို့အတွက် ဘာတွေ နစ်နာနိုင်သလဲ ဟု သာ အရင်ဆုံး တွေးတောတတ်သူများ ဖြစ်နေသည်ကို လည်း တဖြေးဖြေး နှင့် အံ့ဩဖွယ် တွေ့လာခဲ့ရပေသည်။
ပြည်သူတို့၏ ခုခံတွန်းလှန်စစ် မုချ အောင်ရမည်!!!
(လှစိုးဝေ)
